རྒྱ་ནག་གཞུང་གིས་ཐབས་ལམ་སྣ་ཚོགས་བརྒྱུད་དེ་རྒྱ་གར་ནང་གི་༧གོང་ས་མཆོག་དང་དཔལ་རྒྱལ་བ་ཀརྨ་པ་སོགས་ལ་ཆོས་འབྲེལ་འཇོག་མཁན་རྒྱ་ནག་གི་གློག་བརྙན་འཁྲབ་སྟོན་པ་དང་གཞས་པ་་ཚོར་གནོན་ཤུགས་སྤྲོད་བཞིན་ཡོད་འདུག
དེ་རིང་ཝ་ཞིན་ཊོན་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་དབང་འཛིན་པ་ཚོས་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ། ད་ལོའི་ཕྱི་ཟླ་ ༢ པའི་ཚེས་ ༡༤ ཉིན་རྒྱ་གར་བྱང་ཤར་ཁུལ་དུ་རྒྱལ་བ་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་སྐུའི་འཁྲུངས་སྐར་གྱི་དུས་ཆེན་མཛད་སྒོའི་སྟེང་། རྒྱ་རིགས་གློག་བརྙན་འཁྲབ་སྟོན་པ་དང་གཞས་བ་ཁག་ཅིག བཙན་བྱོལ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་ལྷན་ཞུགས་ཀྱི་འདྲ་པར་ཞིག་དང་འབྲེལ་བའི་ཐོག རྒྱ་རིགས་གློག་བརྙན་འཁྲབ་སྟོན་པ་དང་གཞས་བ་ཚོས་རྒྱ་ནག་མི་མང་དང་སྤྱི་ཚོགས་རིང་ལུགས་ལ་ཞབས་འདེགས་ཞུ་དགོས་པ་ལས། བཙན་བྱོལ་བོད་མིར་འབྲེལ་འདྲིས་མི་ཆོག་པའི་ཉེན་བརྡ་བཏང་ཡོད་འདུག
རྒྱ་རིགས་གློག་བརྙན་འཁྲབ་སྟོན་པ་ཧུ་ཅུན་ (Hu Jun) ཟེར་བ་ཞིག་གིས། ཁོ་དང་ཁོའི་ནང་མི་ཚོ་རྒྱ་གར་དུ་གསུང་ཆོས་ཞུ་བར་ཡོང་བ་ལས་གནས་འཕྲིན་དྲ་ཚིགས་ཁག་ཏུ་བསྒྲགས་པའི་ “ཁ་བྲལ་རིང་ལུགས་པ” ཟེར་བ་ཞིག་རྩ་བ་ནས་ཤེས་ཀྱི་མེད་སྐོར་དང་། ཁོ་རང་རྒྱ་རིགས་ཤིག་ཡིན་པའི་ཆ་ནས་རྒྱལ་ཁབ་ཁ་བྲལ་གྱི་སྐད་ཆ་དང་བསམ་སྤྱོད་སྤེལ་མཁན་ཚོར་ཁོས་ཀྱང་མཐའ་གཅིག་ཏུ་དགག་པ་རྒྱག་གི་ཡོད་སྐོར་བཤད་འདུག
ཀྲུང་གོའི་བོད་ལྗོངས་དྲ་ཚིགས་ (CTO) སྟེང་སྤེལ་བའི་རྩོམ་ཡིག་ཅིག་གི་ནང་། པེ་ཅིན་གྱི་གཞས་པ་དང་གློག་བརྙན་འཁྲབ་སྟོན་པ་ཧྥ་ཡི་ཝང་ (Faye Wong) དང་ཧུ་ཅུན་ (Hu Jun)། ཧོང་ཀོང་གི་གློག་བརྙན་འཁྲབ་སྟོན་པ་ཐོ་ཉེ་ལུང་ (Tony Leung) སོགས་ནང་པའི་ཆོས་ལུགས་བྱེད་སྒོར་ཞུགས་ཏེ། ནང་བསྟན་ཆོས་ལུགས་ལ་དད་གུས་བྱས་པ་དེ་ལ་ནོར་འཁྲུལ་ཆེར་མེད་ཀྱང་། ཁོ་ཚོས་ཁ་བྲལ་བར་ངན་འབྲེལ་བྱེད་ཀྱི་ཡོད་པ་དེ་ཚུལ་མཐུན་མིན་ལུགས་སོགས་འཁོད་འདུག
རྒྱ་ནག་ལྷོ་རྒྱུད་ཞོགས་པའི་ཚགས་ཤོག་ (SCMP) ཅེས་པའི་དྲ་ཚིགས་སྟེང་། ཁོ་རང་ཚོས་ཁ་བྲལ་བ་ཟེར་བར་རྒྱབ་སྐྱོར་བྱེད་མཁན་ཁག་ཅིག་མིང་འདོན་བྱས་ཡོད་པའི་གྲས་སུ། ཧོང་ཀོང་གི་གློག་བརྙན་འཁྲབ་སྟོན་པ་ཨན་ཐོ་ནེ་ཝང་ (Anthony Wong) དང་ཆབ་ཕི་མན་ཐོ་ (Chapman To) གཉིས་གཙོས་པའི་ཐའེ་ཝན་གྱི་གཞས་མ་ཨ་མའེ་ (A-Mei) དང་ཁྲུ་ཙོ་ཡུ་ (Chou Tzu-Yu) བཅས་ཡོད་མ་ཟད། ལོ་གཉིས་སྔོན་ལ་རྒྱ་རིགས་གློག་བརྙན་འཁྲབ་སྟོན་པ་ཇི་ཊི་ལེ་ (Jet Li) གཟའ་ཟླ་གཉིས་ཀྱིས་ཀྱང་༧གོང་ས་མཆོག་དང་ལྷན་དུ་འདྲ་པར་བླངས་པ་ལ་བརྟེན་ནས། ཁ་བྲལ་བར་ལག་འབྲེལ་བྱས་ཡོད་པའི་ནག་ཉེས་བཙུགས་ཡོད་སྐོར་སོགས་འཁོད་འདུག
གསར་འགོད་པ། པདྨ་རྒྱལ།
