རེབ་གོང་རོང་བོ་དགོན་ཆེན་གྱི་ལྷ་ཁང་དང་འདུ་ཁང་ནང་༧གོང་ས་མཆོག་གི་སྐུ་པར་སྒྲིག་ཤོམ་བྱས་ན་དགོན་པ་ནས་ཕྱིར་འབུད་གཏོང་རྒྱུ་ཡིན་པ་མ་ཟད་ཚབས་ཆེན་ཡིན་ན་ལྷ་ཁང་འདུ་ཁང་སྒོ་རྒྱག་རྒྱུ་ཡིན་ལུགས་བསྒྲགས་འདུག
ཉེ་སྔོན་རྒྱ་གཞུང་གིས་རེབ་གོང་རོང་བོ་དགོན་ཆེན་གྱི་འདུ་ཁང་དང་ལྷ་ཁང་དོ་དམ་བྱེད་ཐབས་སྐོར་ནས་དགོན་པའི་དོ་དམ་ལྷན་ཁང་དང་དམངས་གཙོ་དོ་དམ་ལྷན་ཁང་ཟེར་བའི་འབྲེལ་ཡོད་ལས་བྱེད་པ་ཚོར་དོན་ཚན་བཞི་ཅན་གྱི་བཀའ་རྒྱ་ཞིག་བསྒྲགས་ཡོད་པའི་ནང་། དགོན་པའི་འདུ་ཁང་དང་ལྷ་ཁང་སོགས་ཀྱི་ནང་༧་གོང་ས་སྐུ་ཕྲེང་བཅུ་བཞི་བ་ཆེན་པོ་མཆོག་གི་སྐུ་པར་སྒྲིག་ཤོམ་བྱེད་མཁན་ཡོད་ན། འབྲེལ་ཡོད་ཀྱི་གཏན་ཁེལ་ལྟར་དགོན་པ་ནས་ཕྱིར་འབུད་གཏོང་རྒྱུ་ཡིན་པ་མ་ཟད། ཉེན་རྟོག་པར་རྩིས་སྤྲད་དེ་ཐག་གཅོད་བྱ་རྒྱུ་དང་། གནས་ཚུལ་ཚབས་ཆེན་ཡིན་ན་ལྷ་ཁང་འདུ་ཁང་སྒོ་བརྒྱབ་ནས་དགོན་པ་སྤྱིའི་སྣང་བརྙན་བརྫོད་པའི་ཁྲིམས་འགལ་བྱ་སྤྱོད་རིགས་ལ་དག་ཐེར་ནན་པོ་བྱ་རྒྱུ་ཡིན་སྐོར་བསྒྲགས་འདུག
བཀའ་རྒྱའི་དོན་ཚན་དང་པོའི་ནང་། དོ་དམ་མི་སྣས་དགོན་པའི་དོ་དམ་ལྷན་ཁང་དང་དམངས་གཙོ་དོ་དམ་ཨུ་ཡོན་ལྷན་ཁང་གིས་ཐད་ཀར་དབུ་ཁྲིད་བྱས་པའི་འོག་བྱ་བ་སྤེལ་བ་དང་། སྒྲིག་སྲོལ་ལམ་ལུགས་སོ་སོ་བརྩི་སྲུང་ནན་མོ་བྱེད་དགོས། དོན་ཚན་གཉིས་པ། དོ་དམ་མི་སྣ་བརྗེ་དུས། དགོན་པའི་དམངས་གཙོ་དོན་དམ་ཨུ་ཡོན་ལྷན་ཁང་གིས་དགོན་པའི་དོ་དམ་ཨུ་ཡོན་ལྷན་ཁང་ལ་ཡིག་ཐོག་ནས་ཞུས་ཏེ་ཡིག་ཚགས་སུ་འགོད་བྱེད་དུ་འཇུག་དགོས་པ་མ་ཟད། དགོན་པའི་དོན་དམ་ཨུ་ཡོན་ལྷན་ཁང་དང་དོ་དམ་མི་སྣ་ཡིས་འདུ་ཁང་དང་ལྷ་ཁང་དོན་དམ་གྱི་འགན་འཁྲིའི་ཡི་གེའི་སྟེང་མིང་རྟགས་བཀོད་རྗེས། ད་བཟོད་དོན་དམ་གྱི་བྱ་བ་བསྒྲུབ་ཆོག
དོན་ཚན་གསུམ་པ། དོ་དམ་མི་སྣས་འདུ་ཁང་དང་ལྷ་ཁང་གི་མེ་འགོག་དང་རྐུན་འགོག ཆུ་འགོག་སོགས་ཀྱི་བདེ་འཇགས་དོགས་ཟོན་གྱི་བྱ་བ་སོ་སོ་དུས་རྒྱུན་ལེགས་པར་བསྒྲུབས་ཏེ། གྲྭ་བ་རེ་འགས་འདུ་ཁང་དང་ལྷ་ཁང་ནང་དུ་ཁྲིམས་འགལ་གྱི་བྱེད་སྒོ་སྤེལ་ཏེ་རོང་བོ་དགོན་པའི་སྤྱིའི་སྣང་བརྙན་བརྫོད་པ་བཀག་འགོག་བྱེད་དགོས། དོན་ཚན་བཞི་བ། དགོན་པའི་འདུ་ཁང་ལྷ་ཁང་སོགས་ཀྱི་གནས་སུ་ཏཱ་ལའི་བླ་མ་སྐུ་ཕྲེང་བཅུ་བཞི་བའི་སྐུ་འདྲ་གཏན་འགོག་བྱེད་དགོས་པ་དང་། གལ་ཏེ་འགལ་མཁན་ཡོད་ན་འབྲེལ་ཡོད་ཀྱི་གཏན་ཁེལ་ལྟར་དགོན་པ་ནས་ཕྱིར་ཕུད་དགོས་པ་མ་ཟད། སྤྱི་བདེ་སྡེ་ཁག་ལ་སྤྲད་དེ་ཐག་གཅོད་བྱེད་པ་དང་། བྱུང་རིམ་ཚབས་ཆེན་ཡིན་ན་འདུ་ཁང་ལྷ་ཁང་སྒོ་བརྒྱབ་ནས་དག་ཐེར་བྱེད་དགོས། ཞེས་བརྗོད་འདུག
འབྲེལ་ཡོད་གནས་ཚུལ་མཁོ་སྤྲོད་པས་འདི་གའི་གསར་འགོད་པར་བརྗོད་ན། རྒྱ་གཞུང་གིས་རོང་བོ་དགོན་ཆེན་ནང་འདི་ལྟ་བུའི་བཙན་གནོན་བྱ་འགུལ་སྤེལ་བ་ཐོག་དང་པོ་མིན་པར་འདས་ལོའི་ཕྱི་ཟླ་ ༡༠ ཚེས་ ༡༤ ཉིན། དགོན་པར་དམངས་གཙོ་ཁྲིམས་སྐྱོང་དགོན་པ་འཛུགས་བསྐྲུན་དང་གཅེས་སྐྱོང་དག་ཐེར་བྱ་འགུལ་སྔར་ལས་གཏིང་ཟབ་ཏུ་སྤེལ་བའི་སྐུལ་སློང་ཚོགས་འདུ་ཟེར་བ་ཞིག་བསྡུས་ཏེ། རོང་བོ་དགོན་ཆེན་གྱི་དགེ་འདུན་པ་ ༣༠༠ ལྷག་བཙན་དབང་གིས་སྐོང་འགུག་བྱས་ཏེ། དགོན་པའི་གྲྭ་མང་ནས་རྒྱལ་ཁབ་ཀྱི་ཁྲིམས་ལུགས་བརྩི་སྲུང་ནན་པོ་བྱས་ཏེ་ཕྱོགས་གང་ཐད་ནས་རྒྱལ་ཁབ་ཀྱི་བཤད་པ་ལྟར་སྒྲུབ་དགོས་པ་དང་། དགོན་པའི་མ་དངུལ་གྱི་འགྲོ་སོང་ཚང་མ་རྒྱལ་ཁབ་ཀྱིས་ཤེས་དགོས་ལ། ཏང་དང་རྒྱལ་ཁབ་ཀྱི་ཁྲིམས་བརྩི་སྲུང་ཡག་པོ་བྱས་ན་རོང་བོ་དགོན་ཆེན་ལ་རོགས་སྐྱོར་དང་ཞིག་གསོ་རྒྱ་ཆེན་པོ་བྱ་རྒྱུ་ཡིན་སྐོར་བརྗོད་ཡོད་འདུག
ཚོགས་འདུ་དེའི་ཐོག་རོང་བོ་དགོན་པའི་གྲྭ་མང་ལ་ལས་བྱེད་པ་སུམ་བརྒྱ་ལྷག་བཀྲམ་སྟེ་གྲྭ་བ་རེར་ལས་བྱེད་པ་གསུམ་རེ་ཆ་བགོས་ཀྱིས་ཁག་ཐེག་བྱེད་དུ་བཅུག་ཡོད་པ་དང་། ཁག་ཐེག་བྱེད་དུ་བཅུག་པའི་གྲྭ་བ་དེའི་འགྲོ་འདུག་སྤྱོད་གསུམ་ལ་ལྟ་རྟོག་ནན་པོ་བྱེད་དགོས་ལ། གལ་སྲིད་ཁྲིམས་འགལ་གྱི་གནས་ཚུལ་བྱུང་ཚེ་ལས་བྱེད་པ་དེ་ལས་གནས་ནས་ཕུད་རྒྱུ་གཏན་འབེབས་བྱས་ཡོད་པ་མ་ཟད། ཤོག་གྲངས་གཉིས་ཅན་གྱི་ཡིག་ཆ་ཞིག་གི་ཐོག་མིང་རྟགས་བཀོད་དུ་བཅུག་པ་དང་འབྲེལ། འབྲེལ་ཡོད་ལས་བྱེད་པས་དོན་ཚན་ཁ་ཤས་ཤིག་ཁ་སྐོང་བྱས་ཡོད་ཀྱང་ནང་དོན་ག་རེ་ཡིན་མིན་ཤེས་སུ་བཅུག་མེད་པ་དང་། གཙང་སེལ་གྱི་ཆབ་སྲིད་ཚོགས་འདུ་དེར་དགེ་འདུན་པ་ ༢༠༠ ལྷག་མཉམ་ཞུགས་བྱས་མེད་པས་ཁོ་ཚོའི་ཀུན་སྤྱོད་ལ་གནད་དོན་ཡོད་པའི་ལྟ་ཚུལ་ངན་པ་བཟུང་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པས་ཚོགས་འདུ་དེ་བསྐོངས་དགོས་དོན་ནི། ཟླ་འགའི་སྔོན་དུ་རྒྱ་ནག་དབུས་གཞུང་ནས་ཆེད་གཏོང་བྱས་པའི་དཔོན་པོ་ཞིག་རོང་བོ་དགོན་པའི་ནང་སླེབ་སྐབས། ཁོ་ལ་དགོན་པའི་ངོས་ནས་ཕེབས་བསུ་སྣེ་ལེན་རྒྱ་ཆེན་བྱེད་དགོས་ལུགས་ས་གནས་འབྲེལ་ཡོད་ཚན་པས་བཀའ་བཏང་ཡོད་ཀྱང་། རེབ་གོང་རོང་བོ་དགོན་པས་ཕེབས་བསུ་མ་བྱས་པར་བརྟེན། རོང་བོ་དགོན་པའི་ཁྲིམས་ལུགས་བརྩི་སྲུང་བྱ་བ་ཧ་ཅང་ཞན་པོ་ཡིན་པས་ངེས་པར་དུ་ཁྲིམས་ལུགས་དག་ཐར་བྱེད་དགོས་ཀྱི་འདུག་ཅེས་རྨ་ལྷོའི་ཁུལ་དཔོན་དང་རྫོང་དཔོན་སོགས་ཀྱིས་དགོན་པའི་དོ་དམ་ཁང་ལ་སྐྱོན་བརྗོད་ནན་མོ་བྱས་ཏེ་ཚོགས་འདུ་བསྐོངས་བཅུག་ཡོད་འདུག
གསར་འགོད་པ། པདྨ་མཚོ།
