ཁ་སང་རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་དཔོན་རིགས་ཚོར་འཕྲིན་ཡིག་བཏང་སྟེ་༧གོང་ས་མཆོག་སུད་སིའི་གྲོང་ཁྱེར་ཇི་ནི་ཝའི་རྒྱལ་སྤྱིའི་འཕེལ་རྒྱས་ཞིབ་འཇུག་སློབ་གཉེར་ཁང་དུ་གདན་ཞུ་མི་ཆོག་ཚུལ་བཤད་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་དཔོན་རིགས་ཚོ་དང་ཕྱི་འབྲེལ་མི་སྣ་ཚོར་ཡི་གེ་བཏང་སྟེ། དེ་རིང་རེས་གཟའ་པ་སངས་ཉིན་༧གོང་ས་མཆོག་ཡུ་རོབ་སིད་སུའི་གྲོང་ཁྱེར་ཇི་ནི་ཝ་རྒྱལ་སྤྱིའི་འཕེལ་རྒྱས་ཞིབ་འཇུག་སློབ་གཉེར་ཁང་དུ་ཆིབས་བསྒྱུར་གྱིས་བཀའ་སློབ་གནང་རྒྱུའི་མཛད་རིམ་དེ་བཀག་སྡོམ་དང་ཕྱིར་འཐེན་དགོས་ལུགས་བཤད་འདུག
ཡི་གེ་དེའི་ནང་། ༧གོང་ས་ཏཱ་ལའི་བླ་མ་མཆོག་ཇི་ནི་ཝ་རྒྱལ་སྤྱིའི་འཕེལ་རྒྱས་ཞིབ་འཇུག་སློབ་གཉེར་ཁང་དུ་གདན་འདྲེན་ཞུས་པ་དེས་རྒྱ་ནག་གི་མངའ་ཁོངས་བདག་དབང་དང་མཉམ་འབྲེལ་རྒྱལ་ཚོགས་ཀྱི་སྒྲིག་ཁྲིམས་ཀྱི་རྩ་འཛིན་དང་དེའི་དགོས་དམིགས་སོགས་རྩིས་མེད་རྡོག་རོལ་བཏང་བ་ཡིན་ཚུལ་དང་། ཕྱིའི་རྒྱལ་ཁབ་ཁག་གིས་༧གོང་ས་མཆོག་སྒྲིག་འཛུགས་དང་བྱེད་སྒོ་གང་རུང་ཐོག་གདན་འདྲེན་ཞུ་བར། རྒྱ་ནག་གཞུང་གིས་༧གོང་ས་མཆོག་གི་མེས་རྒྱལ་ཁ་བྲལ་གྱི་ལས་འགུལ་ལ་མཐའ་གཅིག་ཏུ་ངོ་རྒོལ་ཡོད་ལུགས། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་ཁོངས་གཏོགས་རྒྱལ་ཁབ་ཁག་དང་། དེ་དང་ཕྱོགས་འབྲེལ་རྒྱལ་སྤྱིའི་སྒྲིག་འཛུགས་ཁག་ཡོངས་༧གོང་ས་མཆོག་དང་ཁོང་གི་ཤོག་ཁག་ལ་ཐུགས་འཕྲད་དང་བྱེད་སྒོ་འདི་རིགས་ཐོག་མཉམ་ཞུགས་མི་ཆོག་ཚུལ་བཤད་འདུག
ཇི་ནི་ཝ་རྒྱལ་སྤྱིའི་འཕེལ་རྒྱས་ཞིབ་འཇུག་སློབ་གཉེར་ཁང་གི་འགན་འཛིན་ཧྥེ་ལེ་ཕི་བྷུ་རེན་ (Philippe Burrin) ཟེར་བ་ཞིག་གིས། རྒྱ་ནག་གཞུང་གི་ཞུ་འཕྲིན་དེ་ནི་ཕྱོགས་སོ་སོ་ནས་སྤྲད་པའི་གནོན་ཤུགས་ཤིག་ཡིན་ནའང་། ང་ཚོས་ད་རབ་ཀྱི་བྱེད་སྒོ་འདི་མཚམས་འཇོག་མི་སྲིད། འདི་ནི་གཙུག་ལག་སློབ་ཆེན་གྱིས་བྱེད་སྒོ་འཛིན་སྐྱོང་གི་རང་དབང་དང་སྨྲ་བརྗོད་རང་དབང་གི་གནད་དོན་ཞིག་རེད། བྱེད་སྒོ་འདི་བོད་དོན་དང་འབྲེལ་བ་མེད་ཅིང་། བྱེད་སྒོ་འདི་ཆེས་རྣོ་ངར་ལྡན་པའི་ཆབ་སྲིད་ཀྱི་རྩོད་རྙོག མངའ་ཁོངས་རྩོད་གླེང་གང་ལའང་འབྲེལ་བ་མེད། བྱེད་སྒོ་འདི་འགྲོ་བ་མིའི་ཐོབ་ཐང་གི་གནས་སྟངས་མཐོར་འདེགས་གཏོང་ཐབས་ཀྱི་སྤྱི་དམངས་བྱེད་སྒོ་ཞིག་ཡིན་སྐོར་སོགས་བརྗོད་འདུག
གནས་ཚུལ་ལྟར་ན། རྒྱ་ནག་གཞུང་གིས་བཏང་བའི་ཡི་གེ་དེ་སིད་སུའི་གྲོང་ཁྱེར་ཇི་ནི་ཝར་རྟེན་གཞི་བྱེད་པའི་མཉམ་འབྲེལ་རྒྱལ་ཚོགས་ཀྱི་མགྲིན་ཚབ་པ་ཨ་ཧ་མ་ཌི་ཧྥ་ཝ་ཙེ་ (Ahmad Fawzi) ཟེར་བ་ཞིག་གི་མིང་ཐོག་ཏུ་འབྱོར་བ་ཞིག་ཡིན་ཞིང་། ཇི་ནི་ཝ་རྒྱལ་སྤྱིའི་འཕེལ་རྒྱས་ཞིབ་འཇུག་སློབ་གཉེར་ཁང་གི་འགྲོ་བ་མིའི་ཐོབ་ཐང་གི་གནས་བབ་མཐོར་འདེགས་གཏོང་ཐབས་ཀྱི་སྤྱི་དམངས་བྱེད་སྒོ་དེའི་ཐོག་༧གོངས་ས་མཆོག་གིས་དབུས་ཨེ་རན་དང་ཡ་མིན་རྒྱལ་ཁབ་སོགས་ཀྱི་ནོ་བྷིལ་ཞི་བདེ་གཟེངས་རྟགས་བཞེས་མཁན་མཁས་མཆོག་ཁག་ཅིག་བཅས་མཉམ་ཞུགས་གནང་འཆར་འདུག
གསར་འགོད་པ། པདྨ་རྒྱལ།
