མཁའ་དབུགས་དུག་རླངས་ཆགས་པའི་རྐྱེན་གྱིས་འཛམ་གླིང་སྒང་འདིར་ལོ་རེར་མི་མང་ས་ཡ་ ༡༥ ལྷག་ལ་ཁྲག་ཤེད་རྒྱས་པ་དང་ཁྲག་གི་འཁོར་རྒྱུག་འགག་པའི་འཇིག་ཉེན་འབྱུང་གི་ཡོད་པའི་གྲས་ནས་མི་མང་ས་ཡ་ ༦ ཙམ་གྱི་ཚེ་སྲོག་འཆོར་བ་དང་མི་མང་ས་ཡ་ ༥ ཙམ་ནུས་མེད་ཞོ་བ་དང་། སྐད་དང་མིག་གི་དབང་བོ་ཉམས་པ། རྩ་དཀར་གྱི་ནད་དང་དྲན་ཤེས་ཉམས་པ་བཅས་འབྱུང་གིན་ཡོད་འདུག
དེ་རིང་རྒྱ་ནག་ལྷོ་རྒྱུད་ནངས་མོའི་ཚགས་པར་ཁང་ (scmp) གིས་གནས་ཚུལ་སྤེལ་བ་ལྟར་ན། རྒྱལ་སྤྱིའི་འཕྲོད་བསྟེན་ཞིབ་འཇུག་ཚན་པའི་ཞིབ་འཇུག་གནད་བསྡུས་དཔྱད་རྩོམ་ཞིག་ཕྱོགས་སྒྲིག་བྱས་ཏེ་མཁའ་དབུགས་འབག་བཙོག་ཆགས་པ་དེ་འགྲོ་བ་མིའི་ཚེ་སྲོག་ལ་རྒོལ་བའི་འཇིག་ཉེན་ ༡༠ གྲས་སུ་བགྲངས་ཡོད་པ་དང་། ལྷག་པར་དུ་དཔལ་འབྱོར་ཐོན་སྐྱེད་བྱེད་པའི་རྒྱལ་ཁབ་རྒྱ་ནག་དང་རྒྱ་དཀར། ཨ་ཧྥི་རེ་ཁ་སོགས་ནང་རྡོ་ཐ་དང་རྡོ་སྣུམ། སོལ་རླངས་སོགས་ཚབས་ཆེ་བའི་རྐྱེན་པས་མིའི་མིག་རྩ་དང་ཀླད་རྩར་ཁྲག་རྒྱས་དང་སྐབས་རེར་ཁྲག་གི་འཁོར་རྒྱུག་འགག་སྟེ་ཚེ་སྲོག་བགྲང་གིས་མི་ལང་བ་འཆོར་བཞིན་ཡོད་སྐོར་བརྗོད་འདུག
རྒྱལ་སྤྱིའི་འཕྲོད་བསྟེན་ཞིབ་འཇུག་ཚན་པའི་གནད་བསྡུས་དཔྱད་རྩོམ་དེའི་ནང་ཕྱི་ལོ་ ༡༩༩༠ ལོ་ནས་ ༢༠༡༣ བར་འཛམ་གླིང་རྒྱལ་ཁབ་ ༡༨༨ ནང་མཁའ་དབུགས་དུག་རླངས་ཆགས་པར་བརྟེན་ནས་མིའི་མིག་རྩ་དང་ཀླད་རྩར་ཁྲག་ཤེད་རྒྱས་པ་དང་། ཡང་སྐབས་རེར་ཁྲག་གི་འཁོར་རྒྱུག་འགག་པའི་འཇིག་ཉེན་ཚབས་ཆེན་ཡིན་པ་དང་། དུག་རླངས་མང་ཆེ་བ་སོལ་རླངས། རྡོ་ཐ་དང་རྡོ་སྣུམ་སོགས་ལས་མཆེད་ཀྱི་ཡོད་པ་དང་། མཁའ་དབུགས་དུག་རླངས་ཆགས་པའི་རྐྱེན་གྱིས་འཛམ་གླིང་སྒང་འདིར་ལོ་རེར་མི་མང་ས་ཡ་ ༡༥ ལྷག་ལ་ཁྲག་ཤེད་རྒྱས་པ་དང་ཟུངས་ཁྲག་གི་འཁོར་རྒྱུག་འགག་པའི་འཇིག་ཉེན་འབྱུང་གི་ཡོད་པའི་གྲས་ནས་མི་མང་ས་ཡ་ ༦ ཙམ་གྱི་ཚེ་སྲོག་འཆོར་བ་དང་མི་མང་ས་ཡ་ ༥ ཙམ་ནུས་མེད་ཞོ་བ་དང་། སྐད་དང་མིག་གི་དབང་བོ་ཉམས་པ། རྩ་དཀར་གྱི་ནད་དང་དྲན་ཤེས་ཉམས་པ་བཅས་འབྱུང་གིན་ཡོད་པ་དང་། མཁའ་དབུགས་འབག་བཙོག་ཆགས་པའི་ནད་ཡམས་ཀྱི་འཇིག་ཉེན་དེ་ནི་འཛམ་གླིང་ཁྱོན་ཡོངས་སུ་འབྱུང་བཞིན་པའི་ཁྲག་ཤེད་མཐོ་བ་དང་། ཤིང་འབྲས་ཀྱི་འཚོ་བཅུད་ཉུང་བ། ཚོ་གསོག་པ་དང་ཚྭ་མང་པོ་ཟ་བ། སྔོ་ཚལ་ཉུང་ཉུང་ཟ་བ་དང་ཐ་མག་མང་པོ་འཐེན་པ་བཅས་ཀྱི་ནད་ཚའི་འཇིག་ཉེན་དང་གཅིག་མཚུངས་ཡིན་ཞིང་། སྤྱིར་ཁྲག་ཤེད་རྒྱས་པ་དང་ཟུངས་ཁྲག་གི་འཁོར་རྒྱུག་འགག་པའི་འབྱུང་རྐྱེན་གཙོ་བོ་ཐ་མག་མང་པོ་འཐེན་པ་དང་མངར་ཟས་མང་པོ་ཟ་བ། ལུས་རྩེད་མི་སྦྱོང་བ་དང་ལུས་སེམས་ཀྱི་འཕྲོད་བསྟེན་ཞན་པ་བཅས་ལ་བརྟེན་ནས་འབྱུང་གི་ཡོད་ནའང་། གཞུང་སྒེར་གཉིས་ནས་བཟོ་ལས་ཐོན་སྐྱེད་ལ་སྟངས་འཛིན་བྱས་པ་ཡིན་ན། ང་ཚོས་འཛམ་གླིང་སྤྱིའི་དུག་རླངས་ཀྱི་འཇིག་ཉེན་བརྒྱ་ཆ་ ༣ སྔོན་འགོག་ཐུབ་ཀྱི་ཡོད་སྐོར་བརྗོད་འདུག
ནེའུ་ཙི་ལན་ཌའི་ (New Zealand) ཨུག་ལན་ཌི་བཟོ་ལས་རིག་རྩལ་སློབ་ཆེན་ (Auckland University of Technology) གྱི་ཞིབ་འཇུག་པ་བ་ལི་རེ་ཧྥེ་གྷེན་ (Valery Feigin) ཟེར་བ་ཞིག་གིས་ང་ཚོས་ཞིབ་འཇུག་འབྲས་དོན་ལྟར་ན། རང་བྱུང་ཁོར་ཡུག་དང་མཁའ་རླུང་དུག་རླངས་ཆགས་པར་བརྟེན་ནས་མིའི་མིག་རྩ་དང་ཀླད་རྩར་ཁྲག་ཤེད་རྒྱས་པ་དང་སྐབས་རེར་ཟུངས་ཁྲག་གི་འཁོར་རྒྱུག་འགག་པའི་འཇིག་ཉེན་ནི་བློ་ཡུལ་ལས་འགོངས་པ་ཞིག་རེད་ལ། དམིགས་སུ་དཔལ་འབྱོར་འཕེལ་རྒྱས་ཅན་གྱི་རྒྱལ་ཁབ་ཁག་ནང་འཇིག་ཉེན་ཆེན་པོ་ཡིན་པ་དང་། མཁའ་དབུགས་འབག་བཙོག་ཆགས་པའི་རྐྱེན་གྱིས་འདས་པའི་མི་ལོ་འདི་དག་རིང་འགྲོ་བ་མིའི་བདེ་ཐང་གི་གནས་བབ་སྐྱོ་རུ་ཕྱིན་ཏེ་མི་རྣམས་ནད་ཀྱིས་མནར་བ་དང་ཞ་བོ་ཆགས་པ། ཐ་ན་ཚེ་སྲེག་མང་པོ་འཆོར་གྱིན་ཡོད་སྐོར་སོགས་བརྗོད་འདུག
གསར་འགོད་པ། པདྨ་རྒྱལ།
