དེང་སྐབས་རྒྱ་རིགས་དྲ་ཐོག་གསང་ཉུལ་བ་ཚོས་བོད་རིགས་དང་ཡུ་གུར་མི་རིགས་ཀྱི་ཁེ་དབང་རྩོད་ལེན་གནང་མཁན་ཚོ་དམིགས་འབེན་དུ་བཟུང་ཡོད་འདུག
དབྱིན་ཇིའི་གློག་ཀླད་ཤེས་བྱའི་དུས་དེབ་ (pcworld) ཅེས་པའི་དྲ་ཚིགས་སྟེང་གནས་ཚུལ་སྤེལ་དོན་ལྟར་ན། ཁ་སང་ཨ་རིའི་མངའ་སྡེ་ཁ་ལེ་ཧྥོར་ནེ་ཡའི་དྲ་ལམ་བདེ་སྲུང་ལས་གཉེར་ཁང་ (Palo Alto Network) གིས་ཟླ་བ་ ༧ རིང་གི་ཞིབ་འཇུག་སྙན་ཐོའི་ནང་། རྒྱ་རིགས་དྲ་ཐོག་གསང་ཉུལ་ཚོགས་པ་ཞིག་གིས་འདས་པའི་ལོ་ངོ་གཅིག་རིང་བོད་དང་ཡུ་གུར་མི་རིགས་ཀྱི་ཁེ་དབང་དོན་གཉེར་བ་ཚོ་དམིགས་འབེན་དུ་བཟུང་སྟེ། དྲ་མིང་ལ་སི་ཁར་ལི་ཊི་མེ་མེ་ཁི་ (Scarlet Mimic) ཞེས་པ་ཞིག་སྤྱད་ནས་མི་སྒེར་གྱི་གནས་ཚུལ་མང་པོ་སྐུ་འཁྱེར་བྱེད་བཞིན་ཡོད་པ་དངོས་འབྲེལ་ཡིན་སྐོར་བརྗོད་འདུག
དྲ་ལམ་བདེ་སྲུང་ལས་གཉེར་ཁང་དེའི་གསང་བའི་གནས་ཚུལ་རྟོག་ཞིབ་ཚན་པའི་འགན་འཛིན་ར་ཡན་ཨོལ་སོན་ (Ryan Olson) ཞུ་བ་ཞིག་གིས། ང་ཚོས་ཤེས་རྟོགས་ཟིན་པའི་རྒྱ་རིགས་དྲ་ཐོག་གསང་ཉུལ་ཚོགས་པ་དེས་ཡུ་གུར་དང་བོད་མིའི་ཁེ་དབང་དོན་གཉེར་བ་དང་། རྒྱ་ནང་གི་ཁྲིམས་རྩོད་པ་ཚོ་དམིགས་འབེན་དུ་བཟུང་འདུག དྲ་ཐོག་གསང་ཉུལ་བ་དེ་ཚོ་ཕན་ཚུན་ལ་འབྲེལ་བ་ཤུགས་ཆེན་པོ་ཡོད་པ་དང་། ཁོ་ཚོ་ཚང་མ་ཚོགས་ཁག་གཅིག་གི་མི་རེད་འདུག ཁོ་ཚོས་ཕན་ཚུན་ལ་གསང་བའི་གནས་ཚུལ་སྐུ་འཁྱེར་བྱེད་སྟངས་ཀྱི་རྒྱུ་ཆ་མཁོ་སྤྲོད་བྱེད་ཀྱི་ཡོད་པ་དང་། ཁོ་ཚོས་གཞན་གྱི་དྲ་ཚིགས་དང་གློག་ཀླད་ནང་ལྐོག་འཛུལ་གྱིས་གནས་ཚུལ་སྐུ་འཁྱེར་བྱེད་པའི་ཡོ་བྱད་གཅིག་པ་གཅིག་རྐྱང་བཀོལ་སྤྱོད་བྱེད་ཀྱི་འདུག ཡོ་བྱད་དེ་དག་སྒྲིག་འཛུགས་གཅིག་གིས་མཁོ་སྤྲོད་གནང་གི་ཡོད་པ་ཧ་ཅང་གསལ་བོ་རེད་ཅེས་བརྗོད་འདུག
ཁོང་གིས་མུ་མཐུད་དུ། ང་ཚོས་ཞིབ་འཇུག་བྱས་པ་ལྟར་ན། དྲ་ཐོག་གསང་ཉུལ་བ་མི་གཉིས་ཀྱིས་སྲིད་གཞུང་ལ་ངོ་རྒོལ་བྱེད་ཁུལ་གྱིས་དོན་དུ་རྒྱ་ནང་གི་ཁེ་དབང་རྩོད་ལེན་པ་ཚོ་རྗེས་འདེད་གཏོང་གི་འདུག ཁོ་ཚོ་མི་སྒེར་གྱི་དྲ་ཚིགས་དང་གློག་ཀླད་ནང་ལྐོག་འཛུལ་བྱས་ཏེ་གསང་བའི་ཡིག་ཆ་ཁག་ལ་ལྐོག་ལྟ་བྱེད་ཀྱི་འདུག་ཅེས་སོགས་བརྗོད་འདུག
དྲ་ལམ་བདེ་སྲུང་ལས་གཉེར་ཁང་དེས་མི་སྒེར་གྱི་དྲ་ཚིགས་དང་གློག་ཀླད་ནང་ལྐོག་འཛུལ་དང་གནས་ཚུལ་སྐུ་འཁྱེར་བྱེད་མཁན་དྲ་ཐོག་གསང་ཉུལ་ཚོགས་པ་དེ་ཐད་ཀར་རྒྱ་གན་གཞུང་ལ་འབྲེལ་ཡོད་མེད་ད་དུང་གསལ་ཁ་བྱུང་ཐུབ་མེད་ནའང་། ཁོ་ཚོས་དྲ་ལམ་བདེ་སྲུང་ལས་གཉེར་ཁང་གཞན་མང་པོའི་ཞིབ་འཇུག་ཡིག་ཆ་ཁག་གཞིར་བཟུང་ནས་རྒྱ་རིགས་དྲ་ཐོག་གསང་ཉུལ་ཚོགས་པ་དེར་རྟགས་དཔྱད་ཞིབ་འཇུག་གནང་བ་ཞིག་ཡིན་འདུག
གསར་འགོད་པ། པདྨ་རྒྱལ།
