མཉམ་འབྲེལ་རྒྱལ་ཚོགས་ཀྱི་སྙན་ཐོ་ཞིག་བཏོན་པའི་ནང་ཡེ་མིན་རྒྱལ་ནང་དུ་སོ་ཌི་ཨ་ར་བྷེ་ཡའི་མཉམ་འབྲེལ་དམག་དཔུང་གི་འཐབ་འཛིང་ཁྲོད་དུ་ཉེས་མེད་བྱིས་པ་ ༡༩༥༣ ཡས་མས་ཤི་རྨས་བྱུང་ཡོད་སྐོར་འཁོད་འདུག
དེ་རིང་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢ ཉིན་མཉམ་འབྲེལ་རྒྱལ་ཚོགས་སྤྱི་ཁྱབ་དྲུང་ཆེ་ལས་ཁུངས་ནས་ལོ་འཁོར་ཞིབ་འཇུག་སྙན་ཐོ་ཞིག་བཏོན་པའི་ནང་ན་ནིང་གཅིག་པུར་སོ་ཌི་ཨ་ར་བྷེ་ཡའི་ (Saudi Arabia) མཉམ་འབྲེལ་དམག་དཔུང་གིས་ཡེ་མིན་རྒྱལ་ནང་དུ་ཉེས་མེད་བྱིས་པ་ ༡༩༥༣ ཤི་རྨས་བཟོས་པའི་ནག་ཉེས་ཐེར་འདོན་བྱས་ཏེ། ཁ་སང་སོ་ཌི་ཨ་ར་བྷེ་ཡ་མཉམ་འབྲེལ་སྒྲིག་ཁོངས་ནས་ཕྱིར་ཕུད་བཏང་ཡོད་པ་དང་། ཉེས་མེད་བྱིས་པ་དམར་གསོད་བཏང་བའི་ཉེས་དོན་དེ་ནི་སོ་ཌི་ཨ་ར་བྷེ་ཡའི་མཉམ་འབྲེལ་དམག་དཔུང་གིས་ཡེ་མིན་ (Yemen) རྒྱལ་ནང་དུ་ཤཱེ་ཊི་ (Shiite) ངོ་ལོག་ཤོག་ཁག་དང་འཐབ་འཛིང་བྱས་པའི་ཁྲོད་བྱུང་བ་ཞིག་ཡིན་འདུག
མཉམ་འབྲེལ་རྒྱལ་ཚོགས་ཀྱི་ལོ་འཁོར་ཞིབ་མཇུག་སྙན་ཐོ་དེའི་ནང་། ཕྱི་ལོ་ ༢༠༡༥ ལོར་ཡེ་མིན་རྒྱལ་ནང་དུ་ཉེས་མེད་བྱིས་པ་ ༡༩༥༣ ཤི་རྨས་བྱུང་ཡོད་པ་དང་། ཕྱི་ལོ་ ༢༠༡༤ ལོ་དང་བསྡུར་ན་ཡེ་མིན་རྒྱལ་ནང་དུ་བྱིས་པ་ཤི་རྨས་ཀྱི་གྲངས་འབོར་ལྡབ་ ༦ གི་ཇེ་མང་དུ་ཕྱིན་ཡོད་ཅིང་། ཉེས་མེད་བྱིས་པ་བརྒྱ་ཆ་ ༦༠ ཡས་མས་སོ་ཌི་ཨ་ར་བྷེ་ཡའི་མཉམ་འབྲེལ་དམག་དཔུང་གི་འཐབ་འཁྲུག་ཁྲོད་ཤི་རྨས་བྱུང་ཡོད་པ་མ་ཟད། ཕྱི་ལོ་ ༢༠༡༥ ལོར་ཡེ་མིན་རྒྱལ་ནང་གི་སློབ་གྲྭ་དང་སྨན་ཁང་ཁག་ཏུ་ཐེབས་པའི་རྒོལ་རྡུང་ཁྲོད་བྱིས་པ་ ༡༠༡ ཤི་རྨས་བྱུང་ཡོད་པ་དེ་ཕྱི་ལོ་ ༢༠༡༤ ལོ་དང་བསྡུར་ན་ཉེས་མེད་བྱིས་པ་ཤི་རྨས་ཐེབས་གྲངས་ལྡབ་ ༢ ཀྱི་ཇེ་མང་དུ་སོང་ཡོད་ཅིང་། བྱིས་པ་བརྒྱ་ཆ་ ༤༨ སོ་ཌི་ཨ་ར་བྷེ་ཡའི་མཉམ་འབྲེལ་དམག་དཔུང་གི་འཐབ་འཛིང་ཁྲོད་ཤི་རྨས་བྱུང་ཡོད་སྐོར་འཁོད་འདུག
མཉམ་འབྲེལ་རྒྱལ་ཚོགས་སྤྱི་ཁྱབ་ལས་ཁུངས་ཀྱི་མགྲིན་ཚབ་པ་ཌུ་རྗ་རེག་ (Dujarric) ཟེར་བ་ཞིག་གིས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཀེ་མོན་ (Ban Ki-moon) གྱིས་སོ་ཌི་ཨ་ར་བྷེ་ཡའི་མཉམ་འབྲེལ་དམག་དཔུང་གི་གནད་དོན་དེ་ཕྱི་ཟླ་ ༨ པའི་ནང་རྟོགས་ཞིབ་མ་བྱས་སྔོན་ལ་འཕྲལ་དུ་མཉམ་འབྲེལ་རྒྱལ་ཚོགས་ཀྱི་སྐུ་ཚབ་ཚོགས་ཆུང་ཞིག་ནེའུ་ཡོག་གྲོང་ཁྱེར་དུ་ཆེད་གཏོང་གིས་སུ་ཌེ་ཨ་ར་བྷེ་ཡའི་མཉམ་འབྲེལ་དམག་དཔུང་གིས་ཡེ་མིན་ (Yemen) རྒྱལ་ནང་དུ་ཉེས་མེད་བྱིས་པ་མང་པོ་ཤི་རྨས་བཟོས་བའི་གནད་དོན་ཐོག་བསྐྱར་ཞིབ་བྱ་རྒྱུ་དང་ལེན་བྱས་ཡོད་སྐོར་བརྗོད་ཅིང་། སོ་ཌི་ཨ་ར་བྷེ་ཡའི་གཞུང་ཚབ་པ་ཨལ་མུ་ལེ་མེ་ (Al-Mouallimi) ཟེར་བ་ཞིག་གིས་མཉམ་འབྲེལ་རྒྱལ་ཚོགས་ཀྱིས་སོ་ཌི་ཨ་ར་བྷེ་ཡ་མཉམ་འབྲེལ་སྒྲིག་ཁོངས་ནས་ཕྱིར་ཕུད་བཏང་བ་དེ་ནི་ཆ་རྐྱེན་དང་རྒྱུ་རྐྱེན་གང་ཡང་མེད་པ་ཞིག་དང་། གནད་དོན་དེའི་ཐད་ལ་བསྐྱར་ཞིབ་བྱ་རྒྱུར་སོ་ཌི་ཨ་ར་བྷེ་ཡ་སྲིད་གཞུང་ལ་དོགས་གཞི་ཅི་ཡང་མེད་པ་མ་ཟད། གནད་དོན་དེ་ཐག་ཆོད་ཡོང་བའི་ཡེད་ཆེས་ཡོད་སྐོར་དང་། མཉམ་འབྲེལ་རྒྱལ་ཚོགས་ཀྱི་སྟབས་ཉེས་སྐབས་འཕྲད་ཀྱི་སྙན་ཐོ་དེས་ཡེ་མིན་རྒྱལ་ནང་གི་དུས་ཟིང་ཞི་འཇགས་གཏོང་བའི་གྲོས་མོལ་དང་གྲོས་ཆོད་ཀྱི་རེ་འདུན་ལ་ལྡོག་ཕྱོགས་ཀྱི་ཤན་ཤུགས་ཐེབས་ཡོད་སྐོར་བརྗོད་འདུག
གནས་ཚུལ་ལྟར་ན། ཕྱི་ལོ་ ༢༠༡༤ ལོ་ནས་སོ་ཌི་ཨ་ར་བྷེ་ཡ་དང་ཨ་རིའི་མཉམ་འབྲེལ་དམག་དཔུང་གི་རྒྱབ་རོགས་ལ་བརྟེན་ནས་ཡེ་མིན་སྲིད་གཞུང་གིས་ནུབ་རྒྱུད་ཀྱི་ཧུ་དྷེ་སི་ (Houthis) འཇིགས་སྐུལ་དྲག་སྤྱོད་ཤོག་ཁག་ལ་འཐབ་འཛིང་བྱེད་ཀྱིན་ཡོད་ཅིང་། ཧུ་དྷེ་སི་འཇིགས་སྐུལ་དྲག་སྤྱོད་ཤོག་ཁག་གིས་ཡེ་མིན་གྲོང་ཁྱེར་ས་ན་ (Sanaa) བཙན་བཟུང་བྱས་ཡོད་པ་དང་། ཕྱི་ལོ་ ༢༠༡༥ ལོར་སོ་ཌི་ཨ་ར་བྷེ་ཡའི་མཉམ་འབྲེལ་དམག་དཔུང་གི་རོགས་འདེགས་ལ་བརྟེན་ནས་ཡེ་མིན་རྒྱལ་ནང་གི་ཟིང་འཁྲུག་ཇེ་ཆར་ཕྱིན་ཏེ་ད་ལྟར་མི་སེར་ ༦༠༠༠ ལྷག་གི་ཚེ་སྲོག་ཡོད་པ་རེད།
འདི་ལོའི་ཕྱི་ཟླ་ ༤ ཚེས་ ༡༠ ཉིན་མཉམ་འབྲེལ་རྒྱལ་ཚོགས་ཀྱིས་ཀུ་ཝེ་ཊི་ (Kuwait) རྒྱལ་ནང་དུ་ཞི་བདེ་གྲོས་མོལ་ཚོགས་འདུ་འཚོགས་དགོས་པའི་ཡོངས་ཁྱབ་གསལ་བསྒྲགས་སྤེལ་ནའང་། ཡེ་མིན་རྒྱལ་ནང་གི་ཟིང་འཁྲུག་མུ་མཐུད་འབྱུང་མུས་ཡིན་འདུག
གསར་འགོད་པ། པདྨ་རྒྱལ།
མཉམ་འབྲེལ་རྒྱལ་ཚོགས་ཀྱི་ལས་ཁུངས་ཆེ་མོ་རུ་བོད་ཀྱི་མི་རིགས་ད་བར་བོད་ནང་དུ་ག་ཚོད་ཤི་བ་འམ་རྨས་པ་བྱུང་ཡོད་པའི་སྐོར་གྲངས་ཐོ་ཡོད་དམ་མེད། ཕལ་ཆེར་མེད་བཟོ་རེད། མཉམ་འབྲེལ་རྒྱལ་ཚོགས་ཞེས་པའི་ཚོགས་པ་འདི་ལྐུག་པ་འོན་པ་ཞིག་རེད་འདུག