༄༅།།༧གོང་ས་ཏཱ་ལའི་བླ་མ་མཆོག་གིས་ཡུ་རོབ་ཏུ་ཚན་རིག་པ་དང་བགྲོ་གླེང་གནང་བ།
—— དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལྟ་བ་གསར་བའི་སྐོར་གླེང་བ།
(ཏེང་དབྱི་ཧྥུས་བརྩམས། རྔ་བ་ཚེ་རྒྱམ་གྱིས་བསྒྱུར།)
དེ་རིང་ནི་༧གོང་ས་ཏཱ་ལའི་བླ་མ་མཆོག་གིས་བྷེལ་ཇམ་གྱི་རྒྱལ་ས་པཱར་སེལ་དུ་ཚན་རིག་པ་དང་མཉམ་དུ་༼སེམས་དང་སྲོག་༽གི་བགྲོ་གླེང་གི་ཉིན་གཉིས་པ་རེད། དེ་རིང་ཕྱི་དྲོའི་བགྲོ་གླེང་ཐོག ༧གོང་ས་མཆོག་དང་དཔལ་འབྱོར་རིག་པའི་མཁས་པ་དང་། སྤྱི་ཚོགས་ལས་འགུལ་པ་མཉམ་འཛམ་གླིང་གི་དཔལ་འབྱོར་དང་འཕེལ་རྒྱས་ཀྱི་གནད་དོན་སྐོར་ལ་རྒྱ་ཆེ་ཞིང་གཏིང་ཟབ་པའི་བགྲོ་གླེང་གནང་།
དེ་རིང་ཕྱི་དྲོའི་བགྲོ་གླེང་གཙོ་སྐྱོང་བ་ནི། འཇར་མན་གྱི་དཔལ་འབྱོར་རིག་པའི་འབུམ་རམས་པ་ཧེའུ་སེ་(UweJean Heuse) ཡིན་ལ། ཁོང་གིས་འཇར་མན་གྱི་པོ་ཨིན་དང་ཨ་རིའི་པིར་ཁི་ལིས་ནས་དཔལ་འབྱོར་རིག་པ་སྦྱང་ཞིང་། ཁོང་ནི་འཇར་མན་དུ་སྐད་གྲགས་ཆེ་བའི་དཔལ་འབྱོར་དུས་དེབ་ཀྱི་གསར་འགོད་པ་དང་རྩོམ་པ་པོ་ཞིག་ཡིན་ལ། དེ་སྔ་གཟེངས་རྟགས་ཀྱང་མང་པོ་ཐོབ་མྱོང་ཡོད། དེ་རིང་གི་བགྲོ་གླེང་ཐོག་ཁོང་གིས་དཔལ་འབྱོར་རིག་པའི་མཁས་པ་འབུམ་རམས་པ་ Dennis Snower དང་། བུམ་རམས་པ་ Paul Collier གཉིས་མཚམས་སྦྱོར་བྱས་ཤིང་། ཁོང་གཉིས་ཡུ་རོབ་ཏུ་མཚན་སྙན་ཧ་ཅང་ཆེ་བའི་དཔལ་འབྱོར་རིག་པའི་མཁས་པ་གཉིས་རེད།
འབུམ་རམ་པ་ Snower ནས་སྙན་སྒྲོན་ཞུས་དོན་ལ། དེང་དུས་གཙོ་རྒྱུན་དཔལ་འབྱོར་རིག་པ་ནི་འགྲོ་བ་མིའི་སྤྱི་ཚོགས་ཀྱི་ལོ་རྒྱུས་སྟེང་གང་ལ་གང་འཚམ་གྱི་རིག་གཞུང་གསར་བ་ཞིག་ཡིན་པ་དང་། དུས་རབས་བཅུ་དགུའི་ཡར་སྔོན་དུ། མི་རྣམས་ཀྱིས་དཔལ་འབྱོར་རིག་པ་ནི་འགྲོ་བ་མིའི་རིགས་ཀྱིས་བདེ་སྐྱིད་ཇི་ལྟར་བསྐྲུན་ཐབས་ཀྱི་རིག་པ་ཞིག་ལ་ངོས་འཛིན་བྱེད་ཅིང་། དེང་རབས་བཟོ་ལས་སྤྱི་ཚོགས་ཀྱི་ཡར་རྒྱས་དང་རྒྱུ་འབྱོར་དར་འཕེལ་བྱུང་བར་བརྒྱུད་དེ། དཔལ་འབྱོར་རིག་པ་ནི་རྒྱུ་འབྱོར་སྐོར་གྱི་རིག་གཞུང་ཞིག་ཏུ་ཆགས་ཡོད། གཙོ་རྒྱུན་དཔལ་འབྱོར་རིག་པའི་ཁྲོད། མི་རྣམས་དཔལ་འབྱོར་གྱི་མིར་ཆགས་ཤིང་། དཔལ་འབྱོར་གྱི་མིའི་ཀུན་སློང་ནི་སྒེར་གྱི་ཁེ་ཕན་ལེན་རྒྱུ་དེ་རེད། ཁྲོམ་རའི་“མཐོང་མི་ཐུབ་པའི་ལག་པ་” དེའི་ནུས་པ་ལ་བརྟེན་ནས། རང་གི་ཁེ་ཕན་ཆེ་ཤོས་ལེན་པའི་རང་འདོད་ཚ་བའི་དཔལ་འབྱོར་གྱི་མིས། ཁྲོམ་རའི་སྒྲིག་སྲོལ་ལྟར་མཉམ་འབྲེལ་བྱེད་ཅིང་། འདི་ལྟ་བུའི་མཉམ་འབྲེལ་གྱིས་ཁྲོམ་རར་མཉམ་ཞུགས་བྱས་པའི་དཔལ་འབྱོར་གྱི་མི་ལ་ཁེ་ཕན་ཐོབ་པ་དང་། དེས་སྤྱི་ཚོགས་དབུལ་ཕོང་ལས་ཐར་བར་ཕན་ཐོགས་ཆེན་པོ་ཡོད་པར་ངོས་འཛིན་བྱེད། འདི་ལྟ་བུའི་ངོས་འཛིན་ནི། གཙོ་རྒྱུན་དཔལ་འབྱོར་རིག་པའི་གཞི་རྩའི་ལྟ་བ་ཡིན་པར་བཤད།
འབུམ་རམས་པ་ཁོང་ནི་སྤྲོ་སེམས་ལྡན་པའི་གཙོ་རྒྱུན་དཔལ་འབྱོར་རིག་པའི་མཁས་པ་ཞིག་ཡིན་མོད། འོན་ཀྱང་། ཉེ་བའི་ལོ་འགའི་ནང་། ཁོང་གིས་འཛམ་གླིང་གི་དཔལ་འབྱོར་ཉམས་རྒུད་དང་། ཁྲོམ་ར་ལ་སྤྱི་ཚོགས་ཀྱི་དཀའ་རྙོག་ཚབས་ཆེན་དག་སེལ་བའི་ནུས་པ་བྲལ་བ་མཐོང་སྟེ། ཁོང་གི་ལྟ་བ་ལ་འགྱུར་བ་ཆེན་པོ་བྱུང་། ཁྲོམ་ར་དང་དཔལ་འབྱོར་གྱི་མི་ལ་ཡིད་ཆེས་བྱེད་མཁན་ཞིག་ནས། དཔལ་འབྱོར་ཀུན་སློང་སྣ་མང་ཅན་ལ་ཞིབ་འཇུག་བྱེད་མཁན་ཞིག་ཏུ་གྱུར་ཏེ། འགྲོ་བ་མིས་ཕན་ཚུན་སེམས་ཁུར་གྱི་སྒོ་ནས་མཉམ་འབྲེལ་བྱེད་པའི་དཔལ་འབྱོར་ལྟ་གྲུབ་གསར་བ་བཏོན། ཁོང་ནས། མི་རྣམས་ཀྱི་དངོས་ཡོད་འཚོ་བའི་ནང་གི་དཔལ་འབྱོར་བྱ་འགུལ་ཁྲོད་ཀྱི་འདམ་ཀ་ནི་ཀུན་སློང་འདྲ་མིན་ལས་བྱུང་ཞིང་། རང་གི་ཁེ་ཕན་དོན་དུ་གཉེར་བ་ལས་གཞན། གཉེན་དང་ཉེ་འབྲེལ་གྱི་འབྲེལ་བའི་རྒྱུ་རྐྱེན་དང་། ད་དུང་བཟང་སྤྱོད་ཀྱི་ལྟ་བ། ཕར་གཏོང་དང་ཚུར་ལེན། མཚན་མཐོང་དང་རྒྱུ་མཚན་སོགས། འདི་དག་ཚང་མ་དཔལ་འབྱོར་མཉམ་འབྲེལ་ཡོང་བའི་རྐྱེན་གལ་ཆེན་ཞིག་ཡིན་པ་དང་། དཔལ་འབྱོར་མཉམ་འབྲེལ་ཁྲོད། མི་གཞན་ལ་ཕན་སེམས་ཀྱི་འདུ་ཤེས་འཛིན་མཁན་གྱིས་མཉམ་འབྲེལ་ནང་བྱས་རྗེས་འཇོག་འདོད་ཆེ་བ་དང་། ཁོང་ཁྲོའི་ངང་གནས་པའི་མི་ལ་བྱས་རྗེས་འཇོག་འདོད་ཧ་ཅང་ཆུང་ཞེས་བརྗོད་སོང་།
འབུམ་རམས་པ་ Paul Collier ནས་ཀྱང་། གཙོ་རྒྱུན་དཔལ་འབྱོར་རིག་པས་ཁྲོམ་རའི་ནུས་ཤུགས་དང་། “མཐོང་མི་ཐུབ་པའི་ལག་པ་” ལ་བརྟེན་པའི་ལྟ་ཚུལ་ལ་སྐྱོན་བརྗོད་བྱས། ཁོང་གིས་ཁྲོམ་ར་ནི་འགྲོ་བ་མིའི་སྤྱི་ཚོགས་འཕེལ་རྒྱས་ཁྲོད་ཅུང་ཙམ་ཕྱིས་སུ་བྱུང་བ་དང་། “མཐོང་མི་ཐུབ་པའི་ལག་པས” འགྲོ་བ་མིའི་འབྲེལ་བ་ལ་དབང་བསྒྱུར་མ་བྱས་པའི་ཆེས་ཡར་སྔོན་ནས་བཟུང་། འགྲོ་བ་མིའི་རིགས་ལ་ཕན་ཚུན་འབྲེལ་ལམ་བྱུང་ཡོད་ཅེས་དང་། ཁོང་གིས་ད་དུང་སྲོག་ཆགས་ཀྱི་བྱ་སྤྱོད་རིག་པའི་མཁས་པ་དང་། འགྲོ་བ་མིའི་རིགས་རིག་པའི་མཁས་པ་རྣམས་ཀྱིས་གདོད་མའི་སྤྱི་ཚོགས་ལ་ལྟ་ཞིབ་བྱས་པ་དཔེར་དྲངས་ཏེ། མིའི་རིགས་ཀྱི་ཕྲུ་གུ་མ་འབྱར་ལ་ཨ་མ་དང་ཁྱིམ་མི་ཙམ་མ་ཡིན་པར་མི་གཞན་མང་པོས་ཐུགས་ཁུར་དང་བདག་སྐྱོང་བྱས་སྟབས། བྱིས་པའི་བསམ་བློ་བདེ་ཐང་དང་རྒྱུན་ལྡན་ཆགས་པ་དང་། མི་གཞན་ལ་སེམས་ཁུར་དང་གཞན་ཕན་གྱི་བསམ་བློ་འཕེལ་རྒྱས་བྱུང་། འདི་དག་ནི་ཁྲོམ་ར་མ་བྱུང་བའི་ཆེས་ཡར་སྔོན་ནས་ཡོད་པའི་འགྲོ་བ་མིའི་གཞི་རྩའི་འབྲེལ་བ་ཞིག་ཡིན་པ་དང་། འདི་ལྟ་བུའི་གཞི་རྩའི་འབྲེལ་བའི་ཁྲོད། “མཐོང་མི་ཐུབ་པའི་ལག་པ་” མེད་ལ། དཔལ་འབྱོར་གྱི་མིའི་རྗེས་དཔག་གི་ཁོག་རྩིས་ཀྱང་མེད་ཅེས་དང་།
ཡང་ཁོང་ནས། འགྲོ་བ་མིའི་སྤྱི་ཚོགས་ལ་ལྟ་ཞིབ་དང་བསམ་གཞིགས་བྱས་ན་གསལ་བོ་ཆགས་ཐུབ་པ་ཞིག་ནི། མིའི་གཞི་རྩའི་འབྲེལ་བ་དང་། མིའི་ལྷན་སྐྱེས་ཀྱི་རང་བཞིན་ནི། ཕན་ཚུན་སེམས་ཁུར་བྱེད་པ་དེ་ཡིན་ལ། དེའི་ཕྱིར། འདི་ལྟ་བུའི་ལྷན་སྐྱེས་ཀྱི་རང་བཞིན་ཐོག་ཕྱིར་ལྡོག་བྱེད་རྒྱུ་ནི། དཔལ་འབྱོར་རིག་པའི་ལྟ་བ་གསར་བ་རེད་ཅེས་དང་། དཔལ་འབྱོར་རིག་པ་ནི་ནུས་པ་ཤུགས་ཆེན་ཡོད་པའི་རིག་པའི་གཞུང་ལུགས་ཤིག་ཡིན་པས། ཕན་ཚུན་ཐུགས་ཁུར་རམ་གཟིགས་སྐྱོང་གི་རྨང་གཞིའི་ཐོག་ཏུ་བསྐྲུན་པའི་དཔལ་འབྱོར་མཉམ་འབྲེལ་གྱི་ལྟ་བ་ནི། དེང་དུས་འཛམ་གླིང་དཔལ་འབྱོར་གྱི་སྐྱོན་གནས་ལ་གདོང་ལེན་བྱེད་པའི་ཐབས་ལམ་ཞིག་ཡིན་སྲེད་ཅེས་མཇུག་བསྡོམས་གནང་།
དཔལ་འབྱོར་རིག་པའི་མཁས་པ་གཉིས་ཀྱིས་ཏཱ་ལའི་བླ་མར་དགོངས་ཚུལ་ཞུས་ཤིང་། ༧གོང་ས་མཆོག་ནས་ངའི་དཔལ་འབྱོར་རིག་པའི་ཤེས་བྱ་ཀླད་ཀོར་རམ་སྟོང་པ་ཡིན། འོན་ཀྱང་དཔལ་འབྱོར་རིག་པ་ཧ་ཅང་གལ་ཆེན་པོ་ཡིན་པ་ངས་ཤེས་ཀྱི་ཡོད་ཅེས་དང་། དེང་རབས་འཛམ་གླིང་ནང་དབུལ་ཕྱུག་གི་ཧེ་བག་ཤིན་ཏུ་ཆེན་པོ་ཡིན་པ་ཁོང་ལ་སྔ་མོ་ནས་ཐུགས་སྣང་བྱུང་ཞིང་། ཁོང་གིས་གསུངས་དོན་ལ། ཕྱུག་པོ་རྣམས་ཇེ་ཕྱུག་དང་། དབུལ་པོ་རྣམས་ཇེ་དབུལ་གྱུར་བའི་ཧེ་བག་ཆེན་པོ་འདི། ཡ་རབས་སྤྱོད་བཟང་དང་མི་མཐུན་པའི་ནོར་འཁྲུལ་ཞིག་རེད་ཅེས་གསུངས་ཤིང་། ཁོང་གིས་དེ་སྔ་ཐེངས་མང་པོ་གསུངས་མྱོང་བའི་གཏམ་བསྐྱར་ཟློས་གནང་དོན་ལ། སྤྱི་ཚོགས་དང་དཔལ་འབྱོར་གྱི་གཞུང་ལུགས་ཕྱོགས་ནས་ངོས་རང་སྤྱི་ཚོགས་རིང་ལུགས་པ་ཞིག་ཡིན་པ་དང་། དེ་བཞིན། མཱར་ཁེ་སིའི་དཔལ་འབྱོར་རིག་པས་འགྲོ་བ་མིའི་རིགས་ཀྱི་འདྲ་མཉམ་གྱི་ཕུགས་འདུན་དོན་དུ་གཉེར་བའི་ཕྱོགས་ནས། ངོས་རང་མཱར་ཁེ་སི་རང་ལུགས་པ་ཞིག་ཀྱང་ཡིན་ལ། རྒྱུ་མཚན་ནི་འདྲ་མཉམ་གྱི་ཕུགས་བསམ་ལྡན་པས་ཡིན། འོན་ཀྱང་། ༧གོང་ས་མཆོག་ནས་བསྐྱར་དུ་ཁོང་གིས་དྲག་སྤྱོད་ལ་ངོ་རྒོལ་ནན་པོ་བྱེད་ཀྱི་ཡོད་སྟབས། ལེ་ཉིན་རིང་ལུགས་ལ་ངོ་རྒོལ་གསལ་བོ་ཡོད་པར་གསུངས།
༧གོང་ས་མཆོག་གིས་སླར་ཡང་གསུངས་དོན། ལོ་མང་སྔོན་ཁོང་གདན་ཞུས་ལྟར་ཅེག་སི་ལོ་ཧྥ་ཁེ་ལ་འཚམས་གཟིགས་སུ་འབྱོར་སྐབས། སྤྱི་ཚོགས་རིང་ལུགས་ཀྱི་རྒྱལ་ཁབ་ཚང་མའི་དཔལ་འབྱོར་ཡར་རྒྱས་མེད་པར་རང་གནས་སུ་ལྷག་བསྡད་ཡོད་པའི་གནས་སྟངས་དང་། སྤྱི་ཚོགས་རིང་ལུགས་ཀྱི་དཔལ་འབྱོར་མང་ཉུང་ལ་མ་ལྟོས་པའི་ཡོངས་ཁྱབ་ཕམ་ཉེས་བྱུང་བར་དོ་སྣང་བྱུང་། དེའི་ཕྱིར། ཁོང་ནས། དཔལ་འབྱོར་རིག་པས་འགྲོ་བ་མིའི་རིགས་ཀྱི་དཔལ་འབྱོར་འགུལ་སྐྱོད་ཁྲོད་ཀྱི་མཉམ་འབྲེལ་ཀྱི་ཀུན་སློང་ལ་རྟོག་ཞིབ་དང་། དཔལ་འབྱོར་འདྲ་མཉམ་ལ་དོན་གཉེར་བྱས་ཏེ། རྒྱུ་རྐྱེན་འདྲ་མིན་གྱི་ནང་དུ་ཆ་སྙོམས་ཀྱིས་བསམ་གཞིགས་བྱེད་དགོས་པའི་དགོངས་འཆར་གནང་།
དཔལ་འབྱོར་རིག་པའི་བརྗོད་གཞི་ཚར་རྗེས། སྤྱི་ཚོགས་ཁྱབ་ཁོངས་ཀྱི་བརྗོད་གཞི་དང་། ལྷག་པར་དུ་བུད་མེད་ཀྱི་ནུས་པ་དང་ཐོབ་ཐང་སྐོར་གླེང་སློང་། TheoSowa ནི་ནུབ་ཨ་ཧྥི་རི་ཀའི་རྒྱལ་ཁབ་གྷ་ནཱ་རུ་སྐྱེས་པའི་བུད་མེད་གསར་འགོད་པ་གྲགས་ཅན་དང་། སྤྱི་ཚོགས་ལས་འགུལ་པ་ཞིག་ཀྱང་རེད། ཁོ་མོས་༧གོང་ས་མཆོག་ལ་ཨ་ཧྥི་རི་ཀའི་བུད་མེད་ཀྱི་ནུས་པ་དང་དེ་དག་ལ་འཕྲད་པའི་དཀའ་ངལ་སྐོར་སྙན་སྒྲོན་ཞུས། ༧གོང་ས་མཆོག་ནས་ཁོང་གིས་བུད་མེད་ཀྱི་ཐོབ་ཐང་དང་། ཕོ་མོ་འདྲ་མཉམ། བུ་མོའི་སློབ་གསོ་བཅས་ལ་རྒྱབ་སྐྱོར་གནང་གི་ཡོད་པ་གསལ་སྟོན་གནང་བ་དང་། རང་གི་དགེ་རྒན་ཐོག་མ་དེ་ཨ་མ་ལགས་ཡིན་ལ། མ་ཡུམ་ཆེན་མོའི་བྱམས་བརྩེའི་ཞལ་རས་ཀྱིས་དུས་རྟག་ཏུ་ཁོང་གི་སེམས་ལ་དྲོ་སྐྱིད་དང་བྱམས་བརྩེ་སྟེར་ཞེས་དང་། སྤྱི་ཚོགས་ཇི་འདྲ་ཞིག་ཡིན་ན་ཡང་། བུད་མེད་རྣམས་ཀྱིས་གཞན་ལ་སེམས་ཁུར་དང་གཟིགས་སྐྱོང་མང་བ་བྱེད། བུད་མེད་ཀྱི་སེམས་ཁོངས་སུ་བྱམས་བརྩེ་མང་བ་དང་། བུད་མེད་རྣམས་ཞི་བདེ་ལ་བློ་ཁ་མང་དུ་ཕྱོགས། གལ་སྲིད་བུད་མེད་གང་མང་སྲིད་དོན་གྱི་འགན་དབང་ལེན་པའི་སྤྱི་ཚོགས་སུ་ཞུགས་ན། སྤྱི་ཚོགས་སྔར་ལྷག་ཞི་འཇགས་ཡོང་བར་ཡིད་ཆེས་ཡོད་ཅེས་གསུངས། ཡང་ཁོང་གིས་རྩེད་མོ་དང་སྦྲགས་ཏེ་ཉན་མཁན་རྣམས་ལ་གསུངས་དོན། མི་རེ་འགས་ཏཱ་ལའི་བླ་མ་ནི་བུད་མེད་རིང་ལུགས་པ་ཞིག་རེད་ཅེས་བརྗོད་ཅིང་། ཁོང་གིས་དགའ་སྤྲོའི་ངང་མཚན་གནས་དེ་བཞེས་རྒྱུ་ཡིན་ཞེས་གསུངས། ༧གོང་ས་མཆོག་གི་གསུངས་བཤད་གནང་བའི་བར་མཚམས་སུ། མི་མང་གིས་དགའ་བསུའི་ཐལ་མོ་བརྡབས་པའི་ཐལ་སྒྲ་ཡང་ཡང་གྲགས་ཤིང་། ཚོགས་ཁང་ནང་དགའ་སྤྲོའི་རྣམ་པས་ཁེངས།
དེ་རིང་གི་བགྲོ་གླེང་གནང་མཁན་མཐའ་མ་དེ་༧གོང་ས་མཆོག་གི་ཉེ་འགྲམ་དུ་བཞུགས་རྗེས། ཚོགས་ཁང་དུ་སླར་ཡང་ཐལ་སྒྲ་གྲགས་ཏེ་དགའ་བསུ་ཆེན་པོ་བྱས། ཁོང་ནི་ནོ་བྷེལ་ཞི་བདེའི་གཟེངས་རྟགས་བཞེས་མཁན་ལྕམ་ཝི་ལིམ་སི་( Jody Williams) རེད། ལྕམ་ཝི་ལིམ་སི་ནི་འཛམ་གླིང་དུ་སྐད་གྲགས་ཡོད་པའི་སྤྱི་ཚོགས་ལས་འགུལ་བ་ཞིག་ཡིན་ལ། ཁོང་གིས་ས་འོག་འབར་མདེལ་བཀག་སྡོམ་བྱེད་པའི་གཞུང་འབྲེལ་མིན་པའི་མང་ཚོགས་ཀྱི་ལས་འགུལ་སྤེལ་བ་དང་རྩ་འཛུགས་བྱས་རྐྱེན། ནོ་བྷེལ་ཞི་བདེའི་གཟེངས་རྟགས་ཐོབ་པ་རེད། ༧གོང་ས་མཆོག་དང་ཁོང་གཉིས་སྔར་ནས་ངོ་ཤེས་ཤིང་། འཛམ་གླིང་ཞི་བདེ་དོན་དུ་གཉེར་བའི་བྱེད་སྒོ་མང་པོར་མཉམ་ཞུགས་བྱས་མྱོང་བ་མ་ཟད། ཕན་ཚུན་བརྩི་མཐོང་ཆེན་པོ་ཡོད། གྲོགས་པོ་རྙིང་པ་བསྐྱར་དུ་ཐུག་པས་ཧ་ཅང་སྤྲོ་སྣང་ལྡན་ཞིང་། ཁོང་གཉིས་ལ་བསྟན་བཤིག་ཚ་པོའི་ཐུན་མོང་གི་གཤིས་ཀ་ལྡན་པས། ངོ་ཐུག་མ་ཐག་རྩེད་མོ་རྒྱུན་མ་ཆད་པ་དང་བཞད་མོ་ཆེས་ཆེར་བཞད་ཅིང་། ཚོགས་ཁང་ཡང་དགོད་སྒྲས་ཁེངས།
ལྕམ་ཝི་ལིམ་སིས་ནུབ་ཕྱོགས་སྟོབས་ཆེན་རྒྱལ་ཁབ་ཀྱི་སྲིད་གཞུང་ལ་སྐྱོན་བརྗོད་དྲག་པོའི་རྣམ་འགྱུར་བསྟན་པ་དང་། ཆབས་གཅིག་ཁོང་གིས་སྲིད་གཞུང་གི་འགན་འཁྲིའི་སྐོར་ཡང་གསལ་སྟོན་བྱས། ཁོང་གིས་རང་ཉིད་མཉམ་ཞུགས་བྱས་པའི་གཞུང་འབྲེལ་མ་ཡིན་པའི་ཚོགས་པ་ “PeaceJam”ཞེས་པ་དཔེར་དྲངས་ཏེ། དམངས་ཁྲོད་ཀྱི་གཞུང་འབྲེལ་མིན་པའི་ཚོགས་པས། དབང་ཆ་འདྲ་མཉམ་དང་། ནད་ཡམས་སྔོན་འགོག དབུལ་ཕོངས་གཙང་སེལ། འགྲོ་བ་མིའི་ཐོབ་ཐང་འགན་སྲུང་། ཁོར་ཡུག་སྲུང་སྐྱོབ། གོ་མཚོན་ཚོད་འཛིན། དྲག་སྤྱོད་ལ་བག་ཟོན། འཐུང་ཆུ་གཙང་མ་འགན་ལེན་སོགས་ཀྱི་ཕྱོགས་སུ་ནུས་པ་ཐོན་པའི་སྐོར་གསལ་བཤད་གནང་།
ཏཱ་ལའི་བླ་མའི་གསུངས་དོན་ལ། དེང་དུས་འགྲོ་བ་མིའི་སྤྱི་ཚོགས་ལ་འཕྲད་པའི་དཀའ་རྙོག་ནི། མི་དུང་ཕྱུར་བདུན་ཅུ་ཐུན་མོང་གི་དཀའ་རྙོག་ཅིག་ཡིན་ལ། དཀའ་རྙོག་འདི་དག་ནི་མིས་བཟོས་པ་ལས། དཀོན་མཆོག་དང་། སངས་རྒྱས། ཨ་ལཱ་སོགས་ཀྱིས་བཟོས་པ་མིན། དེའི་ཕྱིར་གསོལ་འདེབས་སམ་སྨོན་ལམ་ཁོ་ན་ལ་བརྟེན་ནས་དཀའ་རྙོག་འདི་དག་སེལ་མི་ཐུབ་ལ། མིས་བཟོས་པའི་དཀའ་རྙོག་དེ་མི་རང་ཉིད་ཀྱིས་སེལ་དགོས། ད་ལྟ་འདིར་འཛོམས་པའི་ང་ཚོ་ཚང་མ་དུང་ཕྱུར་བདུན་ཅུའི་ནང་གི་ཆ་ཤས་ཡིན་པས། ང་ཚོ་ཡང་དཀའ་རྙོག་འདི་དག་བཟོ་མཁན་གྱི་གྲས་སུ་ཡོད་ལ། ང་ཚོ་ལའང་གནད་དོན་དེ་དག་ཐག་གཅོད་བྱེད་པར་མཉམ་ཞུགས་དགོས་པའི་འགན་ཁྲི་ཡོད།
དེར་བརྟེན། ང་ཚོ་མི་རེ་ངོ་རེས་བསམ་བློ་གཏོང་དགོས་པ་ཞིག་ནི། འགྲོ་བ་མིའི་རིགས་ཐུན་མོང་གི་དཀའ་རྙོག་ཐག་གཅོད་བྱེད་པའི་ཕྱོགས་སུ། རང་ཉིད་ཀྱིས་ཅི་ཞིག་བསྒྲུབ་ཐུབ་བམ། ཅི་ཞིག་བསྒྲུབ་དགོས་སམ། རང་ཉིད་མི་གཅིག་གི་ནུས་པ་ཧ་ཅང་ཆུང་ཆུང་ཡིན་པར་སྙམ་སྟེ་འབད་བརྩོན་བྱེད་རྒྱུ་བློས་མི་གཏོང་བར། ནུས་པ་ཆུང་ཆུང་ཡིན་པའི་མི་རེ་རེ་མཉམ་འདུས་བྱས་ན། འཛམ་གླིང་འགྱུར་བ་གཏོང་ཐུབ་པ་དང་། འཛམ་གླིང་སྔར་ལས་མཛེས་སྡུག་ལྡན་པར་བསྐྲུན་ཐུབ་བོ།།
མ་རྩོམ་འབྲེལ་ཐག http://www.dalailamaworld.com/topic.php?t=929
