དེ་རིང་བོད་མི་འདུས་སྡོད་བྱེད་སའི་ཕྱི་རྒྱལ་གྱི་ཡུལ་གྲུ་དང་རྒྱ་གར་དང་འབྲུག་བཅས་ཀྱི་ས་ཁུལ་ཁག་ཏུ་ཉིན་བརྒྱ་དུས་གཅིག་ལ་སྐབས་བཅོ་ལྔ་པའི་བཀའ་ཤག་དང་སྐབས་བཅུ་དྲུག་པའི་སྤྱི་འཐུས་ཀྱི་སྔོན་འགྲོའི་འོས་བསྡུ་གནང་ཡོད་ཅིང་། དེ་རིང་སྔ་དྲོའི་ཆུ་ཚོད་ ༩།༠༠ ནས་ཕྱི་དྲོའི་ཆུ་ཚོད་ ༥ བར་དྷ་ས་གཙུག་ལག་ཁང་གི་འོས་བསྡུའི་ས་ཚིགས་སུ་བཞུགས་སྒར་ཁུལ་གྱི་བོད་མི་ཚོ་འཚང་ཁ་ཤིག་ཤིག་གིས་དམངས་གཙོའི་ཁེ་དབང་ལོངས་སུ་སྤྱོད་པར་འདུ་འཛོམས་གནང་སོང་།
གཙུག་ལག་ཁང་གི་རྭ་བའི་གཡས་ཕྱོགས་སུ་མདོ་སྟོད་ཆོལ་ཁ་དང་། གཡོན་ཕྱོགས་སུ་དབུས་གཙང་དང་མདོ་སྨད་ཆོལ་ཁའི་འོས་བསྡུའི་སྤྱིལ་བུ་བཟོས་འདུག་ལ། དབུས་སུ་འོས་སྒམ་གསུམ་བཞག་ཡོད་པའི་ནང་ཆོལ་ཁ་གསུམ་དབྱེར་མེད་ཀྱི་འོས་འཕེན་པ་ཚོས་སྤྱི་འཐུས་དང་སྲིད་སྐྱོང་གི་འོས་ཤོག་འཕེན་ཡུལ་བཟོས་འདུག ཐེངས་འདིའི་འོས་ལྡུག་མཁན་མང་ཤོས་དབུས་གཙང་ཆགས་འདུག་ལ། ཐོ་འགོད་བྱེད་མཁན་ཡང་གླིང་སྐོར་གྱི་ནུབ་ལམ་བར་ཟིན་འདུག དེ་བཞིན། མདོ་སྟོད་ལའང་བང་རིང་པོ་ཞིག་བསྒྲིགས་འདུག་པ་དང་། ལྷག་པར་དུ་མདོ་སྨད་ཆོལ་ཁར་སྐབས་སྔོན་མ་དག་ལས་འོས་འཕེན་པ་མང་དུ་ཕྱིན་ཡོད་པར་ངོས་འཛིན་བྱེད་ཀྱིན་འདུག
ད་ལོར་དྷ་ས་ཁུལ་དུ་འོས་བསྡུའི་དེབ་སྐྱེལ་བྱེད་མཁན་བོད་མི་ཁྲི་གཅིག་ལྷག་བྱུང་ཡོད་པའི་ཁྲོད་ནས་མི་ ༦༠༠༠ ལྷག་དབུས་གཙང་དང་། མི་ ༢༥༠༠ ནས་ ༣༠༠༠ བར་མདོ་སྟོད། མི་ ༡༠༠༠ ལྷག་མདོ་སྨད་ཆགས་ཡོད་ཅིང་། འོས་བསྡུའི་ས་ཚིགས་ཁག་ ༡༠ ཙམ་གོ་སྒྲིག་བྱས་ཡོད་པ་དག་ནི། གངས་སྐྱིད་མཆོད་རྟེན་ཐང་དང་། དྷ་ས་གཙུག་ལག་ཁང་། དྷ་སྟེང་བོད་ཁྱིམ་དང་དྷ་ཤོད་བོད་ཁྱིམ། ནོར་གླིང་། ས་ར། ཤུག་གསེབ། གྷོ་པལ་པུར། བརྒྱུད་བསྟོད། ཤེས་རབ་དགའ་ཚལ་སློབ་གླིང་བཅས་རེད།
ད་རེབ་མདོ་སྟོད་སྨད་ཀྱི་མི་མང་རྒན་དར་གཞོན་གསུམ་མང་ཆེ་བ་ཕེབས་ཐུབ་ཡོད་ཀྱང་། དབུས་གཙང་ཆོལ་ཁའི་ཁོངས་ནས་མི་རབས་རྒན་པ་དང་གཞོན་པ་མ་གཏོགས། མི་རབས་འབྲིང་བ་མང་ཆེ་བ་དགུན་དུས་ཀྱི་བལ་གོས་འཚོང་བར་ཕྱིན་ཡོད་སྟབས། དར་མའི་མི་རབས་མང་ཆེ་བས་འོས་ཤོག་ལྡུག་ཐུབ་མེད་སྐོར་གླེང་མཁན་འདུག
ཐེངས་འདིར་འོས་བསྡུ་ལས་ཁང་གིས་འོས་བསྡུའི་ས་ཚིགས་ཁག་ཏུ་ལས་བྱེད་དང་ལྟ་རྟོགས་བྱེད་མཁན་མང་པོ་གོ་སྒྲིག་ཞུས་ཡོད་ཀྱང་། འོས་བསྡུའི་སྒྲིག་གཞིའི་ནང་གང་ཟག་ཅིག་གིས་ཡིག་རྨོངས་པ་གཅིག་ལ་མ་གཏོགས་ཡི་གེ་འབྲི་རོགས་བྱེད་མི་ཆོག་པ་གསལ་ཡོད་ཀྱང་། མདོ་སྟོད་དང་དབུས་གཙང་གི་འོས་བསྡུའི་སྤྱིལ་བུའི་ནང་མི་གཅིག་གིས་མི་གཞན་མང་པོར་ཡི་གེ་འབྲི་རོགས་བྱེད་མཁན་བྱུང་ཡོད་ཀྱང་། དེ་ལ་སྟངས་འཛིན་འགག་འགོག་བྱེད་མཁན་མི་འདུག
དེ་རིང་གི་འོས་བསྡུའི་ས་ཚིགས་སུ་རྒྱ་གར་དང་ཕྱི་རྒྱལ་གྱི་གསར་འགོད་པ་མང་པོ་ཕེབས་འདུག་ལ། བཙན་བྱོལ་བོད་མིའི་འོས་བསྡུར་རྟོག་ཞིབ་ཆེད། ཨེ་ཤ་ཡའི་འགྲོ་བ་མའི་ཐོབ་ཐང་དང་དམངས་གཙོའི་སྒྲིག་འཛུགས་ཁག་ཅིག་གི་སྐུ་ཚབ་ཀྱང་ཕེབས་འདུག ད་རེབ་ཀྱི་འོས་བསྡུའི་སྟེང་སྲིད་སྐྱོང་འོས་མི་ ༥ བྱུང་ཡོད་པ་ལས། བློ་བཟང་སེང་གེ་མཆོག་དང་བཀྲ་ཤིས་སྟོབས་རྒྱལ། ཨ་ཚོགས་ཀླུ་མཁར་བྱམས་གསུམ་དྷ་རམ་ས་ལའི་འོས་བསྡུའི་ནང་ཞུགས་ཡོད།
སྐབས་དེར་གསར་འགོད་པས་འོས་འཕེན་པ་ ༡༠༠ ལ་སྲིད་སྐྱོང་གི་འོས་མི་སུ་ལ་འོས་བླུགས་ཡོད་མེད་དྲིས་པར། ད་ལྟའི་སྲིད་སྐྱོང་བློ་བཟང་སེང་གེ་མཆོག་ལ་ ༤༩ དང་། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་ ༤༨ ། བཀྲ་ཤིས་དབང་འདུས་ལགས་སུ་ ༢ ། ཨ་ཚོགས་ཀླུ་མཁར་བྱམས་ལགས་སུ་ ༡ ། བཀྲ་ཤིས་སྟོབས་རྒྱལ་ལགས་སུ་འོས་ལྡུག་མཁན་གཅིག་ཀྱང་བྱུང་མི་འདུག
གསར་འགོད་པས་འོས་བསྡུའི་ས་ཚིགས་སུ་སྲིད་སྐྱོང་གི་འོས་མི་ཨ་ཚོགས་ཀླུ་མཁར་བྱམས་ལགས་སུ་འོས་བསྡུ་འདི་གནད་འགག་གང་འདྲ་ཆགས་ཡོད་མེད་དང་། སྲིད་སྐྱོང་གི་རྒྱལ་ཁ་འཐོབ་རྒྱུའི་གདེང་ཚོད་ག་ཚོད་ཡོད་དྲིས་པར་ཁོང་གིས། འོས་བསྡུ་འདི་གནད་འགག་ཆགས་ཡོད་སྟབས། ད་ནང་ཞོགས་པ་ནས་མི་ཚང་མ་འཚང་ཀ་ཤིག་ཤིག་བྱས་ནས་འོས་ལྡུག་པར་ཡོང་ཡོད་པ་མ་ཟད། ང་རང་ཡིན་ཡང་ནང་མི་ཆ་ཚང་ཁྲིད་ནས་ཡོང་བ་ཡིན། འོས་བསྡུ་འདི་ལོ་ལྔ་རེའི་མཚམས་སུ་སླེབ་ཀྱི་ཡོད་སྟབས། གནད་འགག་ཆགས་ཡོད་པ་རེད། གནད་འགག་ག་རེ་རེད་ཟེར་ན། གཅིག་ནས་ཆབ་སྲིད་ཀྱི་ཚོར་བ་རེད། མི་མང་ལ་ཆབ་སྲིད་ཀྱི་ཚོར་བ་དགོས་ཀྱི་ཡོད་སྟབས། ཁྱབ་ཆེ་ཆུང་ལ་མ་ལྟོས་པར་མི་སྡེའི་སྤྱི་ཚོགས་ནང་ཆབ་སྲིད་ཀྱི་ཚོར་བ་ཡོད་བསྡད་པ་ཞིག་རེད། གཉིས་ནས་དེ་དང་མཉམ་དུ་རེ་བ་གཅིག་དང་དམིགས་ཡུལ་གཅིག་ཡོད་སྟབས། ཕྱོགས་གང་ཐད་ནས་བལྟས་ཀྱང་གལ་ཆེན་པོ་ཆགས་ཀྱི་ཡོད་པ་རེད། ད་ལྟའི་སྐབས་ལ་ང་ལ་རྒྱལ་ཁ་འཐོབ་མིན་ཞུ་ཚོད་ཐིག་གི་མི་འདུག་ཀྱང་། ད་ནང་ཞོགས་པ་ནས་བཟུང་ང་སྣང་བ་སྐྱིད་པོ་འདུག ཅེས་བརྗོད་བྱུང་།
ཡང་སྲིད་སྐྱོང་འོས་མི་བཀྲ་ཤིས་སྟོབས་རྒྱལ་ལགས་སུ་སྲིད་སྐྱོང་འོས་མི་སུ་ལ་འོས་བླུག་ཡོད་མེད་དང་ཁོང་ལ་སྲིད་སྐྱོང་གི་རྒྱལ་ཁ་འཐོབ་པར་གདེང་ཚོད་ཡོད་མེད་དྲིས་པར་ཁོང་གིས། འོས་ལྡུག་རྒྱུ་དེ་ང་རང་གིས་ང་རང་ལ་བླུགས་པ་ཡིན། ང་རང་གི་གདེང་ཚོད་དེ་ང་རང་གིས་ཧ་གོ་ཡི་རེད། གདེང་ཚོད་མེད་ན་ངས་ང་རང་ལ་འོས་བླུག་གི་མ་རེད། འོས་བླུག་སྐབས་ང་ལ་ཚོར་སྣང་ག་རེ་བྱུང་ཟེར་ན། མི་མང་གིས་དམངས་གཙོ་ཟེར་བ་འདི་ག་ཚོད་ཅིག་ཁས་ལེན་མིན་དང་། དེ་བཞིན་ཤེས་ཡོན་དང་ཆབ་སྲིད་ཀྱི་དབྱེ་བ་དེ་ཕྱེ་ཐུབ་ཡོད་དང་མེད་ཟེར་བ་འདི་གཉིས་ཆགས་ཡོད་སྟབས། ཆབ་སྲིད་དང་ཤེས་ཡོན་གྱི་དབྱེ་བ་ཕྱེ་ཐུབ་ན་ང་ལ་རྒྱལ་ཁ་འཐོབ་རྒྱུའི་རེ་བ་ཆེན་པོ་ཡོད་ཀྱང་། ད་དུང་ཤེས་ཡོན་དང་ཆབ་སྲིད་གཉིས་དབྱེ་བ་འབྱེད་མ་ཐུབ་པར་ག་རེ་ཡིན་ཡང་རྡོག་རྡོག་དེ་ཤེས་ཡོན་རེད་ལབ་ན་དེ་ཚོད་ཀྱིས་བསམ་བློ་གཏོང་སྟངས་ལ་ཁྱད་པར་འགྲོ་ཡི་རེད། ད་ཐེངས་སྔོན་འགྲོའི་འོས་བསྡུའི་སྐབས་ང་ལ་འོས་ཤོག་ག་ཚོད་འཐོབ་མིན་དེ་མང་ཚོགས་ལ་བསམ་བློའི་གོ་རྟོགས་གང་འདྲ་ཡོད་མིན་ལ་རག་ལས་ཡོད་པ་རེད། ང་ལུག་རྫི་ཞིག་ཡར་ལངས་པ་དེས་མང་ཚོགས་ལ་དམངས་གཙོའི་གོ་རྟོགས་ཡག་པོ་ཞིག་སྤེལ་ཡོད་བསམ་གྱི་ཡོད་པ་ལྟར། དེ་མཚུངས་མང་ཚོགས་ལའང་ཚོར་སྣང་དེ་བྱུང་ཡོད་ན་ང་ལ་འོས་ཡག་པོ་རག་དགོས་རྒྱུ་རེད། ཅེས་བརྗོད་བྱུང་།
མང་ཚོགས་འོས་འཕེན་པ་ཞིག་ལ་མི་སུ་ལ་སྲིད་སྐྱོང་གི་འོས་ཤོག་བླུགས་པར་དྲིས་པར་ཁོང་གིས། ངས་ཆོལ་ཁ་ཆོས་ལུགས་ཀྱི་ཕྱོགས་ཞེན་མ་བྱས་པའི་ཐོག་ནས་ད་ལྟའི་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་བླུགས་པ་ཡིན། གང་ཡིན་ཟེར་ན། ཚོགས་གཙོ་སྤེན་པ་ཚེ་རིང་མཆོག་གིས་མི་ཚེ་གང་ཚང་བོད་སྤྱི་པའི་ཐོག་ཕྱག་ལས་གནང་ཡོད་པ་མ་ཟད། མི་དྲང་པོ་དང་གཡོ་ཟོལ་མེད་པ་དྲང་ཚུགས་བརྟན་པོ་འཛིན་མཁན་ཞིག་ཡིན་སྟབས། ང་རང་གིས་སྲིད་སྐྱོང་གི་འོས་མི་དེ་ཁོང་ལས་གཞན་སུ་ཡང་མེད་པར་མཐོང་གི་ཡོད། ཅེས་བརྗོད་སོང་།
ཡང་དབུས་གཙང་གི་འོས་འཕེན་པ་ཞིག་ལ་སྤྱི་འཐུས་འདེམས་སྐབས་དཀའ་ངལ་གང་བྱུང་དང་། སྲིད་སྐྱོང་སུ་བདམས་སྐོར་དྲིས་པར་ཁོང་གིས། སྤྱི་འཐུས་འོས་མི་མང་པོ་ཞིག་ཆགས་ཡོད་སྟབས། ཁ་ཤས་ཀྱི་ད་ལྟའི་སྡོད་གནས་དང་ལས་གནས་མ་ཤེས་པའི་དབང་གིས་འོས་ལྡུག་སྐབས་དཀའ་ངལ་འཕྲད་བྱུང་། ངས་ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་མཆོག་ལ་འོས་ཤོག་བླུགས་པ་ཡིན། ཁོང་ལོ་ཆུང་ཆུང་ཡིན་ཡང་དཀའ་ལས་མང་པོ་ཞིག་བརྒྱབ་ནས་གཞུང་གི་ལས་དོན་བསྒྲུབས་སོང་བསམ་ནས་འོས་བླུགས་པ་ཡིན། ཞེས་བརྗོད་བྱུང་།
བོད་མི་གཞན་ཞིག་ལ་སྲིད་སྐྱོང་སུར་བླུགས་པ་དང་བླུགས་དགོས་དོན་གང་ཡིན་དྲིས་པར་ཁོང་གིས། ངས་བཀྲ་ཤིས་དབང་འདུས་ལགས་སུ་བླུགས་པ་ཡིན། གང་ཡིན་ཟེར་ན། ང་མངའ་རིས་ཡིན་སྟབས་མངའ་རིས་ཀྱི་དབུས་ས་གཉིས་ཀྱིས་མིང་འདོན་ཞུས་པའི་སྲིད་སྐྱོང་འོས་མིར་རྒྱབ་སྐྱོར་བྱས་ནས་འོས་ཤོག་བླུགས་པ་ཡིན། ཞེས་བརྗོད་བྱུང་།
གསར་འགོད་པ། དོན་གྲུབ།
སྤྱིར་བཏང་བརྒྱ་ཆའི་ཆ་ནས་སྔོན་དཔག་བྱེད་སྟངས་དེ་འདྲ་རེད། ཡག་པོ་འདུག
ཨོ་རེད། དུས་བབ་ཚང་ལ་འདྲི་རྒྱུ་ཞིག་འདུག ཁྱེད་ཚང་ན་སྲིད་སྐྱོང་འོས་མི་ལྔ་བོར་འོས་འཕེན་ས་ཞིག་བཟོས་འདུག ངས་བདུན་ཕྲག་གསུམ་ལྷག་ལ་ཉིན་ལྟར་ཆད་མེད་དུ་དེར་འོས་ཤོག་འཕངས་ཏེ་བརྟག་དཔྱད་བྱས་པ་ཡིན། འོན་ཀྱང་འོས་གྲངས་ཀྱི་བརྒྱ་ཆའི་ཐོབ་གྲངས་དེར་འགྱུར་བ་མེད་པར་རྟག་པའི་ངོ་བོར་གནས་བསྡད་འདུག དེ་ག་རེ་ཡིན་ནམ། ལངས་ཕྱོགས་ཤིག་ཡིན་ན་ཅང་བཤད་རྒྱུ་མེད། དེ་མ་གཏོགས་དེར་བཟོ་བཅོས་ཞིག་བརྒྱག་རན་འདུག་མ་གཏོགས། མགོ་སྐོར་ཐེབས་ས་རེད།
ངའི་མཆན་བུ་བཀོད་ནས་དུས་ཚོག་གཅིག་དང་ཕྱེད་ཙམ་ཕྱིན་སོང་ཡང་བཅུག་མི་འདུག དེ་བས་ཡང་བསྐྱར་བཀོད་པ་ཡིན།
གསར་འགོད་པས་འོས་འཕེན་པ་ ༡༠༠ ལ་སྲིད་སྐྱོང་གི་འོས་མི་སུ་ལ་འོས་བླུགས་ཡོད་མེད་དྲིས་པར། ད་ལྟའི་སྲིད་སྐྱོང་བློ་བཟང་སེང་གེ་མཆོག་ལ་ ༤༩ དང་། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་ ༤༨ ། བཀྲ་ཤིས་དབང་འདུས་ལགས་སུ་ ༢ ། ཨ་ཚོགས་ཀླུ་མཁར་བྱམས་ལགས་སུ་ ༡ ། བཀྲ་ཤིས་སྟོབས་རྒྱལ་ལགས་སུ་འོས་ལྡུག་མཁན་གཅིག་ཀྱང་བྱུང་མི་འདུག