རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་ཆེ་རུ་ཕྱིན།

ནེའུ་ཡོག་དུས་བབ་གསར་ཁང་གི་ཆེད་བརྗོད། པདྨ་རྒྱལ་གྱིས་བོད་བསྒྱུར་བྱས།

རྒྱ་གཞུང་གིས་ཐལ་ཆེ་བའི་སྒོ་ནས་རྒྱ་ནག་གི་ལྷོ་རྒྱུད་མཚོ་ཁུལ་གྱི་བདག་དབང་རྩོད་གླེང་ཐད་ལ་ཨེ་ཤ་ཡའི་རྒྱལ་ཁབ་ཁག་གིས་སྔར་ལས་ལྷག་པར་ཡ་ལན་སློག་གི་ཡོད། རེས་གཟའ་ཉི་མའི་ཉིན་ཉི་ཧོང་གིས་འདས་པའི་མི་ལོ་ ༡༥ རྗེས་སུ་ཐོག་དང་པོར་ཧྥེ་ལེ་ཕེན་ལ་ཆུ་འཛུལ་དམག་གྲུ་མཁོ་འདོན་བྱེད་པའི་འབོད་སྐུལ་ཞུས་ཡོད་པ་དང་། དེ་ཡང་རྒྱལ་ཁབ་གཉིས་མཉམ་འབྲེལ་ཐོག་རྒྱལ་སྲུང་གི་སྟོབས་ཤུགས་མཐོར་རུ་གཏོང་ཐབས་ཤིག་ཡིན་པ་རེད།

བདུན་ཕྲན་སྔོན་མར་ཝེ་ཋི་ནམ་གྱིས་རྒྱ་ནག་གི་གྲུ་གཟིངས་ཤིག་ཁྲིམས་འགལ་གྱི་སྒོ་ནས་ཝེ་ཋི་ནམ་གྱི་མཚོ་ཁུལ་དུ་འགྲུལ་སྐྱོད་བྱས་པ་བཀག་སྡོམ་བྱས་ཡོད་པ་དང་། ཧིན་རྡུ་ཉེ་ཞི་ཡས་ (F-16) རྟགས་ཅན་གྱི་མཁའ་དམག་གནམ་གྲུར་བརྟེན་ནས་རང་རྒྱལ་གྱི་མཚོ་ཁུལ་སྲུང་སྐྱོབ་ཀྱི་འཇིག་ཉེན་བསླངས་ཡོད་པ་རེད།

དེ་དང་མཉམ་དུ་བདུན་ཕྲག་སྔོན་མར་ཨ་རིའི་སྲིད་འཛིན་ཨོ་བྷ་མ་མཆོག་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐུག་འཕྲད་བྱས་ཡོད་པ་དང་། དེ་ཡང་ཨ་རིའི་དབུས་གཞུང་གིས་ཐེངས་འདིའི་ཐུག་འཕྲད་དེ་ནི་ཝ་ཞིན་ཊོན་གྱིས་རྒྱ་ནག་གི་རྣམ་འགྱུར་ཐོག་འཛིན་པའི་ཛ་དྲག་གི་ལྟ་སྣང་དེ་ཁ་གསལ་དང་ཐད་ཀར་ཞུས་ཡོད་སྐོར་བརྗོད་འདུག

རེས་གཟའ་ཟླ་བར་ཨ་རི་དང་ཧྥེ་ལེ་ཕེན་མཉམ་འབྲེལ་དམག་དཔུང་གི་དམག་སྦྱོང་མགོ་བཙུགས་པ་དེས་ཧྥེ་ལེ་ཕེན་གྱིས་ཨ་རི་ལ་བརྟེན་ནས་པེ་ཅིན་གཞུང་ལ་ཡ་ལན་སྤྲོད་ཐུབ་པའི་རྣམ་པ་སྟོན་གྱི་ཡོད་པ་མངོན་གསལ་རེད།

རྒྱ་ནག་གི་ལྷོ་རྒྱུད་མཚོ་ཁུལ་དུ་རང་བྱུང་ཐོན་ཁུངས་ཕུན་སུམ་ཚོགས་པོ་ཡོད་པ་མ་ཟད། ཨ་སྒོར་ཐེར་འབུམ་མང་པོའི་ཚོང་ཟོག་སྐྱེལ་འདྲེན་བྱེད་སའི་མཚོ་ལམ་གལ་ཆེན་ཞིག་ཀྱང་ཆགས་ཡོད་པ་རེད། རྒྱ་ནག་གིས་མཚོ་ཁུལ་དེའི་བྲག་དང་བྱེ་ཐང་ཁག་མིས་བཟོས་གླིང་ཕྲན་དུ་འཛུགས་སྐྲུན་བྱས་ཏེ། གླིང་ཕྲན་དེ་དག་སྟེང་མཁའ་དམག་དང་མཚོ་དམག་གི་རྟེན་གཞི་འཛུགས་པའི་ལས་གཞི་ལག་བསྟར་བྱས་ཡོད་པ་རེད། གནས་ཚུལ་དེས་མཚོ་ཁུལ་དེའི་གླིང་ཕྲན་ཁག་ཅིག་རང་གི་མངའ་ཁོངས་སུ་གླེང་བའི་ཁྱིམ་མཚེས་རྒྱལ་ཁབ་ཁག་ལ་ཉེན་བརྡ་བསླངས་ཡོད་པ་དང་། ཁོ་ཚོ་རྒྱ་ནག་གིས་མིས་བཟོས་གླིང་ཕྲན་དེ་དག་བེད་སྤྱད་ནས་རྒྱལ་ཁབ་གཞན་གྱི་ཉ་འཛིན་དང་རྡོ་སྣུམ་ཐོན་སྐྱེད་ཀྱི་ཁེ་དབང་ལ་ཐེ་བྱུས་བྱ་སྲིད་པར་དངངས་འཚབ་ལང་གི་ཡོད།

མཚོ་ཁུལ་དེའི་བདག་དབང་རྩོད་གླེང་ལ་བརྟེན་ནས་སོ་སོའི་མཚོ་ཁུལ་སྲུང་སྐྱོབ་ཐད་གྲོས་ཆོད་གསར་བ་ཞིག་བཞག་ཡོད་པ་དང་། གྲོས་ཆོད་དེའི་ནང་འདས་པའི་མི་ལོ་ ༢༠ རྗེས་སུ་ཐོག་དང་པོར་ཨ་རིས་ཧྥེ་ལེ་ཕེན་གྱི་ས་གནས་ཁག་ ༥ ནང་དྲག་ཆས་དང་དམག་དཔུང་གི་རྟེན་གཞི་འཛུགས་ཆོག་པ་མ་ཟད། མངའ་ཁུལ་གྱི་དམག་དོན་འགྲོ་གྲོན་རྒྱ་སྐྱེད་ཆོག་པར་བྱས་ཡོད་པ་རེད། ཉེ་ཆར་ཨ་རིའི་དམག་གྲུས་རྒྱ་ནག་གིས་རང་རྒྱལ་གྱི་མངའ་ཁོངས་སུ་གླེང་བའི་མཚོ་ཁུལ་དུ་ཐེངས་གཉིས་ལ་མྱུལ་ཞིབ་བྱས་ཡོད་པ་དང་། ད་ཆར་མྱུལ་ཞིབ་ཐེངས་གསུམ་པ་བྱེད་འཆར་ཡོད་འདུག

ཧྥེ་ལེ་ཕེན་གྱིས་རྒྱལ་སྤྱིའི་རྩོད་གཞི་འདུམ་འགྲིག་ཁང་དུ་རྒྱ་ནག་གིས་ལྷོ་རྒྱུད་མཚོ་ཁུལ་ཧྲིལ་བོའི་བདག་དབང་རྒྱ་ནག་ལ་ཡོད་པའི་གླེང་ཕྱོགས་ཐད་རྩོད་གླེང་བྱེད་བཞིན་ཡོད་པ་དང་། ད་ལོའི་ཕྱི་ཟླ་ ༦ པའི་ཟླ་མཇུག་ལ་རྩོད་གླེང་དེ་ཐག་ཆོད་ཡོང་བའི་རེ་བ་བྱེད་ཀྱི་ཡོད་པ་རེད། རྒྱ་ནག་གིས་ ༡༩༨༢ ལོའི་ཨ་རིའི་མཚོ་ཁུལ་རྩ་འཛིན་གྲོས་ཆོད་ལ་མིང་རྟགས་བཀོད་ཡོད་ནའང་། ཧྥེ་ལེ་ཕེན་གྱི་རྩོད་གླེང་གི་ཐད་ནས་རྒྱ་ནག་གིས་མཚོ་ཁུལ་དུ་ཉ་འཛིན་དང་ཚོང་ཟོག་སྐྱེལ་འདྲེན། མཚོ་ལམ་རྟོགས་ཞིབ་བཅས་ཀྱི་གྲོས་ཆོད་ལ་ངོས་ལེན་བྱེད་ཀྱི་མེད་སྟབས། ཨ་རིའི་གཞུང་གི་དཔོན་རིགས་ཚོས་རྒྱ་ནག་གཞུང་གིས་རྒྱལ་སྤྱིའི་རྩོད་གཞི་འདུམ་འགྲིག་ཁང་དུ་ཐ་ན་རྒྱ་ནག་གི་ལྷོ་རྒྱུད་མཚོ་ཁུལ་གྱི་གླིང་ཕྲན་མང་པོ་འཛུགས་སྐྲུན་དང་བདག་བཟུང་བྱས་ཡོད་པ་དེ་ཡང་ངོས་ལེན་མི་སྲིད་པར་སེམས་ཁྲལ་བྱེད་ཀྱི་ཡོད་པ་རེད།

རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་གི་བར་གནས་སུ་སྡོད་པའི་ཨ་རིའི་གཞུང་གིས་རྒྱ་ནག་གཙོས་པའི་ཨེ་ཤ་ཡའི་རྒྱལ་ཁབ་ཁག་ཚང་མས་རྒྱ་ནག་གི་ལྷོ་རྒྱུད་མཚོ་ཁུལ་དུ་དམག་དཔུང་གི་རྟེན་གཞི་འཛུགས་སྐྲུན་དང་རྒྱ་སྐྱེད་གཏོང་བཞིན་པ་མཚམས་འཇོག་དགོས་པའི་སྐུལ་འདེད་གཏོང་གི་ཡོད་པ་མ་ཟད། ཨ་རིའི་གཞུང་གིས་ད་དུང་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་གི་གནད་དོན་ཁྲོད་ཕྱོགས་གང་ལ་རྒྱལ་ཁ་འཐོབ་པའི་ངོས་འཛིན་གནང་རྒྱུ་ཁག་ཐག་བྱས་ཡོད་པ་རེད།

ཨོ་བྷ་མ་དང་ཞི་ཅིན་ཕིན་གཉིས་ཀྱི་ཐུག་འཕྲད་ལ་བཟང་ཕྱོགས་ཀྱི་གྲུབ་འབྲས་ཅི་ཡང་ཐོན་མེད་པའི་སྐབས་འདིར། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཨ་རྒྱ་གཉིས་བར་རྩོད་རྙོག་དང་རྒོལ་འཛིང་གི་གནད་དོན་གང་ཡང་མེད་པའི་ངོས་འཛིན་གྱི་ཐོག་ནས། རྒྱ་ནག་གིས་ཨ་རི་དང་ལྷན་དུ་ལས་དོན་སྒྲུབ་པའི་འདོད་འདུན་ཡོད་ལུགས་ནན་བཤད་བྱས་ཡོད་པ་རེད། ཡིན་ནའང་རྒྱ་ནག་གིས་ལྷོ་རྒྱུད་མཚོ་ཁུལ་རྩོད་གླེང་དེ་བཞིན་ཞི་བའི་སྒོ་ནས་ཐག་གཅོད་མ་བྱས་པའི་རྐྱེན་གྱིས་ཕྱོགས་གཉིས་བར་རྙོག་འཛིང་ཆེ་རུ་འགྲོ་བཞིན་ཡོད་པ་འདྲ།

མ་རྩོམ་འབྲེལ་ཐག http://www.nytimes.com/2016/04/07/opinion/tensions-rise-in-the-south-china-sea.html?ref=opinion