བྲག་མགོ་རྫོང་མཁའ་ཉ་གྲོང་ཚོའི་ནང་གློག་མེད་ལ་འགྲིམ་འགྲུལ་སྟབས་བདེ་མེད་པའི་རྐྱེན་གྱིས་གྲོང་ཚོའི་ལྟེ་གནས་སློབ་ཆུང་སྟོང་པ་ཆགས་པ་སོགས་དཀའ་ངལ་ཆེན་པོ་འཕྲད་ཀྱི་ཡོད་སྟབས། ས་གནས་མི་མང་གིས་སྲིད་གཞུང་དང་རྒྱལ་སྤྱིའི་ཐོག་ཁོང་ཚོའི་དཀའ་ངལ་ལ་དོ་འཁུར་དགོས་པའི་འབོད་སྐུལ་གནང་གི་འདུག
འདི་གར་བོད་ནང་ནས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༠༨ ལོ་ནས་བཟུང་དཀར་མཛེས་ཁུལ་བྲག་མགོ་རྫོང་མཁའ་ཉ་གྲོང་ཚོའི་ནང་དུ། རྒྱ་གཞུང་གིས་དབུལ་སྐྱོབ་འཛུགས་སྐྲུན་གྱི་ལས་གཞི་མཚམས་འཇོག་བྱས་པར་བརྟེན། ད་ལྟའི་ཆར་མཐའ་འཁོབ་རི་ཁུལ་དུ་གནས་ཤིང་འགྲིམ་འགྲུལ་སྟབས་བདེ་མིན་པའི་གྲོང་ཚོ་དེའི་འཚོ་བའི་གནས་སྟངས་ཧ་ཅང་སྐྱོ་བོ་དང་རྗེས་ལུས་ཡིན་སྟབས། ས་གནས་མི་མང་གིས་འབྲེལ་ཡོད་ལས་ཁུངས་ལ་དབུལ་སྐྱོབ་ལས་གཞི་བསྐྱར་དུ་མགོ་འཛུགས་དགོས་པའི་འབོད་སྐུལ་གནང་བཞིན་ཡོད་པ་མ་ཟད། རྒྱལ་ཕྱིའི་གསར་འགྱུར་བརྒྱུད་ལམ་ཁག་གིས་གནད་དོན་འདི་ཕྱིར་བསྒྲགས་བྱས་ཏེ། རྒྱལ་ཕྱིའི་ཐོག་ནས་དོ་སྣང་དང་། རོགས་རམ་གནང་ཐབས་དགོས་པའི་འབོད་སྐུལ་གནང་བྱུང་།
མཁའ་ཉ་གྲོང་ཚོའི་བོད་མི་ཞིག་གིས། ཕྱི་ལོ་ ༢༠༠༨ ནས་བཟུང་སྲིད་གཞུང་གིས་མཁའ་ཉ་གྲོང་ཚོར་དབུལ་སྐྱོབ་དང་འཛུགས་སྐྲུན་སོགས་ཀྱི་ལས་གཞི་ཚང་མ་མཚམས་འཇོག་བྱས་པར་བརྟེན། ང་ཚོའི་གྲོང་ཚོ་ཡུན་རིང་ནས་ཧ་ཅང་དབུས་ཕོངས་རྗེས་ལུས་ཀྱི་གནས་སྟངས་འོག་ལུས་པ་དང་། དབྱར་ཁའི་ཆར་ཆུ་དང་དགུན་ཁའི་ཁ་བ་མཐུག་པོས་རི་ཁུལ་གྱི་བགྲོད་ལམ་འགོག་སྐབས། མཐའ་འཁོབ་ཀྱི་རི་ཁུལ་འདི་ནས་ང་ཚོར་བཟའ་བཏུང་དང་འཚོ་བའི་ཡོ་ཆས་སོགས་ཀྱི་ཐོག་དཀའ་ངལ་འཕྲད་ཀྱི་འདུག་ཀྱང་། སྲིད་གཞུང་གིས་ད་ལྟའི་བར་དཀའ་ངལ་སེལ་ཐབས་གང་ཡང་བྱས་ཡོད་པ་མ་རེད། ཡིན་ནའང་། ཁོ་ཚོས་རྒྱུན་དུ་བོད་མི་རྣམས་ཕྱུག་འགྱུར་གྱི་ལམ་དུ་སྐྱོད་དེ་བདེ་སྐྱིད་ལྡན་པའི་འཚོ་བ་སྐྱེལ་བཞིན་ཡོད་སྐོར་ཕྱི་ཕྱོགས་སུ་དྲིལ་བསྒྲགས་ཤུགས་ཆེན་བྱེད་ཀྱི་ཡོད་ཀྱང་། དེ་ཚོ་ཚང་མ་སྐྱག་རྫུན་རེད། ང་ཚོའི་ཤི་གསོན་ལ་གཏན་ནས་དོ་ཁུར་བྱེད་ཀྱི་མི་འདུག ཅེས་དང་།
ཡང་ཁོང་གིས། མཁའ་ཉ་གྲོང་ཚོ་རུ་དེ་སྔོན་མཁའ་ཉ་ལྟེ་གནས་སློབ་ཆུང་ཟེར་བ་ཞིག་ཡོད་པ་དང་། སྐབས་དེར་གྲོང་ཚོའི་བྱིས་པ་ཚོ་སློབ་གྲྭར་འགྲོ་བའི་གོ་སྐབས་རག་གི་ཡོད་ཀྱང་། གྲོང་ཚོའི་ནང་དུ་གློག་དང་ཁ་པར་སྐུད་ལམ། རང་བྱུང་ཆུ་ཁུངས་བཅས་མེད་པ་དང་། འགྲིམ་འགྲུལ་སྟབས་བདེ་མིན་པ་སོགས་ཀྱིས་གྲོང་ཚོའི་སློབ་ཆུང་གི་དགེ་རྒན་རྣམས་འདུག་འདོད་མེད་པར་ས་གནས་གཞན་དུ་ཕྱིན་ཡོད་སྟབས། ད་ལྟ་གྲོང་ཚོའི་སློབ་ཆུང་ནང་དགེ་རྒན་དང་སློབ་ཕྲུག་གཅིག་ཀྱང་མེད་པར་སྟོང་པ་ཆགས་བསྡད་ཡོད་པ་རེད། དངོས་གནས་མཐོང་ན་སེམས་སྐྱོ་བ་ཞིག་རེད། ཅེས་བརྗོད་བྱུང་།
ཡང་ས་གནས་བོད་མི་གཞན་ཞིག་གིས། དེ་སྔོན་སྲིད་གཞུང་གིས་མཁའ་ཉ་གྲོང་ཚོའི་ནང་གློག་སྐུད་ཀ་བ་བཙུགས་ཏེ་གློག་འཐེན་ཡོད་ཀྱང་། ཕྱིས་སུ་འཕྲོ་བརླག་ཏུ་ཕྱིན་ནས་བསྐྱར་བཟོ་གཏན་ནས་མ་བྱས་པར་ལྷག་སོང་སྟབས། དེང་སང་གྲོང་ཚོའི་ནང་གློག་མེད་ལ། ཁ་པར་ཡང་འགྲོ་ཡི་མེད་སྟབས། སྲིད་གཞུང་ལ་རེ་ཞུ་ཅི་ཙམ་བྱས་ཀྱང་ཉན་འཇོག་བྱེད་ཀྱི་མི་འདུག ཅེས་དང་།
མཁའ་ཉ་གྲོང་ཚོ་ནི་རི་བོ་མཐོན་པོས་བསྐོར་བའི་ཡུལ་མཐའ་འཁོབ་ཅིག་ཏུ་གནས་ཡོད་པ་དང་། བྲག་མགོ་རྫོང་དུ་འགྲོ་བ་ལའང་རི་ཁུལ་གྱི་བགྲོད་ལམ་ཀྱག་ཀྱོག་བརྒྱུད་ནས་འགྲོ་དགོས་པ་སོགས་འགྲིམ་འགྲུལ་སྟབས་བདེ་མིན་སྟབས། གྲོང་ཚོ་ནས་བྲག་མགོ་རྫོང་དུ་ཕར་འགྲོ་ཚུར་འོང་ཐེངས་གཅིག་བྱེད་པ་ལའང་ཆུ་ཚོད་ ༦ ནས་ ༧ བར་འགོར་བ་དང་། དྲག་ཆར་དང་ཁ་བ་མཐུག་པོ་བབ་སྐབས་རི་ཁུལ་གྱི་བགྲོད་ལམ་འགག་སྟེ་ཉིན་མ་མང་པོར་འགྲོ་འོང་བྱེད་ཐུབ་ཀྱི་མི་འདུག ང་ཚོའི་གྲོང་ཚོ་འདི་བྲག་མགོ་རྫོང་ཡོངས་ཀྱི་ནང་ནས་དབུལ་ཤོས་དང་རྗེས་ལུས་ཐེབས་པ་ཚབས་ཆེ་ཤོས་རེད། ཅེས་བརྗོད་བྱུང་།
གཞན་ཡང་། ས་གནས་བོད་མི་ཞིག་གིས་འགྲེལ་བརྗོད་གནང་བ་ལྟར་ན། མཁའ་ཉ་གྲོང་ཚོའི་ཉེ་འཁྲིས་སུ་ནགས་ཚལ་སྟུག་པོ་ཡོད་པའི་གནས་རི་ཞིག་ཡོད་ཀྱང་། རྒྱ་གཞུང་གིས་ཉེ་བའི་ལོ་ཤས་ནང་དང་ལྷག་པར་དུ་ཕྱི་ལོ་ ༢༠༠༨ ནས་བཟུང་གྲོང་ཚོའི་དབུལ་སྐྱོབ་འཛུགས་སྐྲུན་མཚམས་བཞག་སྟེ། ས་གནས་ཀྱི་ཤིང་ནགས་མང་པོ་གང་བྱུང་དུ་གཅོད་གཏུབ་བྱས་ནས་ཕྱི་ལ་དབོར་བར་བརྟེན། ཤིང་ནགས་ཀྱི་ཐོན་ཁུངས་ལ་གནོད་སྐྱོན་ཚབས་ཆེན་བཟོས་ཡོད་པ་མ་ཟད། ས་ཆུ་ལའང་གནོད་པ་ཐེབས་ནས་རང་བྱུང་གི་གནོད་འཚེ་སྣ་ཚོགས་འབྱུང་བའི་ཉེན་ཁ་བཟོས་ཡོད་འདུག
གསར་འགོད་པ། པདྨ་མཚོ།
