ཁྲིམས་ཀྱི་བྱ་ར་སྐད་འཕྲིན་ཚོགས་པས་སྲིད་སྐྱོང་འོས་མི་བློ་བཟང་སེང་གེ་དང་དབུས་འོས་བསྡུ་ལས་ཁང་གཉིས་འོས་བསྡུའི་སྒྲིག་གཞི་དང་འགལ་སྐོར་ཁྲིམས་གཏུག་བྱས་པ་དེ་རང་ནས་ཕྱིར་འཐེན་མཇུག་བསྡོམས་རྒྱག་རྒྱུ་ཡིན་ཟེར།
དེ་རིང་ཕྱི་དྲོའི་ཆུ་ཚོད་ ༢ སྟེང་། དྷ་ས་ནོར་བུ་གསོལ་མགྲོན་ཁང་གི་ཚོགས་ཁང་དུ། ཁྲིམས་ཀྱི་བྱ་རའི་སྐད་འཕྲིན་ཚོགས་པའི་སྐུ་ཚབ་དྷ་སར་གནས་སྡོད་བཀྲ་ཤིས་དབྱངས་འཛོམས་ལགས་དང་གྲྭ་དཀོན་མཆོག་དཔལ་བཟང་ལགས་གཉིས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། ད་ལོའི་སྲིད་སྐྱོང་གི་འོས་བསྡུའི་ལས་རིམ་ཁྲོད། ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་མཆོག་དང་། དབུས་འོས་བསྡུ་ལྷན་ཁང་གཉིས་འོས་བསྡུའི་སྒྲིག་གཞི་དང་འགལ་ཡོད་སྐོར་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུག་བྱས་ཡོད་པའི་གནད་དོན་དེ་ཡོངས་གྲགས་ཕྱིར་འཐེན་དང་མཇུག་བསྡོམས་བྱས་པ་ཡིན་སྐོར་བརྗོད་སོང་།
ཁོང་གཉིས་ཀྱིས་ཡིག་ཐོག་གི་གསལ་བསྒྲགས་ཤིག་སྒྲོག་སྦྱངས་གནང་བའི་ནང་། ཁ་མཆུ་ཕྱིར་འཐེན་བྱེད་དགོས་པའི་རྒྱུ་མཚན་གཉིས་བཀོད་ཡོད་པ་ནི། གཅིག ཐེངས་འདིའི་ཁ་མཆུའི་གནད་དོན་དང་འབྲེལ་བའི་ཐོག་༧གོང་ས་སྐྱབས་མགོན་ཆེན་པོ་མཆོག་ལ་སྙན་གསན་ཕུལ་ཞིང་༧གོང་ས་མཆོག་གིས་ཐུགས་བརྩེ་བ་ཆེན་པོས་མི་མང་དང་བླངས་ལས་འགུལ་བའི་འཐུས་མི་གསུམ་ལ་མཇལ་བཅར་སྐལ་བཟང་གི་དབུངས་དབྱུང་གོ་སྐབས་བསྩལ་བ་དང་། འདི་ལོའི་འོས་བསྡུ་དང་འབྲེལ་བའི་ཐོག་ཐུགས་ཕམ་བྱུང་ཚུལ་གྱི་བཀའ་སློབ་ཇི་སྙིད་ཅིག་ཕེབས་པ་དང་ལྷན། ཐེངས་འདིའི་ང་ཚོའི་ལས་འགུལ་ལ་ཐུགས་མཉེས་པོས་བཀའ་སློབ་བཀའ་དྲིན་ཆེ་བ་ཕེབས་གསལ། ཁྱེད་རང་ཚོས་ཕུལ་བའི་སྙན་ཞུ་ངས་མཐོང་བྱུང་། དེ་འདྲ་ཡིན་སྟབས་དེ་རིང་ཁྱེད་ཚོ་ཡར་སྐད་བཏང་བ་ཡིན། ཁྱེད་རང་ཚོས་འགན་འཁྱེར་ནས་ལས་འགུལ་དེ་ལྟར་སྤེལ་བ་དེ་ཡག་པོ་ཞེ་དྲགས་རེད་ད་དུང་ཡང་སེམས་ཤུགས་ནམ་ཡང་ཆགས་རྒྱུ་མེད། ཁྱེད་རང་ཚོའི་ལས་འགུལ་དེས་མི་མང་ཁྲོད་དུའང་གོ་རྟོགས་གང་ཙམ་སྤེལ་ཐུབ་པ་བྱུང་ཡོད་ལ། གྲོས་ཚོགས་ནང་ལ་ཡང་དོ་སྣང་ཞིག་ཡོང་གི་རེད། འོན་ཀྱང་ད་ཆ་འོས་འཐོབ་མཁན་ནི་ཐོབ་ཟིན་པ་རེད་ལ་མཇུག་བསྒྲིལ་ཟིན་པས་ཁྱེད་རང་ཚོའི་ལས་འགུལ་གྱི་ལེ་ཚན་དེ་ཡང་སྒོ་བརྒྱབ་ན་ཡོང་པོ་འདུག ཅེས་བཀའ་སློབ་ཕེབས་ཡོད་ཚུལ་དང་། གཉིས། ང་ཚོས་ཁ་མཆུ་ཞུ་སྦྱོར་ཕུལ་དུས་ནས་ཆེས་མཐོའི་ཁྲིམས་ཞིབ་ཁང་གི་མཐའ་མའི་ཐག་གཅོད་གང་ཞིག་གནང་ཡང་བརྩི་བཀུར་དང་ལེན་ཞུ་རྒྱུར་ཁས་ལེན་ཞུས་ཡོད་པ་ལྟར། འདི་ལོའི་འོས་བསྡུ་དང་འབྲེལ་བའི་གོང་གསལ་ཁ་མཆུ་ཞུ་སྦྱོར་གྱི་ལས་འགུལ་དེ་བཞིན་མཚམས་འཇོག་ཞུས་པ་ཡིན། དེ་མཚུངས་ཐོག་མར་ཁ་མཆུ་ཞུ་སྦྱོར་བྱས་པའི་གནས་སྐབས་སུ་ཡང་གསར་འགྱུར་བརྒྱུད་ལམ་ནས་མི་མང་ལ་གསལ་བསྒྲགས་ཞུས་ཡོད་ཅིང་། དེ་རིང་སླར་ཡང་གསར་འགོད་པ་ཚོ་བརྒྱུད་ནས་མི་མང་ལ་གསལ་བསྒྲགས་ཞུ་དགོས་པ་གལ་ཆེར་མཐོང་གི་ཡོད། སླད་ཀྱང་ང་ཚོ་བོད་མི་ཡིན་ནོ་ཅོག་གིས་ཕྱོགས་རིས་འཐེན་འཁྱེར་སྐམ་པོས་བཅིངས་ཏེ་ཆེན་པོ་གང་འགྲོ་མི་ཤེས་པར་ཆུང་ཆུང་བློས་ཀྱིས་ངོ་སྲུང་མེད་པར་ལྷག་བསམ་རྣམ་དག་གིས་དགེ་འདོན་སྐྱོན་སེལ་གྱིས་ཡག་ཐོག་ཡག་བརྩེགས་ཡོང་བ་ལ་སྨན་པའི་འགན་འཁུར་མཉམ་ལེན་མུ་མཐུད་གནང་རོགས་ཞེས་སེམས་གཏིང་ནས་འབོད་སྐུལ་ཞུ་རྒྱུ་ཡིན། ཞེས་འཁོད་འདུག
བཀྲ་ཤིས་དབྱངས་འཛོམས་ལགས་དང་གྲྭ་དཀོན་མཆོག་དཔལ་བཟང་ལགས་གཉིས་དང་དྲི་བ་དྲིས་ལན་སྐབས་ཁོང་གཉིས་བརྗོད་དོན། སྤྱིར་བཏང་ད་ལོའི་སྲིད་སྐྱོང་འོས་བསྡུའི་སྐབས་ལ་སྲིད་སྐྱོང་འོས་མི་བློ་བཟང་སེང་གེའི་དཔྱ་དངུལ་ལག་དེབ་སྟེང་ “སློབ་བཟང་སངས་རྒྱས།” ཞེས་འཁོད་ཡོད་པ་དང་། དབུས་འོས་བསྡུ་ལས་ཁང་གི་གསལ་བསྒྲགས་ཡིག་ཆ་ཁག་དང་འོས་བསྡུའི་འགེངས་ཤོག་སོགས་ཀྱི་ནང་ལ། སྲིད་སྐྱོང་འོས་མི་གཅིག་གི་མིང་ལ་བློ་བཟང་སེང་གེ་དང་། གཞན་དེའི་མིང་ལ་སྤེན་པ་ཚེ་རིང་ཡིན་ཞེས་བཀོད་ཡོད་པ་ལྟར། མང་ཚོགས་ཀྱིས་ཀྱང་བློ་བཟང་སེང་གེ་མཚན་ཐོག་ལ་འོས་བླུགས་ཡོད་ཀྱང་། རྗེས་ལ་དབུས་འོས་བསྡུ་ལྷན་ཁང་གིས་སློབ་བཟང་སངས་རྒྱས་སྲིད་སྐྱོང་དུ་མཚན་འདོན་གནང་བ་མ་ཟད། སློབ་བཟང་སངས་རྒྱས་ཁོ་རང་གིས་ཀྱང་སྡུགས་པ་མིག་བཙུམས་བྱས་པ་དེ་དབུས་འོས་བསྡུ་ལྷན་ཁང་དང་སློབ་བཟང་སངས་རྒྱས་གཉིས་ཀ་འོས་བསྡུའི་སྒྲིག་གཞིར་འགལ་ཡོད་པ་མ་ཟད། རྙོག་གླེང་དེའི་བར་གསེང་ནས་དཔྱ་དངུལ་ལག་དེབ་བཟོ་བཅོས་བཏང་བ་སོགས་ཀྱི་ནག་ཉེས་ཟེར་ན་འདྲ་ནོར་འཁྲུལ་དེ་དག་རང་འཇགས་གནས་ཡོད་སྐོར་སོགས་བརྗོད་སོང་།
ད་དུང་ཁོང་གཉིས་མུ་མཐུད་བརྗོད་པར། ཁྲིམས་ཀྱི་བྱ་རའི་སྐད་འཕྲིན་ཚོགས་པའི་ཚོགས་མི་ཚོས་དམངས་གཙོའི་ཆ་ཤས་བླངས་ཏེ། གཡོ་ཟོལ་མེད་པར་བདེན་དོན་བསྐྱངས་ཏེ་ཁྲིམས་འགལ་གྱི་གནད་དོན་དེ་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་ལ་ཞུ་གཏུགས་བྱས་ཀྱང་། ཐོག་མར་ཁོ་རང་གཉིས་ལ་ཁྲིམས་ཀྱི་བྱ་རིམ་བསྒྲུབ་པའི་ཉམས་མྱོང་མེད་པའི་ཁར། ཆེས་མཐོའི་ཁྲིམས་ཞིབ་ཁང་གིས་ཀྱང་ཁོང་གཉིས་ལ་དགོས་ངེས་ཀྱི་མཐུན་འགྱུར་ཞུས་མ་སོང་བ་མ་ཟད། བོད་ཀྱི་ཁྲིམས་ལུགས་རིག་པ་བའི་ཚོགས་པ་ཟེར་བ་དེ་དག་གིས་ཀྱང་ཁོང་ཚོར་ཁྲིམས་རྩོད་རོགས་རམ་བྱེད་པའི་ཚབ་ཏུ་བོད་མིའི་སྒྲིག་འཛུགས་དང་སྲིད་སྐྱོང་གི་ཚབ་བྱས་ཏེ་གསར་འགོད་གསལ་བསྒྲགས་སྤེལ་བ་སོགས་ནི་ཁྲིམས་མེད་ལུགས་མེད་ཀྱི་གནས་ཚུལ་ཡིན་ཡང་། ད་ཆར་ཁྲིམས་ཀྱི་བྱ་རའི་སྐད་འཕྲིན་ཚོགས་པའི་ངོས་ནས་༧གོང་ས་མཆོག་གི་བཀའ་སློབ་དང་བཙན་བྱོལ་སྤྱི་ཚོགས་ཆུང་ཆུང་འདིའི་ལྷིང་འཇགས་ལ་བསམ་བློ་བཏང་སྟེ། གུ་ཡངས་དཀྱིལ་ཆེའི་ཐོག་ནས་ད་སྔའི་གནས་ཚུལ་ཆེ་ཕྲ་ཡོངས་རྫོགས་རྩིས་མེད་བཏང་སྟེ་ལས་རིམ་མཇུག་སྒྲིལ་བཞིན་ཡོད་སྐོར་བརྗོད་སོང་།
མཇུག་ཏུ་གསར་འགོད་པས་ཁོང་ཚོའི་གསལ་བསྒྲགས་ནང་༧གོང་ས་མཆོག་ལ་མཇལ་ཁ་ཞུས་སྐོར་ཞིག་འཁོད་ཡོད་པ་དེའི་སྐོར་དྲིས་པར། ཨ་ཅག་བཀྲ་ཤིས་དབྱངས་འཛོམས་ལགས་ཀྱིས། ང་ཚོས་༧གོང་ས་མཆོག་ལ་ང་ཚོར་བདེན་པ་ཡོད་ཀྱང་བདེན་པར་བདག་པོ་རྒྱག་མཁན་མེད་པའི་སྐོར་གྱི་སྙན་ཞུ་ཞིག་ཕུལ་བ་ཡིན། སྐབས་དེར་ང་ཚོའི་སྐད་འཕྲིན་ཚོགས་པའི་ཚོགས་གཙོ་བདེ་སྐྱིད་ལགས་ཀྱང་ཆེད་དུ་སུད་སི་ནས་དྷ་རམ་ས་ལར་ཕེབས་བསྡད་ཡོད་པ་རེད། ཕྱི་ཟླ་ ༦ ཚེས་ ༣ ཉིན་གྱི་སྔ་དྲོར་གློ་བུར་དུ་ང་ཚོ་༧གོང་ས་མཆོག་ལ་མཇལ་ཁར་སྐད་བཏང་སོང་། སྐབས་དེར་བདེ་སྐྱིད་ལགས་དང་སྐུ་ཞོགས་ང་ཚོ་གསུམ་བཅར་བ་ཡིན། སྐུ་མདུན་ཞེ་དྲགས་ཐུགས་གྱེས་པའི་ངང་ནས་ཁྱེད་རང་ཚོའི་སྙན་ཞུ་དེ་ངས་བཀླགས་ཡིན། ད་འོས་བསྡུའི་ལས་རིམ་ཡོངས་སུ་མཇུག་རྫོགས་པ་རེད། ཁྱེད་རང་ཚོའི་ Chapter དེའང་མཇུག་རྫོགས་ན་བཟང་གི་རེད། ཡིན་ནའང་གྲུབ་འབྲས་འཐོན་མ་སོང་སྙམ་ནས་སེམས་ཤུགས་ཆག་དགོས་ཡག་ཡོད་པ་མ་རེད། དམངས་གཙོའི་འགྲོ་ལུགས་ཐོག་ནས་ཞེ་དྲགས་ཡག་པོ་རེད། ང་རང་ཡང་གནས་ཚུལ་ཁ་ཤས་ཐོག་བློ་ཕམ་བྱུང་སོང་། དེ་ངས་ཁོ་རང་ལ་བཤད་པ་ཡིན། ཡིན་ནའང་ཁྱོད་རང་ཚོས་ཕྱོགས་ཆེ་སར་བསམ་བློ་གཏོང་རྒྱུ་གལ་ཆེན་པོ་རེད། མའོ་ཙེ་ཏུང་གིས་བསམ་ཕོད་པ། བཤད་ཕོད་པ། བསྒྲུབ་ཕོད་པ་ཞིག་དགོས་པ་རེད་ཅེས་བཤད་པ་དེས་རྒྱ་ནག་ནང་ཁུལ་ལ་རྙོག་དྲ་ཞེས་དྲགས་བྱུང་བ་རེད། ང་ཚོ་བཙན་བྱོལ་སྤྱི་ཚོགས་ཆུང་ཆུང་ཡིན་དུས་གནས་ཚུལ་སྤྱི་ཡོངས་ལ་བསམ་བློ་གཏོང་རྒྱུ་ཞེ་དྲགས་གལ་ཆེན་པོ་རེད། ཅེས་སྐུ་མདུན་གྱིས་གསུངས་པ་དེས་ང་ཚོ་ཧ་ཅང་བློ་བདེ་བོ་བྱུང་སོང་། ཕྱི་ཉིན་དེ་ག་རང་ལ་ཞུ་གཏུག་ལས་འགུལ་དེ་མཚམས་འཇོག་རྒྱུ་ཡིན་ཞེས་ལབ་པ་ཡིན། ཡིན་ནའང་རྗེས་ལ་ང་ཚོས་གྲོས་བསྡུར་བྱས་ཏེ་གསར་འགོད་གསལ་བསྒྲགས་ཤིག་མ་སྤེལ་ན་མང་ཚོགས་ཀྱིས་དཀར་པོ་ནག་པོ་དང་བདེན་རྫུན་གྱི་དབྱེ་བ་འབྱེད་དཀའ་སྟབས། ང་ཚོས་དེ་རིང་ལས་འགུལ་དེ་མཚམས་འཇོག་དགོས་པའི་རྒྱུ་མཚན་རྒྱབ་ལྗངས་ཞུ་བཞིན་ཡོད། ཅེས་སོགས་བརྗོད་སོང་།
གསར་འགོད་པ། པདྨ་རྒྱལ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
འབྲེལ་བ་མེད་པར་འབྲེལ་བ་ཡོད་པ་འདྲ་འདོག་བཟོ་མཁན་དེ་ཚོ་བོད་པའི་སྤྱི་ཚོགས་ནང་གི་རྐང་པ་འཐེན་མཁན་རེད་དེ་ཚོ་མེད་ན་སྤྱི་ཚོགས་ལ་འཆམ་འདུན་ཚུགས་
བསྟན་འཛིན་ཚེ་འཚོ། མི་མང་རྣམས་ལ་དོན་དངོས་ཐོག་སྙིང་རྗེ་དགོས་པ་ཞིག་རེད། མི་སེར་དཀྱུས་མ་ཞིག་ལ་དགོས་ངེས་ཀྱི་ཡིག་ཆ་ཞིག་བསྒྱུར་བཅོས་གཏོང་དགོས་ཚེ་ཉིན་ནས་ཟླ་དང་། ཟླ་ནས་ལོ་འགོར་འགྲོ་བས་སྲིད་སྐྱོང་གི་མིང་ནོར་འགྲིག་གང་བྱས་ཀྱང་ཆོག་ལ། བསྒྱུར་བཅོས་གཏོང་དགོས་ཚེ་ཉིན་གཅིག་ནང་ཚང་མ་འགྲུབ་འགྲོ་བ་ཞིག་ཡིན་པས། དོན་གནད་འདི་འདྲ་ཞིག་ལ་བསམ་བློ་བཏང་ཚེ་ང་ཚོ་བཙན་བྱོལ་བའི་བོད་མི་གང་རུང་ཞིག་ལ་འདི་ལྟ་བུའི་དཀའ་ངལ་ཞིག་འཕྲད་ན། ཉ་ཉོག་གང་ཡང་བཤད་མི་དགོས་པར་ཡ་ལན་དང་དོ་ཁུར་གནང་རོགས་གནང་།
དེ་ནི་བདེན་མོད་ཀྱང་། དག་ཆ་ནོར་བ་བཙན་བྱོལ་གཞུང་ནང་མང་དག་གཅིག་ཡོད།
གནའ་སྔོན་མ་ནས་ནོར་བ་མུ་མཐུད་གནས་པའང་བགྲང་ཡང་བགྲང་མི་ཐུབ་པ་ཆགས་ཡོད།
རང་དབང་བདེན་པའི་ལས་འགུལ་བའི་དྲུང་ཡིག་གིས་མིང་ནོར་བར་བྲིས་པ་རྩིས་ན་བང་ཁྲི་ཆུང་ལ་མི་གཤོང་བ་ཆགས་སྲིད།
མཚམས་འཇོག་གནང་བ་དེ་ཡག་པོ་རེད། ཁ་མཆུ་མཐར་བསྐྱལ་ན་སྐྱེལ་རྒྱུ་ཡོད་པ་རེད། ཁྲིམས་འགལ་བདེན་དབང་མིག་ལ་སྟོན་རྒྱུ་དང་ལག་པ་འཆིང་རྒྱུ་ཡོད་པ་རེད། ཡིན་ནའང་བཟང་སྤྱོད་དང་སྲིད་སྐྱོང་ལ་བརྩི་གུར་ཞུས་པ་དང་ཧ་ཅང་དམངས་གཙོའི་འགྲོ་ལུགས་དང་མཐུན་པ་ཞིག་རེད་རྣམས་པ་ཚང་མ་ལ་ཐུགས་རྗེ་ཆེ་ཞུ་བཞིན་ཡོད།
ཁྲིམས་གཏུགས་ཁུང་མ་འཁྱོལ་ནས་ཕྱིར་འཐེན་བྱས་པ་ཡིན་ཟེར། ཧ་ཧ་ཧ་་་
རེད་རེད་་་ཁྲིམས་ཀྱི་བྱ་བའི་ཁྲིམས་གཏུགས་ལས་རིམ་ཞིག་བཟུང་བ་ཡག་པར་མཐོང་ལ་རྗེས་སུ་སྤྱི་ཚོགས་སྤྱིའི་བདེ་རྩར་བཟུང་ནས་རང་རེའི་མང་གཙོའི་ལམ་པུ་ཤུགས་རྐྱེན་ཙམ་འདེགས་ཙམ་བྱུང་བ་དགའ་བྱུང་་་
ཁྲིམས་གཏུགས་པའི་གཞི་རྩ་མེད་པ་དང། བཅའ་ཁྲིམས་མགོ་མ་ཚོད་པར་ཁྲིམས་གཏུགས་བྱས། དེ་བཞིན་དཔང་རྟགས་ཡིག་ཆ་ཡང་མེད་པར།་གཞན་གྱི་བསླུ་ཁྲིད་འོག་ཁྲིམས་ལ་གཏུགས། ད་དུང་ཁྲིམས་གཏུགས་མཚམས་འཇོག་བྱས་པ་ཡིན་ཟེར། ཧ་ཧ་ཧ་
དྲང་བདེན་གྱི་འཐབ་རྩོད་བྱས་པ་ལ་དགའ་བསུ་ཡོད། རེད་དེ་”ཧམ་པ་ཅན་གྱི་ཧམ་ཡ་མ་ལོན་ན། བདེན་པ་ཅན་ངུ་ཤོར་”ཞེས་པ་ལྟར་རང་ཅག་ལ་ད་དུང་ངན་གོམས་སུ་གྱུར་བའི་གོམས་གཤིས་ཤིག་ཡོད་ཙང་། སྡིགས་པ་མིག་རྩུམ་ཅན་དེ་དག་སྐབས་ཕྲལ་དུ་ལམ་འགྲོ་བྱུང་ཡང་། ལས་འབྲས་ལ་བསླུ་བ་མེད་ན་རྒྱུ་འབྲས་ཤིག་ངོ་མ་འཁོར་ངེས། ད་་་་ནི་རྟ་རྒྱུགས་ཟིན་རྡུལ་ཡལ་ཟིན་པས་རྒྱལ་བའི་དགོངས་པ་བཞིན་རེ་ཞིག་ངང་འཐེན་བྱས་པ་བཟང་ངོ་།
ཁྲིསམ་གཏུགས་འདི་མཚམས་འཇོག་བྱས་པ་ཐུགས་རྗེ་ཆེ། མང་གཙོའི་སྤྱི་ཚོགས་ནང་ནས་གུ་ཡངས་བྱེད་དགོས་ས་ལ་གུ་ཡངས་གཏོང་ཐུབ་དགོས་རེད། ༧གོང་ས་སྐྱབས་མགོན་ཆེན་པོ་མཆོག་གི་བཀའ་བརྩིས་པ་དེ་ཧ་ཅང་ཡག་པོ་རེད་ཐུགས་རྗེ་ཆེ་ཞུ་རྒྱུ་ཡིན། ང་རང་ཁྲིམས་ཀྱི་བྱ་རའི་སྐད་འཕྲིན་ཚོགས་པའི་ནང་གི་ཚོགས་མི་ཞིག་ཡིན། སྐུ་མདུན་ལ་མཇལ་ཁར་བཅར་བའི་རྗེས་ལ་ད་དུང་མི་ཁ་ཤས་ཀྱིས་ཁ་མཆུ་མུ་མཐུད་མཐར་སྐྱེལ་དགོས་ཚུལ་དང་། སྲིད་སྐྱོང་མཆོག་ལ་གསལ་བཤད་གནང་དུ་འཇུག་དགོས་པའི་རྩོད་པ་མང་པོ་རྒྱག་གི་འདུག་པ་དེ་དག་བཟང་སྤྱོད་དང་མང་གཙོའི་འགྲོ་ལུགས་དང་མཐུན་པ་ཞིག་མ་རེད་དོ་་
བསམ་ངན་སྦྱོར་རྩུབ་ཀྱི་ལས་ངན་འདི་འདྲ་སྤེལ་ན་མཐའ་མའི་གྲུབ་འབྲས་འདི་རེད། གྲུབ་འབྲས་དང་རེ་བ་མེད་དུས་༸གོང་ས་མཆོག་ལ་ལག་པ་ཕྱི་ས་བཟོས་ཏེ་འཚམས་འཇོག་བྱེད་ཀྱི་ཡོད་མདོག་བསྟན། ཁྱེད་ཅག་གི་ཁ་ནང་སྐྱག་པ་བླུག
དྲང་བདེན་ལ་བདག་པོ་མི་འདུག བློ་བཟང་སེང་གེའི་རང་བཙན་ལག་དེབ་བཟོ་བཅོས་བཏང་ཚར་བ་ཞིག་གོ་སོང་། མང་ཚོགས་ཀྱིས་རང་བཙན་ལག་དེབ་བཟོ་བཅོས་དང་ནོར་བཅོས་རིགས་ལོ་དང་ཟླ་བ་བསྡུད་ནས་དཀའ་ལས་བརྒྱབ་སྟེ་འགྲོ་སོང་བཏང་ཡང་བསྒྱུར་བཅོས་གཏོང་ཐུབ་ཀྱི་ཡོད་པ་མ་རེད། སྲིད་སྐྱོང་གི་ཁྲིམས་འགལ་ལུགས་འགལ་གྱི་རང་བཙན་ལག་དེབ་བདུན་ཕྲག་གཅིག་གཉིས་ནང་བཟོ་བཅོས་བཏང་བ་དེ་སུ་ཞིག་གི་དབང་སྤྱོད་འོག་ནས་དེ་ལྟ་བུའི་ཁྲིམས་ལུགས་ཤིག་བཟོས་པ་རེད། དངོས་གནས་དྲང་གནས་མང་ཚོགས་སྙིང་མ་རྗེ།།