ཐེངས་འདིའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐོག་སྲིད་སྤྱི་གཉིས་ཀྱི་འོས་བསྡུའི་སྒྲིག་གཞི་བསྐྱར་བཅོས་ཐད་ཚོགས་བཅར་བ་ཚོས་བསམ་ཚུལ་དོན་ཚན་ ༩ བཏོན་འདུག
བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༦ པའི་ལས་ཉིན་གཉིས་པའི་ཐོག བཙན་བྱོལ་བོད་མིའི་སྲིད་སྤྱིའི་འོས་བསྡུའི་སྒྲིག་གཞི་དང་ལས་དོན་ཁག་ཚུད། བོད་མིའི་ཆིག་སྒྲིལ་ལ་ཕུགས་རྒྱང་པོའི་ཕན་ཐོགས་ཡོང་ཆེད། ཚོགས་བཅར་བ་རྣམས་ཚོགས་ཆུང་སོ་སོར་ཆ་བགོས་ཀྱིས་འོས་བསྡུའི་སྒྲིག་གཞིའི་སྐོར་ལ་བགྲོ་གླེང་གྲོས་སྡུར་གནང་བ་བརྒྱུད་བསམ་ཚུལ་ཕྱོགས་བསྡོམས་བྱས་འདུག
བསམ་ཚུལ་དོན་ཚན་ ༩ བསྡུས་པའི་དང་པོ་ནི། ད་ཡོད་ཆོལ་ཁ་གསུམ་གྱི་སྤྱི་འཐུས་གྲངས་ཚད་བཅུ་རེ་ཡོད་པ་རང་གནས་ཐོག སྤྱི་འཐུས་ཀྱི་ཡོང་ཁུངས་དེ་བཞིན་རྒྱ་བལ་འབྲུག་གསུམ་ནང་ས་གནས་མི་འབོར་ལ་གཞིགས་ཏེ་ས་ཁུལ་ཆེན་པོ་ཁག་འགའ་ཞིག་ལ་ཆ་བགོས་ཀྱིས། ས་ཁུལ་སོ་སོའི་ཐོབ་ཁོངས་ཀྱི་ཆོལ་གསུམ་སྤྱི་འཐུས་རྣམས་ལ་ཆོལ་ཁའི་དབྱེ་མཚམས་མེད་པར་མི་མང་ཚང་མས་འོས་ཤོག་འཕེན་ནས་འོས་འདེམས་གནང་ན་ཕྱོགས་མང་པོ་ནས་དགེ་མཚན་ཤིན་ཏུ་ཆེ་བར་མཐོང་།
གཉིས་པ། སྤྱི་འཐུས་ཚོགས་གཙོ་དང་ཚོགས་གཞོན་འོས་འདེམས་སྐབས་སྤྱི་འཐུས་རྒྱུན་ལས་ནང་འོས་ཤོག་གསུམ་འཕངས་ཀྱང་ཐག་ཆོད་མ་བྱུང་ཚེ། ཇི་ལྟར་ཐག་གཅོད་དགོས་མིན་གྱི་སྒྲིག་གཞི་ཁ་གསལ་དགོས་གལ་མཐོང་།
གསུམ་པ། འོས་གཞི་འདོན་ཕྱོགས་དེ་བཞིན་ཆོལ་ཁ་དང་ལུང་ཚན་གྱི་དབྱེ་མཚམས་མེད་པའི་ཚོགས་པ་ཁག་ཁོ་ནས་བཏོན་ན་དགེ་མཚན་ཆེ་ཞིང་སྐྱོན་ཆ་ཉུང་བ་ཡོང་ངེས་ལགས་ན་དེ་དོན་གནང་གལ་ཆེ་བར་མཐོང་།
བཞི་པ། སྲིད་སྐྱོང་དང་སྤྱི་འཐུས་ཀྱི་འོས་བསྡུ་དུས་གཅིག་ཏུ་མ་ཡིན་པར་འོས་བསྡུ་གཉིས་ཀྱི་དབར་དུས་ཚོད་བར་མཚམས་དགོས་གལ་མཐོང་།
ལྔ་པ། སྔོན་འགྲོའི་འོས་བསྡུ་དང་དངོས་གཞིའི་འོས་བསྡུའི་དབར་དུས་ཡུན་ཐུང་དུ་གཏོང་དགོས་གལ།
དྲུག་པ། སྲིད་སྐྱོང་གི་སྔོན་འགྲོའི་འོས་བསྡུ་མ་གནང་གོང་དངོས་གཞིའི་འོས་མི་གྲངས་ཚད་ག་ཚོད་འཇོག་མིན་ངེས་པར་དགོས་གལ། བདུན་པ། སེར་སྐྱ་སུ་ཡིན་རུང་འོས་བསྡུའི་ཐོབ་ཐང་འདྲ་མཉམ་གྱིས་འོས་གཅིག་རེ་ལས་བླུག་མ་ཆོག་པའི་སྒྲིག་གཞི་བཟོ་དགོས་རྒྱུ་གལ་ཆེར་མཐོང་།
བརྒྱད་པ། འོས་བསྡུའི་ཟླ་ཚེས་དེ་བཞིན་ས་གནས་མི་མང་ས་གནས་སུ་བཞུགས་པའི་དུས་ཚོད་གང་ལེགས་ཤིག་ལ་དགོས་པ་ལས། ས་གནས་ལ་བོད་མི་བཞུགས་མཁན་ཉུང་བའི་དུས་ཚོད་ལ་མི་ཁེལ་བ་བྱས་ན་དགེ་མཚན་ཆེ་བར་མཐོང་།
དགུ་བ། སྲིད་སྐྱོང་ཁྱབ་བསྒྲགས་སྐབས་ཀྱི་འགྲོ་གྲོན་རྣམས་ངེས་པར་དུ་ཁ་གསལ་དགོས་རྒྱུ་གལ་ཆེན་དུ་མཐོང་བ་བཅས་རེད།
གསར་འགོད་པ། པདྨ་མཚོ།
