ཧོང་ཀོང་གྲོས་ཚོགས་ནས་ཆབ་སྲིད་བསྒྱུར་བཅོས་ཀྱི་གྲོས་གཞིར་གོ་སྡུར་བྱས་ནས་མགྱོགས་པོར་ཐག་གཅོད་བྱ་རྒྱུ་ཡིན་འདུག
དེ་རིང་ཕྱི་ཚེས་ ༡༧ ཉིན་གྱི་སྔ་དྲོར། ཧོང་ཀོང་གྲོས་ཚོགས་ནས་ཡུལ་དེའི་ཆབ་སྲིད་བསྒྱུར་བཅོས་ཀྱི་གྲོས་གཞིའི་ཐོག་གོ་སྡུར་དང་གཏན་འབེབས་ཀྱི་ཚོགས་འདུ་མགོ་འཛུགས་བྱས་ཡོད་སྟབས། གྲོས་ཚོགས་ཁང་གི་ཕྱི་ལོགས་སུ་ཆབ་སྲིད་བསྒྱུར་བཅོས་ལ་རྒྱབ་སྐྱོར་དང་ངོ་རྒོལ་བྱེད་མཁན་གྱི་མི་མང་འདུ་འཛོམས་བྱས་ཏེ། འབོད་ཚིག་སྣ་ཚོགས་བྲིས་པའི་འཕྲེད་དར་དང་ཉི་གདུགས་སེར་པོ་བཟུང་ནས་སྐད་འབོད་བྱེད་ཀྱིན་ཡོད་པ་དང་། སྔར་ལོ་ལྟར་ངོ་རྒོལ་བ་ཚོ་གྲོས་ཚོགས་ར་བའི་ནང་འཛུལ་བར་སྔོན་འགོག་ཆེད་ཉེན་རྟོག་པ་མང་པོས་སྐོར་སྲུང་བྱེད་བཞིན་ཡོད་པ་མ་ཟད། རྒྱབ་སྐྱོར་བ་དང་ངོ་རྒོལ་བའི་བར་འཁྲུག་འཛིང་ཤོར་ཏེ་ལས་འགུལ་བ་ཁག་ཅིག་ཉེན་རྟོག་པས་འཛིན་བཟུང་བྱས་ཡོད་འདུག
ཚོགས་འདུའི་ཐོག་ཧོང་ཀོང་སྲིད་དོན་ལྷན་ཁང་གི་མགོ་ཁྲིད་ལིན་ཀྲིན་ཡེ་ཨི་ཡིས། འདས་པའི་ཟླ་བ་ ༢༠ ཙམ་གྱི་རིང་སྤྱི་ཚོགས་ནང་ཆབ་སྲིད་བསྒྱུར་བཅོས་ཐོག་གླེང་སློང་ཤུགས་ཆེན་བྱུང་ཡོད་པ་མ་ཟད། སྲིད་འཛིན་ལམ་ལུགས་འཕེལ་རྒྱས་ཚོགས་ཆུང་གི་ཚོགས་མི་ཚོར་སྐྱོན་བརྗོད་དང་ཟུར་ར། ཁ་རྡུང་གང་མང་བཏང་ཡོད་ཀྱང་། ཆབ་སྲིད་བསྒྱུར་བཅོས་ཐོག་མང་ཆེ་བས་མོས་མཐུན་བྱེད་ཀྱི་ཡོད་པ་བཤད་མི་དགོས་ལ། ཧོང་ཀོང་མི་མང་གི་རེ་བ་ནི་སྲིད་འཛིན་ལམ་ལུགས་འཕེལ་རྒྱས་སུ་འགྲོ་རྒྱུ་དེ་ཡིན་སྟབས། ཧོང་ཀོང་གཞུང་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ལག་བསྟར་བྱེད་སྐབས། རྩ་ཁྲིམས་དང་ཁ་མི་འབྲལ་བར་ནུས་པ་ཡོད་དགུ་འདོན་གྱི་ཡོད་སྐོར་བརྗོད་པ་མ་ཟད། གལ་སྲིད་གྲོས་ཚོགས་ནང་ཆབ་སྲིད་བསྒྱུར་བཅོས་ལ་འདོད་མོས་མེད་པའི་ཐག་གཅོད་བྱུང་ཚེ། སྐབས་འདིའི་ཧོང་ཀོང་གཞུང་གིས་ཡང་བསྐྱར་གྲོས་གཞི་དེ་འདོན་རྒྱུ་མིན་སྐོར་ནན་བརྗོད་བྱས་ཡོད་འདུག
ཧོང་ཀོང་ནང་སྲིད་ལྷན་ཁང་གི་མགོ་ཁྲིད་ཐན་ཀྲི་ཡན་ཙི་ཡིས་ཚོགས་འདུ་མགོ་འཛུགས་ཀྱི་གཏམ་བཤད་གནང་སྐབས། སྲིད་འཛིན་ལམ་ལུགས་འཕེལ་རྒྱས་ཀྱི་ཀྱག་ཀྱོག་གི་གོམ་སྟབས་ ༥ ཡི་བརྒྱུད་རིམ་ལྟར། ཧོང་ཀོང་དམིགས་བསལ་སྲིད་འཛིན་དང་རྒྱ་ནག་རྒྱལ་ཡོངས་འཐུས་མིའི་ཚོགས་ཆེན་རྒྱུན་ལས་ལྷན་ཁང་གཉིས་ཀྱིས། སྔ་གཞུག་ཏུ་གོམ་སྟབས་དང་པོ་དང་གཉིས་པའི་བྱ་བ་ལེགས་པར་གྲུབ་ཡོད་པ་དང་། གལ་སྲིད་ད་རེབ་ཀྱི་གྲོས་ཚོགས་ནང་འཐུས་མིའི་གསུམ་ཆ་གཉིས་ལྷག་གིས་རྒྱབ་སྐྱོར་བྱས་ཏེ་གྲོས་གཞི་ལག་བསྟར་གཏན་འབེབས་བྱེད་ཐུབ་པ་ཡིན་ན། སྲིད་འཛིན་ལམ་ལུགས་འཕེལ་རྒྱས་ཀྱི་གོམ་སྟབས་ ༥ ཡི་ནང་ནས་ཆེས་གལ་གནད་ཆེ་བའི་གོམ་སྟབས་གསུམ་པ་དེ་ལེགས་འགྲུབ་བྱུང་རྒྱུ་ཡིན་སྐོར་བརྗོད་ཡོད་པ་རེད།
རྒྱ་ནག་རྒྱལ་སྲིད་སྤྱི་ཁྱབ་ཁང་གི་ཧོང་ཀོང་དང་ཨོ་མིན་ལས་སྒྲུབ་ཁང་གི་འགན་འཛིན་ཝང་ཀང་ཡཱ་དང་། ཧོང་ཀོང་ནང་ཡོད་པའི་རྒྱ་ནག་ཕྱི་འབྲེལ་ལྷན་ཁང་གི་འཐུས་ཚབ་སོང་རོ་ཨན་གཉིས་ཀྱིས། ཧོང་ཀོང་གི་ཆབ་སྲིད་བསྒྱུར་བཅོས་ཀྱི་གྲོས་གཞིའི་་ཐོག་རྒྱ་ནག་དབུས་གཞུང་གིས་བསྐྱར་དུ་བསམ་བློ་གཏོང་རྒྱུ་མིན་ལ། གལ་སྲིད་འཐུས་མི་ངོ་རྒོལ་བ་ཚོས་མོས་མཐུན་མེད་པའི་ལངས་ཕྱོགས་བརྟན་པོ་བཟུང་བ་ཡིན་ན། ཧོང་ཀོང་གི་དམངས་གཙོ་འཕེལ་རྒྱས་རང་སར་ལྷག་རྒྱུ་ཡིན་པ་མ་ཟད། ཆབ་སྲིད་ཀྱི་རྙོག་འཛིང་ཤུགས་ཆེ་རུ་ཕྱིན་ནས་སྤྱི་ཚོགས་སྔར་ལས་ཁ་འཐོར་ཅན་དུ་གྱུར་ཏེ་དཀའ་ངལ་ཆེན་པོ་འཕྲད་རྒྱུ་ཡིན་ལུགས་བརྗོད་ཡོད་པ་རེད།
ཚོགས་འདུའི་ཐོག་འཐུས་མི་རེ་རེས་སྐར་མ་ ༡༥ རིང་གྲོས་གཞི་དེའི་ཐོག་གཏམ་བཤད་བྱེད་ཀྱིན་ཡོད་པ་དང་། གལ་སྲིད་འཐུས་མི་ ༧༠ ཡིས་གཏམ་བཤད་ཀྱི་དུས་ཡུན་དེ་ཏག་ཏག་བེད་སྤྱོད་བཏང་བ་ཡིན་ན། ཉིན་གཉིས་ཀྱི་རྗེས་སུ་མ་གཏོགས་གྲོས་སྡུར་མཇུག་སྒྲིལ་གྱི་མེད་སྟབས། ཟླ་འདིའི་ཕྱི་ཚེས་ ༡༩ ཉིན་གྱི་སྔ་དྲོ་ཙམ་ལ་མཐའ་མའི་གཏན་འབེབས་ཐུབ་པའི་ཚོད་དཔག་བྱེད་ཀྱི་ཡོད་ཅིང་། གྲོས་གཞི་གཏན་འབེབས་བྱེད་པར་གྲོས་ཚོགས་འཐུས་མི་ཁྱོན་ ༧༠ ཡོད་པའི་ནང་ནས་གསུམ་ཆ་གཉིས་ལྷག་གི་རྒྱབ་སྐྱོར་འཐོབ་དགོས་ཀྱི་ཡོད་པ་དང་། ད་ལྟའི་ཆར་ངོ་རྒོལ་ཚོགས་པའི་འཐུས་མི་ ༢༧ གྱིས་ངོ་རྒོལ་གྱི་འོས་བླུག་རྒྱུ་ཡིན་ལ། ཧོང་ཀོང་གཞུང་གིས་གྲོས་གཞི་དེ་ལག་བསྟར་གཏན་འབེབས་ཐུབ་རྒྱུ་ཧ་ཅང་ཁག་པོ་ཡིན་པ་ངོས་ལེན་བྱས་ཚར་སྐོར་བརྗོད་འདུག
གསར་འགོད་པ། པདྨ་མཚོ།
་རྒྱ་ནག་གཞུང་གིས་ཧོང་ཀོང་ལ་མགོ་བསྐོར་གྱ་ནོམ་པ་ཞིག་གཏོང་རྒྱུ་རེད། ད་བར་འཛམ་གླིང་ཁྱོན་ཡོངས་ལ་དེ་ག་རང་བྱས་ཡོད་པ་རེད། རྒྱ་ནག་གིས་ཕྱི་འབྲེལ་འཐུན་ལམ་ཞེས་པ་ནི་དྲགས་ཤུགས་ཀྱིས་མི་དམངས་ལ་གནོན་ཤུགས་དྲག་ཆས་གྱོན་ནས་མང་གཙོ་དེ་མ་རབ་སྙིང་རྗེ་མེད་པ་གཅིག་ཏུ་བསྒྱུར་གང་ཐུབ་བྱེད་པ་རེད་དོ་ལྷན་རྒྱས་ཚོ་་་་་།