ལྕམ་ཨང་སིན་སུའུ་ཀེ་ལགས་ཀྱི་རྒྱ་ནག་ནང་གི་གཟིགས་སྐོར་དེས་རྒྱ་ནག་དང་ནུབ་ཕྱོགས་རྒྱལ་ཁབ་ཁག་གི་འབར་མའི་ཕྱོགས་ཀྱི་འགྲན་རྩོད་ཤུགས་ཆེ་རུ་འགྲོ་བ་སོགས་རྒྱ་ནག་ལ་དགེ་མཚན་གསུམ་བསྐྲུན་ཡོད་སྐོར་བརྗོད་འདུག
བྷེ་བྷེ་སི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གུང་ཁྲན་ཏང་གིས་མགྲོན་འབོད་བྱས་པ་ལྟར། ཁ་སང་སྔ་དྲོར་འབར་མ་གཞུང་གི་ཁ་གཏད་རྒྱལ་ཡོངས་དམངས་གཙོ་མཉམ་འབྲེལ་ཚོགས་པའི་དབུ་ཁྲིད་ལྕམ་ཨང་སིན་སུའུ་ཀེ་ལགས་དང་། དམངས་གཙོ་ཚོགས་པའི་སྐུ་ཚབ་ཚོགས་པ་ཞིག་པེ་ཅིན་དུ་འབྱོར་ཡོད་པ་དང་། ཁོང་ཚོས་ཉིན་གྲངས་ ༤ རིང་རྒྱ་ནག་གི་རྒྱལ་ས་པེ་ཅིན་དང་ཧྲང་ཧེ་གྲོང་ཁྱེར། འབར་མ་དང་འབྲེལ་འདྲིས་ཆེ་བའི་ཡུན་ནན་ཞིང་ཆེན་བཅས་ཀྱི་ནང་གཟིགས་སྐོར་གནང་རྒྱུ་ཡིན་པ་མ་ཟད། རྒྱ་ནག་གི་སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་གཉིས་ལ་མཇལ་འཕྲད་གནང་རྒྱུ་ཡིན་སྟབས། རྒྱལ་ཕྱི་ནང་ནས་ཁོང་མོའི་རྒྱ་ནག་ནང་གི་གཟིགས་སྐོར་ཐོག་མ་འདི་བརྒྱུད་དེ། རྒྱ་གཞུང་གི་མགོ་ཁྲིད་ཚོར་དམངས་གཙོ་དང་འགྲོ་བ་མིའི་ཐོབ་ཐང་གོང་སྤེལ་ཐོག་སློབ་འཁྲིད་ཐེངས་གཅིག་དང་། རྒྱའི་བཙོན་འོག་ཏུ་ཡོད་པའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ལོའུ་ཞོ་པའོ་ཡི་སྐོར་གླེང་སློང་གནང་ཐུབ་པའི་རེ་བ་ཆེན་པོ་བྱེད་ཀྱི་ཡོད་འདུག
ཁ་སང་གསར་འགོད་ལྷན་ཚོགས་ཤིག་གི་ཐོག གསར་འགོད་པས་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཧོང་ལི་ལ། ལྕམ་ཨང་སན་སུའུ་ཀི་ལགས་ཀྱི་རྒྱ་ནག་ནང་གི་གཟིགས་སྐོར་ཐད་ལས་རིམ་ག་རེ་བསྒྲིགས་ཡོད་པ་དང་། རྒྱ་ནག་ཕྱོགས་ནས་ཁོང་མོའི་གཟིགས་སྐོར་ལ་རེ་བ་ག་རེ་རྒྱག་བཞིན་ཡོད་དྲིས་པར། ཁོང་མོ་དང་སྐུ་ཚབ་ཚོགས་པའི་གཟིགས་སྐོར་གྱི་གནས་ཚུལ་འབྲེལ་ཡོད་སྡེ་ཁག་ནས་དུས་ལྟར་སྤེལ་རྒྱུ་ཡིན་པ་དང་། ཐེངས་འདིའི་གཟིགས་སྐོར་དེ་ཏང་ཁག་གཉིས་ཀྱི་འབྲེལ་འདྲིས་ཀྱི་ཆ་ཤས་ཤིག་ཡིན་ལ། དུས་ཡུན་རིང་པོ་ནས་རྒྱ་ནག་གུང་ཁྲན་ཏང་དང་འབར་མའི་ཏང་ཁག་བར་མཛའ་བརྩེའི་འབྲེལ་བ་རྒྱུན་མཐུད་ཡོད་སྟབས། ཐེངས་འདིའི་གཟིགས་སྐོར་བརྒྱུད་གོམ་གང་མདུན་སྤོས་ཀྱིས་ཏང་ཁག་གཉིས་བར་རྒྱུས་ལོན་དང་ཡིད་ཆེས་བསྐྲུན་ཞིང་། ཐུན་མོང་གིས་ཕྱོགས་གཉིས་ཀྱི་མཉམ་ལས་འབྲེལ་བ་གོང་འཕེལ་དུ་གཏོང་ཐུབ་པའི་རེ་བ་ཡོད། ཅེས་དང་། ལྕམ་ཨང་སིན་སུའུ་ཀེ་ལགས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་གཉིས་ལ་མཇལ་འཕྲད་གནང་རྒྱུ་ཡིན་པའི་གནས་ཚུལ་དེ་དངོས་གནས་ཡིན་ལུགས་བརྗོད་ཡོད་ཀྱང་། ག་དུས་མཇལ་འཕྲད་གནང་རྒྱུ་ཡིན་སོགས་གསལ་བོ་བཤད་མེད་པ་རེད། རྒྱ་ནག་གཞུང་ཕྱོགས་ཀྱི་ཨང་སིན་སུའུ་ཀེ་ཡི་གཟིགས་སྐོར་བྱ་བའི་སྣེ་ལེན་པ་ཞིག་གིས་བྷེ་བྷེ་སི་ལ། ཨང་སིན་སུའུ་ཀེ་ཡི་གཟིགས་སྐོར་གྱི་གནས་ཚུལ་བརྒྱུད་བསྒྲགས་ཐད། གཞུང་འབྲེལ་གསར་ལམ་ཁག་གི་གསར་འགོད་པ་མ་གཏོགས་གཞན་པ་སྐད་གཏོང་གི་མ་རེད་ཅེས་བརྗོད་འདུག
པེ་ཅིན་གྱི་ལོ་རྒྱུས་རིག་གནས་བ་ཞིག་གིས། ད་ལྟ་ལྕམ་ཨང་སིན་སུའུ་ཀེ་ལགས་ཀྱི་སྐོར་སྐྱོད་དང་འབྲེལ་བའི་གནས་ཚུལ་རིམ་པ་ལྟར་རག་ཐབས་མི་འདུག་ཀྱང་། ལྕམ་ཨང་སིན་སུའུ་ཀེ་ལགས་མ་འོངས་པའི་འབར་མའི་སྲིད་འཛིན་གྱི་འོས་མི་དང་། གལ་སྲིད་རང་དབང་དང་འདྲ་མཉམ་རྨང་གཞིར་བཞག་སྟེ་འོས་འདེམས་བྱ་ཐུབ་པ་ཡིན་ན་ཁོང་མོ་སྲིད་འཛིན་ཆགས་རྒྱུར་རེ་བ་ཆེན་པོ་ཡོད་སྟབས། ད་ལན་རྒྱ་གཞུང་གིས་ཁོང་མོ་མགྲོན་འབོད་བྱས་པ་དེ་ནི་སྔ་ས་ནས་ཁོང་མོར་འབྲེལ་འདྲིས་འཛིན་འདོད་པ་ཡིན་སྐོར་དང་། ཨང་སིན་སུའུ་ཀེ་ལགས་དམངས་གཙོའི་མཚོན་རྟགས་ལྟ་བུ་ཞིག་ཏུ་ངོས་འཛིན་བྱེད་ཀྱི་ཡོད་པས། ནུབ་ཕྱོགས་དང་རྒྱ་ནག་ནང་གླེང་ཕྱོགས་མི་འདྲ་བ་ཧ་ཅང་མང་པོ་ཡོད་པ་མ་ཟད། འབར་མའི་མ་འོངས་པའི་ཆབ་སྲིད་ཀྱི་གསར་བརྗེའི་འགུལ་སྐྱོད་ནུབ་ཕྱོགས་པས་དོ་སྣང་བྱ་ཡུལ་ཞིག་ཏུ་གྱུར་ཡོད་ལ། ང་ཚོས་ཀྱང་དོ་སྣང་བྱེད་དགོས་པ་ཞིག་ཆགས་ཡོད། ཅེས་བརྗོད་འདུག
ཡང་རྒྱ་ནག་གི་སྤྱི་ཚོགས་བརྒྱུད་ལམ་ཁག་ཏུ་ལྕམ་ཨང་སིན་སུའུ་ཀེ་ལགས་ཀྱི་གཟིགས་སྐོར་ཐད་དཔྱད་བརྗོད་སྤེལ་མཁན་ཧ་ཅང་མང་པོ་ཡོད་པ་དང་། ཁག་ཅིག་གིས་ལྕམ་ཨང་སིན་སུའུ་ཀེ་ནི་གནམ་བསྐོས་གོང་མས་ཆེད་མངག་གནང་བའི་དམངས་གཙོའི་ལྷ་མོ་དང་། ཨེ་ཤ་ཡའི་དམངས་གཙོའི་དམིགས་དཔེ་ལྟ་ས་ཞིག་ཡིན་སྐོར་དང་། གཟིགས་སྐོར་འདི་བརྒྱུད་ཁོང་མོས་རྒྱ་ནག་གཞུང་གི་མགོ་ཁྲིད་ཚོར་དམངས་གཙོ་དང་འགྲོ་བ་མིའི་ཐོབ་ཐང་གོང་སྤེལ་ཐོག་སློབ་ཁྲིད་ཐེངས་ཤིག་གནང་དགོས་སྐོར་སོགས་བརྗོད་འདུག་ལ། ཡང་ཁག་ཅིག་གིས་གཟིགས་སྐོར་དེ་སྐབས་བསྟུན་ཆབ་སྲིད་ཀྱི་འཆར་གཞི་ཞིག་ཡིན་པས། ཁོང་མོའི་ཆབ་སྲིད་ཀྱི་ལྟ་བ་ལངས་ཕྱོགས་དང་འབྲེལ་བ་མེད་ལ། ཕྱོགས་གཉིས་བར་ཆབ་སྲིད་ཀྱི་ལྟ་བའི་ཐོག་ཧེ་བག་ཆེན་པོ་ཡོད་སྟབས། གཟིགས་སྐོར་སྐབས་ཆབ་སྲིད་ཐོག་འགྱུར་བ་གང་ཡང་འབྱུང་མི་སྲིད་ཀྱང་། འབར་མའི་རོ་ཁེ་པང་དང་རྒྱ་ནག་ཁུན་མེན་བར་གྱི་ཨ་སྒོར་དུང་ཕྱུར ༢༠༠ ལྷག་གི་འགྲོ་གྲོན་གཏོང་འཆར་གྱི་ལྕགས་ལམ་འཛུགས་བསྐྲུན་དང་། ཆུ་ཤུགས་དང་གློག་ཤུགས་མཁོ་འདོན་སོགས་དཔལ་འབྱོར་གྱི་མཉམ་ལས་ཐོག་ནུས་པ་གང་འཚམ་འཐོན་རྒྱུ་ཡིན་སྐོར་རྗོད་ཀྱི་འདུག
ཨོ་སི་ཊོ་ལི་ཡ་གཙུག་ལག་སློབ་གྲྭ་ཆེན་མོའི་འབར་མའི་གནད་དོན་ཆེད་མཁས་པ་ཧྥ་ལི་ནིས། ལྕམ་ཨང་སིན་སུའུ་ཀེ་ལགས་ཀྱིས་འདི་ལོའི་ཕྱི་ཟླ་ ༡༡ པའི་སྲིད་འཛིན་འོས་འདེམས་ཆེན་མོའི་ཁྲོད་རྒྱལ་ཁ་ལེན་པར་འབད་བརྩོན་བྱེད་ཀྱི་ཡོད་སྟབས། ཁོང་མོས་ངེས་པར་དུ་དོན་དངོས་ལ་གདོང་གཏད་དགོས་པ་དང་། ཁོང་མོས་རྒྱ་ནག་མ་འོངས་པར་འབར་མ་ལ་ཅི་ཙམ་གྱིས་གལ་ཆེན་པོ་ཆགས་ཡོད་པ་གསལ་བོ་ཤེས་ཀྱི་ཡོད་སྐོར་བརྗོད་འདུག་ལ། རྒྱ་ནག་མི་མང་ཉིན་རེའི་ཚགས་པར་གྱི་དར་ཆའི་འོག་ཏུ་ཡོད་པའི་གོ་ལའི་དུས་བབ་ཅེས་པའི་ནང་། རྒྱ་ནག་ཕྱོགས་ནས་ཨང་སིན་སུའུ་ཀེ་ལགས་ཀྱི་གཟིགས་སྐོར་དེ་འདི་ལོའི་འབར་མའི་འོས་འདེམས་ཆེན་མོའི་གྲུབ་འབྲས་ཐག་གཅོད་པའི་གོ་སྐབས་ཤིག་ཏུ་ངོས་འཛིན་བྱེད་ཀྱི་ཡོད་ལ། ཁོང་མོས་རྒྱ་ནག་ལ་བཟུང་བའི་རྣམ་འགྱུར་ནི་དངོས་ཡོད་དང་མཛའ་བརྩེ་ལྡན་པ་ཞིག་ཡིན་སྐོར་གྱི་གླེང་བརྗོད་སྤེལ་ཡོད་པ་རེད།
རྒྱ་ནག་ཕྱི་འབྲེལ་ལྷན་ཁང་གི་དྲ་བའི་ཐོག་སྤེལ་བའི་༼རྒྱ་ནག་གིས་ཨང་སིན་སུའུ་ཀེ་ལ་དགའ་བསུ་བྱེད་འོས་པའི་རྒྱུ་རྐྱེན་གསུམ༽ཞེས་པའི་རྩོམ་ཡིག་ནང་། ཕྱི་ལོ་ ༢༠༡༤ ལོའི་ལོ་སྟོད་དུ་འབར་མའི་ནང་ཡོད་པའི་རྒྱ་ནག་གི་གཞུང་ཚབ་པས། ལྕམ་ཨང་སིན་སུའུ་ཀེ་ལགས་གོ་སྐབས་འོས་འཚམ་ཡིན་སྐབས་རྒྱ་ནག་ནང་གདན་འདྲེན་ཞུ་རྒྱུ་ཡིན་སྐོར་བརྗོད་ཡོད་པ་དང་། དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཡིས་ཀྱང་ཁོང་མོར་མགྲོན་འབོད་བྱས་མྱོང་ཡོད་སྟབས། ད་རེས་ཁོང་མོ་གཞུང་ཕྱོགས་ནས་མགྲོན་འབོད་བྱས་པ་དེ། རྒྱ་ནག་དང་འབར་མའི་ཕྱི་འབྲེལ་གྱི་ཐོལ་བརྒལ་ཆེན་པོ་ཞིག་ཡིན་ཚུལ་བརྗོད་ཡོད་པ་མ་ཟད། ལྕམ་ཨང་སིན་སུའུ་ཀེ་གཟིགས་སྐོར་དུ་ཕེབས་པ་དེས། རྒྱ་ནག་གི་ཕྱི་འབྲེལ་སྲིད་ཇུས་ཐད་སྔར་བས་རང་རློམ་ལྡན་ཞིང་སྒོ་ཕྱེས་པ་དང་། རྒྱ་ནག་གི་འབར་མའི་ཕྱོགས་ཀྱི་ཁེ་ཕན་སྔར་བས་སྲུང་སྐྱོབ་བྱེད་ཐུབ་པ། དེ་བཞིན། རྒྱ་ནག་དང་ནུབ་ཕྱོགས་རྒྱལ་ཁབ་ཁག་གི་འབར་མའི་ཕྱོགས་ཀྱི་འགྲན་རྩོད་ཆེ་རུ་འགྲོ་ཐུབ་པ་བཅས་ནི་རྒྱ་ནག་ལ་བསྐྲུན་པའི་དགེ་མཚན་གསུམ་ཡིན་སྐོར་བརྗོད་འདུག
གསར་འགོད་པ། པདྨ་མཚོ།
