༧གོང་ས་མཆོག་ནི་གུས་བརྩི་ལྡན་པའི་ཆོས་ཕྱོགས་ཀྱི་དབུ་ཁྲིད་ཅིག་ཡིན་སྟབས་ཕྱི་ཕྱོགས་ནས་ཁོང་ལ་ཆོས་ཕྱོགས་ཀྱི་མཇལ་བཅར་ཞུ་མཁན་ཚོར་རྒྱ་གར་གཞུང་གིས་བཀག་འགོག་གང་ཡང་མེད་སྐོར་བརྗོད་འདུག
ཁ་སང་རྒྱ་གར་ (PTI) གསར་ཁང་གིས་གནས་ཚུལ་སྤེལ་བའི་ནང་། རྒྱ་གར་གཞུང་གིས་༧གོང་ས་ཏཱ་ལའི་བླ་མར་ཆོས་ཕྱོགས་ཀྱི་མཇལ་བཅར་ཞུ་མཁན་ཚོར་དགག་བྱ་གང་ཡང་མེད་སྐོར་དང་། དྷ་རམ་ས་ལར་པེ་ཅིན་གཞུང་དང་འབྲེལ་བའི་བགྲོ་གླེང་ཚོགས་འདུ་བསྐོངས་མེད་སྐོར་བརྗོད་འདུག
རྒྱ་གར་ནང་སྲིད་ལྷན་ཁང་གི་མགྲིན་པ་ཚབ་བེ་ཀ་སི་ཝ་རུ་ཕི་ (Vikas Swarup) ཟེར་བ་ཞིག་གིས། མི་སྒེར་ཁག་ཅིག་༧གོང་ས་ཏཱ་ལའི་བླ་མར་མཇལ་བཅར་དུ་ཡོང་བ་མ་གཏོགས། དྷ་རམ་ས་ལར་པེ་ཅིན་གཞུང་དང་འབྲེལ་བའི་བགྲོ་གླེང་ཚོགས་འདུ་ཚོགས་ཡོད་པ་མ་རེད། ཁྱེད་ཚོས་ཤེས་གསལ་ལྟར། ཏཱ་ལའི་བླ་མ་མཆོག་ནི་གུས་བརྩི་ལྡན་པའི་ཆོས་ཕྱོགས་ཀྱི་དབུ་ཁྲིད་ཅིག་ཡིན་སྟབས། ཕྱི་ཕྱོགས་ནས་ཁོང་ལ་ཆོས་ཕྱོགས་ཀྱི་མཇལ་བཅར་ཞུ་མཁན་མང་པོ་ཡོང་གི་ཡོད་པ་མངོན་གསལ་ཡིན་ཞིང་། རྒྱ་གར་གཞུང་གིས་ཆོས་ཞུ་བ་ཚོར་བཀག་འགོག་གང་ཡང་མེད་སྐོར་བརྗོད་འདུག
གནས་ཚུལ་འདིའི་ནང་། ཟླ་སྔོན་མར་རྒྱ་གར་གཞུང་གིས་རྒྱ་རིགས་བུད་མེད་ལུ་ཅིན་ཧྭ་ (Lu Jinghua) དང་ར་ཝང་ (Ra Wong) གཉིས་དྷ་རམ་ས་ལར་ཡོང་བའི་མཐོང་མཆན་ཕྱིར་འཐེན་བྱས་ཡོད་པ་དང་། ཕྱི་སྡོད་རྒྱ་རིགས་བུད་མེད་ལུ་ཅིན་ཧྭ་ལགས་ནི་ཕྱི་ལོ་ ༡༩༨༩ ལོར་གནམ་བདེ་སྒོ་མོ་ཆེའི་ཐང་ཆེན་དུ་དམངས་གཙོའི་འོས་ལངས་སྐབས་ཀྱི་ལས་འགུལ་བ་ཞིག་དང་། ར་ཝང་ལགས་ནི་ཧོང་ཀོང་གི་དམངས་གཙོ་དོན་གཉེར་ཞིག་བཅས་ཡིན་སྐོར་འཁོད་འདུག
གསར་འགོད་པ། པདྨ་རྒྱལ།
