ཨ་རིའི་རྒྱལ་ཡོངས་སྲིད་འཛིན་འོས་བསྡུ་ཆེན་མོའི་སྔོན་འགྲོའི་ལས་རིམ་ཁྲོད་དམངས་གཙོ་ཚོགས་སྲིད་འཛིན་འོས་མི་ལྕམ་ཧེ་ལ་རེ་ཁི་ལེན་ཊོན་དང་མངའ་སྡེའི་གྲོས་ཚོགས་འཐུས་མི་གཞོན་པ་སྐུ་ཞབས་བྷིར་ནེ་སན་ཌིར་སི་རྣམ་གཉིས་ཀྱི་འགྲན་བསྡུར་ཁྲོད་ཧེ་ལ་རེ་ཕམ་བཞིན་ཡོད་འདུག
ཟླ་རྗེས་མའི་ཕྱི་ཚེས་ ༡ ཉིན་ནས་ཨ་རིའི་དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་སྲིད་འཛིན་འོས་མི་གཏན་འཁེལ་གསལ་བསྒྲགས་ཞུ་རྒྱུ་ཡིན་པ་དང་། ད་ལོའི་ཕྱི་ཟླ་ ༡༡ པའི་ཚེས་ ༨ ཉིན་དངོས་གཞིའི་འོས་བསྡུ་གནང་རྒྱུ་ཡིན་པ་ལྟར། ཟླ་འདིའི་ཕྱི་ཚེས་ ༡༤ ཉིན་ཨ་རིའི་སྒེར་གཉེར་སློབ་ཆེན་ཁུན་ནེ་ཕེ་ཡ་ཁི་གཙུག་ལག་སློབ་ཆེན་ (Quinnipiac University) ནང་སྔོན་འགྲོའི་འོས་ཞུགས་མི་མང་ ༥༠༠ ཁྲོད་ཀྱི་བརྒྱ་ཆ་ ༤༩ དམངས་གཙོ་ཚོགས་པའི་འོས་མི་སྐུ་ཞབས་སན་ཌིར་སི་ལ་རྒྱབ་སྐྱོར་བྱེད་ཀྱི་ཡོད་པ་དང་། མི་མང་བརྒྱ་ཆ་ ༤༤ དམངས་གཙོ་ཚོགས་པའི་འོས་མི་ལྕམ་ཧེ་ལ་རེ་ཁི་ལེན་ཊོན་ལ་རྒྱབ་སྐྱོར་བྱས་ཡོད་འདུག དེ་བཞིན། ཟླ་འདིའི་ཚེས་ ༧ ཉིན་ནས་ཨ་རིའི་དཀྱིལ་ནུབ་མངའ་སྡེ་ཨོ་ཝ་ (Iowa) དང་ནེའུ་བོ་ཧམ་ཕི་ཤཱེར་ (New Hampshire) གཉིས་ནང་མི་མང་བརྒྱ་ཆ་ ༤༨ ཀྱིས་སྐུ་ཞབས་སན་ཌིར་སི་ལ་འོས་ལྡུག་གིན་ཡོད་པ་དང་། མི་མང་བརྒྱ་ཆ་ ༤༡ གིས་ལྕམ་ཁི་ལེན་ཊོན་ལ་འོས་ལྡུག་བཞིན་ཡོད་སྟབས། ད་ཆར་སྐུ་ཞབས་སན་ཌིར་སི་གི་འོས་གྲངས་བརྒྱ་ཆ་ ༩ འཕར་བ་དང་ལྕམ་ཁི་ལེན་ཊོན་གྱི་འོས་གྲངས་བརྒྱ་ཆ་ ༤ ཙམ་མར་ཆགས་ཡོད་འདུག
གནས་ཚུལ་ལྟར་ན། ཨ་རིའི་མངའ་སྡེ་རིམ་པའི་ནང་གི་སྔོན་འགྲོའི་འོས་འདེམས་ཁྲོད་ལྕམ་ཧེ་ལ་རེ་ཁི་ལེན་ཊོན་གྱི་འོས་གྲངས་བསྟུད་མར་ཐེངས་གཉིས་ལ་ཉུང་དུ་ཕྱིན་ཡོད་སྟབས། དབྱེ་ཞིབ་པ་ཚོས་ཁོང་མོའི་འོས་འགྲན་གྱི་གནས་སྟངས་དེ་ཕྱི་ལོ་ ༢༠༠༨ ལོའི་འོས་འགྲན་གྱི་གནས་བབ་དང་གཅིག་པ་ཆགས་སྲིད་པར་ཚོད་དཔག་བྱེད་བཞིན་ཡོད་པ་དང་། སྔོན་འགྲོའི་འོས་བསྡུའི་འགྲོ་གྲོན་ཐད་ལྕམ་ཁི་ལེན་ཊོན་གྱིས་ཨ་སྒོར་ས་ཡ་ ༧.༤ དང་སྐུ་ཞབས་སན་ཌིར་སི་ཡིས་ཨ་སྒོར་ས་ཡ་ ༩.༧ ཟིན་གྱི་ཡོད་འདུག
སྤྱིར་ཨ་རིར་སྤྱི་མཐུན་ཚོགས་པ་དང་དམངས་གཙོ་ཚོགས་པ། ལྗང་ཁུ་ཚོགས་པ། ངལ་རྩོལ་ཚོགས་པ། རྩ་ཁྲིམས་ཚོགས་པ། རང་དབང་ཚོགས་པ་ཟེར་བ་སོགས་སྲིད་དོན་ཚོགས་པ་མང་པོ་ཞིག་ཡོད་ཀྱང་། ༡༨༥༢ ལོར་ཨ་རིའི་རྒྱལ་ཡོངས་སྲིད་འཛིན་འོས་བསྡུ་ཐོག་མར་མགོ་བཙུགས་པ་ནས་བཟུང་ཤུགས་ཆེ་ཤོས་དེ་དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཆགས་ཡོད་འདུག
དམངས་གཙོ་ཚོགས་པའི་འོས་མི་ལྕམ་ཧེ་ལ་རེ་ཁི་ལེན་ཊོན་གྱི་འབོད་སྒྲ་གཙོ་བོ། “མོས་ང་ཚོའི་དམིགས་འབེན་གཙོ་བོ་རྒྱལ་སྤྱིའི་འཇིགས་སྐུལ་དྲག་སྤྱོད་པ་འགོག་ཐབས་ཙམ་མ་ཡིན་པར་རྒྱལ་སྤྱིའི་འཇིགས་སྐུལ་དྲག་སྤྱོད་པ་ཚར་གཅོད་གཏོང་རྒྱུ་དེ་ཡིན”ཞེས་དང་། མར་ཊེན་ཨོ་མ་ལའེ་ཡི་འབོད་སྒྲ་གཙོ་བོ། “ང་རང་སྲིད་སྟེགས་འདིའི་སྟེངས་བུད་ནས་སི་རི་ཡའི་སྐྱབས་བཅོལ་བ་དྲུག་ཁྲི་ལྔ་སྟོང་ཨ་རིའི་རྒྱལ་ནང་དུ་སྣེ་ལེན་དགོས་པའི་བསམ་ཚུལ་འདོན་མཁན་ཐོག་མ་དེ་ཡིན། ང་ཚོས་འཇིགས་སྐུལ་དྲག་སྤྱོད་པའི་དམར་གསོད་འོག་གི་སྐྱབས་བཅོལ་བའི་དངོས་འབྲེལ་དཀའ་རྙོག་འདི་སེལ་འདུམ་དགོས་པར་ངས་ཡིད་ཆེས་བྱེད་ཀྱི་ཡོད”ཅེས་པ་འདི་རེད།
དེ་བཞིན། སྤྱི་མཐུན་ཚོགས་པའི་སྐུ་ཞབས་ཇེབ་བྷུ་ཤཱི་ཡི་འབོད་སྒྲ་གཙོ་བོ། “ང་ཚོས་སི་རི་ཡའི་སྐྱབས་བཅོལ་བའི་གནས་སྟངས་ངོ་མ་དེ་མཐོང་ཡོང་དུས། ང་ཚོར་དཀའ་རྙོག་འདི་སེལ་བའི་འོས་འགན་གཡོལ་དུ་མེད་པ་ཡོད་པ་རེད་བསམ་གྱི་འདུག མ་ཟད་ང་ཚོས་སི་རི་ཡའི་རྒྱལ་ནང་དུ་སྡོད་ཐབས་མེད་པའི་ཡི་ཤུ་བ་ཚོའི་འཚོ་གནས་ལ་དོ་སྣང་བྱ་དགོས་ཀྱི་ཡོད”ཅེས་པ་དང་། སྤྱི་མཐུན་ཚོགས་པའི་ཞབས་ཊི་རུམ་ཕུ་ཡི་འབོད་སྒྲ་གཙོ་བོ་ “ངས་ཁ་པར་ལེན་དུས། ལས་དོན་ཆེ་ཆུང་ཅི་འདྲ་ཞིག་ཡིན་རུང་། ངས་དེ་དང་དུ་ལེན་ངེས་ཡིན། གལ་སྲིད་ཁྱེད་ཀྱིས་དོན་དངོས་རྟོགས་འདོད་ན། ངའི་སྐད་ཆར་ཉོན་ཅིག འདི་ནི་ཡིད་སྐྱོ་བའི་འགྲེལ་བརྗོད་ཅིག་ཡིན་ནའང་། ངས་རྒྱལ་ཡོངས་བདེ་སྲུང་ལྷན་ཁང་གི་ནོར་འཆུག་ཐེར་འདོན་བྱེད་ཀྱི་ཡོད”ཅེས་པ། སྤྱི་མཐུན་ཚོགས་པའི་ལྕམ་ཁར་ལེ་ཧྥའོ་རེ་ན་མཆོག་གི་འབོད་སྒྲ་གཙོ་བོ། “དུས་རྒྱུན་གཡོན་ལྷུང་ལ་འཕྲད་བཞིན་པའི་དཀའ་རྙོག་སེལ་ཐབས་སུ། ང་ཚོས་མིག་མཐོང་ལག་ཟིན་གྱི་རྩ་ཁྲིམས་མང་པོ་ཞིག་ལག་བསྟར་བྱེད་དགོས་ཀྱི་འདུག”ཅེས་སོགས་རེད།
ཨ་རིའི་སྲིད་འཛིན་འོས་འགྲན་ཁྲོད་དམངས་གཙོ་ཚོགས་པའི་ཨ་རིའི་རྒྱལ་དོན་དྲུང་ཆེ་ཟུར་བ་ལྕམ་ཧེ་ལ་རེ་ཁི་ལེན་ཊོན་ (Hillary Clinton)དང་། ཨ་རིའི་ཤར་རྒྱུད་མངའ་སྡེ་མ་རེ་ལན་ཌའི་ (Maryland) སྤྱི་ཁྱབ་བློན་ཆེན་མར་ཊེན་ཨོ་མ་ལའེ་ (Martin O’Malley)། བྱང་ཤར་རྒྱུད་ཀྱི་བིར་མོན་ཊི་ (Vermont) མངའ་སྡེའི་གྲོས་ཚོགས་འཐུས་མི་གཞོན་པ་སྐུ་ཞབས་བྷིར་ནེ་སན་ཌིར་སི་ (Bernie Sanders)བཅས་ ༣ ཡོད་པ་དང་། སྤྱི་མཐུན་ཚོགས་པའི་སྲིད་འཛིན་འོས་གཞིར་ཨ་རིའི་ལྷོ་ཤར་མངའ་སྡེ་ཧྥི་ལོ་རེ་ཌའི་ (Florida) སྤྱི་ཁྱབ་བློན་ཆེན་ཇེབ་བྷུ་ཤཱི་ (Jeb Bush)དང་། ཨ་རིའི་ཀླད་ཁམས་གཤག་བཅོས་སྨན་པ་ཆེན་མོ་སྐུ་ཞབས་བྷིན་ཁར་སོན་ (Ben Carson)། ཨ་རིའི་བྱང་ཤར་མངའ་སྡེ་ནེའུ་ཇིར་སའེ་ (New Jersey) ཡི་སྤྱི་ཁྱབ་བློན་ཆེན་ཆ་རེ་སི་ཆ་རེ་སི་ཊེ་ (Chris Christie)། ལྷོ་རྒྱུད་ཀྱི་ཊ་ཁི་སི་ (Texas) མངའ་སྡེའི་གྲོས་ཚོགས་འཐུས་མི་གཞོན་པ་སྐུ་ཞབས་ཊི་ཌ་ཁ་རུ་ཙ་ (Ted Cruz)། ཨ་རིའི་འཕྲུལ་ལས་རིག་པའི་འགན་འཛིན་ཟུར་བ་ལྕམ་ཁར་ལེ་ཧྥའོ་རེ་ན་ (Carly Fiorina)། ལྷོ་ཤར་མངའ་སྡེ་བེར་ཇེ་ནེ་ཡའི་ (Virginia) སྤྱི་ཁྱབ་བློན་ཆེན་ཟུར་བ་སྐུ་ཞབས་ཇེམ་གྷེལ་མོར་ (Jim Gilmore)། ལྷོ་ཤར་མངའ་སྡེ་ཨར་ཁན་ས་སིའི་(Arkansas) སྤྱི་ཁྱབ་བློན་ཆེན་ཟུར་བ་སྐུ་ཞབས་མེ་ཁི་ཧུག་ཀ་བྷེ་ (Mike Huckabee)། ཨ་རིའི་དཀྱིལ་ནུབ་མངའ་སྡེ་ཨོ་ཧ་ཡོའི་ (Ohio) སྤྱི་ཁྱབ་བློན་ཆེན་ལས་ཐོག་སྐུ་ཞབས་ཨོ་ཧན་ཀ་སི་ཆ་ (ohn Kasich)། ཨ་རའི་གྲོས་ཚོགས་འཐུས་མི་ཟུར་བ་སྐུ་ཞབས་རན་ཌི་ཕུལ་ (Rand Paul)། ལྷོ་ཤར་གྱི་ཧྥི་ལོ་རེ་ཌ་ (Florida) མངའ་སྡེའི་གྲོས་ཚོགས་འཐུས་མི་གཞོན་པ་སྐུ་ཞབས་མར་ཁོ་རུ་བྷེའོ་ (Marco Rubio)། སྤྱི་མཐུན་ཚོགས་པའི་སྲིད་དོན་པ་སྐུ་ཞབས་རེ་ཁི་སན་ཊོར་རུམ་ (Rick Santorum)། ཨ་རིའི་འབྱོར་ལྡན་པ་ཆེན་མོ་སྐུ་ཞབས་ཌོ་ནལ་ཌི་ཇེ་ཊི་རུམ་ཕུ་ (Donald J. Trump)། བྱང་ཤར་མངའ་སྡེ་མ་ས་ཆུ་སི་ཊེ་སིའི་ (Massachusetts) སྤྱི་ཁྱབ་བློན་ཆེན་ཟུར་བ་སྐུ་ཞབས་ (Mitt Romney)སོགས་ ༡༡ འདུག
ཨ་རིའི་རྒྱལ་ཁབ་དེ་མངའ་སྡེ་ ༥༠ ཡིས་གྲུབ་ཅིང་། གྲོས་ཚོགས་གོང་འོག་གཉིས་ཡོད་པ་ལས་གྲོས་ཚོགས་གོང་མར་མངའ་སྡེ་རེ་ནས་འཐུས་ ༢ རེ་ཡོང་གི་ཡོད་སྟབས་ཁྱོན་གྲོས་ཚོགས་འཐུས་མི་ ༡༠༠ ཡོད་པ་དང་། གྲོས་ཚོགས་འོག་མའི་ནང་འཐུས་མི་ ༤༣༥ ཡོད་ཅིང་། དེ་དག་ནི་འོས་བསྡུའི་ས་ཁོངས་ ༤༣༥ ལ་བསྒོས་ཏེ་ས་ཁོངས་རེ་ནས་འོས་མི་གཅིག་རེ་འདེམས་བཞིན་ཡོད།
གསར་འགོད་པ། པདྨ་རྒྱལ།
གསར་འགྱུར་འཐུས་ཚང་དང་གོ་བདེ་སྙིང་བསྡུས་བྲིས་ཡོད།