ཧྲོ་ལིན་དགོན་པའི་མཁན་པོ་ཧྲི་ཡོན་ཞིན་གྱི་ནག་ཉེས་ཐེར་འདོན་བྱས་ཡོད་ཀྱང་རྒྱ་ནག་ཆོས་རིག་ལས་ཁུངས་ཀྱིས་ནག་ཉེས་ཞུ་གཏུག་པ་དེ་རྫུན་མ་ཡིན་ལུགས་བསྒྲགས་པར་བརྟེན་སྤྱི་ཚོགས་ཐོག་གླེང་གཞི་ཆེན་པོ་ཆགས་ཡོད་འདུག
ཟླ་སྔོན་མའི་ཚེས་ ༢༥ ཉིན་ཧི་ནན་སོན་ཧྲན་ཧྲོ་ལིན་དགོན་པའི་དགེ་ཕྲུག་ཧྲི་ཀྲིན་ཡེ་ཡིས། དགོན་པ་དེའི་མཁན་པོ་ཧྲི་ཡོན་ཞིན་སངས་རྒྱས་ཀྱི་སྡོམ་ཁྲིམས་ལ་འགལ་ཏེ། བུད་མེད་ལ་འགྲོགས་པ་སོགས་ཀྱི་བྱ་སྤྱོད་ངན་པ་དག་དྲ་རྒྱའི་སྟེང་བཀྲམ་ཡོད་པ་མ་ཟད། དེ་སྔོན་ས་གནས་ཀྱི་སྤྱི་བདེ་ལས་ཁུངས་ཀྱིས་ཧྲི་ཡོན་ཞིན་གྱིས་བུད་མེད་ལ་ངན་འབྲེལ་བྱས་པའི་ནག་ཉེས་ཐོ་འགོད་ཡིག་ཆ་སོགས་བདེན་དཔང་ཆེད་དྲ་ཐོག་ཏུ་བཀོད་ཡོད་པ་མ་ཟད། གོང་རིམ་ལ་ནག་ཉེས་ཡར་ཞུ་བྱས་ཡོད་ཀྱང་། རྒྱ་ནག་ཆོས་རིག་ལས་ཁུངས་ཀྱིས་ཧྲི་ཀྲིན་ཡེ་ཞེས་པའི་མི་ཞིག་མེད་ཚུལ་དང་གནས་ཚུལ་རྫུན་མ་ཡིན་ལུགས་ཁྱབ་བསྒྲགས་བྱས་ཡོད་སྟབས། ཧྲོ་ལིན་དགོན་པའི་སྤྱིའི་དྲག་རྩལ་དགེ་རྒན་ཟུར་བ་ཧྲི་ཡན་ལོ་ (Shi Yanlu) གཙོས་པའི་མི་དྲུག་པེ་ཅིན་དུ་ཕྱིན་ཏེ། འབྲེལ་ཡོད་ལས་ཁུངས་ལ་ཧྲི་ཡོན་ཞིན་གྱི་ནག་ཉེས་ ༡༠ ཡར་ཞུ་བྱས་ཡོད་པའི་སྐོར་རྒྱལ་ཕྱིའི་དྲ་རྒྱའི་བརྒྱུད་ལམ་ཁག་གཙོས་རྒྱ་ནག་གི་སྤྱི་ཚོགས་བརྒྱུད་ལམ་ཁག་གང་མང་ཞིག་ཏུ་སྤེལ་བཞིན་ཡོད་པ་མ་ཟད། ཆབ་སྲིད་དཔྱད་ཞིབ་པ་ཚོས་རྒྱ་ནག་ཆོས་རིག་ལས་ཁུངས་ཀྱི་བྱ་སྤྱོད་དེར་དབྱེ་ཞིབ་སྣ་ཚོགས་བྱེད་ཀྱི་ཡོད་འདུག
ཁ་སང་ཞིན་ཐང་རིན་གྱིས་རྒྱ་ནག་གི་ཞིན་ལཱང་དྲ་བས་གནས་ཚུལ་ལུང་འདྲེན་བྱས་པ་ལྟར་ན། པེ་ཅིན་ལ་ཞུ་གཏུག་བྱེད་དུ་ཕྱིན་པའི་མི་ ༦ གིས་ཧྲི་ཡོན་ཞིན་གྱི་ནག་ཉེས་ཐེར་འདོན་བྱས་པའི་ནང་། ཧྲི་ཡོན་ཞིན་གྱིས་ཧྲོ་ལིན་དགོན་པའི་རྒྱུ་ནོར་དང་ཞལ་འདེབས་ཧམ་ཟ་བྱས་ཏེ་རང་ཉིད་ཀྱི་འཚོ་བ་རྒྱས་སྤྲོས་བྱས་པ་དང་བསྙད་འདོགས་རྒྱུ་ལེན། བུད་མེད་གང་མང་ལ་ངན་འབྲེལ་ཡོད་པ་སོགས་ཀྱི་ནག་ཉེས་ ༡༠ བགྲངས་ཡོད་པ་མ་ཟད། ཁོ་བོའི་ནག་ཉེས་ལ་བདེན་དཔང་བྱེད་མཁན་གྱི་མི་ ༢༠ ཡི་མིང་ཡང་སྤྲད་ཡོད་འདུག ཟླ་འདིའི་ཚེས་ ༤ ཉིན་གྱི་མཚན་གུང་ཏིན་ཧྥིན་གྲོང་ཁྱེར་ཆོས་རིག་ལས་ཁུངས་ཀྱིས་ཧྲི་ཀྲིན་ཡེ་ཞེས་པའི་མི་ཞིག་ཁྱོན་ནས་མེད་ཚུལ་ཁྱབ་བསྒྲགས་བྱེད་ཡོང་དུས། མི་མང་པོས་ཁྱབ་བསྒྲགས་དེ་ཧྲི་ཡོན་ཞིན་ལ་སྲུང་སྐྱོབ་བྱེད་པའི་ཆེད་དུ་སྤེལ་བ་ཡིན་པའི་དོགས་སློང་བྱས་ཡོད་པ་མ་ཟད། རྒྱ་ནག་མི་མང་གིས་ཉེས་ཅན་ཧྲི་ཡོན་ཞིན་ལ་ཞིབ་བཤེར་མ་བྱས་པར་ཧྲི་ཀྲིན་ཡེ་ལ་ཞིབ་བཤེར་བྱེད་དགོས་པའི་རྒྱུ་མཚན་ག་རེ་ཡིན་མིན་སྐོར་ལའང་གླེང་སློང་འདྲ་མིན་བྱུང་ཡོད་འདུག
གོང་གི་གནད་དོན་དེའི་ཐད་རྒྱ་ནག་གི་སྐབས་དོན་དཔྱད་ཞིབ་པ་ཧིན་ཧི་ (Heng He) ཡིས། ཆོས་རིག་ལས་ཁུངས་ལ་ཆོས་ལུགས་ཀྱི་གནད་དོན་ཐག་གཅོད་བྱེད་པའི་ཐོབ་ཐང་ཡོད་པ་མ་རེད། ཆོས་རིག་ལས་ཁུངས་ནི་སྲིད་གཞུང་གི་ལས་ཁུངས་ཤིག་ཡིན་པ་དང་། སྲིད་གཞུང་གིས་ཀྱང་ཆོས་ཕྱོགས་ཀྱི་བྱེད་སྒོ་ལ་ཐེ་གཏོགས་བྱེད་དགོས་དོན་ཡོད་པ་མ་རེད། གལ་སྲིད་ཆོས་རིག་ལས་ཁུངས་ཀྱིས་ཧྲི་ཡོན་ཞིན་གྱི་ལས་དོན་ལ་ཐེ་གཏོགས་བྱས་པ་ཡིན་ན། ཆོས་ལུགས་དེ་རྫུན་མ་ཞིག་ཡིན་པ་གསལ་བཤད་བྱས་པ་རེད། གལ་སྲིད་ཧྲི་ཡོན་ཞིན་གྱིས་ཁྲིམས་འགལ་ཚབས་ཆེན་བྱས་ཡོད་པའི་དབང་དུ་བཏང་ནའང་། ཞིབ་བཤེར་བྱ་མཁན་དེ་ཉེན་རྟོག་པ་དང་ཞིབ་བཤེར་ལྷན་ཁང་ཡིན་པ་ལས་ཆོས་རིག་ལས་ཁུངས་ཕྱི་རུ་འབུད་དགོས་དོན་ཡོད་པ་མ་རེད། ཅེས་སོགས་བརྗོད་འདུག
ཡང་རང་དབང་དཔྱད་གླེང་བ་ཞིན་ཐན་ཞིན་ (Xing Tianxing) གྱིས། རྒྱ་གཞུང་ནི་ཆོས་མེད་སྨྲ་བ་ཡིན་སྟབས་དངོས་གནས་སྒྲུབ་སྦྱོང་བྱེད་མཁན་གྱི་གྲྭ་བ་ཚོར་རྒྱབ་སྐྱོར་བྱེད་ཀྱི་མེད་ལ། ཧྲི་ཡོན་ཞིན་ལྟ་བུའི་གྲྭ་བ་རྫུན་མ་རིགས་ཀྱིས་མང་ཚོགས་ཀྱི་ཆོས་དད་སྒྲུབ་སྦྱོང་དང་། སྲོལ་རྒྱུན་རིག་གནས་ལ་གཏོར་སྐྱོན་བཏང་བ་ཡིན་ན་རྒྱ་གཞུང་གི་འདོད་བློ་དང་མཐུན་གྱི་ཡོད་པ་རེད། ཅེས་སོགས་བརྗོད་འདུག ཕྱི་སྡོད་རྒྱ་རིགས་ཀྱི་བརྒྱུད་ལམ་ཏཱ་ཅི་ཡན་དྲ་བའི་སྟེང་། རྒྱ་ནག་གུང་ཁྲན་ཏང་ཡོན་དང་སངས་རྒྱས་ཆོས་ལུགས་ཀྱི་མགོ་གཙོ་ཀྲའོ་ཕོ་ཁྲོ་(Zhao Puchu) ཡི་རྒྱབ་སྐྱོར་འོག ཧྲི་ཡོན་ཞིན་གྱིས་ཕྱི་ལོ་ ༡༩༩༧ ལོ་ནས་ཧྲོ་ལིན་དགོན་པའི་ནང་བྱ་བ་བྱས་ཤིང་། ཕྱི་ལོ་ ༡༩༩༩ ལོར་དངོས་སུ་དགོན་པ་དེའི་མཁན་པོ་ཆགས་ཡོད་པ་དང་། ཀྲའོ་ཕོ་ཁྲོ་ཟེར་བ་དེ་རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་ལ་འབྲེལ་བ་དམ་པོ་ཡོད་མཁན་ཞིག་ཡིན་སྐོར་སོགས་བཀོད་འདུག
ཧྲི་ཡོན་ཞིན་ནི་ཕྱི་ལོ་ ༡༩༦༥ ལོའི་ཟླ་ ༩ བའི་ནང་ཨན་ཧུའེ་ཞིང་ཆེན་གྱི་ཡིན་ཧྲང་རྫོང་དུ་སྐྱེས་ཤིང་། ཁོའི་སྐྱ་མིང་ལ་ལེའུ་ཡིན་ཁྲིན་ (Liu Yingcheng) ཟེར་གྱི་ཡོད་འདུག ད་ལྟ་ཧྲོ་ལིན་དགོན་པའི་མཁན་པོ་དང་རྒྱ་ནག་སངས་རྒྱས་ཆོས་ལུགས་མཐུན་ཚོགས་ཀྱི་ཚོགས་གཙོ་གཞོན་པ་དང་། ཧིན་ནན་ཞིང་ཆེན་གྱི་སངས་རྒྱས་ཆོས་ལུགས་མཐུན་ཚོགས་ཀྱི་ཚོགས་གཙོ་བཅས་ཡིན་འདུག
གསར་འགོད་པ། འཇིགས་མེད་རྒྱ་མཚོ།
