ལྷ་སར་ཀཱེ་ཨཧྥོ་སི་ཟ་ཁང་ཕྱེ་རྒྱུ་ཡིན་ཟེར།

ཁ་སང་ཨ་རིའི་སྙན་གྲགས་ཅན་གྱི་སྟབས་བདེའི་ཟས་རིགས་ཁེ་ལས་ཀཱེ་ཨཧྥོ་སི་ (KFC) ཡིས་རྒྱ་ནག་རྒྱལ་ཡོངས་ནང་ཟ་ཁང་མང་དུ་གཏོང་བ་དང་ཆབས་ཅིག ལོ་རྗེས་མའི་ཕྱི་ཟླ་དང་པོའི་ཟླ་མཇུག་ཏུ་ལྷ་སར་ཀཱེ་ཨཧྥོ་སིའི་ཟ་ཁང་ཐོག་མ་སྒོ་ཕྱེ་རྒྱུ་ཡིན་སྐོར་བསྒྲགས་འདུག
རྒྱ་ནག་ཤིན་ཧྭ་གསར་ལམ་སྟེང་ལྷ་སར་རྟེན་གཞི་བྱས་པའི་ཁྲན་ལི་ཤི་དྷ་ཚོང་གཉེར་བསྟི་གནས་

(Shenlishidai shopping centre) ཁང་གི་འགན་འཛིན་ཀྲང་ཝའེ་ (Chen Biao) ཟེར་བས། ང་ཚོའི་ཚོང་གཉེར་བསྟི་གནས་ཁང་དང་ཀཱེ་ཨཧྥོ་སི་བར་གན་རྒྱ་བཞག་སྟེ། ལོ་རྗེས་མའི་ཕྱི་ཟླ་དང་པོའི་ནང་ལྷ་སར་ཀཱེ་ཨཧྥོ་སིའི་ཟ་ཁང་གཉེར་རྒྱུ་ཐག་གཅོད་བྱས་ཡོད་པ་ལྟར། ད་ལྟ་ཐོག་རྩེག་གཉིས་ཅན་གྱི་ཟ་ཁང་བརྒྱབ་སྟེ་ནང་གི་བཀོད་པ་ལེགས་སྒྲིག་བྱེད་བཞིན་ཡོད། ཀཱེ་ཨཧྥོ་སིས་ལྷ་སར་ཟ་ཁང་འཛིན་རྒྱུ་ཐག་གཅོད་མ་བྱས་གོང་ནས་བོད་ནང་སྟབས་བདེའི་བྱ་ཤ་སྲེག་མ་ཟ་ས་དྷི་ཁཱོ་སི་ (Dicos) སོགས་ཟ་ཁང་མང་པོ་ཡོད་པ་མ་ཟད། རྒྱ་ཆེའི་ཟས་སྤྱོད་པས་མཉེས་པོ་གནང་གི་ཡོད་སྟབས། ད་ཐེངས་བོད་ནང་རྒྱལ་སྤྱིའི་སྙན་གྲགས་ཅན་གྱི་ཀཱེ་ཨཧྥོ་སི་ཟ་ཁང་བཙུགས་ན། མ་འོངས་པར་རྒྱལ་སྤྱི་རྒྱལ་ནང་གི་ཡུལ་སྐོར་བའི་ཟས་ཀྱི་འདོད་ཡོན་སྐོང་ཐུབ་པའི་ཡིད་ཆེས་ཡོད། ཅེས་བརྗོད་འདུག

ཡང་ཀཱེ་ཨཧྥོ་སིའི་ལས་ཁུངས་ཨ་མ་ཡཱམ་ (Yum Brands Inc) གྱིས། ང་ཚོས་རྒྱ་ནག་ནང་གི་ཡན་ལག་ཟ་ཁང་ ༦༩༠༠ ལ་བཅོས་བསྒྱུར་དང་རྒྱ་སྐྱེད་བཏང་སྟེ། ཡུན་རིང་མ་འགོར་བར་རྒྱ་ནག་རྒྱལ་ཡོངས་ནང་ཟ་ཁང་ ༢༠༠༠༠ ཚུགས་རྒྱུ་ཐག་གཅོད་བྱས་ཡོད་སྟབས། བོད་ཀྱི་གྲོང་ཁྱེར་ལྷ་སར་ལོ་རྗེས་མའི་ཟླ་དང་པོའི་ནང་ཟ་ཁང་ཐོག་མ་དེ་སྒོ་འབྱེད་བྱ་རྒྱུ་ཡིན། གལ་སྲིད་མ་འོངས་པར་ང་ཚོའི་ཟ་ཁང་འདིའི་ཚོང་ཡག་པོ་བྱུང་ན། རིམ་པས་བོད་ཀྱི་གྲོང་རྡལ་དང་གྲོང་ཁྱེར་ཁག་ཏུ་ཡན་ལག་ཇེ་མང་དུ་གཏོང་རྒྱུ་ཡིན། ཞེས་བརྗོད་འདུག

དེ་རིང་གྷར་ཌིན་དང་རོའི་ཌར་གྱིས་གནས་ཚུལ་སྤེལ་བའི་ནང་། ༢༠༠༤ ལོར་ཨ་རིའི་ཟས་རིགས་ཁེ་ལས་ཀཱེ་ཨཧྥི་སིས་བོད་ནང་ཟ་ཁང་ཚུགས་རྒྱུའི་འཆར་གཞི་བཏིང་ཡོད་ཀྱང་། ༧གོང་ས་ཏཱ་ལའི་བླ་མ་མཆོག་དང་དཀར་ཟས་ཚོགས་པ་འདྲ་མིན་གྱིས་སྐྱོན་བརྗོད་བྱས་ཡོད་སྟབས། ད་བར་བོད་ནང་ཀཱེ་ཨཧྥོ་སིའི་ཟ་ཁང་འཛུགས་ཐུབ་མེད། དེ་བཞིན། རྒྱ་ནག་གི་ཀཱེ་ཨཧྥོ་སི་དང་མེག་ཌོ་ཎལ་ཌི་ (McDonald)སོགས་ཀྱི་གཙང་སྦྲ་དང་ཟས་རིགས་ཀྱི་རྒྱུ་ཆ་ཡག་པོ་མེད་སྟབས། མང་ཚོགས་ཀྱིས་ཚོང་རྟགས་དེ་དག་གི་ཟས་རིགས་ཉོ་རྒྱུ་མཚམས་བཞག་པའི་དབང་གིས་ཁེ་ལས་དེ་གཉིས་ཀྱི་ཟ་ཁང་མང་པོ་སྒོ་རྒྱག་དགོས་བྱུང་ཡོད།

༢༠༡༤ ལོར་ཚོང་རྟགས་དེ་གཉིས་ཀྱིས་སླར་ཡང་རྒྱ་ནག་ནང་དུས་ཚོད་ཡོལ་བའི་སྲེག་ཤ་བཙོངས་པར་བརྟེན། འཛད་སྤྱོད་པ་མང་པོས་ངོ་རྒོལ་བརྒྱབ་ཡོད་སྟབས། ཁེ་ལས་ཁང་གཉིས་ཀྱིས་དགོངས་སེལ་ཞུས་ཏེ། མ་འོངས་པར་ཟས་རྒྱུ་ཆ་དང་གཙང་སྦྲ་ཇེ་ལེགས་སུ་གཏོང་རྒྱུའི་ཁས་ལེན་བྱས་སྟབས། ད་ལྟ་རྒྱ་ནག་མི་མང་གིས་ཟས་རིགས་དེ་དག་ལ་དགའ་སྣང་ཆེན་པོ་བྱེད་བཞིན་ཡོད། ཉེ་ལམ་རྒྱ་ནག་གི་དཔལ་འབྱོར་ཉམས་ཉེས་འགྲོ་བཞིན་ཡོད་པ་དང་བསྟུན་ཏེ། མི་མང་ཆེ་བས་དྲ་ཐོག་བརྒྱུད་གཙང་སྦྲ་ལེགས་པའི་ཟས་རིགས་མངག་ཉོ་བྱེད་བཞིན་ཡོད་པར་བརྟེན། ད་ལྟ་རྒྱ་ནག་ནང་ཀཱེ་ཨཧྥོ་སི་ཡི་ཚོང་ཁ་རྒྱུག་པོ་ཡོད་པ་རེད་ཅེས་བཀོད་འདུག

རག་ཡཱ་ཌི་ཆ་འཕྲིན་ (The Rakyat Post) ཞེས་པས་ཀཱེ་ཨཧྥོ་སིས་བོད་ནང་གི་ཁྲོམ་རྭ་རྒྱ་སྐྱེད་གཏོང་ཆེད་ལྷ་ས་གྲོང་ཁྱེར་དུ་ས་ཆ་མུའུ་གྲུ་བཞི་མ་ ༤ ཚེག་ ༦༧ ཅན་ཞིག་ཉོས་ཏེ། ད་ལྟ་ཁང་པ་གསར་རྒྱག་བྱེད་བཞིན་འདུག ཕྱི་ལོ་ ༡༩༩༤ ལོ་ནས་ད་བར་བོད་ནང་གི་ལོ་རེའི་ཐོན་འབབ་གྲངས་གནས་གཉིས་འཕར་ཡོད་པ་དང་། ཕྱི་ལོ་ ༢༠༡༤ ལོར་མི་དམངས་ཤོག་སྒོར་ཐེར་འབུམ་ ༩༢།༥ ཡི་ཡོང་འབབ་བྱུང་བ་མ་ཟད། ལོ་རེར་ཞིང་འབྲོག་གཉིས་ཀྱི་ཡོང་འབབ་བརྒྱ་ཆ་ ༡༤ དང་གྲོང་ཁྱེར་གྱི་གྲོང་མི་ཚོའི་ཡོང་འབབ་བརྒྱ་ཆ་ ༨ ལྷག་འཕར་བཞིན་ཡོད་པ་རེད། ད་ལྟ་བོད་ནང་གི་དཔལ་འབྱོར་ཡར་རྒྱས་ཤུགས་ཆེན་པོ་འགྲོ་བཞིན་ཡོད་པ་མ་ཟད། ཚོང་གི་མ་འཇོག་བྱེད་སའི་ཁོར་ཡུག་བཟང་པོ་ཡོད་སྟབས། ད་ཆ་བོད་ནང་རྒྱལ་སྤྱིའི་མ་འཇོག་བྱེད་མཁན་མང་དུ་འགྲོ་བཞིན་ཡོད་སྐོར་སོགས་འཁོད་འདུག

གསར་འགོད་པ། དོན་གྲུབ།