༧གོང་ས་མཆོག་གིས་སྔོན་མ་ནས་ཁོང་གི་གཟིམ་ལམ་དུ་དགུང་གྲངས་ ༡༡༣ ལ་བཞུཊ་རྒྱུའི་རྟེན་འབྲེལ་གསལ་པོ་ཡོང་གི་ཡོད་པས་བློ་བདེ་པོ་བྱོས་གསུངས་འདུག
ཟླ་འདིའི་ཕྱི་ཚེས་ ༡༤ ཉིན་བཞུགས་སྒར་དྷ་རམ་ས་ལ་རུ། འཛམ་གླིང་རྒྱལ་སྤྱིའི་དགེ་ལྡན་ལྷན་ཚོགས་ཀྱི་གོ་སྒྲིག་འོག དགའ་ལྡན་ཁྲི་རིན་པོ་ཆེ་མཆོག་གི་དབུས་༸སྐྱབས་རྗེ་ཤར་བྱང་གི་ཆོས་རྗེ་རྣམ་གཉིས་དང་། གདན་ས་གསུམ་དང་རྣམ་རྒྱལ་གྲྭ་ཚང་། རྒྱུད་གྲྭ་སྟོད་སྨད། བཀྲིས་ལྷུན་པོ། རྭ་སྟོད་བཅས་ཀྱི་མཁན་རིན་པོ་ཆེ་དང་མཁན་ཚབ་རྣམ་པ། དེ་བཞིན་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཚོགས་གཙོ་བཅས་ལྷན་འཛོམས་ཀྱིས། ཉེ་ལམ་བཙན་བྱོལ་བོད་མིའི་བཀའ་སྤྱི་གཉིས་ཀྱི་འོས་བསྡུའི་ལས་རིམ་གྱི་གཙོས་པའི་ཕྱི་ནང་གི་གནད་དོན་ཁ་ཤས་ཀྱི་རྐྱེན་པས་༧གོང་ས་མཆོག་དགོངས་པ་འཁྲུག་པའི་གནས་ཚུལ་དང་འབྲེལ་ཛ་དྲག་གི་ཚོགས་འདུ་ཞིག་ཚོགས་སྐོང་གནང་ཡོད་པ་དང་། ཚོགས་འདུའི་སྟེང་གྲོས་ཆོད་དོན་ཚན་གསུམ་བཞག་སྟེ་༧གོང་ས་མཆོག་ལ་སྙན་གསེང་ཞུས་པ་དང་སྦྲགས། ཁོང་སྐུ་ཚེ་ཡུན་རིང་བརྟན་པའི་གསོལ་འདེབས་ཞུ་སྐབས་སྔོན་མ་ནས་གཟིམ་ལམ་དུ་དགུང་གྲངས་ ༡༡༣ ལ་བཞུགས་རྒྱུའི་རྟེན་འབྲེལ་གསལ་པོ་ཡོང་གི་ཡོད་སྐོར་གསུངས་ཏེ། སྐུ་ཚེ་ཡུན་རིང་བརྟན་པའི་བཀའ་བཞེས་ཐོབ་ཡོད་འདུག
ཟླ་འདིའི་ཚེས་༡༦ ཉིན་དྷ་ས་མེག་གྷན་རྣམ་རྒྱལ་གྲྭ་ཚང་གི་དཔེ་མཛོད་དུ། ཤར་རྩེ་མཁན་རིན་པོ་ཆེ་བྱང་ཆུབ་ཆོས་ལྡན་ལགས་ཀྱིས་འཛམ་གླིང་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཚབ་ཞུས་ཏེ་གསར་འགོད་གསལ་བསྒྲགས་ཤིག་སྐོང་ཚོགས་གནང་བའི་ཐོག ཁོང་གིས་ད་ལན་ང་ཚོར་ཕལ་ཆེར་ཆུ་ཚོད་ ༡།༣༠ ཙམ་གྱི་རིང་བཀའ་མོལ་ལྷོད་ལྷོད་བྱས་ཏེ་ཞུ་བའི་གོ་སྐབས་བྱུང་། སྐབས་དེར་༧གོང་ས་མཆོག་ཐུགས་ཧ་ཅང་དགྱེས་ཚོར་ཆེན་པོ་ཡོད་པ་དེ་གསལ་པོ་ཞེ་དྲགས་ཆགས་སོང་། ༧གོང་ས་མཆོག་ནས་བར་ལམ་ང་རང་ཚོའི་སྤྱི་ཚོགས་ནང་གནས་ཚུལ་བྱུང་སྟངས་ཁ་ཤས་ལ་བརྟེན་ནས་ང་རང་ཚོ་བློ་འཚབ་སྐྱེས་དགོས་པའི་གནས་ཚུལ་བྱུང་སོང་། ཡིན་ནའང་ད་ལན་ལྷན་རྒྱས་ཚོ་དམ་གཙང་ཤ་སྟག་ཅིག་འདི་ལྟར་འཛོམས་ཏེ་ང་ལ་རེ་སྐུལ་གནང་བ་རེད། ཡིན་དང་ཡིན། ཁྱེད་རང་ཚོ་ཚང་མ་བློ་བདེ་པོ་བྱས་ནས་བཞུགས་ཨང་། སྔོན་མ་ནས་གཟིམ་ལམ་དུ་ཡང་ནས་ཡང་དུ་དགུང་ལོ་ ༡༡༣ ལ་སྡོད་པའི་རྟེན་འབྲེལ་གསལ་པོ་བྱས་ནས་ཡོང་གི་ཡོད་ལ། ད་ལྟའི་ཆར་སྐུ་གཟུགས་ཡིན་ནའང་ཡག་པོ་ཞེ་དྲགས་ཡོད་སྐོར་གསུངས་ཡོད་ལུགས་འགྲེལ་བརྗོད་གནང་ཡོད་པ་རེད།
ཡང་ཁོང་གིས་མཇལ་བཅར་སྐབས་༧གོང་ས་མཆོག་ནས་མ་འོངས་པར་ལས་དོན་ཚང་མ་ཚགས་ཚུད་ལམ་ལྷོང་ཡོང་སླད་ཚང་མས་འཁུར་མཉམ་ལེན་དགོས་པའི་ལམ་སྟོན་གནང་ཡོད་སྐོར་བརྗོད་དོན། མ་འོངས་པར་མུ་མཐུད་ལོ་བཅུ་གྲངས་ཤིག་གི་རིང་སྐུ་ལས་བསྐྱོན་ནས་ཕྱག་ལས་གནང་ཐུབ་པ་ཞིག་ཡོང་གི་རེད་ལ། དུས་ཡུན་དེའི་རིང་ཆོས་ལུགས་བརྒྱུད་དང་བཅས་པའི་དབུ་ཁྲིད་ཚོ་དང་། བོད་མིའི་སྤྱི་ཚོགས་ནང་ལོགས་ཀྱི་དབུ་ཁྲིད་ཚོ་ཚང་མའི་ངོས་ནས་འབད་བརྩོན་ཤུགས་ཆེན་གནང་སྟེ། ལས་དོན་ཚང་མ་ཚགས་ཚུད་པོ་དང་ལམ་ལྷོང་ཡོང་བ་ཞིག་བྱེད་དགོས་པ་དེ་ཞེ་དྲགས་གལ་ཆེན་པོ་རེད་ཅེས་བཀའ་གནང་ཡོད་སྐོར་དང་། འདི་ལོའི་ཕྱི་ཟླ་ ༦ པའི་ནང་དགེ་འདུན་པའི་འཕྲོད་བསྟེན་དང་འབྲེལ་བའི་ཚོགས་འདུ་རྒྱས་པ་ཞིག་འཚོགས་འཆར་ཡོད་ལ། ཚོགས་འདུ་དེ་མ་འཚོགས་གོང་མཁན་པོ་རྣམ་པ་ཚོ་དགོན་པ་སོ་སོའི་ནང་ཕེབས་ཏེ། འཕྲོད་བསྟེན་དང་འབྲེལ་བའི་ལས་དོན་ཐོག་ཡར་རྒྱས་དང་བསྒྱུར་བཅོས་གཏོང་དགོས་པ་གང་ཡོད་ཀྱི་ཐོག་གྲོས་བསྡུར་གནང་རྒྱུ་ཡིན་སྐོར་སོགས་བརྗོད་ཡོད་པ་རེད།
འཛམ་གླིང་རྒྱལ་སྤྱིའི་དགེ་ལྡན་ལྷན་ཚོགས་ནས་བཞག་པའི་གྲོས་ཆོད་གསུམ་ནི། ༡༽༸གོང་ས་མཆོག་གི་ལྷ་དགོངས་འཁྲུག་པ་དང། ཐུགས་འཚབ་བྱུང་བ། ཐུགས་ཕམ་བྱུང་བ་དེ་དག་སེལ་བའི་ཐབས་ཤེས་ལ་ང་ཚོ་རི་བོ་དགེ་ལྡན་པའི་ཕྱོགས་ནས་སྒོ་གསུམ་ཐོག་ནས་ནུས་པ་ཡོད་ཚད་བཏོན་ནས་བཀའ་སྲུང་ཅི་སྒྲུབ་ཞུ་རྒྱུ་ཡིན།
༢༽ང་ཚོའི་བོད་པའི་སྤྱི་ཚོགས་ནང་ལ་ཆོལ་ཁ་གསུམ་དང་ཆོས་བརྒྱུད་ལྔ་ཡོངས་སུ་རྫོགས་པ་རྡོག་རྩ་ཆིག་སྒྲིལ་དགོས་པ་ཤིན་ཏུ་གལ་ཆེན་མཐོང་བ་དང་། བར་ལམ་ལས་རིམ་སྣ་ཚོགས་ཀྱི་རྐྱེན་ལ་བརྟེན་ནས་དེར་ཉམས་རྒུད་བྱུང་ཡོད་པའི་དོགས་ཟོན་ཡོང་གི་འདུག་པས། ༸གོང་ས་མཆོག་ཀྱང་དེ་ལ་ཐུགས་འཚབ་མཛད་བཞིན་ཡོད་པ་བསམ་བཞིན་ཡོད། དེར་བརྟེན་ང་ཚོ་རི་བོ་དགེ་ལྡན་པའི་ཆོས་བརྒྱུད་སྤྱི་ཡོངས་ནས་ཆོས་བརྒྱུད་གཞན་གྱི་དབུ་ཁྲིད་ཚོར་བོད་མི་ཚང་མ་ལ་མཐུན་སྒྲིལ་རྡོག་རྩ་ཆིག་སྒྲིལ་གནང་རྒྱུ་གལ་ཆེན་ཡིན་སྐོར་གྱི་བཀའ་སློབ་ལམ་སྟོན་ཡང་ནས་ཡང་དུ་སྩལ་རྒྱུའི་གསོལ་འདེབས་ཞུ་རྒྱུ།
༣༽བཀའ་སྤྱི་གཉིས་ནས་བོད་གཞིས་བྱེས་གཉིས་ཀྱི་བོད་མི་ཡོངས་རྫོགས་མཐུན་ལམ་རྡོག་རྩ་ཆིག་སྒྲིལ་གོང་བུའི་སྟོབས་ཤུགས་ལ་དོ་ཕོག་ཅུང་ཟད་ཙམ་ཡང་མི་འབྱུང་ཆེད་འབད་པ་ལྷོད་མེད་གནང་སྐྱོང་ཡོང་བ་དང། ལྷག་པར་དུའང་ད་ལམ་བཀའ་ཁྲི་ཟུར་པ་རྣམ་པ་དང། སྤྱི་འཐུས་ཚོགས་ཟུར་རྣམ་པ། བཀའ་ཟུར་རྣམ་པ་བཅས་ཟླ་ ༤ ཚེས་ ༡༡ ཉིན་བཀའ་སྤྱི་ལྷན་རྒྱས་སར་ཆེད་བཅར་གྱིས་ཛ་དྲག་གི་གནད་དོན་རེ་སྐུལ་དོན་ཚན་ལྔ་སྙན་སེང་ཞུས་པ་རྣམས་གང་མགྱོགས་ཕྱག་ལེན་གནང་རྒྱུ་ཤིན་ཏུ་གལ་ཆེ་བར་མཐོང་ནས། བཀའ་སྤྱི་ལྷན་རྒྱས་ནས་དོན་ཚན་དེ་དག་ཅིས་ཀྱང་ཕྱག་ལེན་དུ་འཁེལ་བ་གནང་སྐྱོང་ཡོང་བའི་རེ་སྐུལ་ཞུ་བཞིན་ཡོད་བཅས་རེད་ལ། གལ་ཆེའི་དོན་གནད་གསུམ་དེ་ངེས་པར་དུ་ཕྱག་བསྟར་དགོས་པའི་འབོད་སྐུལ་དང་སྦྲགས་བཀའ་སྤྱི་གཉིས་ལའང་ཕུལ་ཡོད་འདུག
གསར་འགོད་པ། པདྨ་མཚོ།
སངས་རྒྱས་གྲངས་མེད་བྱོན་པའི་མ་འཐུལ་བའི། མ་རུང་གདུལ་དཀའ་སྙིགས་དུས་འགྲོ་བ་ལ། བདེ་གཤེགས་ལམ་བཟང་ཇི་བཞིན་སྟོན་པ་ཡི། ༧སྐྱབས་མགོན་ཐུགས་རྗེ་ཅན་ཁྱོད་བརྟན་པར་བཞུགས། འཁོར་བ་མ་སྟོང་བར་དུ་བཞུགས་སུ་གསོལ།