རྒྱ་གཞུང་གིས་བསང་ཆུ་རྫོང་ཨ་མཆོག་ཡུལ་ཚོའི་བླ་རིའི་གཏེར་ཁ་སྲུང་སྐྱོབ་པ་བོད་མི་དྲུག་བདུན་ཞིག་ལ་གཅར་རྡུང་ཚབས་ཆེན་བཏང་སྟེ་སྨན་ཁང་དུ་འཁྲིད་དགོས་བྱུང་ཡོད་འདུག
ཕྱི་ཟླ་ ༥ ཚེས་ ༣༡ ཉིན་ནས་བཟུང་ཀན་ལྷོ་བསང་ཆུ་རྫོང་ཨ་མཆོག་ཡུལ་ཚོའི་བོད་མི་ཚོས་བླ་རིའི་གཏེར་ཁ་སྔོག་འདོན་ལ་འགོག་རྒོལ་སྲུང་སྐྱོབ་ཀྱི་ལས་འགུལ་སྤེལ་ཏེ་ཉིན་གྲངས་བཞི་འགྲོ་བཞིན་ཡོད་པ་ལྟར། སུད་སིར་གནས་སྡོད་བོད་མི་ཡུམ་སྐྱབས་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་ཞོགས་པར་ཁོར་ཡུག་སྲུང་སྐྱོབ་ཚོགས་པའི་སྣེ་ཁྲིད་པ་ཚོའི་གཙོས་བོད་མི་དྲུག་ལ་རྒྱ་གཞུང་ཉེན་རྟོག་པས་རྡུང་རྡེག་ཚབས་ཆེན་བཏང་རྗེས་སྨན་ཁང་དུ་ཁྲིད་ཡོད་པ་དང་། ད་ལྟའི་ཆར་ཁོང་ཚོའི་གནས་སྟངས་ཞིབ་ཕྲ་ཤེས་རྟོགས་མ་ཐུབ་པར་ལྷག་ཡོད་པ་དང་། དེ་རིང་ཨ་མཆོག་ཡུལ་ཚོའི་ཚོང་ཁང་དང་ཟ་ཁང་ཡོད་ཚད་སྒོ་བརྒྱབ་སྟེ་སྲང་ལམ་གྱི་འགོ་མཇུག་གང་སར་དྲག་ཆས་ཉེན་རྟོག་པས་དམ་སྲུང་ནན་མོ་བྱེད་ཀྱི་འདུག དེ་རིང་ཞོགས་པར་བྱུང་བའི་དོན་རྐྱེན་དེས་ས་གནས་མི་མང་ལ་ཕོག་ཐུག་ཆེན་པོ་བཟོས་པས་མི་མང་གི་འདུ་འཛོམས་ཆེ་རུ་འགྲོ་བཞིན་ཡོད་སྐོར་བརྗོད་བྱུང་།
བླ་རིའི་གཏེར་ཁ་སྲུང་སྐྱོབ་པ་ཚོས་ས་གནས་སྲིད་གཞུང་ལ་འབོད་སྐུལ་སྙན་ཞུ་ཞིག་སྤྲད་པའི་ནང་། རྒྱལ་ཁབ་ཀྱི་ཁྲིམས་ལུགས་བརྩི་སྲུང་སྒོས་སྐྱེས་ཁམས་དོ་མཉམ་དང་ཁོར་ཡུག་སྲུང་སྐྱོབ་གཙིགས་སུ་བཟུང་སྟེ་ལས་འགུལ་སྤེལ་བ་ནི་དོན་དངོས་བཤད་ན་གནས་ལུགས་དང་མཐུན་པ་མ་ཟད། དམངས་ཁྲིམས་སྲིད་ཁྲིམས་ཉེས་ཁྲིམས་གང་དུའང་མ་འགལ་བའི་ཁྲིམས་མཐུན་ལས་འགུལ་ཞིག་ཡིན་ཟེར། དེ་རིང་ཕྱི་བཞུགས་བོད་མི་ཞིག་གིས་འདི་ག་གསར་ཁང་དུ་གནས་ཚུལ་ཞིབ་ཕྲ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༡༦ ཟླ་ ༥ བའི་ཚེས་ ༣༡ ཉིན་མདོ་སྨད་ཨ་མཆོག་གི་ཡུལ་མི་ ༣༠༠ ཙམ་བདེ་མོ་ཐང་དུ་འཛོམས་ནས་སྤྱི་བསང་བཏང་རྗེས། ལོ་ངོ་བཅུ་ཕྲག་ལྷག་རིང་རྒྱ་ནག་གི་གཏེར་འདོན་ཚན་ཁག་གིས་ཁོར་ཡུག་འབག་བཙོག་བཟོས་རྐྱེན་དུ་གྱུར་བའི་རང་བྱུང་ཁམས་ཀྱི་ཉིང་བཅུད་འབྲུ་བཞིན་པ་ལྟར། ཨ་མཆོག་གི་ཚོ་བ་བརྒྱད་ཀྱི་དགོན་གྲོང་ཀུན་གྱིས་མཆོད་བཀུར་བྱེད་པའི་བླ་རིའི་གཏེར་ཁ་བརྐོས་སྟབས། རང་བྱུང་ཁོར་ཡུག་ལ་གཏོར་བརླག་ཚད་མེད་དང་ཆག་སྒོ་ཉམས་ང་བ་བཟོས་པར་མི་མང་གི་མིག་གིས་བཟོད་པར་འཕྲེད་དར་དམར་པོའི་སྟེང་ཨ་མཚོག་བླ་རིའི་གཏེར་ཁ་སྔོན་འགོག་ཅེས་བྲིས་ཏེ་ཞི་བའི་གོམ་བགྲོད་ཀྱིས་ཡུལ་དངོས་སུ་འབྱོར་མ་ཐག ཉེན་རྟོག་དམག་མི་མང་པོ་འབྱོར་བ་མ་ཟད། ཉེན་རྟོག་དམག་གི་རླངས་འཁོར་ཆེ་འབྲིང་མང་བོ་བང་བསྒྲིགས་ཏེ་ཞི་རྒོལ་མི་མང་ལ་འཇིགས་སྐུལ་བྱས་ཀྱང་། ཉེན་རྟོག་པའི་མདུན་དུ་ས་གནས་ཡུལ་མི་ཚོའི་སྤོབས་པ་མ་ཉམས་པར། རྒྱལ་ཁབ་ཀྱི་ཁྲིམས་ལུགས་བརྩི་སྲུང་སྒོས་སྐྱེས་ཁམས་དོ་མཉམ་དང་ཁོར་ཡུག་སྲུང་སྐྱོབ་གཙིགས་སུ་བཟུང་སྟེ་ལས་འགུལ་སྤེལ་བ་ནི་དོན་དངོས་བཤད་ན་གནས་ལུགས་དང་མཐུན་པར་མ་ཟད། དམངས་ཁྲིམས་སྲིད་ཁྲིམས་ཉེས་ཁྲིམས་གང་དུའང་མ་འགལ་བའི་ཁྲིམས་མཐུན་ལས་འགུལ་ཞིག་ཡིན་པ་བསྙོན་དུ་མེད། དེར་བརྟེབ་ང་ཚོས་ལས་འགུལ་འདི་སྤེལ་བ་ཡིན། དེ་རིང་ཉིན་གང་བོར་འཚེ་མེད་དང་དྲང་བདེན་གྱི་ཐོག་ནས་རེ་སྐུལ་ཞུས་པ་ཡིན་ལ། ཉིན་གང་བོར་ཨུ་ཐུག་ཐབས་ཟད་ཀྱིས་སྡུག་སྨྲེ་བཏོན་པ་ཡིན། གཏེར་ཁ་འདིའི་ཆེད་དུ་ཡུལ་མི་གཉིས་ཀྱི་ཚེ་སྲོག་ཤོར་མྱོང་ལ་། ནན་འབད་དང་ཁྱུང་རི་ཐང་། རེབ་ཚ་མདོ། བན་ཁུ་སོགས་ཀྱི་བར་ལ་ནང་འཁྲུག་ཕྱོགས་ལངས་རབ་དང་རིམ་པ་མང་པོ་བྱུང་མྱོང་། འདི་ནི་སྤྱི་ཚོགས་འཆམ་མཐུན་ལ་གཏོར་བརླག་དང་རུ་སྡེ་ཡུལ་ཕྱོགས་བར་འགལ་བ་བཟོ་བའི་རྒྱུ་རྐྱེན་དུ་གྱུར་ཡོད། ཅེས་བརྗོད་ཡོད་འདུག
གསར་འགོད་པ། པདྨ་མཚོ།
