འགྲུལ་སྐྱེལ་གནམ་གྲུ་ཞིག་བོར་བརླག་ཏུ་ཕྱིན།

ཧྥ་རན་སི་ནས་ཨེ་ཇིབ་ཏུ་འཕུར་བའི་འགྲུལ་སྐྱེལ་གནམ་གྲུ་ཞིག་གིས་མི་གྲངས་ ༦༦ འཁུར་ཏེ་གར་སོང་ཆ་མེད་དུ་གྱུར་ཡོད་འདུག

ཕྱི་ཚེས་ ༡༨ ཉིན་གྱི་མཚན་གུང་ཆུ་ཚོད་ ༡༡ ཡོལ་ཙམ་ལ། ཧྥ་རན་སིའི་རྒྱལ་ས་ཕ་རི་སི་ནས་ཨེ་ཇིབ་ཏུ་འཕུར་བའི་འགྲུལ་སྐྱེལ་གནམ་གྲུ་ཨང་རྟགས་ (MS 804) ཅན་ཞིག་གར་སོང་ཆ་མེད་དུ་གྱུར་ཡོད་པ་དང་། འགྲུལ་སྐྱེལ་གནམ་གྲུ་དེའི་ནང་འགྲུལ་བ་ ༥༦ དང་། གནམ་གྲུའི་ཁ་ལོ་བ་དང་བདེ་སྲུང་མི་སྣ་བཅས་ཁྱོན་མི་གྲངས་ ༦༦ ཡོད་པ་དང་། འགྲུལ་བ་ཚོའི་ནང་ཨེ་ཇིབ་ཀྱི་འགྲུལ་བ་ ༣༠ དང་ཧྥ་རན་སིའི་འགྲུལ་བ་ ༡༥ ཚུད་པའི་ཕྱི་རྒྱལ་གྱི་འགྲུལ་བ་ ༢༦ ཡོད་པ་དང་། དེའི་ཁྲོད་བྱིས་པ་གསུམ་ཡོད་འདུག

ད་ལྟའི་ཆར་ཨེ་ཇིབ་ཀྱི་མཁའ་དམག་དང་མཚོ་དམག་གཉིས་མཉམ་རུབ་ཀྱིས་གྷི་རིག་ཉེ་འགྲམ་གྱི་མཚོ་ཁུལ་དུ་འཚོལ་ཞིབ་བྱེད་བཞིན་ཡོད་ལ། དབྱིན་ཇི་དང་ཧྥ་རན་སི་སོགས་ཀྱིས་འཚོལ་རོགས་བྱེད་བཞིན་ཡོད་པ་དང་། ཨ་རབ་བརྙན་འཕྲིན་ཁང་གིས་གནས་ཚུལ་སྤེལ་བ་ལྟར་ན། མཚོ་ཁུལ་དེ་ནས་ཕུང་པོ་གཉིས་དང་གནམ་གྲུའི་ཆག་རོ་འགའ་རྙེད་ཡོད་འདུག

ཁ་སང་ཕྱི་དྲོར་ཨེ་ཇིབ་མི་མང་མཁའ་འགྲུལ་བློན་ཆེན་ཞི་ར་ཧྥ་ཊི་(Sherif Fathi)ལགས་ཀྱིས། འགྲུལ་སྐྱེལ་གནམ་གྲུའི་དོན་རྐྱེན་དེ་དྲག་སྤྱོད་པས་བསླངས་བ་ཞིག་ཡིན་པའི་ཉེན་ཁ་ཆེན་པོ་ཡོད་སྐོར་བརྗོད་ཡོད་པ་དང་། ཨུ་རུ་སུ་རྒྱལ་ཕྲན་མཉམ་འབྲེལ་ཕྱོགས་ནས་ཀྱང་དོན་རྐྱེན་དེ་དྲག་སྤྱོད་པ་དང་འབྲེལ་བ་ཡོད་པའི་ཉེན་ཁ་ཧ་ཅང་ཆེན་པོ་ཡོད་སྟབས། ངེས་པར་དུ་མཉམ་འབྲེལ་ཞིབ་འཇུག་མཐར་སོན་པ་བྱེད་དགོས་པའི་འབོད་སྐུལ་བྱས་འདུག ཡིན་ནའང་། ཧྥ་རན་སིའི་སྲིད་འཛིན་ཧོ་ལན་ཌི་(François Hollande)ལགས་ཀྱིས་ད་ལྟའི་ཆར་གནམ་གྲུ་དེར་དྲག་སྤྱོད་པས་གནོད་སྐྱོན་བཏང་བའི་དོགས་གཞི་གང་ཡང་མཐོང་རྒྱུ་མེད་སྐོར་བརྗོད་ཡོད་པ་རེད།

འདི་ལོའི་ཕྱི་ཟླ་ ༣ ཚེས་ ༢༩ ཉིན་ཨེ་ཇིབ་ཀྱི་རྒྱལ་ནང་འགྲུལ་སྐྱེལ་གནམ་གྲུ་ཞིག་བྷོར་ཨེ་ཨ་རབ་གནམ་ཐང་(Borg El Arab Airport)ནས་ཀ་རོ་རྒྱལ་སྤྱིའི་གནམ་ཐང་(Cairo International Airport)ཟེར་བར་སྐྱོད་སྐབས། འགྲུལ་བ་སྐྱེས་པ་ཞིག་གིས་གནམ་གྲུའི་ཁ་ཕྱོགས་བསྒྱུར་ཏེ། ལར་ནཱ་ཀཱ་རྒྱལ་སྤྱིའི་གནམ་ཐང་(Larnaca International Airport )ཟེར་བ་རུ་བསྐྱོད་དགོས་པའི་བཙན་སྐུལ་བྱས་ཡོད་པ་མ་ཟད། གནམ་གྲུའི་ཁ་ཕྱོགས་མ་བསྒྱུར་ན་ཁོ་རང་གི་སྐེད་པའི་འབར་རྫས་འགད་གཏོར་གཏོང་རྒྱུ་ཡིན་པའི་འཇིགས་སྐུལ་བྱས་ཡོད་སྟབས། གནམ་གྲུ་དེ་ལར་ནཱ་ཀཱ་རྒྱལ་སྤྱི་གནམ་ཐང་དུ་འཕུར་དགོས་བྱུང་ཞིང་། གནམ་གྲུ་ས་ལ་བབས་མ་ཐག་འགྲུལ་བ་དང་གནམ་གྲུའི་ཞབས་ཞུ་བ་ཚོ་མྱུར་ཏུ་སར་ཡོད་པ་དང་། ཉེན་རྟོག་པས་འཇིགས་སྐུལ་བ་དེ་འཕྲལ་དུ་འཛིན་བཟུང་གིས་སྔོག་བཤེར་བྱེད་སྐབས། ཁོའི་སྐེད་པར་བཏགས་ཡོད་པ་དེ་ཕྱི་ཤུབས་ཅན་གྱི་ལག་ཐོག་ཁ་པར་ཞིག་ཡིན་པ་རེད།

ཕྱི་ལོ་ ༢༠༠༢ ཟླ་ ༥ པའི་ནང་། ཨེ་ཇིབ་ཀྱི་འགྲུལ་བ་ ༧༣༧ ཡོད་པའི་གནམ་གྲུ་ཞིག་ལ་བརྡབ་སྐྱོན་བྱུང་སྟེ་ཁྱོན་མི་གྲངས་ ༡༤ རྐྱེན་ལམ་དུ་ཤོར་ཡོད་པ་དང་། དེ་ནི་ཉེ་བའི་ལོ་ཤས་ནང་ཨེ་ཇིབ་ཀྱི་འགྲུལ་སྐྱེལ་གནམ་གྲུར་དོན་རྐྱེན་བྱུང་བ་ཚབས་ཆེ་ཤོས་དེ་ཆགས་ཡོད་འདུག

གསར་འགོད་པ། པདྨ་མཚོ།