དེ་རིང་པེ་ཅིན་གྲོང་ཁྱེར་མི་དམངས་འབྲིང་རིམ་ཁྲིམས་ཁང་དང་པོའི་དྲ་བའི་སྟེང་གནས་ཚུལ་སྤེལ་བའི་ནང་། ཡུན་ནན་ཞིང་ཆེན་གྱི་ཞིང་ཆེན་མགོ་ཁྲིད་གཞོན་པ་ཟུར་བ་ཧྲིན་ཕེ་ཕིན་ (Chén Péipíng) གྱིས་ལྐོག་རྔན་བླངས་པའི་ནག་ཉེས་འོག་འཛིན་བཟུང་ཞིབ་བཤེར་བྱས་པ་ཁྱབ་བསྒྲགས་བྱས་འདུག
གནས་ཚུལ་ནང་། ༢༠༠༠ ནས་ ༢༠༡༢ ལོའི་བར་ཧྲིན་ཕེ་ཕིན་གྱིས་རྒྱ་ནག་ཐིན་ཁྲོན་རྫོངས་ཀྱི་མགོ་གཙོ་དང་སི་མའོ་གྲོང་ཁྱེར་གྱི་མགོ་ཁྲིད་སོགས་བྱས་སྐབས། དབང་ཆ་སྒེར་སྤྱོད་ཀྱིས་ཡུན་ནན་ས་ཁུལ་གྱི་ཚོང་པ་མང་པོར་རྒྱབ་རོགས་འོག་ཁོས་རྒྱུ་ནོར་འབོར་ཆེན་ལྐོག་རྔན་བླངས་ཏེ། ཁྱོན་རྒྱ་སྒོར་འབུམ་ ༡༦༡༥ ལྷག་ཟོས་ཡོད་སྐོར་ཁྱབ་བསྒྲགས་བྱས་འདུག
༢༠༡༣ ལོའི་ཟླ་ ༡ པ་ནས་ཧྲིན་ཕེ་ཕིན་གྱིས་ཡུན་ནན་ཞིང་ཆེན་མགོ་ཁྲིད་ཀྱི་ལས་འགན་འཁུར་ཡོད་པ་དང་། ༢༠༡༤ ལོའི་ཟླ་ ༣ ཚེས་ ༩ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཉེས་དོན་དོགས་གཞིའི་འོག་ཞིབ་བཤེར་བྱ་རྒྱུ་ཁྱབ་བསྒྲགས་བྱས་ཤིང་། ཟླ་དེའི་ཚེས་ ༢༠ ཉིན་ཏང་ནས་ཕྱིར་འཕུད་ཁྱབ་བསྒྲགས་བྱས་ཏེ་དངོས་སུ་འཛིན་བཟུང་བྱས་ཡོད་འདུག
དེ་རིང་བྷེ་བྷེ་སི་གསར་ཁང་གིས་གནས་ཚུལ་སྤེལ་བའི་ནང་། ཧྲིན་ཕེ་ཕིན་ནི་རྒྱ་ནག་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་ ༡༨ པའི་རྗེས་ལ་ཞིང་ཆེན་རིམ་པའི་སྟག་རྒན་གོ་གནས་ཕབ་པ་ ༢༢ དེ་ཆགས་ཡོད་པ་དང་། ཧྲིན་ཕེ་ཕིན་ཞིབ་བཤེར་བྱས་རྗེས་ ༢༠༡༤ ནས་ ༢༠༡༥ ལོའི་ནང་ཡུན་ནན་དཔོན་རིགས་ཚོའི་གོ་གནས་ལ་གཡོ་ཁྱོམ་ཆེན་པོ་ཞིག་བྱུང་ཡོད་སྟབས། ཞིང་ཆེན་གྱི་མགོ་གཙོ་ཟུར་བ་པེ་ཨིན་ཕེ་ (Bai Enpei)དང་། ཞིང་ཆེན་མགོ་གཙོ་གཞོན་པ་ཟུར་བ་ཁྲོའོ་ཧི་ (Chou He)། ཡུན་ནན་ཞིང་ཆེན་ཁོན་མིན་གྲོང་ཁྱེར་མགོ་གཙོ་ཟུར་བ་ཀའོ་ཅེན་སོན་ (Gao Jinsong) སོགས་ཀྱི་གོ་གནས་ཕབ་ཡོད་འདུག ཁོན་མིན་གྲོང་ཁྱེར་གྱི་མགོ་གཙོ་ཟུར་བ་ཀྲང་ཐེན་ཞིན་ (Zhang Tianxin) ལ་སྒྲིག་འགལ་ཉེས་མིང་འོག་གོ་གནས་ཕབ་པ་སོགས་ཡུན་ནན་ཞིང་ཆེན་གྱི་མཐོ་རིམ་དཔོན་རིགས་ ༤ གོ་གནས་ནས་ཕབ་ཡོད་འདུག ཅེས་བཀོད་འདུག
༢༠༡༥ ལོར་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་དང་རྒྱ་ནག་སྲིད་གྲོས་ཚོགས་ཆེན་གཉིས་སྐབས། ཡུན་ནན་ཞིང་ཆེན་གྱི་མགོ་གཙོ་ལེ་ཅི་ཧིན་ (Li Jiheng) གྱིས་བརྒྱུད་ལམ་ཁག་ཏུ་ ༢༠༡༤ ལོར་ཡུན་ནན་ཞིང་ཆེན་ནང་གོ་མཐོ་རིམ་དཔོན་རིགས་ ༤༢ དང་གཞུང་སྒྲུབ་ཁང་གི་མགོ་གཙོ་ ༣༧ ལ་ཞིབ་བཤེར་བྱས་ཡོད་པ་སོགས་བརྗོད་འདུག
ཧྲིན་ཕེ་ཕིན་ནི་ ༡༩༦༢ ལོའི་ཟླ་ ༢ ཚེས་ ༣ ཉིན་ཡུན་ནན་ཧྲི་ཏེན་ (Shidian)རྫོངས་ནས་སྐྱེས་ཡོད་པ་དང་། ༡༩༨༡ ལོའི་ཟླ་ ༨ པ་ནས་རྒྱ་གཞུང་གི་ལས་ཀ་བྱ་རྒྱུ་མགོ་བཙུགས་འདུག ༡༩༨༥ ལོར་རྒྱ་ནག་གུང་ཁྲན་ཏང་ནང་འཛུལ་བཞུགས་བྱས་ཡོད་འདུག
གསར་འགོད་པ། འཇིགས་མེད་རྒྱ་མཚོ།
