བོད་ཀྱི་སྐད་ཡིག་རིག་གཞུང་སྲུང་སྐྱོབ་ཀྱི་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་ལ་རྒྱལ་ཁབ་ཁ་བྲལ་གཏོང་བར་ངན་སྐུལ་བྱས་ལུགས་ཀྱི་ཉེས་མིང་གཡོགས་འདུག
ཕྱི་ཚེས་ ༣༡ ཉིན་ནེའུ་ཡོག་དུས་བབ་ཀྱི་རྒྱ་ཡིག་དྲ་བའི་ཐོག་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༡ ཚེས་ ༢༧ ཉིན། བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་ཐོབ་ཐང་རྩོད་ལེན་པ་བོད་རིགས་བཀྲ་ཤིས་དབང་ཕྱུག་ལགས་རྒྱ་གཞུང་ཉེན་རྟོག་པས་འཛིན་བཟུང་བྱས་ཏེ། ཡུལ་ཤུལ་གྱི་བཀག་ཉར་ཁང་ཞིག་ཏུ་ཡུན་རིང་བཀག་ཉར་བྱས་ནས་གོ་ཐོས་མེད་པར་གྱུར་ཡོད་ཀྱང་། ཟླ་འདིའི་ཕྱི་ཚེས་ ༢༤ ཉིན་ཉེན་རྟོག་པ་ཞིག་གིས་ཁོང་གི་ཁྱིམ་མི་ཚོར་ཁོང་དངོས་སུ་འཛིན་བཟུང་བྱས་པའི་བརྡ་ཡིག་ཅིག་སྤྲད་ཡོད་པ་དང་། བརྡ་ཡིག་དེའི་ནང་བཀྲ་ཤིས་དབང་ཕྱུག་ལ་རྒྱལ་ཁབ་ཁ་བྲལ་གཏོང་བར་ངན་སྐུལ་བྱས་པའི་ནག་ཉེས་ཡོད་སྐོར་བརྗོད་ཡོད་འདུག
ཁོང་གི་ཁྱིམ་མི་ཚོས་ས་གནས་རང་ནས་ཁོང་ལ་ཁྲིམས་རྩོད་པ་རག་ཐབས་མེད་ལ། སྲིད་གཞུང་གིས་ཁོང་ལ་ག་དུས་ཁྲིམས་བཤེར་བྱ་རྒྱུ་ཡིན་མིན་གྱི་ཉི་མའང་བསྒྲགས་མེད་སྐོར་བརྗོད་འདུག་ལ། རྒྱ་གཞུང་གིས་ཆབ་སྲིད་ཀྱི་ཉེས་མིང་གཡོགས་པའི་བོད་ཀྱི་བཙོན་པ་མང་པོ་ཞིག་ལ་ཁྲིམས་རྩོད་པ་གླ་རུ་མ་བཅུག་པར་གསང་བའི་ཐོག་ནས་ཁྲིམས་ཐག་གཅོད་བཞིན་ཡོད་སྟབས། གལ་སྲིད་རྒྱལ་ཁབ་ཁ་བྲལ་གཏོང་བར་ངན་སྐུལ་བྱས་ཚུལ་གྱི་ཉེས་མིང་འོག་ཁྲིམས་ཆད་ལག་བསྟར་བྱས་པ་ཡིན་ན། ཁོང་ལ་དུས་ཡུན་ལོ་ངོ་ ༡༥ ཡི་བཙོན་འཇུག་ཁྲིམས་ཆད་གཅོད་སྲིད་པའི་ཉེན་ཁ་ཡོད་འདུག
ནེའུ་ཡོག་དུས་བབ་ཐོག་བཀོད་པའི་གནས་ཚུལ་ནང་། བཀྲ་ཤིས་དབང་ཕྱུག་ལགས་ཀྱིས་ཝེ་པའོ་ཐོག་ཏུ་བོད་མི་ཚོས་སོ་སོའི་རིག་གཞུང་སྲུང་སྐྱོབ་བྱེད་དགོས་ལ། རྒྱ་གཞུང་གི་མགོ་ཁྲིད་ཚོས་དེ་ལ་རྒྱབ་སྐྱོར་མཐུན་སྦྱོར་བསྐྲུན་དགོས་སྐོར་བརྗོད་ནས་བོད་ལ་རང་སྐྱོང་གི་བདག་དབང་ཆེན་པོ་དགོས་ལུགས་བརྗོད་ཡོད་པ་ལས་བོད་རང་བཙན་སྐོར་ནས་ཅི་གང་བྲིས་མེད་པ་མ་ཟད། ཁོང་གིས་བོད་རང་བཙན་རྩོད་པར་ངོ་རྒོལ་ཡོད་ཅེས་བརྗོད་ལུགས་བཀོད་འདུག
འདས་ལོའི་ཕྱི་ཟླ་ ༡༡ ཚེས་ ༢༨ ཉིན་རྒྱ་ནག་ནང་ཡོད་པའི་ཨ་རིའི་ཉིག་ཡོག་དུས་བབ་ཡན་ལག་ཁང་གི་བརྙན་ལེན་པ་(Jonah M. Kessel)ལགས་ཀྱིས། བཀྲ་ཤིས་དབང་ཕྱུག་ལགས་བོད་མིའི་སྐད་ཡིག་གི་བདག་དབང་རྩོད་ལེན་ཆེད་པེ་ཅིན་དུ་ཞུ་གཏུག་བྱེད་པར་ཕྱིན་པའི་སྐོར་གྱི་བརྙན་ཐུང་སྐར་མ་ ༩ ལྷག་ཅན་ཞིག་བཟོས་ཡོད་པ་མ་ཟད། ཡན་ལག་ཁང་དེའི་འགན་འཛིན་ཧང་ཨན་ཝེ་ལགས་ཀྱིས་༼བོད་སྐད་ཡིག་སྲུང་སྐྱོབ་ཀྱི་བོད་མིའི་དཀའ་སྤྱད་འགོག་རྒོལ།༽ཞེས་པའི་རྒྱ་གཞུང་གི་བཙན་གནོན་སྲིད་བྱུས་འོག བོད་ཀྱི་སྐད་ཡིག་རིག་གཞུང་དང་ཆོས་ལུགས་བཅས་ལ་ཚད་ངེས་ཅན་གྱིས་དམ་དྲག་བྱེད་བཞིན་ཡོད་པའི་སྐོར་ནས་སྐྱེ་རྒུ་མདོར་ཡོད་པའི་གྲྭ་བཙུན་དང་། པེ་ཅིན་དུ་གནས་སྡོད་བོད་རིགས་བུད་མེད་རྩོམ་པ་པོ་ཚེ་རིང་འོད་ཟེར་ལགས་སོགས་སུ་གནད་དོན་འདྲི་ཞིབ་བྱས་པའི་དཔྱད་རྩོམ་རིང་པོ་ཞིག་ནེའུ་ཡོག་དུས་བབ་ཐོག་བཀོད་ཡོད་པ་རེད།
བརྙན་ཐུང་དེའི་ནང་བཀྲ་ཤིས་དབང་ཕྱུག་ལགས་པེ་ཅིན་དུ་ཕྱིན་ནས་ཟླ་གཉིས་ལྷག་རིང་རྒྱ་ནག་དབུས་མི་མང་ཁྲིམས་ཁང་དུ་གནད་དོན་ཞུ་གཏུག་ཆེད། ཁྲིམས་རྩོད་ཞབས་ཞུ་ཁང་བཅུ་གྲངས་ཤིག་ལ་འབྲེལ་གཏུག་བྱས་ཡོད་ཀྱང་། ཁྲིམས་རྩོད་པ་མང་ཆེ་བས་རྒྱ་གཞུང་གི་སློབ་གསོའི་སྲིད་བྱུས་དེས་བོད་ལ་ཕན་ཐོགས་ཆེན་པོ་ཡོད་སྐོར་བརྗོད་དེ་དང་ལེན་བྱས་མེད་ལུགས་བརྗོད་ཡོད་པ་མ་ཟད། རྒྱ་ནག་གི་བཙན་གནོན་དམ་དྲག་འོག་གི་བོད་ཀྱི་གནས་སྟངས་དངོས་དང་ཁྲིམས་ལུགས་ནང་གསལ་ལྟར་ཞུ་གཏུག་བྱེད་ས་མེད་སྐོར་སོགས་ངོ་སྤྲོད་གནང་འདུག
ཡང་བརྙན་ཐུང་ནང་། ཁོང་གིས་རྒྱ་ནག་དབུས་བརྙན་འཕྲིན་ཁང་ལ་འབྲེལ་བ་བྱས་ཏེ། བོད་ཁུལ་ཡོངས་ཀྱི་སློབ་ཆུང་ནས་དམའ་འབྲིང་། མཐོ་འབྲིང་བཅས་ཀྱི་བསླབ་ཚན་མང་པོ་དེའི་ནང་བོད་ཡིག་བསླབ་ཚན་གཅིག་མ་གཏོགས་མེད་ལ། དེ་ནི་བོད་མི་རིགས་ཀྱི་རིག་གཞུང་རྩ་མེད་དུ་གཏོང་བའི་སྲིད་བྱུས་ཤིག་ཡིན་སྟབས། གནད་དོན་དེ་གོང་རིམ་ལ་ཞུ་གཏུག་བྱེད་འཆར་ཡོད་པ་དང་། དབུས་བརྙན་འཕྲིན་ཁང་གིས་གནས་ཚུལ་དེ་གཏོང་ཐུབ་མིན་འདྲི་སྐབས། ཁ་པར་ལེན་མཁན་བུད་མེད་ཅིག་གིས་རྒྱུན་ལྡན་གྱི་འཚོ་བའི་ཁྲོད་དཔེར་ན་གློག་འཕྲིན་དང་ཡས་ཏུང་ཚོང་གཉེར་ཁང་སོགས་ཀྱིས་རྒྱ་ཡིག་ཁོ་ན་བེད་སྤྱོད་བྱེད་བཞིན་ཡོད་པ་རེད། ག་རེ་བྱས་སོང་། དེས་བོད་རིགས་ཚོར་སྟབས་བདེ་མེད་པ་ཞིག་བཟོ་ཡི་འདུག་བསམ་གྱི་ཡོད་དམ་ཞེས་བརྗོད་འདུག་ལ། གནས་ཚུལ་དེ་ཐོ་འགོད་ཀྱིས་འབྲེལ་ཡོད་ལ་སྐད་ཆ་འདྲི་རྒྱུ་ཡིན་ལུགས་བཤད་དེ་གསར་འགྱུར་གཏོང་རོགས་བྱས་མེད་སྐོར་བརྗོད་འདུག
བཀྲ་ཤིས་དབང་ཕྱུག་ལགས་གིས་ཨ་རིའི་ཉིག་ཡོག་དུས་བབ་ལ་ཞུ་གཏུག་གི་བརྒྱུད་རིམ་དང་དགོས་དམིགས་སོགས་ངོ་སྤྲོད་བྱས་པའི་བརྙན་ཐུང་། http://www.nytimes.com/video/world/100000004063185/china-tibet-activist-cn.html?action=click>ype=vhs&version=vhs-heading&module=vhs®ion=video-area
གསར་འགོད་པ། པདྨ་མཚོ།
