གཅན་ཚ་རྫོང་མི་རིགས་སློབ་འབྲིང་གཉིས་པའི་བོད་རིགས་སློབ་མ་ཡོངས་ནས་སློབ་གྲྭར་སྙན་ཞུ་ཕུལ་ཏེ་སློབ་འབྲིང་དེའི་ནང་རྒྱ་རིགས་དགེ་རྒན་ཇེ་མང་ནས་ཇེ་མང་དུ་འགྲོ་བཞིན་པས་འཛིན་གྲྭ་ཆེད་འཛུགས་ཀྱིས་ཁོང་ཚོར་བོད་ཡིག་བོད་སྐད་སྦྱོང་དུ་འཇུག་དགོས་པའི་རེ་བ་བཏོན་འདུག
རྒྱ་ནག་གཞུང་གིས་བྱིས་གཉོར་ཁང་ནས་བཟུང་བོད་ཁུལ་གྱི་སློབ་གྲྭ་ཆེ་འབྲིང་ཆུང་གསུམ་ནང་རྒྱ་ཡིག་རྒྱ་སྐད་གཙོ་གཉེར་བྱེད་པར་ཐབས་ཇུས་སྣ་ཚོགས་བཏོན་ཏེ། རྒྱ་རིགས་དགེ་རྒན་མང་པོ་བོད་ཁུལ་གྱི་སློབ་གྲྭ་ཁག་ཏུ་ལས་བགོས་ཆེད་གཏོང་བྱེད་བཞིན་ཡོད་པ་ལྟར། ཉེ་སྔོན་རྨ་ལྷོ་བོད་རིགས་རང་སྐྱོང་ཁུལ་གཅན་ཚ་རྫོང་མི་རིགས་སློབ་འབྲིང་གཉིས་ པའི་བོད་རིགས་སློབ་མ་ཡོངས་ནས་སློབ་གྲྭར་སྙན་ཞུ་ཕུལ་ཏེ། ཉེ་བའི་ལོ་ཤས་ནས་བཟུང་མི་རིགས་སློབ་འབྲིང་དེའི་ནང་རྒྱ་རིགས་དགེ་རྒན་ཇེ་མང་ནས་ཇེ་མང་དུ་སོང་སྟེ་མི་རིགས་སློབ་འབྲིང་ཞེས་པ་མིང་གི་ལྷག་མ་ཙམ་དུ་གཏོང་ཉེན་ཆེ་བས། མི་རིགས་རང་སྐྱོང་ས་ཁུལ་དུ་མི་རིགས་རང་གི་སྐད་དང་ཡི་གེ་བཀོལ་སྤྱོད་དགོས་པའི་རྒྱལ་ཁབ་ཀྱི་གཏན་འབེབས་སྲིད་བྱུས་ལག་བསྟར་བྱེད་དགོས་པ་མ་ཟད། ད་ཡོད་ཀྱི་རྒྱ་རིགས་དགེ་རྒན་ཚོར་ཆེད་དུ་འཛིན་གྲྭ་བཙུགས་ཏེ་བོད་ཡིག་བོད་སྐད་སྦྱོང་དུ་འཇུག་དགོས་པའི་རེ་བ་བཏོན་ཡོད་པ་དང་། རེ་བ་དེ་མངོན་འགྱུར་མ་བྱུང་བར་དུ་ཞུ་གཏུག་མཚམས་འཇོག་རྒྱུ་མིན་སྐོར་བརྗོད་འདུག
དེ་ཡང་བོད་རིགས་སློབ་མ་ཚོའི་སྙན་ཞུའི་ནང་དུ། ཀྲུང་གོ་གུང་ཁྲན་ཏང་གི་ཡང་དག་པའི་མི་རིགས་རང་སྐྱོང་གི་སྲིད་ཇུས་ཀྱིས་རིགས་སོ་སོའི་མི་རིགས་མངའ་ཁོངས་ཀྱི་བདག་དབང་ལ་སྲུང་སྐྱོབ་དང་མི་རིགས་རང་སྐྱོང་ས་ ཁུལ་ནས་མི་རིགས་རང་གི་སྐད་དང་ཡི་གེ་བཀོལ་ཆོག་པ་དང། མི་རིགས་རང་གི་མངའ་ཁོངས་རང་གིས་བདག་པོར་བརྒྱག་པ། རང་གི་ཡུལ་སྲོལ་གོམས་གཤིས་རྒྱུན་འཛིན་བྱས་ཆོག་པ། ཆོས་ལུགས་དད་མོས་རང་དབང་སོགས་ཀྱི་ཡང་དག་པའི་སྲིད་ཇུས་ཀྱི་མི་རིགས་གྲངས་ཉུང་དང་རྒྱ་རིགས་མི་རིགས་གྲངས་ཉུང་ཕན་ཚུན་གྱི་བར་སྔར་ལས་ལྷག་པའི་ངང་མཐུན་སྒྲིལ་ལ་ཤུགས་སྣོན་བྱས་ཡོད། དེ་བས་རྨ་ལྷོ་བོད་རིགས་རང་སྐྱོང་ཁུལ་ནི་བོད་རིགས་རང་སྐྱོང་ཁུལ་ཞིག་ཡིན་པའི་ ཆ་ནས་དེ་ལ་ཏང་གི་ཡང་དག་པའི་སྲིད་ཇུས་ལག་བལྟར་བྱས་སྟེ། དེའི་མངའ་ཁོངས་བོད་རིགས་ཀྱི་བདག་པོར་བརྒྱག་པ་དང་དེའི་མངའ་ཁོངས་ནས་བོད་རང་གི་སྐད་དང་ཡི་གེ་བཀོལ་དགོས། སྒོས་སུ་གཅན་ཚ་རྫོང་མི་རིགས་སློབ་འབྲིང་གཉིས་པ་ནི་མི་རིགས་སློབ་འབྲིང་ཞིག་ཡིན་པས་སློབ་གྲྭ་འདིའི་ནང་མི་རིགས་རང་གི་སྐད་དང་ཡི་གེ་གཙོ་བོར་འཛིན་དགོས་པ་དེ་སློབ་མ་ཚོས་མ་བཤད་ཀྱང་རང་རིགས་ལ་ཤ་ཞེན་ཆེ་བའི་ཁྱོད་ཚོས་མཁྱེན་ངེས་ཡིན། ཞེས་བརྗོད་འདུག
ཡང་སྙན་ཞུ་ནང་། ཉེ་བའི་ལོ་འདི་དག་གི་ནང། རང་སློབ་གྲྭ་སྟེ་གཅན་ཚ་རྫོང་མི་རིགས་སློབ་འབྲིང་གཉིས་པའི་ནང། རྒྱ་མིའི་དགེ་རྒན་ཇེ་མང་ནས་ཇེ་མང་རེད། སྣང་ཚུལ་འདི་ནི་རྣོ་ངར་གྱི་རལ་ཁྲི་སོ་གཉིས་མ་ཞིག་སྟེ། འདིས་ཕྱོགས་གཅིག་ནས་མི་རིགས་སློབ་འབྲིང་ཞེས་པ་མིང་གི་ལྷག་མ་རུ་གཏོང་ཉེན་ཆེ། ཡང་ཕྱོགས་གཞན་ཞིག་ནས་རྒྱ་ནག་གི་དགེ་རྒན་ཇེ་མང་དུ་ཕྱིན་པ་དེ་ཡིས་སློབ་གྲྭར་དགེ་རྒན་གྱིས་མི་འདང་བའི་གནད་དོན་ཞིག་ཐག་གིས་བཅད་པ་དང་ཡང་ཕྱོགས་གཞན་ཞིག་ནས་ གནད་དོན་ཞིག་བཟོས་པ་རེད། ད་ནི་ངེད་སློབ་མ་ཚོས་གནད་དོན་འདི་ཐག་གཅོད་དགོས་པའི་རེ་བ་ཞུས་པ་ཡིན། རེ་བ་འདི་ནི་སློབ་མ་གཅིག་དང་གཉིས་ཀྱི་རེ་བ་མིན་ལ་འདི་ནི་གཅན་ཚ་རྫོང་མི་རིགས་སློབ་འབྲིང་གཉིས་པའི་བོད་རིགས་སློབ་མ་ཡོངས་ཀྱི་རེ་བ་ཡིན། ང་ཚོས་སློབ་གྲྭ་ལ་རེ་བ་འདི་ལྟར་ཞུ་འདོད་དེ། ང་ཚོ་སློབ་མ་ཡོངས་ནས་སློབ་གྲྭས་དགེ་རྒན་འཚོལ་རྒྱུ་ནི་ཧ་ཅང་དཀའ་ཁག་ཆེ་བའི་ལས་ཞིག་ཡིན་པ་རྒྱུས་ལོན་དང་བསམ་ཤེས་བྱེད་ཐུབ། འོན་ཀྱང། ང་ཚོས་རྒྱུས་ལོན་དང་བསམ་ཤེས་འདི་འདྲ་ཞིག་ལ་བརྟེན་ནས་མི་རིགས་སློབ་འབྲིང་ཞེས་པ་མིང་གི་ལྷག་མ་དང་ཕྱིའི་རྣམ་པ་ཙམ་དུ་འགྱུར་ཏུ་འཇུག་མི་འདོད་ལ་འགྱུར་ ཏུ་འཇུག་ཀྱང་མི་སྲིད། ང་ཚོས་སློབ་གྲྭ་འདིའི་ནང་གི་རྒྱ་མིའི་དགེ་རྒན་ཚང་མ་ཕྱིར་ཕུད་གཏོང་དགོས་པའི་རེ་བ་མི་འདོན་ལ། རྒྱ་མིའི་དགེ་རྒན་སློབ་གྲྭ་འདིའི་ནང་ཡོང་བར་གཏན་འགོག་བྱ་དགོས་པའི་རེ་བའང་མི་འདོན། ང་ཚོ་སློབ་མ་ཡོངས་ནས་རང་སློབ་གྲྭའི་སློབ་གཙོ་གཙོས་པའི་མཐོ་རིམ་མགོ་ཁྲིད་ཡོངས་ཀྱིས་ཀྲུང་གོ་གུང་ཁྲན་ཏང་གི་མི་རིགས་གྲངས་ཉུང་ས་ཁུལ་ནས་མི་རིགས་རང་གི་སྐད་དང་ཡི་གེ་བཀོལ་དགོས་པའི་ཡང་དག་པའི་སྲིད་ཇུས་ལག་བལྟར་བྱས་སྟེ་རང་སློབ་ གྲྭའི་ནང་གི་རྒྱ་རིགས་དགེ་རྒན་ཚང་མར་བོད་སྐད་ཡིག་སྦྱང་སའི་འཛིན་གྲྭ་ཞིག་གཙོ་སྒྲིག་བྱས་ཏེ་ཁོང་ཚོ་ལའང་རང་ཅག་གི་སྐད་ཡིག་སྦྱང་དུ་འཇུག་རྒྱུའི་རེ་བ་ཞུས་པ་ཡིན། རེ་བ་འདི་ཇི་སྲིད་མངོན་འགྱུར་མ་བྱུང་བར་ང་ཚོས་དེ་སྲིད་མཚམས་མི་འཇོག འདི་ནི་ང་ཚོ་མི་རིགས་སོ་སོ་ཐ་དད་ཏུ་བྱས་ནས་མཐུན་སྒྲིལ་ལ་གནོད་པའི་སྐད་ཆ་བཤད་པ་མིན་ལ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་དང་འགལ་བའི་སྐད་ ཆ་བཤད་པའང་མིན། དེ་ལས་ལྡོག་སྟེ། རིགས་སོ་སོའི་མི་རིགས་མཐུན་སྒྲིལ་ཡོང་ཆེད་དང་ཀྲུང་ཧྭ་མི་དམངས་སྤྱི་མཐུན་ རྒྱལ་ཁབ་ཀྱི་ཁྲིམས་ལག་བསྟར་བྱས་པ་ཙམ་ལས་ཆབ་སྲིད་དང་འགལ་བའི་སྐད་ཆ་བཤད་པ་མིན། ཞེས་བརྗོད་འདུག་ལ། མཇུག་ཏུ་མཐོ་འབྲིང་འཛིན་གྲྭ་དང་པོ་ནས་གསུམ་པ་བར་གྱི་འཛིན་གྲྭ་ཁང་བཅུ་ཡི་བོད་རིགས་སློབ་མའི་སྐུ་ཚབ་ ༢༢ ཀྱིས་མིང་རྟགས་བརྒྱབ་འདུག
ཉེ་སྔོན་འདི་གའི་གསར་འགོད་པས་བོད་ནས་གསར་དུ་འབྱོར་བའི་རྔ་བ་ཁུལ་གྱི་དགེ་འདུན་པ་ཞིག་ལ་ཁོའི་ཕ་ཡུལ་ཕྱོགས་ཀྱི་སློབ་གྲྭ་ཁག་གི་ནང་བོད་རིགས་དགེ་རྒན་དང་རྒྱ་རིགས་དགེ་རྒན་གང་མང་བ་ཡོད་དྲིས་པར་ཁོང་གིས། ངའི་ཕ་ཡུལ་གྱི་དགེ་རྒན་མང་ཆེ་བ་རྒྱ་རིགས་རེད། བོད་རིགས་དགེ་རྒན་ཉུང་ཉུང་རེད། རྒྱ་རིགས་དགེ་རྒན་ཚོས་བོད་སྐད་ཤེས་ཀྱི་མི་འདུག སློབ་ཕྲུག་ཚོ་སློབ་གྲྭར་སོང་རྗེས་ངེས་པར་དུ་རྒྱ་ཡིག་རྒྱ་སྐད་སྦྱོང་དགོས་པ་རེད། ཁོར་ཡུག་གི་དབང་གིས་རྒྱ་ཡིག་རྒྱ་སྐད་སྦྱོང་རྒྱུ་ཅུང་སླ་པོ་འདུག ཅེས་བརྗོད་བྱུང་།
འདི་ལོའི་ཕྱི་ཟླ་ ༤ པའི་ནང་རྒྱ་ནག་བུད་མེད་མཉམ་འབྲེལ་དྲ་རྒྱ་ཞེས་པའི་གཞུང་འབྲེལ་དྲ་བའི་ཐོག་ གནས་ཚུལ་སྤེལ་བ་ལྟར་ན། རྒྱ་ནག་གི་རྒྱལ་ས་པེ་ཅིན་སོགས་གྲོང་ཁྱེར་དང་ཞིང་ཆེན་ཁག་ ༡༧ ནས་བོད་རང་སྐྱོང་ལྗོངས་ཀྱི་ནང་ཁྱོན་དགེ་རྒན་ ༧༠༠ ཙམ་ཆེད་གཏོང་བྱས་ཏེ། ལོ་ངོ་ ༣ རིང་བོད་ཁུལ་གྱི་སློབ་གྲྭ་ཁག་གི་ནང་དགེ་རྒན་བྱ་རྒྱུ་ཡིན་པ་དང་། རུ་ཁག་དང་པོའི་དགེ་རྒན་ ༧༦ བོད་དུ་འབྱོར་ཟིན་ཏེ། བོད་ཀྱི་རྒྱལ་ས་ལྷ་སའི་གཙོས་གཞིས་ཀ་རྩེ་དང་ཉིང་ཁྲི། ལྷོ་ཁ། ཆབ་མདོ་བཅས་ཀྱི་སློབ་གྲྭ་ཁག་ཏུ་ལས་ཞུགས་བྱས་ཡོད་སྐོར་བརྗོད་འདུག་ལ། ཉེ་བའི་ལོ་འདི་དག་ནང་བོད་རིགས་མཐར་ཕྱིན་སློབ་མ་མང་པོར་ལས་ཀ་མ་རག་པའི་དཀའ་ངལ་འཕྲད་བཞིན་ཡོད་པར་བརྟེན། ཕྱི་ཕྱོགས་ནས་ཡོང་བའི་ལས་འཚོལ་བ་ཚོར་ལས་ཀའི་གོ་སྐབས་མང་པོ་སྤྲོད་བཞིན་ཡོད་པ་དེར་ཚོད་འཛིན་བྱེད་དགོས་པའི་ཞུ་གཏུག་ལས་འགུལ་ཡང་སྤེལ་དགོས་བྱུང་ཡོད་པ་རེད།
གསར་འགོད་པ། པདྨ་མཚོ།
