དབྱིན་ཡུལ་གཞུང་གིས་རྒྱ་ནག་གི་སྒྱུ་རྩལ་བ་གྲགས་ཅན་ཨེ་ཝེ་ཝེ་ལགས་སུ་ཉིན་གྲངས་ ༢༠ ལས་ཐོངས་མཆན་སྤྲད་མི་འདུག
ཟླ་འདིའི་ཚེས་ ༢༩ ཉིན་པེ་ཅིན་ནང་རྟེན་གཞི་བྱས་པའི་དབྱིན་ཡུལ་གྱི་གཞུང་ཚབ་ཁང་གིས། རྒྱ་ནག་གི་སྒྱུ་རྩལ་བ་གྲགས་ཅན་ཨེ་ཝེ་ཝེ་ལགས་སུ་ཡི་གེ་ཞིག་བཏང་སྟེ། ཁོང་གིས་དབྱིན་ཡུལ་རྒྱལ་ས་ལོན་ཌོན་གྱི་བླ་ན་མེད་པའི་སྒྱུ་རྩལ་བརྩམས་ཆོས་བསྟི་གནས་ (Royal Academy of Arts) ཁང་དུ། བརྩམས་ཆོས་འགྲེམས་སྟོན་ཞིག་བྱ་ཆེད་ཟླ་དྲུག་རིང་གི་ཐོངས་མཆན་ཞུས་ཡོད་ཀྱང་། ཁོང་གིས་འགེངས་ཤོག་ནང་དེ་སྔོན་ནག་ཉེས་གང་བསགས་ཀྱི་གནས་ཚུལ་གང་ཡང་བཀོད་མེད་སྟབས། ཁོང་ལ་ཉིན་གྲངས་ ༢༠ རིང་གི་ཐོངས་མཆན་ལས་སྤྲོད་རྒྱུ་མིན་པ་ཕྱི་བསྒྲགས་བྱས་ཡོད་འདུག
བྷི་བྷི་གསར་ཁང་གིས་པེ་ཅིན་ནང་ཡོད་པའི་དབྱིན་ཡུལ་གཞུང་ཚབ་ཁང་གི་ཐོངས་མཆན་ལག་འཁྱེར་ཞུ་སྦྱོར་ཚན་པས་ཨེ་ཝེ་ཝེ་ལ་བཏང་བའི་ཡི་གེའི་ནང་དོན་ལུང་འདྲེན་བྱས་པར། ཨེ་ཝེ་ཝེ་ཡིས་དབྱིན་ཡུལ་གྱི་ཐོངས་མཆན་ཞུ་ཕྱོགས་ཀྱི་སྒྲིག་སྲོལ་ལ་བརྩི་འཇོག་མ་བྱས་པར་སྙན་ཞུའི་འགེངས་ཤོག་ནང་ནག་ཉེས་གང་བསགས་ཀྱི་གནས་ཚུལ་ཞིབ་ཕྲ་བཀོད་མེད་ཀྱང་། ང་ཚོས་ཁོང་ལ་དམིགས་བསལ་བཏང་སྟེ་དབྱིན་ཡུལ་ནང་འགྲོ་རྒྱུའི་དུས་ཚོད་ལ་ཚད་བཀག་བཟོས་ཏེ་ཆོག་མཆན་སྤྲད་ཡོད། མ་འོངས་པར་ཁོང་གིས་ཐོངས་མཆན་ཞུ་སྐབས་འགེངས་ཤོག་ནང་སྔར་བྱས་ནག་ཉེས་གང་བསགས་ཀྱི་གནས་ཚུལ་མ་བཀོད་ན། སྒྱུ་རྩལ་བ་ཁོང་དབྱིན་ཡུལ་ནང་ལོ་ ༡༠ རིང་འགྲོ་སྐྱོད་བྱེད་མི་ཆོག་པའི་བཀག་སྡོམ་བྱ་སྲིད་པ་རེད། ཅེས་བརྗོད་འདུག
སྤྱི་ཚོགས་དྲ་རྒྱ་ཨིན་སི་ཌ་གྷ་རམ་ (Instagram) ཐོག་སྒྱུ་རྩལ་བ་ཨེ་ཝེ་ཝེ་ཡིས་ཆེད་བསྒྲགས་ཤིག་གི་ནང་འཁོད་དོན། ངས་དབྱིན་ཡུལ་གྱི་གཞུང་ཚབ་ཁང་དང་ཡུལ་མི་གནས་སྤོ་ལྷན་ཁང་ལ་ཁ་པར་ཐེངས་མང་བཏང་སྟེ། ད་བར་རྒྱལ་ཁྲིམས་ལ་རྡོག་རོལ་བཏང་བའི་ནག་ཉེས་གང་ཡང་བསགས་མེད་པ་གསལ་བཤད་བྱས་པ་ཡིན་ཡང་། ཁོ་ཚོས་ངའི་སྐད་ཆར་ཉན་འཇོག་མ་བྱས་པར་ཨུ་ཚུགས་མཐར་སྐྱེལ་བྱས་ཏེ། ངས་ནག་ཉེས་བསགས་ཡོད་པ་ཁུངས་ལྡན་ཡིན་སྟབས། ད་ཐེངས་ཐག་གཅོད་འདི་བྱས་པ་ཡིན་སྐོར་བརྗོད་བྱུང་། ཅེས་བཀོད་འདུག
༢༠༡༡ ལོའི་ ༤ ཚེས་ ༣ ཉིན་རྒྱ་ནག་གི་སྒྱུ་རྩལ་བ་གྲགས་ཅན་ཨེ་ཝེ་ཝེ་ལགས་པེ་ཅིན་གནམ་ཐང་དུ། རྒྱ་གཞུང་ཉེན་རྟོག་པས་འཇུ་བཟུང་གིས་ཉིན་ ༨༡ རིང་བཀག་ཉར་བཙོན་འཇུག་དང་། ཁོང་གི་ཕྱི་བསྐྱོད་ལག་ཁྱེར་ལོ་བཞིའི་རིང་གཞུང་བཞེས་བཏང་ཡོད་སྟབས། རྒྱལ་སྤྱིའི་རྒྱལ་ཁབ་དང་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་རྒྱ་གཞུང་གིས་ཨེ་ཝེ་ཝེ་བཀག་ཉར་བྱས་པ་དེ་ནི་རྒྱ་ནག་གཞུང་དང་ལྟ་བ་ཐ་དད་འཛིན་མཁན་ཤེས་ལྡན་པ་དག་ལ་ཕྱོགས་ཡོངས་ནས་བཀག་སྡོམ་བྱེད་བཞིན་པའི་མཚོན་རྟགས་གསལ་ཤོས་ཤིག་ཡིན་སྐོར་སྐྱོན་འཛུགས་བྱས་ཡོད་པ་མ་ཟད། ༢༠༡༡ ལོའི་ཟླ་ ༦ ཚེས་ ༢༡ ཨོ་སི་ཊོ་ལི་ཡའི་སྒྱུ་རྩལ་བ་ ༧༠ ལྷག་གིས་ཁོང་ཀློད་གྲོལ་དགོས་སྐོར་གྱི་མི་མང་ཁྲི་ ༡༤ ལྷག་གིས་མཚན་རྟགས་བཀོད་པའི་སྙན་ཞུ་ཞིག་ཕྱི་བསྒྲགས་བྱས་སྟབས། ལོ་དེའི་ཟླ་ ༦ ཚེས་ ༢༣ ཉིན་རྒྱ་ནག་གཞུང་གིས་ཁོང་ཀློད་གྲོལ་བཏང་ཡོད་ཀྱང་། པེ་ཅིན་ཁྲལ་བསྡུ་སྡེ་ཁག་གིས་ཁོང་ལ་རྒྱ་སྒོར་ཁྲི་ ༡༥༠༠ དཔྱ་ཁྲལ་གུན་གསབ་སྤྲོད་དགོས་པའི་བཙན་བཀའ་བཏང་སྟེ་དཔྱ་ཁྲལ་བསྒྲུབས་བཅུག་ཡོད། ༢༠༡༢ ལོ་ནས་བཟུང་རྒྱ་ནག་གཞུང་གིས་ཁོང་བཟང་བཙོན་ལ་བཅུག་སྟེ་ད་བར་ཕྱི་བསྐྱོད་དམ་བསྒྲགས་བྱས་ནས་མི་སུ་གང་དང་ཐུག་ཏུ་བཅུག་མེད་སྟབས། རྒྱ་ནག་གཞུང་ལ་རྒྱལ་སྤྱིའི་རྒྱལ་ཁབ་དང་ལྷག་པར་དུ་རྒྱ་ནག་རྒྱལ་ནང་གི་མཁས་པ་དང་སྒྱུ་རྩལ་བ། མང་ཚོགས་བཅས་ཀྱིས་ཁོང་ཀློད་གྲོལ་གཏོང་དགོས་པའི་གནོན་ཤུགས་རབ་དང་རིམ་པ་སྤྲད་པར་བརྟེན། ཟླ་འདིའི་ཚེས་ ༢༨ ཉིན་རྒྱ་ནག་གཞུང་གིས་ཁོང་ལ་འགྲོ་སྐྱོད་ལག་ཁྱེར་སྤྲད་ཡོད།
ཁ་སང་དབྱིན་ཡུལ་གྱི་སྒྱུ་རྩལ་བ་དང་རྩོམ་པ་པོ་ཚོ་ཁག་ཅིག་གིས་ཕྱི་ཟླ་ ༡༠ ནང་རྒྱ་ནག་གི་སྲིད་འཛིན་ཞི་ཅིན་ཕིན་དབྱིན་ཡུལ་ནང་རྒྱལ་དོན་སྐོར་སྐྱོད་བྱ་འཆར་ཡོད་པར་བརྟེན། དབྱིན་ཡུལ་གཞུང་གིས་རྒྱ་ནག་གི་ངོ་གདོང་སྲུང་ཆེད་སྒྱུ་རྩལ་བ་ཨེ་ཝེ་ཝེ་ཡིས་ནག་ཉེས་བསགས་ཡོད་ལུགས་བརྗོད་དེ། ཁོང་ཟླ་དྲུག་རིང་དབྱིན་ཡུལ་ནང་སྐྱོད་ཆོག་པའི་ཐོངས་མཆན་སྤྲད་མེད་ཚུལ་བརྗོད་ཡོད་སྟབས། བྷི་བྷི་སི་གསར་འགོད་པས་དབྱིན་ཡུལ་གྱི་ནང་སྲིད་ལྷན་ཁང་ལ་སྒྱུ་རྩལ་བ་ཨེ་ཝེ་ཝེ་ཡིས་ཁྲིམས་འགལ་ནག་ཉེས་གང་བསགས་ཡོད་མེད་གསལ་བཤད་བྱེད་དགོས་སྐོར་བརྗོད་ཡོད་ཀྱང་། ད་བར་ཁོ་ཚོས་བརྡ་ལན་གང་ཡང་སྤྲད་ཡོད་མི་འདུག
དེ་རིང་དབྱིན་ཡུལ་གྱི་གྷར་ཌིན་གསར་ལམ་ཐོག་དབྱིན་ཡུལ་རྒྱལ་ས་ལོན་ཌོན་གྱི་བླ་ན་མེད་པའི་སྒྱུ་རྩལ་བརྩམས་ཆོས་བསྟི་གནས་ཁང་གི་འགན་འཛིན་ཌེམ་མཱར་ལའོ་ (Tim Marlow) ལགས་ཀྱིས། དབྱིན་ཡུལ་གཞུང་གིས་སྒྱུ་རྩལ་བ་ཨེ་ཝེ་ཝེ་ལགས་སུ་ཟླ་དྲུག་རིང་གི་ཐོངས་མཆན་མ་སྤྲད་པར་བློ་ཕམ་ཆེན་པོ་སྐྱེས་བྱུང་བས། གཞུང་གིས་གནད་དོན་འདིར་ཞིབ་འཇུག་ནན་མོ་བྱས་ཏེ་གང་མགྱོགས་ངེས་པ་བརྙེད་པའི་ལན་ཞིག་རྒྱག་རྒྱུའི་རེ་སྐུལ་ཞུ་བཞིན་ཡོད། ཅེས་དང་། ཡང་རྒྱལ་སྤྱིའི་ཉེས་ཡང་ཚོགས་པའི་ལས་བྱེད་ཇེམ་སི་ (James Savage) ལགས་ཀྱིས། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩོད་ལེན་པ་ཚོར་ཉེས་མིང་འདྲ་མིན་བཀལ་ཏེ། ཁོ་ཚོའི་མཚན་སྙན་མེད་པ་བཟོ་ཐབས་བྱེད་བཞིན་ཡོད་པ་མ་ཟད། རྒྱལ་ཁབ་གཞན་ལ་གནོན་ཤུགས་སྤྲད་ནས་ཁོ་ཚོའི་འགྲོ་སྐྱོད་ལ་དམ་དྲག་བཀག་བཀོག་བྱེད་བཞིན་ཡོད་པ་གསལ་གསལ་ཐིང་ཐིང་ཆགས་ཡོད་ཀྱང་། དབྱིན་ཡུལ་གཞུང་གིས་ཁོང་གི་ཐོངས་མཆན་གྱི་དུས་འགྱང་ལ་ཚོད་འཛིན་བྱས་པ་དེ་ནི། མི་དཀར་པོར་ཞྭ་མོ་ནག་པོ་གཡོགས་པ་ཞིག་རེད། ཅེས་བརྗོད་འདུག
དབྱིན་ཇི་འདི་ཡག་པོ་ཞེ་པོ་གཅིག་དང་གང་ཡོང་ ཡིན་ཡང་ད་ག་རེད་ད་ཨོ་འགྲན་རྩེད་མོར་དམིགས་ནས་ང་ཚོ་མགོ་སྐོར་རྩིས་བྱས་པ་རེད།།།
རྒྱ་ནག་དམར་གཞུང་ལ་དགུན་ཁའི་ཨོ་རྩལ་མགྲོན་བདག་བྱེད་པའི་འོས་བབས་ཡོད་མེད་ཀྱི་གླེང་གཞི་ཞིག་ཡོང་གི་ཡོད་པའི་མཚམས་སུ་སྒྱུ་རྩལ་བ་ཨེ་ཝེ་ཝེ་ལགས་ཀྱི་ཕྱི་བསྐྱོད་ལག་ཁྱེར་ཕྱིར་སྤྲོད་ཡོངས་གྲགས་དང་། དོན་དམ་པའི་དཔའ་བོ་རོང་རྒྱས་ཨ་གྲགས་ལགས་བཙོན་གྲོལ་བཏང་བ་སོགས་འགྲེལ་བ་ཡོད་མེད་ཇི་ལྟར་ཡང་འཁྲབ་ཚན་དེ་ཚོ་དང་ལྷན་ཅིག་ཏུ་རྒྱ་ནག་ལ་དགུན་ཁའི་ཨོ་རྩལ་གྱི་མགྲོན་བདག་རག་པ་རེད། དེ་སྔོན་ ༢༠༠༨ ལོའི་ཨོ་རྩལ་རྒྱ་ནག་ལ་བདེ་བླག་ངང་ཚོགས་ཐུབ་པའི་རེ་སྨོན་གྱི་སྔ་ཞུགས་སུ་བོད་རྒྱའི་དབར་གྲོས་མོལ་ཐེངས་ཁ་ཤས་བྱེད་པའི་རྣམ་འགྱུར་བསྟན་ཡོད་ཀྱང་། ད་རེས་འབྲེལ་མོལ་གྱི་རྣམ་འགྱུར་མ་བསྟན་པ་དེས་གང་ཞིག་མཚོན་གྱི་ཡོད་དམ། ད་རྒྱ་ནག་དེ་རྒྱལ་སྤྱིའི་གཅེས་ཕྲུག་སྲས་སྐུ་ཞབས་ཤིག་ཏུ་གྱུར་མེད་དམ་སྙམ།