རྒྱ་གར་ལ་རེ་བ་བཅོལ་རྒྱུ་ཞེ་དྲཊ་ཡོད་པ་མ་རེད་ཟེར།

རྒྱ་གར་ཇཱ་ཎཱ་ཊ་ཌལ་ཚོགས་པའི་སྤྱི་ཁྱབ་དྲུང་ཆེ་ཨ་རུན་ཀུ་མར་མཆོག་གིས་ང་ཚོའི་ཚོགས་པ་འདི་རྒྱ་གར་གྱི་གཞུང་འཛིན་ཚོགས་པའི་ཁོངས་སུ་ཐེངས་ཁ་ཤས་བསླེབས་ཡོད་ཀྱང་། བློ་ཕམ་པ་ཞིག་ལ་ང་ཚོས་བོད་དོན་ཐོག་རྒྱབ་སྐྱོར་ཆེན་པོ་བྱེད་ཐུབ་ཡོད་པ་མ་རེད་ཅེས་བརྗོད་སོང་།

དེ་རིང་ཉིན་རྒྱབ་ཆུ་ཚོད་ ༢།༠༠ སྟེང་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཚོགས་དྲུང་ལས་ཁུངས་ཀྱི་གོ་སྒྲིག་འོག རྒྱ་གར་གྱི་ཆབ་སྲིད་ཚོགས་པ་ཇཱ་ཎཱ་ཊ་ཌལ་མཉམ་སྦྲེལ་ཚོགས་ (Janata Dal United) པའི་སྤྱི་ཁྱབ་དྲུང་ཆེ་ཨ་རུན་ཀུ་མར་ (Shri. Arun Kumar Shrivastava) མཆོག་དང་། ཚོགས་པའི་རྒྱལ་ཡོངས་དྲུང་ཆེ་ཨཱ་མཱ་ཌ་ཁཱན་ (Afque Ahmad Khan) མཆོག་རྣམ་གཉིས་ཀྱིས་བོད་དོན་དང་འབྲེལ་བའི་གསར་འགོད་གསལ་བསྒྲགས་ཤིག་གནང་སོང་།

བོད་མི་མང་སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས་ཀྱིས་ད་བར་རྒྱ་གར་གྱི་ཆབ་སྲིད་ཚོགས་པ་ཇཱ་ཎཱ་ཊ་ཌལ་མཉམ་སྦྲེལ་ཚོགས་པ་དང་ཚོགས་པའི་དྲུང་ཆེ་རྣམ་གཉིས་ཀྱིས་བོད་དོན་ཐོག་རྒྱབ་སྐྱོར་གང་འདྲ་གནང་ཡོད་མེད་དང་། ཐེངས་འདིའི་གསར་འགོད་ལྷན་ཚོགས་སྐོང་དགོས་དོན་བཅས་ཀྱི་ཐོག་ངོ་སྤྲོད་གཏམ་བཤད་གནང་བ་དང་འབྲེལ་ཁོང་རྣམ་གཉིས་ལ་འབོད་སྐུལ་གནང་དོན། སྔོན་མ་ཇཱ་ཎཱ་ཊ་ཌལ་མཉམ་སྦྲེལ་ཚོགས་པས་བོད་དོན་ཐོག་གྲོས་ཆོད་གཅིག་བཞག་ཡོད་པ་མ་ཟད། ལོ་རྗེས་མའི་ནང་ཚོགས་པའི་རྒྱལ་ཡོངས་ཚོགས་ཆེན་འཚོགས་རྒྱུ་ཡིན་སྟབས། སྐབས་དེར་ཚོགས་པའི་ངོས་ནས་སྔར་བཞིན་བོད་དོན་རྒྱབ་སྐྱོར་གྱི་གྲོས་ཆོད་ཅིག་འཇོག་གནང་ཡོང་བ་དང་། ཕྱིས་འབྱུང་ཚོགས་པའི་གྲོས་ཚོགས་འཐུས་མི་གང་མང་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཁོངས་ཞུགས་རྒྱུར་འབོད་སྐུལ་ཞུ་བཞིན་ཡོད་པ་མ་ཟད། བོད་མིའི་འཚོ་རྟེན་གཙོ་བོ་ནི་དགུན་དུས་བལ་གོས་བཙོངས་ནས་འཚོ་བ་སྐྱེལ་བཞིན་ཡོད་སྟབས། རྒྱ་གར་བྷི་ཧར་མངའ་སྡེའི་རྒྱལ་ས་གཙོས་ས་ཁུལ་ཁག་ཏུ་བོད་མི་བལ་གོས་འཚོང་མཁན་དང་། གནས་ཆེན་ཁག་ཏུ་ཡོད་པའི་བོད་དགོན་ཁག་ལ་སྔར་བཞིན་རྒྱབ་སྐྱོར་ཡོང་བའི་འབོད་སྐུལ་ཞུ་བཞིན་ཡོད། ཅེས་སོགས་བརྗོད་སོང་།

རྒྱ་གར་ཇཱ་ཎཱ་ཊ་ཌལ་མཉམ་སྦྲེལ་ཚོགས་པའི་སྤྱི་ཁྱབ་དྲུང་ཆེ་ཨ་རུན་ཀུ་མར་མཆོག་གིས་རྒྱལ་སྤྱིའི་སྟེང་བོད་རིགས་གཞོན་སྐྱེས་ཚོས་སྔར་བས་བོད་དོན་འཐབ་རྩོད་བྱེད་དགོས་སྐོར་གཏམ་བཤད་གནང་དོན། ཕྲན་སྤྱི་ཚོགས་རིང་ལུགས་པ་ཞིག་ཡིན་སྟབས། ཕྱིས་སུ་ཆབ་སྲིད་ཚོགས་པའི་ནང་འཛུལ་ཏེ། སྤྱི་ཚོགས་རིང་ལུགས་པ་ཇའེ་ཡཱ་པར་ཀཱ་ཤཱི་ནཱ་རན་ཡན་(Jayaprakash Narayan)། རམ་མ་ནོ་ཧར་ལོ་ཧི་ཡ་(Ram ManoharLohia) མཆོག ཨ་ཅྰ་རྱ་ཎ་རེན་དྷ་དེབ་མཆོག ཇོར་ཇི་ཕར་ནན་ཌི་སི་མཆོག་བཅས་ཀྱིས་བོད་དོན་ཐོག་རྒྱབ་སྐྱོར་ཞུས་ཡོད་པ་རེད། རྒྱ་ནག་གིས་ཁོ་ཚོ་དམར་པོའི་གཞུང་ཡིན་ལབ་ཀྱི་ཡོད་པ་རེད། རྒྱ་ནག་གཞུང་གིས་བོད་བཙན་བཟུང་བྱས་པ་ནས་བཟུང་སྟེ། བོད་མི་དག་རྒྱ་ནག་གཞུང་གིས་མི་སེར་སྤེལ་ཡུལ་ཆགས་ནས་བོད་མི་ཚོས་བཟོད་ཐབས་བྲལ་ནས་བཙན་བྱོལ་ནང་སླེབ་དགོས་བྱུང་ཡོད་སྟབས། གལ་སྲིད་མ་འོངས་པའི་ལོ་བཅུའི་ནང་ཚུད་དུ་བོད་དོན་བདེན་མཐའ་སེལ་མ་ཐུབ་པ་ཡིན་ན། རྒྱ་མི་ཕོན་ཆེ་བོད་ནང་གནས་སྤོས་ཏེ་བོད་མི་ཚོར་རང་བཞིན་གྱིས་དཀའ་ངལ་འཕྲད་རྒྱུ་རེད། ༧གོང་ས་མཆོག་ལ་རྒྱལ་སྤྱིའི་ཐོག་མཚན་སྙན་གྲགས་དང་དད་གུས་ཞུ་མཁན་ཧ་ཅང་མང་པོ་ཡོད་སྟབས། བོད་མི་ཚོས་ཁེ་ཕན་དེ་ལོངས་སྤྱོད་ཐུབ་དགོས་པ་མ་ཟད། བོད་རིགས་གཞོན་སྐྱེས་ཚོས་བོད་དོན་བདེན་མཐའ་སེལ་ཆེད་རྒྱལ་སྤྱིའི་ཐོག་མུ་མཐུད་ལས་འགུལ་སྤེལ་རྒྱུ་དཔེ་མི་སྲིད་པའི་གལ་ཆེན་པོ་ཆགས་ཡོད། ང་ཚོའི་ཚོགས་པ་འདི་རྒྱ་གར་གྱི་གཞུང་འཛིན་ཚོགས་པའི་ཁོངས་ཐེངས་ཁ་ཤས་བསླེབས་ཡོད་ཀྱང་། བློ་ཕམ་པ་ཞིག་ལ་ང་ཚོས་བོད་དོན་ཐོག་རྒྱབ་སྐྱོར་ཆེན་པོ་བྱེད་ཐུབ་ཡོད་པ་མ་རེད། ཅེས་སོགས་བརྗོད་སོང་།

ཚོགས་པའི་རྒྱལ་ཡོངས་དྲུང་ཆེ་ཨཱ་མཱ་ཌ་ཁཱན་མཆོག་གིས། ང་སློབ་ཕྲུག་ཡིན་སྐབས་ཚོགས་པའི་ངོས་ནས་རྒྱ་གར་རྒྱལ་ས་ལྡི་ལིར་ངོ་རྒོལ་གྱི་ལས་འགུལ་ཞིག་སྤེལ་རྒྱུ་ཐག་གཅོད་གནང་ཡོད་སྟབས། ཕྲན་བྷི་ཧར་ནས་ལྡི་ལིར་ཡོང་བ་ཡིན། སྐབས་དེར་རྒྱ་ནག་གི་སྲིད་བློན་ལི་ཧྥང་རྒྱ་གར་ལ་རྒྱལ་དོན་སྐོར་སྐྱོད་བྱེད་པར་འབྱོར་ཡོད་སྟབས། ང་དང་རོགས་པ་ཞིག་གླ་འཁོར་ནང་བསྡད་ནས་ལི་ཧྥང་གི་འདྲ་གཟུགས་ཤིག་འཁྱེར་ཏེ། བོད་མི་ཚོས་ངོ་རྒོལ་རྒྱག་ཡུལ་གྱི་རྒྱ་ནག་གི་གཞུང་ཚབ་ཁང་ཕྱོགས་སུ་ཡོང་སྐབས། ཉེན་རྟོག་པས་འཇུ་བཟུང་བཙོན་འཇུག་བྱས་སོང་། དེ་ནི་ངའི་མི་ཚེའི་ནང་གི་ལས་འགུལ་ཐོག་མ་ཡིན་པ་མ་ཟད། དེ་ཡང་བོད་དོན་དང་འབྲེལ་ནས་བཙོན་འཇུག་བྱས་པ་ཞིག་ཀྱང་ཆགས་ཡོད་པ་རེད། ཅེས་སོགས་བརྗོད་སོང་།

མཇུག་ཏུ་གསར་འགོད་པས་ཚོགས་པའི་སྤྱི་ཁྱབ་དྲུང་ཆེ་ཨ་རུན་ཀུ་མར་མཆོག་ལ་སྐུ་ཉིད་ཀྱི་ཚོགས་པའི་ངོས་ནས་བོད་རང་བཙན་ལ་རྒྱབ་སྐྱོར་གནང་གི་ཡོད་ཀྱང་། བོད་མིའི་སྒྲིག་འཛུགས་ཀྱི་བཞེངས་ཕྱོགས་དབུ་མའི་ལམ་ཆགས་ཡོད་སྟབས། དེའི་ཐད་དགོངས་ཚུལ་གང་ཡོད་དྲིས་པར་ཁོང་གིས། ང་རང་སྒེར་ངོས་ནས་དབུ་མའི་ལམ་ལ་ཡིད་ཆེས་གང་ཡང་མེད་ཀྱང་། བོད་རང་བཙན་རྩོད་ལེན་བྱ་རྒྱུར་དབུ་མའི་ལམ་བཟང་བ་ཡོད་ན། དེའི་ཐོག་བསྐྱོད་དགོས་པ་ཞིག་རེད། ཅེས་བརྗོད་སོང་།

གསར་འགོད་པ་གཞན་ཞིག་གིས་རྒྱ་གར་བོད་དོན་རྒྱབ་སྐྱོར་བས་བོད་དོན་ཐོག་འགན་ཁུར་བླངས་ནས་རྒྱབ་སྐྱོར་གནང་ཡོད་ཀྱང་། ད་བར་ངེས་པ་བརྙེད་པའི་དོན་འབྲས་མ་ཐོན་པའི་རྒྱུ་རྐྱེན་གང་ཡིན་དྲིས་པར་ཁོང་གིས། རྒྱ་གར་གྱི་དམངས་གཙོ་ནི་ཕྱི་ཚུལ་གྱི་རྣམ་པ་སྟོན་རྒྱུ་ཙམ་ཞིག་ཡིན་པ་ལས་ཡང་དག་ཅིག་མིན་སྟབས། རྒྱ་གར་ལ་རེ་བ་བཅོལ་རྒྱུ་ཞེ་དྲགས་ཡོད་པ་མ་རེད། ཅེས་བརྗོད་སོང་།

གསར་འགོད་པ། དོན་གྲུབ།