ང་མི་གཅིག་པ་ཡིན་སྙམ་པ་མ་གཏོགས་ཏཱ་ལའི་བླ་མ་ཡིན་སྙམ་པའི་བསམ་བློ་གཏོང་གི་མེད།

དེ་རིང་སྔ་དྲོར་ལ་དྭགས་ཁྲིག་སེ་དགོན་དུ་ནང་ཆོས་བགྲོ་གླིང་ཆེན་མོའི་དབྱར་ཆོས་དབུ་འཛུགས་གནང་བའི་སྟེང་༧གོང་ས་མཆོག་གིས་ལ་དྭགས་ཁུལ་གྱི་ཆོས་ལུགས་ཁག་གིས་མཐུན་ལམ་གནང་དགོས་པ་དང་། ལ་དྭགས་སློབ་གྲྭ་ཁག་ཏུ་ནང་པའི་ལྟ་གྲུབ་སློབ་གཉེར་དང་བགྲོ་གླེང་སོགས་ཀྱི་ཐོག་ཤུགས་སྐྱོན་དགོས་པའི་བཀའ་གནང་སོང་།

དེ་རིང་ཞོགས་པའི་ཆུ་ཚོད་ ༩།༠༠ སྟེང་། ལ་དྭགས་རྒྱལ་ས་སླེའི་ཉེ་འཁྲིས་ཀྱི་ཁྲིག་སེ་དགོན་ཚུལ་ཁྲིམས་རྣམ་དག་གླིང་གི་མདུན་ཐང་དུ། དེ་རིང་ཚེས་ ༩ ནས་ ༢༠ བར་གྱི་ལ་དྭགས་དབྱར་ཆོས་ཆེན་མོ་དབུ་འཛུགས་མཛད་སྒོ་ཚོགས་སོང་། མཛད་སྒོའི་སྐུ་མགྲོན་གཙོ་བོར་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག འཇམ་དགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་། གླིང་མཆོག་སྤྲུལ་རིན་པོ་ཆེ། ཁྲིག་སེ་རིན་པོ་ཆེ་མཆོག དེ་བཞིན། ལ་དྭགས་རང་སྐྱོང་ཡར་རྒྱས་ཚོགས་པའི་ཚོགས་གཙོ་བསོད་ནམས་ཟླ་བ་ལགས། ལ་དྭགས་དོན་རྩའི་བློན་པོ་ཚེ་རིང་རྡོ་རྗེ་ལགས། གཞན། ལ་དྭགས་ནང་ཚོགས་དང་ཁ་ཆེའི་ཆོས་དཔོན། དགོན་སྡེ་ཁག་གི་གྲྭ་བཙུན་དང་སེར་སྐྱ་མི་མང་ ༨༠༠༠ ལ་ཉེ་བ་འདུ་འཛོམས་གནང་སོང་།

མཛད་སྒོའི་སྟེང་ཁྲིག་སེ་དགོན་པའི་དགོན་བདག་རྗེ་བཙུན་ངག་དབང་འཇམ་དབྱངས་བྱམས་པ་བསྟན་འཛིན་མཆོག་གིས་མཎ་ཊལ་རྟེན་གསུམ་འདེགས་འབུལ་ཞུས་རྗེས་རྒྱ་གར་དང་བོད་རྒྱལ་ཁབ་ཆེན་པོའི་རྒྱལ་གླུ་དང་། དེའི་རྗེས་ཁྲིག་སེ་ལྷ་སྡེ་མི་སྡེའི་ཡོངས་ནས་༧གོང་ས་མཆོག་གི་སྐུའི་གྱ་སྟོན་དང་བསྟུན་ཏེ་བྱམས་བརྩེའི་གསེར་གྱི་གཟེངས་རྟགས་ཤིག་༧གོང་ས་མཆོག་ལ་ཕུལ་སོང་། ཐེངས་འདིའི་དབྱར་ཆོས་ཆེ་མོའི་སྟེང་བོད་པའི་གདན་ས་ཁག་དང་། ལ་དྭགས་ཁུལ་གྱི་གྲུབ་མཐའ་རིས་མེད་ཀྱི་དགོན་སྡེ་ཁག དེ་བཞིན། སློབ་གྲྭ་ཁག་བཅས་ཀྱི་དགེ་བཤེས་དང་མཁས་པ་ཚོས་ནང་ཆོས་སྐོར་ལ་བགྲོ་གླེང་གནང་རྒྱུ་ཡིན་འདུག

སྐབས་དེར་ཁྲིག་སེ་དགོན་པའི་དགོན་བདག་རྗེ་བཙུན་ངག་དབང་འཇམ་དབྱངས་བྱམས་པ་བསྟན་འཛིན་མཆོག་གིས་ད་ལོའི་དབྱར་ཆོས་ཆེན་མོ་ངོ་སྤྲོད་གནང་བ་ལྟར་ན། དེ་སྔོན་༧གོང་ས་མཆོག་གིས་ལ་དྭགས་སུ་ཆོས་བརྒྱུད་རིས་མེད་ཀྱི་མཁན་སྤྲུལ་དགེ་བཤེས་མང་པོ་གདན་འཛོམས་པའི་ཆོས་ཀྱི་བགྲོ་གླེང་འཚོགས་རྒྱུ་གལ་ཆེན་པོ་ཡིན་ཚུལ་གསུངས་པ་ལྟར། ལོ་བཞིའི་སྒོང་ནས་མཁས་པའི་ནང་ཆོས་བགྲོ་གླེང་དེ་དབུ་འཛུགས་གནང་བ་དང་། ལོ་གསུམ་ཙམ་ནས་དབྱར་ཆོས་ཆེན་མོ་ཞེས་མིང་བཏགས་ཡོད་འདུག

རིན་པོ་ཆེ་མཆོག་གིས་གསུངས་དོན། “༧གོང་ས་མཆོག་ ༡༩༨༤ ལོར་ཁྲིག་སེ་མགོན་པའི་སྐུ་རྟེན་རབ་གནས་གནང་བར་ཕེབས་སྐབས། དོལ་རྒྱལ་མ་བསྟེན་ན་ལེགས་ཚུལ་དང་། དེའི་ཚབ་ཏུ་དཔལ་ལྡན་ལྷ་མོ་བསྟེན་ན་ཕན་རླབས་ཡོད་སྐོར་གསུངས་པ་ལྟར། བཀའ་གསུང་དང་ལེན་ཞུས་ཏེ་དོལ་རྒྱལ་བསྟེན་མཚམས་རྩ་བ་ནས་བཞག་པ་ཡིན། དེའི་རྗེས་ནས་དགོན་སྡེ་འདིའི་དགེ་འདུན་པ་རྣམས་ཐུགས་མཐུན་ཁྲིམས་གཙང་གི་བཀྲ་ཤིས་པའི་དགེ་མཚན་སྔར་མེད་པ་ཞིག་བྱུང་སོང་། མ་འོངས་པར་ཡང་༧གོང་ས་མཆོག་གིས་བཀའ་གང་དང་ཅི་བསྩལ་དང་ལེན་ལག་བསྟར་ཞུ་རྒྱུ་ཡིན་པའི་དམ་བཅའ་ཞུ་བཞིན་ཡོད།” ཅེས་གསུངས་སོང་།

མཇུག་ཏུ་༧གོང་ས་མཆོག་གིས་མི་མང་ལ་གསུངས་བཤད་གནང་དོན། ང་ཚོ་འགྲོ་བ་མི་གཅིག་མཚུངས་ཆགས་ཡོད་པ་རེད། མི་རིགས་དང་ཆོས་ལུགས་མི་འདྲ་བ་ཡོད་ཀྱང་། ང་ཚོ་འདི་ལྟར་འཛོམས་ཡོང་གི་ཡོད་པ་དེ་མི་དང་མིའི་བརྩེ་བ་དང་། གྲོགས་པོའི་འདུ་ཤེས་ཤིག་གི་ཐོག་ནས་འཛོམས་ཡོང་གི་ཡོད་པ་རེད། ང་ཚོ་ཚང་མས་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་གྱུར་རེད། དེར་བརྟེན། སྡུག་བསྔལ་སེལ་ནས་བདེ་བ་བསྒྲུབ་རྒྱུའི་ལས་འགན་དང་ཐོབ་ཐང་ང་ཚོ་ཚང་མར་ཡོད་པ་རེད། གཞི་བརྟེན་དེའི་ཐོག་ནས་ང་ཚོ་མི་དང་མི་ཕན་ཚུན་བར་བརྩེ་བ་ཡོང་གི་ཡོད་པ་རེད།

འཛམ་གླིང་འདིའི་ཐོག་མིས་བཟོས་པའི་དཀའ་ངལ་མང་པོ་ཡོད་པ་རེད། དེ་དག་ང་ཚོས་མི་གཅིག་གྱུར་གྱི་འདུ་ཤེས་གལ་ཆེན་པོར་མ་བརྩིས་ཏེ། ནང་གསེས་མི་རིགས་མི་འདྲ་བ་དང་ཆོས་ལུགས་མི་འདྲ་བ། མཚོན་མདོག་མི་འདྲ་བ། རྒྱལ་ཁབ་དང་ལམ་ལུགས་མི་འདྲ་བ། དབུལ་ཕྱུག་མི་འདྲ་བ། ཤེས་ཡོན་ཅན་དང་ཤེས་ཡོན་མེད་མཁན། རིགས་རུས་ཡག་བཙོག་སོགས་གལ་ཆེན་པོར་བརྩིས་པའི་དབང་གིས་རྙོག་དྲ་མང་པོ་ཡོང་གི་ཡོད་པ་རེད། ང་ཚོ་མི་གཅིག་གྱུར་ཡིན་པའི་འདུ་ཤེས་བཟུང་བ་ཡིན་ན་རྙོག་དྲ་དེ་དག་སེལ་ཐུབ་ཀྱི་ཡོད་པ་རེད། ང་འཛམ་གླིང་གི་རྒྱལ་ཁབ་དང་ལུང་པ་འདྲ་མིན་ནང་འགྲོ་བཞིན་ཡོད་པ་དང་མི་འདྲ་མིན་ལ་ཐུག་གི་ཡོད་པ་རེད། གང་ཞིག་ཏུ་ཕྱིན་ན། སུ་ཞིག་ལ་ཐུག་ན། ང་མི་གཅིག་པ་ཡིན་བསམ་པའི་ཀུན་སློང་འཁྱེར་གྱི་ཡོད་མ་གཏོགས་ང་ནང་པ་ཡིན། ང་བོད་པ་ཡིན། ང་སྐྱབས་མགོན་ཏཱ་ལའི་བླ་མ་ཡིན་བསམ་པ་ཁྱོན་ནས་བསམ་བློ་གཏོང་གི་མེད། མི་གཅིག་པ་ཡིན་བསམ་པའི་ཐོག་ནས་སྐད་ཆ་བཤད་ནས་འགྲོ་བཞིན་ཡོད།

ད་ལྟ་འཛམ་གླིང་གི་རང་བྱུང་འབྱུང་བའི་གནོད་པ་ཆེ་རུ་འགྲོ་བཞིན་འདུག་ལ། མ་འོངས་པར་ཡང་ད་དུང་ཆེ་རུ་འགྲོ་རྒྱུ་རེད། རང་བྱུང་འབྱུང་བའི་གནོད་པ་དེ་ཙམ་ཞིག་ཡོད་བཞིན་པའི་སྟེང་ལ། ད་དུང་མིས་དང་དུ་བླངས་པའི་ཐོག་ནས་རྙོག་དྲ་སྣ་ཚོགས་བཟོས་ན་ཕན་ཐོགས་ག་རེ་འདུག མི་དུད་འགྲོ་བཞིན་བསམ་བློ་མེད་ན་གནས་ཚུལ་ཐ་དད་རེད། དུད་འགྲོ་ལྟར་མིན་པར་འཕྲལ་ཕུགས་རྒྱང་གསུམ་གྱི་བསམ་བློ་འཁོར་མཁན་ཞིག་ཡིན་ན། ད་ནི་ང་ཚོ་མིས་བཟོས་པའི་རྙོག་དྲ་མི་ཡོང་བ་ཞིག་བྱེད་དགོས་སྙམ་པའི་བསམ་བློ་ཚང་མས་གཏོང་དགོས་པ་རེད། འཛམ་གླིང་སྤྱི་ལ་ཕན་པ་དང་སྐྱིད་པོ་ཡོང་དགོས་པར་འདོད་ན། ཐོག་མ་སོ་སོའི་ཉེ་འཁོར་ལ་འཆམ་པོ་མཐུན་པོ་དང་། སོ་སོའི་ཉེ་འཁོར་ལ་བདེན་པ་དང་དྲང་མོ། ཞི་བདེ་བག་ཕེབས་ཡོང་བ་ཞིག་བཟོས་དང་། དེ་ནས་ཁྱིམ་མཚེས་དང་སྤྱི་ཚོགས། ཡུལ་ལུང་དང་རྒྱལ་ཁབ་བྱས་ཏེ་འཛམ་གླིང་སྤྱི་ལ་ཞི་བདེ་ཡོང་གི་རེད།

འཛམ་གླིང་ཐོག་ཐབས་སྐྱོ་བ་ཞིག་ལ། རྙོག་དྲ་འབྱུང་ས་ཞིག་ཆོས་དད་མི་འདྲ་བའི་ཐོག་ནས་ཡོང་གི་འདུག དེ་ཧ་ཅང་སེམས་སྐྱོ་དགོས་པ་ཞིག་རེད། བྱམས་པ་དང་བརྩེ་བའི་བསླབ་བྱའི་འབྱུང་ཁུངས་སུ་བརྩི་བའི་ཆོས་བརྒྱུད་དེ་ཆགས་སྡང་འཕེལ་བའི་གཞི་རྩ་ཞིག་ཆགས་པ་ཡིན་ན་སྨན་དུག་ཏུ་གྱུར་པ་དང་གཅིག་པ་རེད། ངས་འདས་པའི་ལོ་མང་རིང་ཆོས་ལུགས་མཐུན་བསྒྲིལ་ཐོག་འབད་བརྩོན་བྱེད་ཀྱིན་ཡོད། དེས་ཕན་ཐོགས་གང་ལ་གང་འཚམ་ཡོང་གི་ཡོད་པ་ཞིག་མཐོང་སོང་། ངས་ཆོས་ལུགས་ཚང་མར་བརྩི་བཀུར་ཞུ་བཞིན་ཡོད། ཆོས་ལུགས་ཚང་མས་མི་ལ་ཕན་ཐོགས་ཀྱི་ཡོད་པ་རེད། ལྟ་གྲུབ་མི་འདྲ་བ་ཡིན་ཡང་བྱམས་པ་དང་བརྩེ་བའི་བསླབ་བྱ་དེས་མི་ལ་ཕན་ཐོགས་ཀྱི་ཡོད་པ་རེད། ཐེངས་ཤིག་ངས་ཨོ་སི་ཊོ་ལི་ཡར་སྐད་ཆ་བཤད་སྐབས། ཡེ་ཤེས་བླ་མ་ཞིག་གིས་ང་ངོ་སྤྲོད་གང་སྐབས། ང་ཡེ་ཤེས་པ་ཡག་པོ་ཞིག་ལ་བརྩི་བཞིན་ཡོད་གསུངས་སོང་། རྗེས་ལ་ངས་སྐད་ཆ་བཤད་སྐབས་ཁོ་རང་ནང་པ་ཡག་པོ་ཞིག་ལ་ངོས་འཛིན་བཞིན་ཡོད་ཞུས་པ་ཡིན། གང་ལྟར་ང་ཚོའི་ཉམས་ལེན་གཅིག་པ་ཆགས་ཀྱི་ཡོད་པ་རེད། ལ་དྭགས་ལ་མཚོན་ན་ནང་པ་དང་། ཁ་ཆེའི་བར་འབྲེལ་བ་ཡག་པོ་འདུག ཁ་ཆེའི་ནང་ལོགས་སུའང་ཤི་ཡཱ་དང་སོའོ་ནེ་འབྲེལ་བ་ཡག་པོ་ཡོད་པ་ཞིག་མཐོང་སོང་། དེ་འཛམ་གླིང་སྤྱི་ལ་མིག་དཔེ་སྟོན་ཐུབ་པའི་ནོར་བུ་རེད། དེ་ལ་བདག་པོ་ཡག་པོ་རྒྱག་རོགས། ག་ལེར་ནོར་བུའི་འོད་ཟེར་འཕྲོས་ཏེ་རྒྱ་གར་ཡོངས་དང་། དེ་ནས་འཛམ་གླིང་ཡོངས་ལ་ཁྱབ་ཐུབ་པ་བྱ་རྒྱུ་ང་ཚོ་ཚང་མའི་ལས་འགན་རེད། ཁྱེད་རང་ཚོས་ལ་དྭགས་གཅིག་པུར་བསམ་བློ་བཏང་ནས་མི་སྡོད་པར་བསམ་བློ་རྒྱ་ཆེན་པོ་གཏོང་རོགས།

སློབ་དཔོན་དབྱུག་གཉེན་གྱིས་སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱས་པ་སྨྲ་བྱེད་པ། །སྒྲུབ་པར་བྱེད་པ་ཁོ་ཡིན། ། ཞེས་གསུངས་ཡོད་པ་རེད། སངས་རྒྱས་བསྟན་པ་ཟེར་བ་དེ་ལྷ་ཁང་རྫིག་པོ་དང་སྐུ་རྫིག་པོའི་སྐད་ཆ་མ་རེད། ཐོས་བསམ་སློབ་གཉེར་ཡག་པོ་བྱས་ཏེ་ནང་གཤིས་རྒྱུད་ཡག་པོ་ཡོད་པ་དེ་ལུང་གི་བསྟན་པ་རེད། དེ་ལག་ལེན་དང་ཉམས་ལེན་བྱས་ནས་ལུས་ངག་ཡིད་གསུམ་གྱི་སྤྱོད་ལམ་ཞི་ཞིང་དུལ་བ་དེ་འདྲ་ཞིག་ལ་རྟོགས་པའི་བསྟན་པ་ཟེར་ཆོག་གི་རེད། མང་པོ་ཞིག་གིས་སངས་རྒྱས་བསྟན་པ་རྒྱས་བར་ཤོག་ཟེར་གྱི་ཡོད་ཀྱང་། བསྟན་པ་ངོ་མ་གང་ཡིན་པ་ངོས་ཟིན་གྱི་མི་འདུག

དེ་རིང་འདིར་ས་གནས་ལ་དྭགས་ཀྱི་ཆབ་སྲིད་མི་སྣ་དང་། ཁ་ཆེ་ཤི་ཡཱ་དང་སོའོ་ནེ་ཆོས་ལུགས་མི་སྣ་ཚོས་ཁ་ཙམ་མ་ཡིན་པར་སེམས་པའི་གཏིང་ནས་ཚོར་བ་ཡོད་པའི་ཐོག་ནས་གསུང་བཤད་གནང་བྱུང་། ཐུགས་རྗེ་ཆེ་ཞུ་རྒྱུ་ཡིན། དེ་བཞིན། ཁྲི་ཆེན་རིན་པོ་ཆེ་མཆོག་གི་མདུན་ནས་ངས་གསུང་ཆོས་མང་པོ་ཞུས་པ་རེད། དགེ་སློང་འདུལ་བ་འཛིན་པ་མཁས་གྲུབ་གཉིས་ལྡན་བསམ་གྱིས་མི་ཁྱབ་པ་རེད། ཐུགས་རྗེ་ཆེ་ཞུ་རྒྱུ་ཡིན།

སྔོན་མ་བཀའ་གདམ་པའི་དགེ་བཤེས་མངོན་ཤེས་ཡོད་མཁན་ཞིག་དགོན་པ་ཞིག་ཏུ་མཆོད་མཇལ་ལ་ཕེབས་སྐབས། དགོན་པ་དེའི་ནང་གི་དགེ་བཤེས་ཤིག་ཞལ་མར་གཟིགས་ཏེ་བསྡད་ཡོད་པའི་རྒྱུད་དུ་སྐྱབས་འགྲོ་རྣམ་དག་ཅིག་མེད་པ་མངོན་ཤེས་ཀྱིས་གཟིགས་པ་རེད། དེ་ནས་དགེ་བཤེས་དེས། གནད་དོན་གཞན་ཕར་ཞོག་ད་དུང་ནང་པ་སངས་རྒྱས་པའི་གྲས་སུ་མ་ཚུད་པའང་གཅིག་འདུག་ཨང་གསུངས་པ་རེད། དེ་བཞིན། ང་ལ་མངོན་ཤེས་མེད་པ་སྟབས་ཡག་པ་རེད་མ་གཏོགས། ང་ལ་མངོན་ཤེས་ཡོད་ན། དེ་རིང་འདིར་ཁྱེད་རང་ཚོའི་ནང་དུའང་ཁ་ཤས་ལ་ཞུས་དང་མ་ཞུས་མི་འདུག་གསུང་དགོས་ཐུག་མི་སྲིད་པ་མ་རེད། སྐུ་རྩེད་དང་སྦྲགས།

མདོར་བསྡུས་ན། ལུང་གི་བསྟན་པ་བསླབ་པ་གསུམ། རྟོགས་པའི་བསྟན་པ་སྡེ་སྣོད་གསུམ་རེད། སྡེ་སྣོད་གསུམ་ལ་སློབ་སྦྱོང་བྱས་ཏེ་བསླབ་པ་གསུམ་གྱི་ཉམས་ལེན་ཇི་ལྟར་བྱ་དགོས་པ་ཤེས་པར་བྱས་ན་ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་ཀྱིན་ཡོད་པ་རེད། དེར་བརྟེན། ཁྱེད་རང་ཚོ་ལ་དྭགས་པ་ཚོས་ནང་ཆོས་ལ་སློབ་སྦྱོང་བྱ་རྒྱུ་ཤིན་ཏུ་གལ་ཆེན་པོ་རེད། སྐྱབས་སུ་མཆི། ཕྱག་འཚལ་ལོ་ལབ་བསྡད་པས་ཕན་གྱི་མ་རེད།

མ་འོངས་པའི་མི་རབས་གསར་པ་དེ་སངས་རྒྱས་པའི་ཆོས་ལུགས་ཀྱི་གཞི་ལམ་འབྲས་གསུམ་གྱི་རྣམ་བཞག་ཆ་ཚང་ཤེས་པའི་ཐོག་ནས་ཤེས་རབ་ཀྱི་གྲོགས་དང་བཅས་པའི་དད་པ་དང་། ཤེས་རབ་ཀྱི་གྲོགས་དང་བཅས་པའི་སྙིང་རྗེ་ཡོད་མཁན་གྱི་སྤྱི་ཚོགས་ཤིག་ཡོང་རྒྱུར་འབད་བརྩོན་བྱེད་དགོས་པ་རེད། དེ་ལ་གསུང་ཆོས་ཚར་གཅིག་ཉན་པས་ཕན་གྱི་མ་རེད། སློབ་གྲྭའི་ནང་དུ་སློབ་སྦྱོང་བྱེད་དགོས་པ་རེད།

དེ་སྔ་བོད་པ་བཙན་བྱོལ་བའི་སློབ་གྲྭ་ཁག་གི་ནང་ཆོས་དགེ་རྒན་ལ་ཆོས་དགེ་ཞུ་བཞིན་འདུག བར་སྐབས་ཤིག་ལ་ངས་མིང་དེ་ལ་འགྱུར་བ་ཞིག་བཏང་སྟེ། ལྟ་གྲུབ་སློབ་དཔོན་ལབ་ན་གང་འདྲ་འདུག་ཞུས་པ་ཡིན། སངས་རྒྱས་པའི་ཆོས་སློབ་ཁྲིད་བྱེད་སྐབས་ལྟ་གྲུབ་དང་འབྲེལ་ནས་བཤད་དགོས་པ་རེད། སྤྱོད་པ་འཚེ་བ་མེད་པ་ཆོས་ལུགས་ཚང་མའི་ནང་ཡོད་པ་རེད། ལྟ་བ་རྟེན་འབྱུང་གི་ཐོག་ནས་ཐུན་མོང་མ་ཡིན་པའི་སངས་རྒྱས་ཀྱི་ཆོས་དེ་ངོ་སྤྲོད་དགོས། ལྟ་བ་རྟེན་འབྱུང་ལས་བདག་མེད་པ་བཤད་ཀྱི་ཡོད། དེ་ལ་བྱེ་བྲག་སྨྲ་བ་དང་མདོ་སྡེ་བ། སེམས་ཙམ་པ། དབུ་མ་བ་ཞེས་བདག་མེད་པའི་གོ་བ་ཕྲ་ནས་ཕྲ་རུ་འགྲོ་བཞིན་ཡོད་པ་རེད། དེར་བརྟེན། སློབ་གྲྭ་ཁག་ཏུ་ནང་ཆོས་སློབ་ཁྲིད་བྱེད་མཁན་དེ་ལྟ་གྲུབ་སློབ་མཁན་ཆགས་ཡོད་པ་རེད། ངས་དེ་ལྟར་ཤེས་རིག་ལས་ཁུངས་ལ་བསམ་འཆར་ཞུས་ཏེ། རྗེས་ལ་ཁོ་རང་ཚོས་དེ་ཡག་པོ་འདུག་གསུངས་ཏེ། ད་ལྟ་ང་ཚོས་ལྟ་གྲུབ་སློབ་དཔོན་ཟེར་གྱི་ཡོད། ཁྱེད་རང་ལ་དྭགས་པ་ཚོས་ཀྱང་སློབ་གྲྭ་ཁག་ནང་ཞལ་འདོན་སློབ་བསྡད་པ་དེ་འདྲ་མ་ཡིན་པར། ནང་ཆོས་ངོ་སྤྲོད་གནང་བའི་ཐོག་ནས་གཞི་ལམ་འབྲས་གསུམ་གྱི་རྣམ་བཞག་དེ་རིགས་པའི་ལམ་ནས་བཤད་དགོས།

ལ་དྭགས་དབྱར་ཆོས་ཆེན་མོ་ ༢༠༡༤ ལོར་ཀླུ་འཁྱིལ་དགོན་པ་དང་། ༢༠༡༥ ལོར་སྤུས་ཐུབ་དགོན་པ། ད་ལོར་ཁྲིག་སེ་དགོན་པ་བཅས་སུ་བཙུགས་ཡོད་འདུག

ལ་དྭགས་རྒྱལ་ས་སླེ་ནས་གསར་འགོད་པ་དོན་འགྲུབ་བཀྲ་ཤིས་ཀྱིས་སྤེལ།