གཟའ་ཉི་མའི་ཉིན་ཨ་རིའི་ནེའུ་ཡོག་དང་ནུའི་ཇིར་སི་ས་གནས་བོད་ཀྱ་གཞོན་ནུ་ལྷན་ཚོགས་ཀྱི་སྐབས་ ༡༤ པའི་རྒྱུན་ལས་གསར་འདེམས་གནང་སྟེ་རྒྱུན་རིང་གི་རྙོག་གླེང་འགྲིག་འཇགས་བྱུང་ཡོད་འདུག
ཟླ་སྔོན་མའི་ཚེས་ ༣༡ ཉིན། ཨ་རིའི་ནེའུ་ཡོག་དང་ནེའུ་ཇིར་སི་ས་གནས་བོད་མིའི་ཚོགས་ཁང་ཕུན་ཚོགས་བདེ་བཞིའི་ནང་། ནེའུ་ཡོག་དང་ནེའུ་ཇིར་སི་ས་གནས་གཞོན་ནུའི་རྒྱུན་ལས་གསར་འདེམས་གནང་ཡོད་ཅིང་། བཀའ་ཟུར་བློ་བཟང་སྙན་གྲགས་ལགས་དང་རྒྱུན་ལས་ཟུར་བ་རྣམ་རྒྱལ་ཤཱསྚི་རྣམ་གཉིས་ཀྱིས་སྣེ་འཁྲིད་གནང་ཡོད་པ་དང་། གསར་དུ་བདམས་ཐོན་བྱུང་བའི་རྒྱུན་ལས་དག་ལས་ཚོགས་གཙོ་བསྟན་འཛིན་སྐལ་ལྡན་ལགས་དང་ཚོགས་གཞོན་ཚེ་རིང་དཔལ་ལྡན་ལགས། དྲུང་ཆེ་སྒྲོལ་མ་ཆོས་འཕེལ་བཅས་བསྐོ་བཞག་གནང་ཡོད་འདུག
ཐེངས་འདིའི་ཚོགས་འདུའི་སྟེང་། དྷ་རམ་ས་ལའི་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་དྲུང་ཆེ། ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས་རྣམ་པ། ས་གནས་མདོ་ཁམས་ཆུ་བཞི་སྒང་དྲུག་དང་བུད་མེད་ལྷན་ཚོགས་ཀྱི་རྒྱུན་ལས་རྣམ་པ། ས་གནས་གཞོན་ནུའི་རྒྱུན་ལས་རྣམ་པ། དེ་བཞིན། ས་གནས་མི་མང་ ༦༠༠ ལྷག་འཛོམས་ཡོད་པ་ལས་མི་ ༥༨༧ གྱིས་དངོས་སུ་འོས་ཕངས་ཡོད་འདུག
རྒྱུན་ལས་གསར་པ་འོས་འདེམས་རྗེས་ལ་བཀའ་ཟུར་བློ་བཟང་སྙན་གྲགས་ལགས་ཀྱིས། ད་རེབ་ཚེས་ ༢༦ ཉིན་ང་ཚོས་ནང་མོལ་གནང་སྟེ་འགྲིག་འཇགས་བྱུང་སྐབས། ས་གནས་གཞོན་ནུའི་རྒྱུན་ལས་ཚོས་དགོས་འདུན་གལ་ཆེན་པོ་ཞིག་བཏོན་ཡོད་པ་དེ་ནི། འབྱུང་འགྱུར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་སྟེང་། སྒྲིག་གཞི་བསྐྱར་བཅོས་སུ་ཚོགས་ཆུང་ཞིག་བཙུགས་ཏེ། གཞོན་ནུའི་སྒྲིག་གཞི་བསྒྱུར་བཅོས་ཀྱི་ལས་རིམ་འགྲོ་དགོས་པ་དང་། དེ་བཞིན། ཚོགས་ཆེན་དེའི་སྟེང་རྒྱ་གར་ལྷོ་ཕྱོགས་ཀྱི་གཞོན་ནུའི་ས་གནས་བརྒྱད་ཀྱང་མཉམ་ཞུགས་གནང་དགོས་པ་བཅས་ཀྱི་དགོས་འདུན་བཏོན་ཡོད་སྐོར་གསུངས་སོང་།
ཐེངས་འདིར་གསར་དུ་བདམས་ཐོན་བྱུང་བའི་རྒྱུན་ལས་དག་གི་འོས་གྲངས་ནི། ཚེ་རིང་དཔལ་ལྡན་ལགས་སུ་འོས་གྲངས་ ༤༠༤ དང་བསྟན་འཛིན་སྐལ་ལྡན་ལགས་སུ་འོས་ ༤༠༡ ། སྒྲོལ་མ་ཆོས་འཕེལ་ལགས་སུ་འོས་ ༣༨༨ ། པད་མ་དར་འཕེལ་གླིང་ལགས་སུ་འོས་ ༣༥༩ ། འཆི་མེད་ཚེ་རིང་ལགས་སུ་འོས་ ༣༥༥ ། ཚེ་དབང་བདེ་ཆེན་ལགས་སུ་འོས་ ༣༢༥ ། སྐལ་བཟང་ཕུན་ཚོགས་ལགས་སུ་འོས་ ༢༨༤ ། ངག་དབང་རིགས་འཛིན་ལགས་སུ་འོས་ ༢༨༣ ། བདེ་ཆེན་རྡོ་རྗེ་ལགས་སུ་འོས་ ༢༥༩ ། ཀརྨ་རྒྱ་མཚོ་ལགས་སུ་འོས་ ༢༥༧ བཅས་ཐོབ་ཡོད་འདུག
འདས་ལོའི་ཕྱི་ཟླ་ ༧ པའི་ནང་། ནེའུ་ཡོག་དང་ནེའུ་ཇིར་སི་ས་གནས་གཞོན་ནུ་ལྷན་ཚོགས་ཀྱིས་དབུས་གཞོན་ནུར་དོན་ཚན་ ༣ ཅན་གྱི་ཡི་གེ་ཞིག་བཏང་བའི་ནང་། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་གཞི་དོན་ཚན་དང་པོའི་ནང་༧གོང་ས་མཆོག་གི་བཀའ་དགོངས་འོག་ཤར་སྐྱོད་བྱ་རྒྱུ་ཡིན་ཞེས་འཁོད་ཡོད་པ་དང་དོན་ཚན་བཞི་པའི་ནང་རང་བཙན་རྩོད་རྒྱུ་ཡིན་ཞེས་འཁོད་ཡོད་པ་གཉིས་ནང་འགལ་ཆགས་ཡོད་སྟབས། དབུས་བོད་ཀྱི་གཞོན་ནུ་ལྷན་ཚོགས་ཀྱི་ལངས་ཕྱོགས་ལ་འགྱུར་བ་མ་བཏང་བར་དབུས་ལ་འབྲེལ་བ་ཞུ་རྒྱུ་མིན་སྐོར་འཁོད་ཡོད།
འདས་ལོའི་ཕྱི་ཟླ་ ༡༢ ཚེས་ ༡༦ ཉིན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ནེའུ་ཡོག་དང་ནེའུ་ཇིར་སི་ས་གནས་གཞོན་ནུ་གནས་སྐབས་རིང་སྒོ་རྒྱག་རྒྱུ་ཡིན་པའི་གསལ་བསྒྲགས་སྤེལ་ཡོད། ཕྱི་ཟླ་ ༡༢ ཚེས་ ༢༩ ཉིན་ནེའུ་ཡོག་ས་གནས་གཞོན་ནུའི་རྒྱུན་ལས་རྣམ་པས་མི་མིང་བསྡུ་སྐོང་གནང་སྟེ་འོས་བསྡུ་གནང་སྐབས་བརྒྱ་ཆ་ ༩༥ ལྷག་གིས་ས་གནས་གཞོན་ནུ་སྒོ་མི་རྒྱག་པར་རྒྱུན་ལས་ཚོས་མི་མཐུད་ལས་འགན་འཁུར་དགོས་པའི་བསམ་ཚུལ་བྱུང་ཡོད། ཟླ་སྔོན་མའི་ཚེས་ ༢༦ ཉིན་བཀའ་ཟུར་བློ་བཟང་སྙན་གྲགས་ལགས་ཀྱིས་མགོ་ཁྲིད་དེ་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་དྲུང་ཆེ། དེ་བཞིན། ནེའུ་ཡོག་ས་གནས་གཞོན་ནུའི་རྒྱུན་ལས་རྣམ་པ་བཅས་ནང་མོལ་གནང་སྟེ་འགྲིག་འཇགས་བྱུང་ཤིང་ཚེས་ ༣༡ ཉིན་སླར་ཡང་སྐབས་ ༡༤ པའི་ས་གནས་གཞོན་ནུའི་རྒྱུན་ལས་གསར་འདེམས་གནང་རྒྱུའི་ཐག་གཅོད་དེ་བྱུང་ཡོད།
