དེ་རིང་སྔ་དྲོར་དབུས་འོས་བསྡུ་ལས་ཁང་ནས་བཀའ་ཤག་སྐབས་ ༡༥ པ་དང་བོད་མི་མང་སྤྱི་འཐུས་ཀྱི་འོས་དམིགས་རྣམ་གསལ་བསྒྲཊ་གནང་བ་དང་འབྲེལ། དོ་བདག་འོས་མི་དང་འོས་འཕེན་པས་ཐུགས་སྣང་དགོས་པའི་དོན་ཚན་ཁག་ཅིག་བསྒྲགས་གནང་སོང་།
དེ་རིང་སྔ་དྲོའི་ཆུ་ཚུད་ ༡༠།༣༠ ཐོག་གངས་སྐྱིད་ལྷག་པ་ཚེ་རིང་ཚོགས་ཁང་དུ། བཙན་བྱོལ་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་ནས་བཀའ་ཤག་སྐབས་བཅོ་ལྔ་པའི་སྲིད་སྐྱོང་ཀྱི་དངོས་གཞིའི་འོས་དམིགས་གཉིས་དང་། བོད་མི་མང་སྤྱི་འཐུས་སྐབས་ ༡༦ པའི་དབུས་གཙང་ཆོལ་ཁའི་དངོས་གཞིའི་འོས་དམིགས་དང་བླངས་བ་གཅིག་བཅས་འོས་དམིགས་ ༢༡ དང་། མདོ་སྟོད་སྨད་གཉིས་ལ་འོས་དམིགས་ ༢༠ རེ། དེ་བཞིན་ཆོས་བརྒྱུད་ཆེན་པོ་བཞི་དང་གཡུང་དྲུང་བོན། ཡུ་རོབ་དང་ཨ་ཧྥེ་རི་ཁ་ཁུལ་བཅས་ནས་འོས་དམིགས་ ༤ རེ། ལྷོ་བྱང་ཨ་རི་ནས་དང་བླངས་འོས་དམིགས་གཉིས་བཅས་འོས་དམིགས་ ༦། རྒྱ་བལ་འབྲུག་གསུམ་ཕུད་པའི་ཨེ་ཤ་ཡ་དང་ཨོ་སི་ཊོ་ལི་ཡ་ཁུལ་ནས་དང་བླངས་འོས་དམིགས་གཅིག་བཅས་དངོས་གཞིའི་འོས་དམིགས་ ༣ གཏན་འབེབས་གནང་བ་གསལ་བསྒྲགས་གནང་སོང་།
དེ་ཡང་དབུས་འོས་བསྡུ་ལས་ཁང་གི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་སྲིད་སྤྱི་གཉིས་ཀྱི་འོས་གཞི་རྣམ་པས་ཐུགས་སྣང་དགོས་པའི་གནད་དོན་ཁག་ཅིག་ཡིག་ཐོག་ནས་སྒྲོག་སྦྱངས་གནང་བའི་ནང་།
༡༽ འོས་སྒྲིག་སྤྱི་དང་ལྷག་པར་དོན་ཚན་ ༢༤ ནང་གསེས་ཁག་དང་དེ་འབྲེལ་ལམ་སྟོན་ཁག་ལ་ཐུགས་སྣང་ངེས་པར་གནང་དགོས།
༢༽ དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་མ་ཟིན་གོང་དུ་ས་གནས་སོ་སོའི་འོས་བསྡུ་ལས་ཁང་ལ་རྩིས་སྙན་འབུལ་དགོས་རིགས། ཀ ལམ་སྟོན་སྔོན་སོང་ལྟར་འོས་མི་སྒེར་སོ་སོ་དང་། སྤྱི་སྒེར་སུའི་ཐད་ནས་འོས་གཞི་དམིགས་འཛུགས་ཀྱིས་སྔོན་འགྲོ་དང་དངོས་གཞི་གཉིས་ཀའི་ཐད་རྒྱབ་སྐྱོར་གསལ་བསྒྲགས་སོགས་ཀྱི་ཆེད་འགྲོ་གྲོན་ཇི་སོང་དོ་བདག་འོས་མིའི་རྩིས་ཁྲའི་ཁོངས་སུ་བསྡོམས་ཏེ་འགྲོ་གྲོན་གང་སོང་གི་རྩིས་ཁྲ་མཐའ་དག་ཁུངས་སོ་སོའི་ས་གནས་འོས་བསྡུ་ལས་ཁང་ལ་འབུལ་དགོས།
ཁ། འོས་མིར་དམིགས་འཛུགས་ཀྱིས་རྒྱབ་སྐྱོར་གསལ་བསྒྲགས་གནང་མཁན་གཞུང་འབྲེལ་ངོས་ལེན་ཡོད་པའི་ཚོགས་པ་ཚང་མས་ཀྱང་འོས་སྔོན་འགྲོ་དང་དངོས་གཞི་གཉིས་ཀའི་འགྲོ་གྲོན་གང་སོང་གི་རྩིས་ཁྲ་མཐའ་དག་ས་གནས་སོ་སོའི་འོས་བསྡུ་ལས་ཁང་དུ་ངེས་འབུལ་དགོས་པ་ཡིན།
ག འོས་གཞིའི་སྐྱེ་བོ་སུ་རང་ལ་དོ་བདག་རང་ཉིད་ནས་དང་། ཚོགས་སྡེ་སུ་ཐད་ནས་འོས་བསྡུའི་དྲིལ་བསྒྲགས་སོགས་ཀྱི་ཆེད་འགྲོ་གྲོན་རྩ་ནས་བཏང་མེད་ཚེ་དེ་འབྲེལ་གྱི་གནས་ཚུལ་ས་གནས་འོས་བསྡུ་ལས་ཁང་ལ་ཡིག་ཐོག་ནས་སྙན་འབུལ་ཞུ་དགོས།
ང་། སྔོན་ཞུས་ལྟར་འོས་གཞི་སོ་སོ་ནས་རང་ཉིད་ལ་རྒྱབ་སྐྱོར་གསལ་བསྒྲགས་བྱེད་འཐུས་ཆོག་པའི་ཚོགས་སྡེ་དང་མི་སྒེར་སུ་ལ་ཆོག་མཆན་གནང་བའི་ངོ་བཤུས་འོས་མི་ཡོང་ཁུངས་སོ་སོའི་ས་གནས་འོས་བསྡུ་ལས་ཁང་ལ་ངེས་འབུལ་དགོས་པ་ཡིན་བཅས་བཀོད་འདུག
ཡང་འོས་འཕེན་མཁན་ཡོངས་ནས་ཐུགས་སྣང་དགོས་པའི་དོན་ཚན་ ༦ བསྒྲགས་པའི་ནང་།
༡༽ ཉེ་སྔོན་འོས་སྔོན་འགྲོའི་སྐབས་སུ་དེབ་སྐྱེལ་མེད་པ་དང་ཆ་ཤས་ལེན་ཐུབ་མེད་པ་ཡོད་ན་དངོས་གཞིའི་སྐབས་སུ་ཆ་ཤས་ལེན་ཐུབ་པ་གནང་རོགས།
༢༽ འོས་བསྡུ་དངོས་གཞིའི་སྐབས་འདི་ནས་འགྲེམས་སྤེལ་ཞུས་པའི་འོས་ཤོག་ནང་ཆོལ་ཁ་ཡིན་ན་འོས་མི་ཉི་ཤུ་རེ་དང་། དེའི་སྟེང་དང་བླངས་བསྣན་ཡོད་པ་བཅས་ཀྱི་ནང་ནས་ཁྱོན་འོས་མི་ ༡༠ ཡི་མཚན་དང་མཚོན་རྟགས་གང་རུང་གི་སྟེང་དུ་འོས་རྟགས་རྒྱག་དགོས་པ་ལས་བཅུ་ལས་བརྒལ་མི་ཆོག ཕོ་མོ་ཁྱད་མེད་བཅུ་རེའི་ནང་དུ་བུད་མེད་གཉིས་ལ་ངེས་པར་འོས་འཕེན་དགོས་པ་སྔོན་འགྲོ་དང་གཅིག་མཚུངས་ཡིན།
༣༽ ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པ་དང་། དེ་བཞིན་ལྷོ་བྱང་ཨ་རི། ཡུ་རོབ་དང་ལྷོ་ཨ་ཧྥེ་རི་ཁ་ཁུལ་བཅས་ཀྱི་འོས་མི་བཞི་རེ་དང་། དེའི་སྟེང་དང་བླངས་བསྣན་ཡོད་པ་བཅས་ཀྱི་ནང་ནས་འོས་མི་གཉིས་ཀྱི་མཚན་དང་མཚོན་རྟགས་གང་རུང་སྟེང་དུ་འོས་རྟགས་རྒྱག་དགོས། རྒྱ་བལ་འབྲུག་གསུམ་ཕུད་པའི་ཨེ་ཤ་ཡ་དང་ཨོ་སི་ཊོ་ལི་ཡའི་ཁུལ་དུ་འོས་མི་གཉིས་ཀྱི་སྟེང་དང་བླངས་བསྣན་ཡོད་པ་བཅས་ཀྱི་ནང་ནས་འོས་མི་གཅིག་གི་མཚན་དང་མཚོན་རྟགས་གང་རུང་གི་སྟེང་དུ་འོས་རྟགས་རྒྱག་དགོས།
༤༽ དངོས་གཞིའི་འོས་བསྡུའི་སྐབས་ལོང་བ་དང་ལག་པ་གཉིས་ཀ་མེད་པའམ་སྐྱོན་ཅན་ལ་མ་གཏོགས་ཡིག་རྨོངས་ཅན་གྱིས་འོས་བསྡུའི་སྤྱིལ་བུའི་ནང་རོགས་རམ་བྱེད་མི་མཉམ་འཁྲིད་མི་ཆོག
༥༽ འོས་སྒྲིག་དོན་ཚན་ ༣༤ ནང་གསེས་ ༢ ཀ་པའི་དགོངས་དོན་ལྟར་རིགས་འགྲེས་ཀྱིས་སོ་སོས་སུ་ལ་འོས་འཕངས་པའི་འོས་ཤོག་པར་བརྒྱབ་སྟེ་ངོ་དེབ་སོགས་དྲ་ལམ་ཁག་ཏུ་ཁྱབ་སྤེལ་བྱེད་པ་དང་། དོ་བདག་འོས་མི་ལ་དྲ་ལམ་ནས་བསྐུར་བ་སོགས་དབུས་སའི་འོས་བསྡུ་ལས་ཁང་སུའི་ཐད་ནས་ཤེས་རྟོགས་བྱུང་ཚེ་འོས་ཤོག་རྩིས་མེད་གཏོང་རྒྱུ་ཡིན།
༦༽ དེ་རིང་འདི་ནས་གསལ་བསྒྲགས་བྱས་པའི་སྲིད་སྤྱི་གཉིས་ཀྱི་འོས་དངོས་གཞི་འདིའི་ནང་ནས་མ་འོངས་པའི་མགོ་ཁྲིད་འོས་འདེམས་བྱེད་དགོས་སྟབས། དོན་དངོས་འོས་ཆོས་མ་ཚང་བའི་བདེན་དཔང་དངོས་ར་འཕྲོད་པ་ཡོད་ན་མ་གཏོགས། རང་གི་འདོད་དབང་ཙམ་གྱི་དབང་དུ་བཏང་ནས་ཁག་དཀྲི་འདྲ་མིན་གྱིས་གཞི་མེད་བསྙོན་འཛུགས་དང་། ཆིག་བསྒྲིལ་གཏོར་བཤིག་དགྲ་དགའ་གཉེན་སྡུག་སོགས་ཀྱི་གཞི་རུ་མ་འགྱུར་བའི་ཁུངས་མེད་འཆལ་གཏམ་རིགས་དྲ་ལམ་སོགས་བརྒྱུད་ལམ་ཁག་ཏུ་མི་སྤེལ་བའི་རེ་སྐུལ་ནན་མོ་ཞུ་རྒྱུ་ཡིན་ཞེས་བཀོད་འདུག
གསར་འགོད་པ། པདྨ་མཚོ།
