བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པའི་ཐོག་ཡོངས་གྲགས་བྱས་པའི་གཏམ་བཤད་གཅིག་དང་ཡོངས་གྲགས་མ་བྱས་པའི་གཏམ་བཤད་དྲུག་འདུག་ཟེར།
དེ་རིང་སྔ་དྲོའི་ཆུ་ཚོད་ ༩།༡༥ ཐོག་གངས་སྐྱིད་གཉའ་ཁྲི་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བོད་ནང་གི་ད་ལྟའི་གནས་སྟངས་ཐོག་བགྲོ་གླེང་ཚོགས་འདུ་ཞིག་ཚོགས་སོང་བ་དང་། ཚོགས་ཐོག་ཏུ་སྐུ་མགྲོན་གཙོ་བོར་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་དྲུང་འཕར་ཀུན་དགའ་བཀྲ་ཤིས་ལགས་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་གཉིས་གཙོས། སྲིད་བྱུས་ཉམས་ཞིབ་ཁང་གི་འགན་འཛིན་རྒན་གཞོན་རྣམ་གཉིས་དང་སྲི་ཞུ་ལས་བྱེད། དེ་བཞིན་སྲིད་བྱུས་ཉམས་ཞིབ་ཁང་གི་གཏམ་བཤད་གནང་མཁན་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་འཛོམས་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་བོད་ནང་གི་རང་ལུས་མེར་སྲེག་དང་འབྲེལ་བའི་ཐོག་གཏམ་བཤད་གནང་དོན། ཕྱི་ལོ་ ༢༠༡༤ ལོར་ཨ་རིའི་ཨར་ཝར་ཌི་གཙུག་ལག་སློབ་ཆེན་གྱིས་བོད་ནང་གི་རང་ལུས་མེར་སྲེག་གི་གནད་དོན་དང་འབྲེལ་བའི་ཐོག་ལ་ཉམས་ཞིབ་ཅིག་བྱས་འདུག དེའི་ནང་རྒྱ་ནག་གཞུང་གིས་སྤྱི་ཚོགས་དྲ་ལམ་ཁག་ལ་གནས་ཚུལ་དམ་བསྒྲགས་བྱེད་སྐབས་གང་འདྲ་བྱས་ནས་བྱེད་ཀྱི་ཡོད་མེད་དང་། དམིགས་བསལ་ ༢༠༡༡ ནས་ ༢༠༡༣ ལོའི་བར་བོད་ནང་བོད་མི་ ༡༢༠ ཡིས་རང་ལུས་མེར་བསྲེགས་གནང་སྟེ། ཕྱི་ལོ་ ༢༠༡༢ ལོར་རང་ལུས་མེར་སྲེག་གནང་མཁན་མང་ཤོས་ཆགས་ཡོད་པ་མ་ཟད། སྐབས་དེའི་ཕྱི་ཟླ་ ༡༠ དང་ ༡༡ ནང་རྒྱ་ནག་གི་སྲིད་འཛིན་གསར་པ་བསྐོ་བཞག་བྱ་རྒྱུ་གཙོས་ཚོགས་འདུ་མང་པོ་ཚོགས་དགོས་པ་ཁ་ཐུག་བརྒྱབ་སྟེ། རང་ལུས་མེར་བསྲེགས་མང་པོ་གནང་ཡོད་སྟབས། ཉམས་ཞིབ་ཀྱི་གྲུབ་དོན་ནང་རང་ལུས་མེར་སྲེག་བྱེད་སྐབས་ཀྱི་གནས་ཚུལ་ཁ་ཤས་གསལ་པོ་མེད་པ་མ་ཟད། པར་རིགས་མ་རག་པའི་གནས་ཚུལ་བྱུང་བ་དང་། ཡང་ཁ་ཤས་ཀྱིས་རང་ལུས་མེར་བསྲེགས་གནང་དགོས་པའི་རྒྱབ་ལྗོངས་གནས་ཚུལ་དང་བཅས་པ་ཁྱབ་བསྒྲགས་ཤུགས་ཆེ་ཆགས་དགོས་དོན་ཁྲོད་ནས་གཅིག་ནི། གཟའ་སྤེན་པ་དང་ཉི་མར་རང་ལུས་མེར་སྲེག་གནང་བ་ཡིན་ན། ཕྱི་ཕྱོགས་ལ་གནས་ཚུལ་མགྱོགས་པོ་ཞེ་པོ་ཞིག་བཏང་ཐུབ་ཀྱི་ཡོད་པ་དང་། རེས་གཟའ་ཟླ་བ་ནས་པ་སངས་ནང་ལོགས་ལ་རང་ལུས་མེར་བསྲེགས་གནང་བ་ཡིན་ན། དམ་དྲག་གི་དབང་གིས་ཕྱི་ཕྱོགས་ལ་གནས་ཚུལ་ཁྱབ་བརྡལ་འགྲོ་རྒྱུ་ཁག་པོ་ཡོད་པ་མ་ཟད། རྒྱུན་རིང་ས་ཁུལ་གཅིག་ནང་ལྷག་གི་ཡོད་པ་གསལ་སྟོན་བྱས་ཡོད་སྟབས། ང་ཚོས་དེའི་ཐོག་ཉམས་ཞིབ་བྱ་རྒྱུ་ཡོད་རེད་བསམ་གྱི་འདུག རྒྱ་ནག་རྒྱལ་ཡོངས་ནང་སྤྱི་ཚོགས་དྲ་ལམ་སྤྱོད་མཁན་ས་ཡ་མང་པོ་ཡོད་ཀྱང་། རྒྱ་ནག་གཞུང་གིས་རང་ལུས་མེར་བསྲེགས་ཀྱི་གནས་ཚུལ་ག་རེ་ཐོན་པ་ཡིན་ཡང་། ཁོ་ཚོས་ཚབས་ཆེན་ཞིག་ལ་བརྩིས་ནས་དུས་ཐུང་ནང་བརྒྱ་ཆ་ ༨༠ ཙམ་ནག་བསུབ་གཏོང་ཐུབ་ཀྱི་ཡོད་སྟབས། ང་ཚོས་དེ་ཚོའི་ཐོག་ལའང་བསམ་བློ་གཏོང་དགོས་པ་རེད་བསམ་གྱི་འདུག ཅེས་བརྗོད་སོང་།
ཚེ་རིང་མཚོ་མོ་ལགས་ཀྱིས་བོད་དང་རྒྱ་ནག་ནང་ཚབས་ཆེན་གནས་ཚུལ་ག་རེ་ཐོན་པ་ཡིན་ཡང་རྒྱ་ནག་གཞུང་གིས་རྒྱལ་སྤྱིའི་ཐོག་རྒྱལ་ནང་གི་གནས་ཚུལ་ཡིན་ལུགས་ལོག་འགྲེལ་བྱེད་བཞིན་ཡོད་སྐོར་བརྗོད་དོན། ང་ཚོ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་འདུ་མང་པོ་ཞིག་ལ་འགྲོ་སྐབས། ང་ཚོར་ཚོར་སྣང་ཆེན་པོ་ཞིག་ག་རེ་བྱུང་ཟེར་ན། ལོ་ཤས་ནང་རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ནང་ལས་ཀ་བྱེད་སྟངས་འདྲ་པོ་སྟེ། ཁོ་ཚོར་དངུལ་མང་པོ་ཡོད་སྟབས། མི་མང་པོ་ཞིག་གཏོང་ཐུབ་ཀྱི་ཡོད་པ་མ་ཟད། ཐ་ན་ཚོགས་འདུ་དེ་འདྲར་སོ་པ་བཀྲམ་རྒྱུའི་སྐད་ཆ་ཡང་ཆགས་ཡོད་པ་རེད། མཉམ་འབྲེལ་རྒྱལ་ཚོགས་ནི་ལུང་པ་མེད་པ་དང་རང་དབང་མེད་པ་དག་གི་སྐད་རྒྱག་ས་ཞིག་ཆགས་ཀྱི་ཡོད་སྟབས། རྒྱ་ནག་གཞུང་གིས་མཉམ་ཞུགས་བྱེད་ཀྱི་ཡོད་མདོག་བྱས་ནས་ལས་ཀ་ལོག་པར་བྱེད་བསྡད་ཀྱི་འདུག ད་བར་མཉམ་འབྲེལ་རྒྱལ་ཚོགས་ཀྱིས་སྒྲིག་གཞི་མང་པོ་ཞིག་བཟོས་ཡོད་པ་མ་ཟད། ལྷག་པར་དུ་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་གི་ཚོགས་པ་ཁག་དང་འཐབ་རྩོད་པ་སོགས་ཀྱིས་ཞུ་གཏུག་རྒྱག་ཆོག་པའི་སྒྲིག་གཞི་འདྲ་མིན་བཟོས་ཡོད་ཀྱང་། འདས་པའི་ལོ་ཤས་ནང་རྒྱ་ནག་གཞུང་གིས་གཞུང་འབྲེལ་མིན་པའི་ཚོགས་པ་ཁག་གི་ཁ་འགོག་རྒྱུ་གཙོས། བོད་ནང་གི་གནས་སྟངས་དང་སྲིད་བྱུས་ཐོག་སྐྱོན་བརྗོད་བྱས་པ་ཡིན་ན། རྒྱ་ནག་རྒྱལ་ཁབ་ཀྱི་བདག་དབང་གནད་དོན་ལ་ཐེ་བྱུས་བྱེད་ཀྱི་ཡོད་པའི་ལོག་འགྲེལ་རྒྱག་གི་ཡོད་པ་དེ་ཚབས་ཆེན་ཞིག་རེད་བསམ་གྱི་འདུག དཔེར་ན། གནམ་བདེ་སྒོ་མོ་ཆེའི་ཐང་ཆེན་གྱི་དོན་རྐྱེན་བྱུང་སྐབས། རྒྱ་ནག་གཞུང་གིས་མེ་མདའ་བརྒྱབ་ནས་ཞི་རྒོལ་བ་སློབ་ཕྲུག་མང་པོ་བསད་པའི་གནད་དོན་མཉམ་འབྲེལ་རྒྱལ་ཚོགས་ནང་གླེང་སློང་བྱེད་སྐབས། ཁོ་ཚོས་སོ་སོའི་མི་མང་ལ་མེ་མདའ་རྒྱག་ཆོག་པའི་བདག་དབང་ཡོད་སྐོར་བརྗོད་ཡོད་སྟབས། ད་ལྟ་ང་ཚོས་རྒྱ་ནག་དང་བོད་ནང་གི་གནས་སྟངས་གང་འདྲ་ཡིན་མིན་ཚོད་དཔག་གང་ལ་གང་འཚམ་བྱེད་ཐུབ་ཀྱི་རེད་བསམ་གྱི་འདུག ཅེས་སོགས་བརྗོད་སོང་།
དེའི་རྗེས་བདེ་སྲུང་ལས་ཁུངས་ཀྱི་དྲུང་འཕར་ཀུན་དགའ་བཀྲ་ཤིས་ལགས་ཀྱིས་ད་ལྟའི་བོད་ནང་གི་གནས་སྟངས་ཐོག་བོད་རིགས་ལས་བྱེད་ཚོའི་བསམ་བློ་གཏོང་སྟངས་གང་ཡིན་སྐོར་བརྗོད་དོན། ང་ཚོས་བོད་ནང་གི་བོད་རིགས་ལས་བྱེད་ཀྱི་བསམ་བློ་གཏོང་སྟངས་དེ། བདེ་སྲུང་ལས་ཁུངས་གིས་ག་དུས་ཡིན་ཡང་གནས་ཚུལ་རྟོག་ཞིབ་བྱ་རྒྱུའི་ནང་ནས་གལ་ཆེ་ཤོས་ཤིག་ལ་འཛིན་གྱི་ཡོད་པ་རེད། གང་ཡིན་ཟེར་ན། བོད་ཀྱི་དོན་གྱི་བདག་པོ་བོད་ནང་ཡོད་སྟབས། ཁོ་ཚོས་བོད་ཀྱི་གནས་ཚུལ་ལ་ལྟ་སྟངས་དང་ང་ཚོས་ལྟ་སྟངས་བར་ལ་ས་དང་གནམ་གྱི་ཁྱད་པར་ཡོད་པ་རེད། དཔེར་ན། རྒྱ་ནག་གཞུང་གི་ཆབ་སྲིད་ཀྱི་གནས་ཚུལ་མར་བཤད་སྐབས་ཐ་སྙད་འགའ་ཤས་ང་ཚོས་ཀློག་གི་ཡོད་ཀྱང་ཚིག་གི་གོ་དོན་ངོ་མ་གང་ཡིན་ཤེས་ཀྱི་མེད་སྟབས། བོད་རིགས་ལས་བྱེད་ཀྱི་བསམ་བློ་གཏོང་སྟངས་གལ་ཆེན་པོ་ཆགས་ཡོད་པ་རེད། ང་ཚོ་ཚང་མས་སྐོར་རྭ་རྒྱག་ས་ནི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པའི་ཞི་ཅིན་ཕིན་གྱི་གཏམ་བཤད་ལ་བལྟས་ནས་སྐོར་རྭ་རྒྱག་གི་ཡོད་པ་རེད། ང་རང་གི་ལྟ་ཚུལ་ག་རེ་ཡིན་ཟེར་ན། འདིའི་ཐོག་ནས་མ་འོངས་པར་བོད་ལ་ཞེ་པོ་ཞིག་ཡག་ཏུ་འགྲོ་གི་རེད་བསམ་བསམ་ཞིག་མཐོང་གི་མི་འདུག་ལ། ད་ལྟ་ལས་སྡུག་ཏུ་འགྲོ་རྒྱུ་ཨེ་ཡོད་བསམ་གྱི་འདུག ང་རང་གིས་བལྟས་པ་ཡིན་ན་ཆབ་སྲིད་ཐོག་དམ་དྲག་ཧ་ཅང་གི་ཆེན་མོ་དང་དཔལ་འབྱོར་ཐོག་ལྷོད་ཏུ་འགྲོ་ས་རེད། འདི་ངའི་སྤྱི་ཡོངས་ཀྱི་ཚོགས་ཆེན་དྲུག་པའི་ལྟ་སྟངས་རེད། ཉེ་ཆར་ང་ཚོར་ཁག་གཉིས་ཙམ་ནས་ལན་བསླེབས་བྱུང་། རིགས་གཅིག་ཕྱི་རྒྱལ་དང་རིགས་གཅིག་རྒྱ་རིགས་ངོ་ཤེས་པ་དེ་འདྲ་བརྒྱུད་ནས་བོད་ནང་ནས་ཚུར་ལན་བསླེབས་པའི་ནང་ལ། ཚོགས་ཆེན་ཐེངས་དྲུག་པའི་ཞི་ཅིན་ཕིན་གྱི་གཏམ་བཤད་དེ་ག་རེ་རེད་ཟེར་ན། སྔོན་ནས་ཚོགས་འདུ་ཚོགས་ཏེ་ཡོངས་གྲགས་བྱས་པའི་གཏམ་བཤད་དེ་དང་། དེ་མིན་པའི་གཏམ་བཤད་དྲུག་ཡོད་པ་དེ་རེད། ལན་སྐུར་མཁན་གྱིས་གང་འདྲ་བྱས་ནས་བསྐུར་ཡོད་རེད་ཟེར་ན། ཞི་ཅིན་ཕིན་གྱི་གཏམ་བཤད་དེ་ཡོངས་གྲགས་བྱས་པའི་གཏམ་བཤད་དེ་རེད། ཡོངས་གྲགས་མ་བྱས་པའི་གཏམ་བཤད་ཁ་ཤས་ཤིག་འདུག དེ་ཚོའི་ནང་དོན་གསལ་པོ་རྟོགས་ཀྱི་མི་འདུག་ཟེར་བ་ངག་ཐོག་གི་ལན་འབྱོར་པ་དེ་རེད། ཧོང་ཀོང་ནང་ལ་རྒྱ་ནག་གཞུང་གི་གསར་འགྱུར་ཧྥི་ནེག་སི་ (Phoenix) ཟེར་བ་ཞིག་ཡོད་པ་རེད། ཚགས་པར་དེའི་ནང་ག་རེ་བྲིས་ཡོད་པ་རེད་ཟེར་ན། བོད་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་དེའི་སྒང་ལ་གཏམ་བཤད་དྲུག་ཡོད་པ་རེད། ལན་བསྐུར་མཁན་སྔོན་མ་དེས་གཏམ་བཤད་ཀྱི་གྲངས་ཀ་ལབ་ཡོད་པ་མ་རེད། ཚོགས་ཆེན་དྲུག་པའི་ཐོག་གི་ཞི་ཅིན་ཕིན་གྱི་གཏམ་བཤད་དེ་ཡོངས་གྲགས་བྱ་རྒྱུ་ཡིན་པ་དང་། ཡོངས་གྲགས་མ་བྱས་པ་དེ་ང་ཚོས་ཤེས་ཀྱི་ཡོད་མ་རེད་ཟེར་བ་དེ་ཆགས་ཡོད་སྟབས། ཧྥི་ནེག་སི་ཟེར་བ་དེའི་ནང་ག་རེ་བྲིས་ཡོད་རེད་ཟེར་ན། ཉེ་ཆར་ཚོགས་འདུ་ཐེངས་དྲུག་པ་དེའི་སྒང་ལ་གཏམ་བཤད་མི་འདྲ་བ་དྲུག་ཡོད་པ་རེད། གསུམ་དེ་སུ་རེད་ཟེར་ན་ཞི་ལི་ཡུད་ཀྱི་གཏམ་བཤད་རེད། དེ་ཡང་ཞི་ཅིན་ཕིན་དང་ལི་ཁེ་ཆང་། ཡུས་ཀྲིང་ཧྲིང་གསུམ་གྱི་གཏམ་བཤད་དང་། གཞན་གསུམ་དེ་ག་རེ་རེད་ཟེར་ན་བགྲོ་གླེང་གི་གཏམ་བཤད་ཡིན་པར་བརྟེན། ཚོགས་འདུའི་ཐོག་བཀྲམ་རྗེས་ཡར་བསྡུས་ཡོད་སྟབས། བོད་ཀྱི་གནས་ཚུལ་དེ་གང་འདྲའི་རྫི་གསང་པོ་རེད་འདུག་གསལ་པོ་མཐོང་གི་རེད་ཅེས་བཀོད་ཡོད་པ་རེད། ཅེས་དང་།
ཁོང་གིས་མུ་མཐུད། ལན་བསྐུར་མཁན་རིགས་གཅིག་ཕྱི་རྒྱལ་དང་རིགས་གཅིག་བོད་རིགས་ལས་བྱེད་རེད། བོད་རིགས་ལས་བྱེད་ཀྱི་ལན་དེའི་ནང་ག་རེ་ཡོད་རེད་ཟེར་ན། ཉེ་ཆར་ཚོགས་འདུ་དྲུག་པའི་ནང་ལ་སྔར་མེད་པའི་སྐད་ཆ་བཤད་པ་དེ་འདྲ་འདུག ཁོ་རང་གིས་དཔེ་མཚོན་བགྲངས་པའི་ནང་། གཅིག༽ མི་མང་གི་འཚོ་བར་དོ་སྣང་བྱེད་དགོས་པ་དང་། གཉིས༽ སྲོལ་རྒྱུན་གྱི་རིག་གནས་ལ་སྔར་ལྷག་དོ་སྣང་བྱེད་དགོས་པ། གསུམ༽ བླ་མ་ཚོས་སྤྱི་ཚོགས་ཀྱི་ལས་འགུལ་དང་རིག་གཞུང་གི་ཁྱབ་ཁོངས་ནང་ལ་ནུས་པ་འདོན་རྒྱུར་འབད་བརྩོན་བྱེད་དགོས་པ་རེད་ལབ་པ་དེ་ཚོ་དོ་སྣང་བྱེད་དགོས་པའི་གནས་ཚུལ་རེད་ཅེས་དང་། རིགས་གཅིག་གིས་ཚོགས་འདུའི་ནང་བྱུང་བའི་སྐད་ཆ་དེ་ཚོ་ཕྱི་ལོགས་ལ་ཞེ་པོ་ཞིག་གོ་རྒྱུ་མི་འདུག དེར་བརྟེན། ཞི་ཅིན་ཕིན་གྱི་གཏམ་བཤད་ནང་བལྟས་པ་ཡིན་ན། ཆོས་དད་རང་དབང་ལ་བརྩི་བཀུར་བྱེད་དགོས་པ་དང་། མི་མང་གི་དཔལ་འབྱོར་དང་འཚོ་བ་ཡར་རྒྱས་གཏོང་དགོས་པ་སོགས་ཀྱི་གནད་དོན་ཐོག་ཁོ་ཚོས་མངོན་གསལ་དོད་པོས་ལབ་མེད་ཀྱང་། མི་སེམས་འཐོར་ཞིག་རུག་རུག་བཟོ་དགོས་ཀྱི་འདུག་ཟེར་བའི་བཟོ་སྟངས་བཟོ་ལུགས་དེ་ཡང་དཔལ་འབྱོར་ཡར་རྒྱས་ལ་བརྟེན་ནས་བྱེད་ཀྱི་ཡིན་ཟེར་གྱི་ཡོད་སྟབས། ཁོ་རང་གི་ལན་དེའི་ནང་བོད་རིགས་ལས་བྱེད་པའི་ལྟ་སྟངས་མི་འདྲ་བ་ཡོད་རེད་ཟེར་བ་དེ། དེ་རིང་ཚོགས་འདུའི་ཐོག་ནས་གསལ་པོ་མཐོང་ཐུབ་པ་ཞིག་ལ་༧རྒྱལ་བ་རིན་པོ་ཆེར་ཁོ་ཚོའི་རྣམ་འགྱུར་དེ་ཧ་ལས་པའི་མཁྲེགས་པོ་རེད་བཞག ང་ཚོས་ནམ་རྒྱུན་རྒྱ་ནག་ནང་ལ་རྙིང་ཞེན་དང་གུ་ཡངས་ཕྱོགས་ཁག་གཉིས་ཀྱི་ཁྲོད་ནས་༧རྒྱལ་བ་རིན་པོ་ཆེར་རྣམ་འགྱུར་མཁྲེགས་པོ་སྟོན་མཁན་གྱི་དཔོན་ངན་རྙིང་ཞེན་ཅན་ཚོས། ༧རྒྱལ་བ་རིན་པོ་ཆེར་མཁྲེགས་པོ་བྱ་རྒྱུར་དགའ་པོ་བྱེད་ཀྱི་འདུག ངའི་བསམ་ཚུལ་ལ་༧རྒྱལ་བ་རིན་པོ་ཆེར་མཁྲེགས་བཟུང་ཅན་གྱི་རྣམ་འགྱུར་སྟོན་སྟངས་དེ་གནས་ཚུལ་གསུམ་ལ་ལྟ་དགོས་ཀྱི་འདུག དང་པོ༽ ཞི་ཅིན་ཕིན་གྱི་མི་ཚེའི་ལོ་རྒྱུས་ལ་བལྟས་པ་ཡིན་ན། ཆབ་སྲིད་ཀྱི་འཐབ་རྩོད་དང་ཁོར་ཡུག་འདྲ་མིན་ནང་འཚར་ལོངས་བྱུང་མཁན་གྱི་མི་ཞིག་ཡིན་སྟབས། དུས་ཚོད་གང་འདྲ་ཞིག་ལ་སྐད་ཆ་གང་འདྲ་ཞིག་བཤད་དགོས་མིན་ཆ་ཚང་རྒྱུས་མངའ་ཡོད་མཁན་གྱི་མི་ཞིག་ཡིན་པར་བརྟེན། ༧རྒྱལ་བ་རིན་པོ་ཆེར་མཁྲེགས་འཛིན་གྱི་རྣམ་འགྱུར་འཛིན་རྒྱུ་དེ། ཞི་ཅིན་ཕིན་ཁོ་རང་གི་ཐབས་བྱུས་ཀྱི་ཐོག་ནས་འདི་འདྲ་ཞིག་མ་བྱས་ན་འགྲོ་ས་ཡོད་མ་རེད་ཟེར་ནས་བསམ་བློ་བཏང་བཞག་པ་ཞིག་ཡིན་ན་ཞེས་པ་དང་གཅིག་དང་། དེ་མིན་ན་རྙིང་ཞེན་ཤོག་ཁག་གི་འགོག་རྐྱེན་བསླེབས་ནས་ཆགས་པ་ཡིན་ན་ཞེས་པ་དང་གཉིས། ཡང་མིན་ན་ཞི་ཅིན་ཕིན་ཁོ་རང་གི་བསམ་བློ་རང་དེ་འདྲ་ཡིན་ན་ཟེར་བ་བཅས་གང་ཡིན་ང་ཚོས་ཚོད་དཔག་བྱེད་ཐུབ་ཀྱི་མི་འདུག ཡིན་ནའང་ངའི་གྲོགས་པོ་ཁག་ཅིག་གིས་གལ་སྲིད་གོང་གི་དེ་གཉིས་ཡིན་པ་ཡིན་ན། མ་འོངས་པར་ང་ཚོར་རེ་བ་ཡོད་ཡོད་པ་རེད། ག་རེ་རེད་ཟེར་ན་དེ་གཉིས་ག་དུས་ཡིན་ནའང་འགྱུར་བ་འགྲོ་བསྡད་པ་ཞིག་རེད། གལ་སྲིད་གསུམ་པ་དེ་ཡིན་ན། ང་ཚོར་ཏོག་ཙམ་ཁག་པོ་བྱེད་ཀྱི་རེད། དེ་ཡིན་ན་ཁོ་ཚོའི་རྩིས་དེ་ག་རེ་རེད་ཟེར་ན། ༧རྒྱལ་བ་རིན་པོ་ཆེ་ཕྱི་རྒྱལ་ལ་དགོངས་པ་རྫོགས་བཅུག སྐུ་མདུན་དགོངས་པ་རྫོགས་པ་ཡིན་ན་བོད་དོན་བརླག་གི་རེད་ཟེར་བའི་བསམ་བློ་དེ་གཏོང་གི་མིན་འགྲོ་ཞེས་པ་དེ་ཁོ་རང་གི་བསམ་བློ་རེད། ད་ལྟ་ཁོ་ཚོའི་བསམ་བློ་གསུམ་པོ་དེ་ཚོའི་ཁྲོད་ནས་ཤུགས་ཆེ་བས་ག་པར་འགྲོ་གི་ཡོད་རེད་ཟེར་ན། གོང་གི་གཉིས་དེར་འགྲོ་གི་ཡོད་པ་མ་ཟད། ང་རང་གི་ལྟ་སྟངས་ཀྱང་དེ་རང་ཡིན། ཞེས་བརྗོད་སོང་།
ཁོང་གིས་བོད་ནང་གི་གནས་སྟངས་ལ་ལྟ་སྐབས་དགའ་སྐྱོ་ཟུང་འབྲེལ་ཐོག་ནས་ལྟ་རྒྱུ་གལ་ཆེན་ཡིན་སྐོར་བརྗོད་དོན། ང་ཚོས་སྐྱོ་སྣང་ཐོག་ནས་བལྟས་པ་ཡིན་ན། ད་ལྟའི་བོད་ནང་གི་གནས་སྟངས་ཛ་དྲག་དང་ཐབས་སྐྱོ་པོ་རེད། གནས་ཚུལ་ལ་ལྟ་སྐབས་དགའ་སྣང་དང་སྐྱོ་སྣང་གཉིས་ཀྱི་ལྟ་སྟངས་མི་འདྲ་བ་ཡོད་སྟབས། སྐྱོ་སྣང་ཐོག་ནས་ལྟ་སྐབས་ཞེ་དྲགས་དཀའ་ལས་ཁག་པོ་ཡོད་པ་འདྲ་པོ་ཞིག་ཡོད་ཀྱང་། དགའ་སྣང་ཐོག་ནས་བལྟས་པ་ཡིན་ན་རེ་བ་མེད་པ་རྩ་ནས་མ་རེད། བོད་ནང་གི་གཞོན་སྐྱེས་མི་རབས་དེ་ཚོ་རྒྱ་ནག་གཞུང་གིས་བཤད་པ་ལྟར། ཁོ་ཚོའི་སེམས་དེ་པེ་ཅིང་ལ་མེད་པར་རྡ་རམ་ས་ལར་ཡོད་པ་ང་ཚོས་གནས་ཚུལ་ལ་བལྟས་ན་གསལ་པོ་རེད། ཁོ་ཚོས་ནམ་རྒྱུན་ལབ་ཀྱི་ཡོད་པ་རེད། ང་ཚོར་རྒྱུག་པ་གཞུས་ཀྱང་ཡར་འ་འུར་ལབ་ས་མི་འདུག་ཀྱང་། ང་ཚོས་རྒྱུག་པ་གཟེད་པ་ཡིན་ཡང་འ་འུར་ཕྱི་ལོགས་ནས་ལབ་ཀྱི་ཡོད་སྟབས། ཕྱི་རྒྱལ་ལ་ཡོད་མཁན་གྱི་བོད་པ་ཚོར་ཁོ་ཚོས་རེ་བ་བཅོལ་གྱི་ཡོད་པ་གསལ་པོ་ཡིན་པར་བརྟེན། ངས་མ་འོངས་པར་རེ་བ་ཡོད་རེད་བསམ་གྱི་འདུག ཅེས་སོགས་བརྗོད་སོང་།
ལྷན་ཚོགས་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བདུན་གྱིས་ད་ལྟའི་བོད་ནང་གི་འགྲོ་བ་མིའི་ཐོབ་ཐང་དང་། ད་ལྟའི་བོད་ནང་གི་གནས་སྟངས་སྤྱི་དང་བྱེ་བྲག་ཏུ་ཛ་དྲག་གི་གནད་དོན་ཁག དེ་བཞིན་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་དྲུག་པ། རྒྱ་ནག་གི་དམག་དཔུང་ནང་གྲངས་ཉུང་མི་རིགས་སྤྱི་དང་ཡང་སྒོས་བོད་རིགས་ཀྱི་གནས་ཚུལ། བོད་ནང་སྤྱི་ཚོགས་དྲ་ལམ་གྱི་ཤུགས་རྐྱེན། བོད་ནང་གི་འཛུགས་སྐྲུན་དང་འཁྱོག་བཤད་ཀྱི་དོན་འགྲེལ། བོད་མཐོ་སྒང་གི་གནད་དོན་དེ་ཇི་ལྟར་བྱས་ནས་གལ་ཆེ་ཆགས་པ་ཡིན། རྒྱ་ནག་ནང་དམར་ཤོག་ཚོགས་པས་ད་བར་ལུགས་མཐུན་ཡིན་ཚུལ་གྱི་སྲིད་དབང་རྒྱུན་འཛིན་ཇི་ལྟར་བྱེད་ཀྱི་ཡོད་པའི་སྐོར་དང་། རྒྱ་ནག་གི་དཀའ་ངལ་དེ་ག་ཚོད་ཙམ་གྱིས་ནང་ལོགས་ཀྱི་དཀའ་ངལ་ཡིན་ནམ་ཞེས་པ་བཅས་ཀྱི་བརྗོད་གཞིའི་ཐོག་གཏམ་བཤད་དང་བགྲོ་གླེང་གནང་ཡོད་འདུག
གསར་འགོད་པ། དོན་གྲུབ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཁོ་ཚོས་ནམ་རྒྱུན་ལབ་ཀྱི་ཡོད་པ་རེད། ང་ཚོར་རྒྱུག་པ་གཞུས་ཀྱང་ཡར་འ་འུར་ལབ་ས་མི་འདུག་ཀྱང་། ང་ཚོས་རྒྱུག་པ་གཟེད་པ་ཡིན་ཡང་འ་འུར་ཕྱི་ལོགས་ནས་ལབ་ཀྱི་ཡོད་སྟབས། ཕྱི་རྒྱལ་ལ་ཡོད་མཁན་གྱི་བོད་པ་ཚོར་ཁོ་ཚོས་རེ་བ་བཅོལ་གྱི་ཡོད་པ་གསལ་པོ་ཡིན་པར་བརྟེན། ངས་མ་འོངས་པར་རེ་བ་ཡོད་རེད་བསམ་གྱི་འདུག ཅེས་སོགས་བརྗོད་སོང་།
གང་ལྟར་ཡང་བོད་པ་ཚོས་ཐབས་ཤེས་ཡོད་དགུ་རྩེ་སྤྲུལ་གྱིས་ཕྱི་རྒྱལ་འཕུར་ཐབས་བྱེད་ཀྱི་ཡོད་པ།དེ་མིན་བོད་ནང་ལོག་ཐབས་ཁོ་ན་བྱེད་བཞིན་ཡོད་པ་ང་ཚོས་ལས་ཀྱི་སྣེ་མོ་བ་རྣམས་ཀྱི་མཐོང་གི་ཡོད་པ་མ་རེད།མིང་དང་སྒོར་མོ་ཁོ་ན་རེད་འདུག
ཚོགས་པ་དང་སྐྱིད་སྡུག་ཁག་མང་དག་ཞིག་ལ་སྤྱི་ཚོགས་རྙིང་པ་ལམ་དང་ལུགས་སྲོལ་ད་དུང་ཡང་ཡོད་མུས་རེད།
དཔེར་ན་སྐྱིད་ཐུས་གྲོས་ཚོགས་སུ་ཡིན་ན་ཚོགས་པ་ནང་་ལྐོལ
སྐད་ཆ་འདི་ཞིབ་འཇུག་བྱས་པའི་གྲུབ་དོན་ཞིག་ཡིན་ཐང་མོད། བོད་ནང་དུ་བཞུགས་མཁན་ཚོའི་གནས་སྟངས་དམ་དུ་གཏོང་བའི་རྒྱུར་ཡང་མི་འགྱུར་བའི་ངེས་བ་མི་འདུག
ཁ་སང་དེ་རིང་བོད་ནང་གི་གཞོན་སྐྱེས་མང་པོར་ཁ་བརྡ་བྱས་ན་འདི་ལྟར་ཟེར་གི་འདུག ཁྱེད་ཚོར་ཕྱི་ན་རང་དབང་ཆ་བར་ཡོད་པ་དང་། རང་དབང་འཐེབ་རྩོད་ཀྱི་གནས་རིམ་དང་དགོས་མཁོ། བྱེད་ཐབས་དང་རྒྱབ་ལྗོངས་སོགས་སློབ་གསོ་སྤྲད་ཡོད་མོད། འོན་ཀྱང་དེང་སྐབས་སྲིད་སྐྱོང་དང་སྤྱི་འཐུས་འོས་འདེསབ་སླེབ་ལ་ཉེ་སྐབས། རང་ཚིགས་མེད་པའི་སྐད་ཆ་བཤད་མཁན་དང་འགན་མི་འཁྱེར་བའི་སྐད་ཆ་བཤད་མཁན། དཀྲུགས་གཞི་ཅན་གྱི་སྐད་ཆ་བཤད་མཁན། དགོས་པ་དང་དམིགས་ཡུལ་གང་ཡང་མེད་པར་ཚོད་ཚོད་ལ་དཀྲུགས་ཤིང་དཀྲོགས་བསྡད་མཁན་སོགས། མདོར་ན་སྐད་ཆ་ཚིག་གཅིག་ཡིན་རུང་ཉམས་བཞག་ནས་བཤད་ན་མ་གཏོགས།་བོད་ནང་གི་བོད་མི་ཚོས་ཅིག་ཅིག་ཅིག་བྱས་རབས་དང་མིིག་མིག་བྲིས་ནས་བཀོད་རབས། རང་དབང་ལུང་པར་རང་དབང་གི་སྨྲ་བརྗོད་བེད་སྤྱོད་གཏོང་རྐྱང་མི་གནང་བར་ཞུ། ང་ཚོའི་འདི་ནས་ཕྱིའི་རྒྱལ་ལ྄བ་ཁག་གི་ཁྲིམས་ཀྱི་འགྲོ་སྟངས་ལྟར་དང་། ཡང་ན་བོད་རང་གི་ཡིག་ཆ་ཁག་ཏུ་བཀོད་དེ་གཏན་འབེམས་གནང་འདུག་པ་གཞིར་བཞག་ནས་ཡིད་འཛིན་དང་བཤད་འབྲི་གནང་རྒྱུ་གལ་ཆེ་སྙམ།