རྒྱ་གཞུང་གིས་བོད་དང་ནང་སོག ཤིན་ཅང་སོགས་མཐའ་མཚམས་ས་ཁུལ་ཁག་ཏུ་དྲག་དམག་འབོར་ཆེན་ཆེད་གཏོང་བྱས་ཏེ་སྲུང་སྐྱོབ་ལ་ཁ་གཡར་ཏེ་དྲག་གནོན་བྱ་འཆར་ཡོད་འདུག
འདི་ལོའི་ཕྱི་ཟླ་ ༩ པའི་ཟླ་མཇུག་ནས་བཟུང་རྒྱ་ནག་དབུས་གཞུང་གིས་ཁ་ཐག་རིང་ཞིང་བརྟན་ལྷིང་མིན་པའི་མཐའ་མཚམས་ཀྱི་བོད་དང་ནང་སོག ཤིན་ཅང་བཅས་ཀྱི་ས་ཁུལ་ཁག་ཏུ་ལྕགས་ཁྲབ་རླངས་འཁོར་གཏོང་མཁན་གྱི་དྲག་དམག་ཆེད་གཏོང་བྱས་ཏེ་མཐའ་མཚམས་སྲུང་སྐྱོབ་བྱ་རྒྱུ་ཡིན་སྐོར་བསྒྲགས་ཡོད་འདུག
རའོ་ཊུར་གསར་ཁང་གིས་གནས་ཚུལ་སྤེལ་བའི་ནང་། མཐའ་མཚམས་ས་ཁུལ་ཁག་ཏུ་ལྕགས་ཁྲབ་རླངས་འཁོར་གཏོང་མཁན་གྱི་དམག་དཔུང་ཆེད་གཏོང་བྱེད་བཞིན་པའི་ལས་འཆར་འདི་ནི་ད་ལོའི་ཕྱི་ཟླ་ ༦ པ་ནས་མགོ་བཙུགས་ཡོད་པ་དང་། ལྕགས་ཁྲབ་དམག་དཔུང་གི་དམིགས་འབེན་གཏོད་ས་གཙོ་བོ་དེ་ཡང་བོད་དང་ནང་སོག དེ་བཞིན་ཤིན་ཅང་བཅས་ཀྱི་ས་ཁུལ་ཁག་ཅིག་ཡིན་ཞིང་། མི་འགྱང་བར་ས་ཁུལ་དེ་དག་ནང་ལྕགས་ཁྲབ་རླངས་འཁོར་གཏོང་མཁན་གྱི་དམག་དཔུང་འབོར་ཆེན་ཆེད་གཏོང་གིས་དྲག་གནོན་བྱ་འཆར་ཡོད་སྐོར་བརྗོད་འདུག
མཐའ་མཚམས་ས་ཁུལ་ཁག་ཏུ་ཆེད་གཏོང་བྱས་པའི་ལྕགས་ཁྲབ་རླངས་འཁོར་སྟེང་“མཐའ་མཚམས་སྲུང་བའི་འོས་འགན”ཞེས་བྲིས་ཡོད་པ་དང་། དྲག་པོའི་དམག་དཔུང་དེར་མཐའ་མཚམས་ཁག་ཏུ་ཉུལ་ཞིབ་བྱ་རྒྱུ་དང་མཐའ་མཚམས་ཀྱི་རྩོད་རྙོག་ཞི་འཇགས་གཏང་བ་སོགས་ཀྱི་འཆར་ཅན་སྦྱོང་བརྡར་སྤྲད་ཡོད་པ་མ་ཟད། དྲག་དམག་གི་སྟོབས་ཤུགས་ལ་བརྟེན་ནས་རྒྱ་གཞུང་གི་དབང་སྒྱུར་སྲིད་ཇུས་སྲ་བརྟན་དང་དམིགས་ཡུལ་མངོན་འགྱུར་ཡོང་ཆེད་ཡིན་འདུག
ཉེ་ལམ་ནས་སྲིད་འཛིན་ཞི་ཅིན་ཕིན་གྱི་སྲིད་ཇུས་ཏེ། རྒྱལ་ནང་གི་ལྐོག་ཟ་རུལ་སུངས་གཙང་བཤེར་བྱེད་བཞིན་པའི་གནས་སྟངས་ཅུང་ཛ་དྲག་པོ་ཆགས་ཡོད་པ་དང་། རྒྱ་ནག་གི་དམག་དོན་སྲིད་ཇུས་ཐད་ལའང་ཤན་ཤུགས་ཟློག་ཏུ་མེད་པ་ཐེབས་བཞིན་ཡོད་པ་མ་ཟད། ཐ་ན་རྒྱ་ནག་དབུས་གཞུང་གི་ཐེབས་རྩ་ཁག་དང་འབྲེལ་བ་གཏན་ནས་མེད་པའི་དམག་དཔོན་ཚོའི་རྒྱུ་ནོར་ལའང་ཞིབ་བཤེར་གྱི་ཉེན་ཁ་ཞིག་བསླེབ་ཀྱི་ཡོད་ཅིང་། ལྷག་པར་དུ་རྒྱལ་ནང་གི་ལྐོག་ཟ་རུལ་སུངས་གཙང་བཤེར་བྱེད་པའི་སྲིད་ཇུས་ལ་རྒོལ་བའི་དཔོན་རིགས་ཚོའི་ཐོག་ལ་ལས་འགུལ་འདི་བསླེབ་ཉེན་ཡོད་འདུག
དེ་ཡང་ཧོང་ཀོང་རང་གསར་ཁང་གིས་གནས་ཚུལ་སྤེལ་བའི་ནང་། ཁ་སང་ཕྱི་དྲོར་རྒྱ་ནག་དབུས་མི་མང་ཁྲིམས་ཁང་ནས་དམར་ཤོག་ཚོགས་པའི་མཐོ་རིམ་དཔོན་རིགས་ཟུར་བ་ཅང་ཅེ་མེན་ཟེར་བ་ཞིག་གིས་ས་སྣུམ་དང་སོལ་རླངས་ཐོན་ཁུངས་སོགས་ནས་ལྐོག་རྔན་ཕོན་ཆེན་བླངས་པའི་ནག་ཉེས་འོག ལོ་ ༡༦ གི་ཁྲིམས་ཐག་གཅོད་རྒྱུ་དང་། ལི་ཁྲོན་ཁྲིན་ཟེར་བ་ཞིག་གིས་གཞུང་རྒྱུ་ལྐོག་ཟ་བྱས་པའི་ནག་ཉེས་འོག ལོ་ ༡༣ གི་ཁྲིམས་ཐག་དང་རྒྱ་སྒོར་ས་ཡ་གཅིག་གི་ཉེས་ཆད་གཅོད་རྒྱུ་ཡིན་སྐོར་ཕྱིར་བསྒྲགས་བྱས་ཡོད་པ་དང་། དཔོན་རིགས་འདི་གཉིས་འདི་ལོར་ཚེ་བཙོན་གྱི་ཁྲིམས་ཐག་བཅད་པའི་ཀྲུའུ་ཡོང་ཁང་དང་འབྲེལ་བ་ཡོད་སྐོར་བཀོད་འདུག
གསར་འགོད་པ། པདྨ་རྒྱལ།
