ཆབ་སྲིད་བཙོན་ཟུར་དགའ་ལྡན་ཚེ་རིང་།
བཀའ་ཟུར་སྐུ་ངོ་འབྲོང་ཆུང་དངོས་སྒྲུབ་མཆོག་དེ་སྔ་མཐོ་སློབ་ཐོན་རྗེས། བདེ་སྲུང་ལས་ཁུངས་ཀྱི་ལས་བྱེད་དཀྱུས་མ་ཞིག་ནས་ཐེམ་སྐས་རིམ་འཛེགས་ཐོག་ད་བར་མི་ལོ་བཞི་བཅུ་ཙམ་གྱི་རིང་བཙན་བྱོལ་བོད་མིའི་སྒྲིག་འཛུགས་ནང་རང་ཚུགས་བརྟན་ཞིང་ལྷག་བསམ་ལ་གཡོ་བ་མེད་པར་དཀའ་ངལ་དང་། ཉེན་ཁ་གང་ལ་ཡང་བཟོད་སྲན་དང་ཐུགས་དཀྱིལ་ཡངས་པོ་གནང་སྟེ་ད་ལྟའི་བར་དུ་གཟི་བརྗིད་ཆེན་པོས་ཕེབས་པ་རེད། མདོར་ན། སྐུ་ཉིད་ཀྱི་ཚེ་སྲོག་གི་ནུས་ཤུགས་ཡོད་ཚད་ནས་ཡོད་ཚད་མི་རིགས་འདི་ཉིད་ཀྱི་བདེ་སྡུག་ཁོ་ནའི་ཆེད་དུ་ལེགས་སྐྱེས་སུ་ཕུལ་ཡོད་ཞུས་ན་མ་ཆོག་པ་མེད།
ཁོ་བོ་བོད་ནང་དུ་འཚོ་གནས་བྱེད་སྐབས་སྐུ་ངོ་མཆོག་གི་མཚན་སྙན་ཐོས་མྱོང་ལ། ༡༩༩༣ ལོར་ཁོ་བོ་བོད་ནས་བཙན་བྱོལ་དུ་ཡོང་སྟེ། བཞུགས་སྒར་དུ་འབྱོར་བའི་ཉིན་ཤས་རྗེས་སྐུ་ངོ་དངོས་སྒྲུབ་མཆོག་ལ་དངོས་སུ་ཞལ་མཇལ་བ་དང་། སྐབས་དེར་ཁོང་གིས་བདེ་སྲུང་གི་དྲུང་ཆེའི་ཐུགས་འགན་བཞེས་བཞིན་པ་རེད་འདུག སྐབས་དེར་ང་དང་ལས་དབང་གཅིག་པའི་གྲོགས་པོ༼ཚེ་བསོད་༽མཉམ་དུ་ཡོད། དེ་ནི་ངའི་ངོས་ནས་བརྗོད་ན་རང་ཉིད་བོད་ནང་འཚོ་གནས་བྱེད་སྐབས་རེ་བ་དང་ཡིད་ཆེས་བློ་གཏད་བཅོལ་སའི་བོད་མིའི་སྒྲིག་འཛུགས་ཀྱི་གལ་ཆེའི་མཐོ་རིམ་མི་སྣ་ཞིག་ལ་མཇལ་ཏེ་ལུས་སེམས་གཉིས་ཀྱི་བདེ་སྡུག་ཞུ་ཡུལ་རག་པ་ཐོག་མ་དེ་ཆགས་ཡོད།
ཉིན་དེར་སྐུ་ངོ་མཆོག་གིས་བོད་ནང་གི་ཆབ་སྲིད་གནས་བབ་དང་། བོད་མི་ཆབ་སྲིད་བཙོན་པའི་གནས་སྟངས་སོགས་ཐུགས་སྣང་ཆེན་པོས་བཀའ་འདྲི་ཞིབ་ཚགས་གནང་བ་དང་། ཁོང་གིས་རྩ་ཆེའི་བསླབ་བྱ་ལམ་སྟོན་མང་པོ་གནང་བ་བརྒྱུད་དེ་སྐུ་ངོ་མཆོག་དང་ཧ་ཅང་སེམས་ཐག་བོ་ཆགས་སོང་། ཡང་སྒོས་ཁོ་བོར་ཆ་མཚོན་ན་བཙན་བྱོལ་དུ་འབྱོར་བའི་ཉིན་ནས་བཟུང་བོད་མི་ཆབ་སྲིད་བཙོན་ཟུར་གཅིག་མཚུངས་ལྟར་སློབ་སྦྱོང་གི་གོ་སྐབས་དང་། འཚོ་བའི་མཐུན་རྐྱེན། ལས་གནས་གོ་སྒྲིག་སོགས་ཀྱི་གཟིགས་སྐྱོང་ཐོབ་ཡོད།
དུས་དེ་ནས་བཟུང་གང་ས་ཅི་ཐད་དུ་སྐུ་ངོ་མཆོག་ལ་བཀའ་འདྲི་དགོངས་སྐོར་དང་། བསླབ་བྱ་ལམ་ལྟོན་ཞུས་ཏེ་ཡོང་བ་ཡིན་ལ། མདོར་ན། ལོ་ངོ་དེ་དག་ནང་སྐུ་ངོ་མཆོག་གི་ཕྱག་ལས་གནང་ཕྱོགས་དང་དགོངས་པ་བཞེས་སྟངས་གང་ཅིར་སོ་སོ་རྒྱུས་མངའ་ཡོད་པ་ཞིག་ཆགས་སོང་ལ། སྐུ་ངོ་མཆོག་ནི་མི་གཤིས་བཟང་ཞིང་ཉམས་ཆུང་དང་མཐོ་དམན་གྲགས་ཞན་ཀུན་ལ་དཔོན་ཉམས་གྱི་དྲི་མས་མ་གོས་པའི་རང་གཞུང་གི་དབུ་ཁྲིད་བློ་དཀར་གཞུང་དྲང་ཞིག་ལ་དུས་རྟག་ཏུ་ངོས་འཛིན་ཞུ་བཞིན་ཡོད།
ལྷག་པར་དུ་སྐུ་ངོ་མཆོག་གིས་མི་ལོ་བཞི་བཅུ་ལྷག་ཙམ་རིང་༧གོང་ས་སྐྱབས་མགོན་ཆེན་པོ་མཆོག་གི་སྐུའི་ཉེན་སྲུང་དང་འབྲེལ་བའི་ལས་དོན་ཁག་ལ་བོད་ཕྱི་ནང་གཉིས་ཀྱི་བོད་མི་ཕལ་མོ་ཆེས་བསྔགས་བརྗོད་གནང་གི་ཡོད། དེ་བཞིན། བོད་མིའི་སྒྲིག་འཛུགས་ཀྱི་ཆབ་སྲིད་བཞེངས་ཕྱོགས་དབུ་མའི་ལམ་གྱི་སྲིད་ཇུས་ཐོག་ལ་ཁ་ཞེ་གཉིས་མེད་ཐོག་ནས་མི་མང་ལ་སྲིད་བྱུས་དེའི་ངོ་བོ་དང་བྱུང་རིམ་སོགས་ལམ་སྟོན་དང་གསལ་བཤད་གནང་ཡོད།
དེ་དང་ཕྱོགས་མཚུངས་༧གོང་སྐུ་ཕྱྭ་ལ་བདོ་བའི་དོལ་ཚོགས་ཀྱི་བྱེད་སྤྱོད་ལ་ཉེན་གཡོལ་དང་འཇིགས་ཞུམ་མེད་པར་སྐུའི་སྲུང་སྐྱོབ་ཀྱི་ལས་དོན་ཁག་གོ་རིམ་དང་ཞིབ་ཚགས་བབས་ལྷིང་བརྟན་གསུམ་གྱི་སྒོ་ནས་ཕྱག་ལས་མང་དག་ཅིག་གནང་ཡོད་པ་ནི་ཁོ་བོས་བརྗོད་ག་ལ་དགོས། བོད་མི་སྤྱི་བོ་གནམ་བསྟན་ཡོངས་ཀྱིས་མཁྱེན་གསལ་རེད། གོང་གསལ་དངོས་ཡོད་གནས་ཚུལ་དེ་དག་སྐུ་ངོ་མཆོག་གིས་རྩ་དགོངས་ཞུས་པའི་གནས་ཚུལ་དེ་ཐོས་མ་ཐག་གི་སེམས་ཚོར་ཙམ་བྲིས་པ་ལས་དེ་མིན་གྱི་དམིགས་ཡུལ་གང་ཡང་མེད།
༢༠༡༦/༤/༡༠ ཉིན།
