རྒྱ་ནག་གི་འབྱོར་འབྲིང་གྲལ་རིམ་གྱི་སེམས་ཁྲལ།

མོའུ་རོང་ཞེ་ཚིན་(Murong Xuecun)གྱིས་བརྩམས།
པདྨ་རྒྱལ་གྱིས་བོད་བསྒྱུར་བྱས།

ཉེ་ལམ་ངའི་གྲོགས་པོ་ཕྱུག་ཁག་ཅིག་གིས་ང་ལ་ཁྱོས་དམངས་སྒོར་ཕྱི་ཕྱོགས་སུ་ཅི་ལྟར་བརྗེ་གཏོང་བྱེད་ཀྱི་ཡོད་ཅེས་དྲིས་སོང་། ངས་ཁོ་ལ་ང་ནམ་རྒྱུན་ཧོང་ཀོང་ལ་འགྲོ་གི་ཡོད་ཅིང་འགྲོ་ཐེངས་རེར་ངས་ཁྲིམས་མཐུན་སྒོས་དམངས་སྒོར་ ༢༠,༠༠༠ ནས་ཨ་སྒོར་ ༣,༡༠༠ འཁྱེར་གྱི་ཡོད་ལ། དེ་ནས་ངས་ཧོང་ཀོང་གི་དངུལ་ལོར་བརྗེས་ནས་ས་གནས་དངུལ་ཁང་ནང་འཇོག་གི་ཡོད་ཅེས་བཤད་པ་ཡིན། ཁེ་བཟང་ང་ལས་ཆེ་བའི་གྲོགས་པོ་དེ་ཅུང་བློ་ཕམ་བྱུང་ཡོད་མདོག་རེད། ཁོར་མཚོན་ན་ངས་ཐེངས་གཅིག་གི་འགྲུལ་བསྐྱོད་ལ་ཨ་སྒོར་ ༣,༡༠༠ འཁྱེར་གྱི་ཡོད་པ་དེ་ཁོའི་དམངས་སྒོར་ཕྱིར་གཏོང་དང་བསྡུར་ཚེ་དོན་དངོས་ཤིག་ཆགས་ཀྱི་མེད་ཚོད་འདུག

ན་ནིང་ནས་ཁྲོམ་རའི་དཔལ་འབྱོར་ཉམས་རྒུད་དང་དམངས་སྒོར་གྱི་འཛའ་ཐང་ཆག་པ་ནས། རྒྱ་རིགས་མི་མང་གིས་ངའི་གྲོགས་པོས་དངུལ་ལོ་ཕྱིར་གཏོང་གི་ཐབས་ཤེས་ལ་དགའ་མོས་བྱེད་ཀྱིན་འདུག སྲིད་གཞུང་གིས་དངུལ་ལོ་འབོར་ཆེན་ཕྱིར་གཏོང་བྱ་བར་ཚད་གཞི་གསར་བ་བཟོས་ཡོད་ནའང་། མི་མང་གིས་དམ་དྲག་གི་སྒྲིག་གཞི་མང་པོའི་འོག་ནས་དངུལ་ལོ་ཕྱིར་གཏོང་གི་ཐབས་ཤེས་འཚོལ་བཞིན་ཡོད་པ་དང་། འདས་པའི་ལོ་ངོ་གཅིག་དང་ཕྱེད་ཀའི་རིང་ལ་རྒྱ་ནག་ནང་གི་མི་སྒེར་དང་ཚོང་གཉེར་ཁང་མང་པོས་ཨ་སྒོར་ཐེར་འབུམ་གཅིག་ཙམ་བརྗེ་གཏོང་བྱས་ཡོད་པ་རེད།

རྒྱ་རིགས་མི་མང་རང་རྒྱལ་དང་འབྲལ་བཞིན་པ་དེ་ཡང་ཁོ་ཚོའི་འབྱུང་འགྱུར་ལ་སྔར་བས་ཉེན་ཚབས་ཆེ་བའི་མཚོན་རྟགས་ཤིག་ཡིན་པ་མ་ཟད། བརྟན་འཇགས་མིན་པའི་དཔལ་འབྱོར་འདུ་འགོད་དང་མཁའ་དབུགས་འབག་བཙོག ཟས་རིགས་དང་བཏུང་ཆུར་འདྲིས་པའི་དུག་རྫས་སོགས་ལ་བརྟེན་ནས་རྒྱ་ནང་གི་ཉིན་རེའི་འཚོ་གནས་ལ་འཇིག་ཉེན་སླེབ་ཀྱིན་ཡོད། ཉེ་ཆར་ཤེས་རྟོགས་བྱུང་བ་ལྟར་ན། རྫས་འགྱུར་འདྲེས་མའི་འགོག་སྨན་ས་ཡ་མང་པོ་བྱིས་པ་ཚོར་བརྒྱབ་པའི་གནད་དོན་དེས་སྤྱི་མང་ལ་དོ་ཕོག་ཆེན་པོ་བསླངས་འདུག

ཕྱིས་སུ་རྒྱ་ནག་ནང་སྤྱི་མང་གི་གླེང་སློང་ཐད་དམ་དྲག་དང་ཁྲིམས་གྱི་དབང་སྒྱུར་ལ་སྣང་ཆུང་། དྲང་བདེན་གྱི་ཁྲིམས་རྩོད་ལ་ཁྱད་གསོད་སོགས་གཏོང་བཞིན་པ་རྒྱ་ནག་མི་མང་གིས་ལམ་ཟུར་དང་ལམ་འོག་སོགས་ན་ཤབ་ཤུབ་གླེང་གིན་འདུག

གྲོང་ཁྱེར་གྱི་གཞོན་སྐྱེས་ཆེད་ལས་པ་ཚོས“དཔལ་འབྱོར་དཀའ་རྙོག་ལས་སྲུང་སྐྱོབ་ལམ་ཕྱོགས”ཞེས་པའི་རྩོམ་ཡིག་ཅིག་སྤྱི་ཚོགས་བརྒྱུད་ལམ་ཁག་ཏུ་ཁྱབ་སྤེལ་བྱས་པ་མ་ཟད། སྤྱི་ཚོགས་བརྒྱུད་ལམ་ཁག་ཏུ་ད་དུང“འབྱོར་འབྲིང་གྲལ་རིམ་པའི་སེམས་ཁྲལ་བཅུ”དང“འབྱོར་འབྲིང་གྲལ་རིམ་པ་ཚོ་སླར་ཡང་དབུལ་བོར་འགྱུར་སྲིད་དམ”སོགས་ཀྱི་གནས་ཚུལ་བཀོད་དེ་འཇིགས་སྣང་སློང་གི་ཡོད་པ་རེད། དེར་མ་ཟད། སེམས་ཁྲལ་གཞན་ཁག་ཅིག་ནི་རྒྱ་ནང་གི་དཔལ་འབྱོར་འདུ་འགོད་ཀྱི་འགྲོས་ཇེ་དལ་དུ་བཏང་བ་དང་འབྱོར་འབྲིང་གྲལ་རིམ་པའི་སེམས་ཁྲལ་ཇེ་ཆེར་འགྱུར་བཞིན་འདུག

འབྱོར་འབྲིང་གྲལ་རིམ་པ་ཚོས་དམངས་སྒོར་ཕྱིར་གཏོང་བྱ་བའམ་ཕྱིའི་རྒྱལ་ཁབ་ཁག་གི་དངུལ་ལོར་བརྗེ་འཚོང་བྱ་རྒྱུ་ནི་ཐུན་མོང་གི་གྲོས་འཆར་ལྟ་བུ་ཞིག་ཆགས་ཡོད་པ་དང་། ཉེ་ཆར་ “མ་རྐང་དུས་དེབ་ཁང” གིས་ཞིབ་འཇུག་རྒྱུས་ལོན་ལྟར་ན། རྒྱ་ནང་གི་འབྱོར་འབྲིང་གྲལ་རིམ་པ་བརྒྱ་ཆ་ ༤༠ ཡིས་ཡོང་འབབ་བརྒྱ་ཆ་ ༡༠ ཐོག་ནས་དམངས་སྒོར་ཕྱིའི་རྒྱལ་ཁབ་ཁག་གི་དངུལ་ལོར་བརྗེ་ཚོང་གཉེར་འདོད་ཡོད་པ་མ་ཟད། ད་ཆར་འབྱོར་འབྲིང་གྲལ་རིམ་པ་བརྒྱ་ཆ་ ༢༩ ཡིས་གོང་ཞུས་ཡོང་འབབ་ཀྱི་ཐོག་ནས་དམངས་སྒོར་བརྗེ་ཚོང་བྱས་ཡོད་འདུག

ད་དུང་ཉེ་ཆར་རྒྱལ་སྤྱིའི་བརྒྱུད་ལམ་ཁག་ཏུ་ཐོན་པའི་པ་ན་མའི་ཡིག་ཆ་ཁག་ནང་ཐ་ན་རྒྱ་ནག་གི་ཆེས་མཐོའི་དཔོན་རིགས་ཚོའི་ཉེ་འབྲེལ་ཚོས་ཀྱང་དམངས་སྒོར་འབོར་ཆེན་དཔྱ་ཁྲལ་འཇལ་མི་དགོས་པའི་ཕྱིའི་རྒྱལ་ཁབ་ཀྱི་དངུལ་ཁང་དུ་གསང་ཉར་བྱས་ཡོད་སྐོར་འཁོད་འདུག

རྒྱ་ནག་དང་ཁ་འབྲལ་བའི་ཐབས་ཤེས་འཐེན་མཁན་ཇེ་མང་དུ་འགྲོ་བཞིན་ཡོད་ཅིང་། ཕྱི་ལོ་ ༢༠༡༤ ལོའི་དཔྱ་ཁྲལ་ལ་བརྟེན་ནས་མི་མང་ ༧༦,༠༨༩ ལ་ཨ་རིའི་ནང་གཏན་སྡོད་ཆོག་པའི་མི་སེར་ལག་ཁྱེར་ཐོབ་ཡོད་པ་དང་། ཕྱི་ལོ་ ༢༠༡༣ ལོར་མི་མང་ ༤,༢༩༡ ཙམ་ལ་རག་ཡོད་པ་རེད།

ཕྱི་ལོ་ ༢༠༡༤ ལོར་ཨ་རིའི་གཞུང་གིས་མ་རྐང་འཛུགས་མཁན་མི་མང་ ༡༠,༦༩༢ ལ་ཐོངས་མཆན་སྤྲད་པའི་གྲས་སུ་རྒྱ་རིགས་ ༩༡༢༨ ཡོད་པ་དང་། ཕྱི་ལོ་ ༢༠༡༣ ལོའི་མ་རྐང་འཛུགས་མཁན་གྲས་ཀྱི་བརྒྱ་ཆ་ ༣༠ རྒྱ་རིགས་རེད། དུས་མཚུངས་སུ་ཨོ་སི་ཊོ་ལེ་ཡ་གཞུང་ནས་མ་རྐང་འཛུགས་མཁན་གྱི་ཐོངས་མཆན་བརྒྱ་ཆ་ ༨༨ རྒྱ་རིགས་ཚོར་སྤྲད་ཡོད་པ་རེད། མ་རྐང་འཛུགས་མཁན་གྱི་ཐོངས་མཆན་ལ་བརྟེན་ནས། རྒྱ་རིགས་མི་མང་རྒྱ་ནག་དང་ཁ་འབྲལ་འདོད་ཙམ་མ་ཟད། ད་དུང་དམངས་སྒོར་ཕྱིའི་རྒྱལ་ཁབ་ཏུ་བརྗེ་གཏོང་བྱེད་འདོད་ཡོད་པ་རེད།

ད་དུང་ཕྱིའི་རྒྱལ་ཁབ་ཁག་ཏུ་གནས་ཚང་འཚོལ་བཞིན་པའི་རྒྱ་རིགས་སློབ་མ་ཇེ་མང་དུ་འགྲོ་བཞིན་ཡོད་པ་དང་། ཕྱི་ལོ་ ༢༠༡༤ ནས་ ༢༠༡༥ ལོའི་སློབ་གཉེར་གྱི་མིང་ཐོག་ནས་ཨ་རིའི་ནང་སློབ་གཉེར་བྱེད་མཁན་རྒྱ་རིགས་སློབ་མ་ ༣༠༤,༠༤༠ ཡོད་པ་དང་། ཕྱི་ལོ་ ༢༠༡༡ ནས་ ༢༠༡༣ བར་རྒྱ་རིགས་སློབ་མ་ ༡༡༠,༠༠༠ ཡས་མས་ཡོད་པ་རེད།

རྒྱ་ནག་གི་དབང་འཛིན་པ་ཚོས་རྒྱ་ནག་གི་དཔོན་རིགས་དང་མི་མང་གི་བྲོས་བྱོལ་ལ་དམ་དྲག་ཤུགས་ཆེན་བྱེད་བཞིན་ཡོད་པ་དང་། དེ་ལ་བརྟེན་ནས་དམངས་སྒོར་ཕྱིའི་རྒྱལ་ཁབ་ཀྱི་དངུལ་ལོར་བརྗེ་གཏོང་བྱེད་པར་སྔར་བས་དཀའ་ལས་ཁག་པོ་ཆགས་ཡོད་པ་དང་། དེ་ནི་དམངས་སྒོར་ཕྱིར་གཏོང་གི་བཀག་རྒྱ་ཆེན་པོ་ཞིག་ཆགས་ཡོད་པ་རེད།

རྒྱ་ནང་གི་དངུལ་ལོར་འདོན་འཇུག་རང་འགུལ་འཕྲུལ་དྲ་ (A.T.M. network) བརྒྱུད་ནས་ཉིན་གཅིག་ལ་དམངས་སྒོར་ ༡༠,༠༠༠ དང་ལོ་གཅིག་ནང་དམངས་སྒོར་ ༡༠༠,༠༠༠ ཕྱིར་གཏོང་བྱེད་བཞིན་འདུག ན་ནིང་དངུལ་ལོར་བརྗེ་གཏོང་ཞབས་ཞུའི་ལས་རིགས་ཀྱི་སྒྲིག་འཛུགས་ཁག་ལ་དྲག་གནོན་ཐེབས་པའི་གནས་ཚུལ་མང་པོ་ཐོན་ཡོད་པ་དང་། དེ་དང་མཉམ་དུ་སྲིད་གཞུང་གིས་ཨ་རིའི་དངུལ་ལོར་ཉོ་ཚོང་ལས་འཆར་ལ་འགོག་རྐྱེན་བཟོས་པ་རེད།

དཔོན་རིགས་ཚོས་མི་མང་གི་ཕྱི་སྐྱོད་ལག་ཁྱེར་ལ་ཞིབ་བཤེར་བྱེད་པ་དང་། ཕྱི་ལོ་ ༢༠༡༣ ལོར་གཞུང་ཞབས་ཚོ་སྒེར་གྱི་དོན་དག་གི་ཐོག་ནས་མེས་རྒྱལ་དང་ཁ་འབྲལ་བར་དམ་དྲག་བྱས་པ་རེད། སྤྱིར་བཏང་དམ་དྲག་གི་སྲིད་ཇུས་དེ་རིགས་ཆེས་མཐོའི་དཔོན་རིགས་ཚོར་དམིགས་པ་ཞིག་ཡིན་ནའང་། ཞི་ཅིན་ཕིན་གྱི་དུས་སྐབས་ནས་ཕྱི་སྐྱོད་ལག་ཁྱེར་ལ་ཞིབ་བཤེར་བྱེད་རྒྱུ་ནི་ཆེས་རྒྱུན་ལྡན་གྱི་གནས་སྟངས་ཤིག་ཆགས་འདུག་ལ། ཐ་ན་ས་གནས་སྲིད་གཞུང་གི་ལས་བྱེད་ཅིག་ཡིན་ནའང་དེ་ལྟར་བྱེད་པ་རེད།

ཕྱི་ལོ་ ༢༠༡༣ ལོར་ཀུང་ཀྲུག་ཞིང་ཆེན་ནང་གཞི་རིམ་ལས་བྱེད་ ༢༠༠༠ ཕྱི་སྐྱོད་ལག་ཁྱེར་ལ་ཞིབ་བཤེར་བྱས་ཡོད་པ་མ་ཟད། པེ་ཅིན་གྲོང་ཁྱེར་དང་སི་ཁྲོན་ཞིང་ཆེན། ཐ་ན་གཙུག་ལག་སློབ་ཆེན་ཁག་གི་ལས་བྱེད་ཚོ་དང་གཞི་རིམ་སྒྲིག་གྲས་ལས་བྱེད་ཚོར་ཡང་དེ་ལྟར་བྱས་ཡོད་པ་རེད།

སྤྱི་དམངས་ཀྱིས་སྲིད་གཞུང་ལ་ཡ་ལན་སློག་པའི་བློ་ཁོག་མེད་སྟབས། པེ་ཅིན་གཞུང་གི་བྱ་སྤྱོད་ལ་དོ་སྣང་ཁྱེད་མཁན་སུ་ཡོད་དམ། ཕྱི་ཟླ་ ༢ བར་གསར་འཛུགས་བྱས་པའི་གཞུང་འབྲེལ་དྲ་ཚིགས་ཤིག་གི་སྟེང་འཁོད་པའི་བསམ་ཚུལ་ཞིག་གི་ནང་འབྱོར་འབྲིང་གྲལ་རིམ་པའི་སེམས་ཁྲལ་གཙོ་བོ་ནི་ཁོ་ཚོ་སྔོན་མའི་གྲོང་ཁུལ་དང་ཞིང་གྲོང་གི་དབུལ་གནས་སུ་ཕྱིར་བསྐྲོད་པར་ཞེད་ཀྱི་ཡོད་ལུགས་བཤད་འདུག

འཆལ་གཏམ་དེས་དོན་དངོས་ཤིག་གསལ་འདོན་བྱས་འདུག་སྟེ། གཅིག་བྱས་ན་འབྱོར་འབྲིང་གྲལ་རིམ་པའི་སེམས་ཁྲལ་ངོ་མ་དེ་མི་མང་དང་དཔོན་རིགས་མང་པོ་ཕྱི་རྒྱལ་དུ་འབྱོར་བཞིན་པ་དང་། ཤུལ་དུ་ལྷག་པའི་ཁེར་རྐྱང་གི་སྲིད་གཞུང་བཅས་ཡིན་སྲིད་ཀྱང་། ཁོ་ཚོས་མིང་དོན་མཚུངས་པའི་བཅོས་བསྒྱུར་གྱི་སྟ་གོན་ནི་མི་ནུས་པ་རེད།

མཐར་ཐུག་སྲིད་ཇུས་དེ་ལས་འབྱོར་འབྲིང་གྲལ་རིམ་པ་མང་པོར་ཁེ་ཕན་རག་གི་ཡོད་པ་རེད། ཕལ་ཆེར་གྲོང་དང་གྲོང་ཁྱེར་ཁག་གི་འབྱོར་འབྲིང་གྲལ་རིམ་པའི་ཕྱེད་ཀ་ཙམ་ལ་གཞུང་གི་སྒྲིག་འཛུགས་ཁག་དང་ཡང་ན་གཞུང་འབྲེལ་ཁེ་ལས་སྡེ་ཁག་ཏུ་ལས་གནས་སྤྲད་ཡོད་པ་དང་། ཕྱི་སྐྱོད་ལག་འཁྱེར་གྱི་རྐྱེན་པས་ཁོ་ཚོས་གཞུང་འབྲེལ་ཁེ་ལས་དེ་རིགས་བརྩོན་ལེན་ཐུབ་ཀྱི་མེད་པ་དང་། ངས་ངོ་ཤེས་ཚང་མར་ལྡོག་ཕྱོགས་ཀྱི་ལྟ་ཚུལ་དེ་འདྲ་གཅིག་མཚུངས་ཡོད་པ་རེད།

སྤྱིར་ཁོ་ཚོའི་འདོད་བློ་མ་ཁེངས་པའི་རྒྱུ་རྐྱེན་གཙོ་བོ་ནི་སྲིད་ཚོགས་གཅིག་གི་སྲིད་ཇུས་ལམ་ལུགས་དེ་ཡིན་ནའང་། ཁོ་ཚོས་སྲིད་ཚོགས་གཅིག་གི་སྲིད་ཇུས་ལམ་ལུགས་དེས་ཁོ་ཚོའི་འཚོ་གནས་ལ་འགན་སྲུང་ཡོད་པར་བསྟོད་བསྔགས་གཏོང་གིན་འདུག

ང་ལ་གཞུང་འབྲེལ་ཁེ་ལས་གཉེར་བའི་གྲོགས་པོ་ཞིག་ཡོད། ཁོ་སྡོད་སའི་གྲོང་ཁྱེར་ཆེ་ཞིང་ཁོའི་ལས་གནས་ཀྱང་གཞན་གྱི་བརྩི་མཐོང་ཐོབ་པ་ཞིག་འདུག མ་ཟད་ཁོའི་ཡོང་འབབ་གཏན་འཇགས་དང་ཁོའི་སྡོད་གནས་ཀྱང་གུ་ཡངས་པོ་རེད། ཡིན་ནའང་ཁོ་རྒྱ་ནག་དམར་ཤོག་ཚོགས་པར་མི་དགའ་ཞིང་། ཆབ་སྲིད་ལམ་ལུགས་ལ་སྐྱོན་བརྗོད་མང་པོ་བྱས་པ་རེད།

ཡིན་ན་ཡང་རྒྱ་རིགས་གཞན་དག་ལྟར། ཁོས་མགྱོགས་པོར་ཆབ་སྲིད་བཅོས་བསྒྱུར་ཡོང་བར་རེ་ལྟོས་བྱེད་ཀྱི་མེད་ཅིང་། ཉེ་ཆར་ཁོས་ང་ལ་ “དམངས་གཙོའི་ལམ་ལུགས་ཡག་པོ་རེད། ཡིན་ཡང་ང་ཤི་རག་བར་དུ་དེ་མཐོང་བའི་རེ་བ་བཅངས་མེད” བཅས་ཟེར།

བསྒྱུར་མཆན། མོའུ་རོང་ཞེ་ཚིན་ (Murong Xuecun) ནི་རྒྱ་རིགས་རྩོམ་པ་པོ་ཞིག་ཡིན་ཞིང་། ཁོའི་བརྩམས་ཆོས་གཙོ་བོར་ <<རླུང་དམར་གསེབ་གྱི་བྲོ་གར་>><<Dancing Through Red Dust >>སོགས་འདུག་ལ། ཁོའི་དཔྱད་རྩོམ་འདི་ནེའུ་ཡོག་དུས་གསར་ཁང་གི་བསམ་ཚུལ་ལེ་ཚན་ནས་བོད་བསྒྱུར་བྱས།

མ་རྩོམ་འབྲེལ་ཐག http://www.nytimes.com/2016/05/11/opinion/chinas-middle-class-anxieties.html?_r=0