པེ་ཅེན་ནས་མེ་བཏང་ན་དུ་བ་གངས་སྐྱིད་ནས་ཐུལ་གྱི་འདུག

རྡོ་མེ་འབུད།

ངས་དེ་རིང་བོད་ཀྱི་ཁ་དཔེ་སྟེ “ཤ་ཚ་བའི་ཁ་ལ་གཏམ་སྙན་མེད། ནད་ཕན་པའི་སྨན་ལ་མངར་མོ་མེད” ཟེར་བའི་གཏན་ཚིག་གིས་མདུན་དུ་བསུས་ནས། སེམས་གཏམ་དམར་བོའི་མདུང་ཁ་གནམ་ལ་སྐོར་ན། གནམ་གྱི་ལྷ་ཆེན་ལ་ཕོག་རུང་། འོག་གི་ཀླུ་སྲིན་ལ་གནོན་རུང་ངས་རང་གི་སྐད་ཡིག་གི་ཆེད་དུ་སེམས་གཏམ་བརྡོལ་ངེས་ཡིན་ཟེར་བའི་དམ་བཅའ་སྔོན་དུ་སོང་བའོ།།

འུ་ཚོས་ལོ་ངོ་ལྔ་བཅུ་ལྷག་གིས་རིང་ལ་བོད་ཀྱི་སྐད་དང་རིག་གཞུང་སྲུང་སྐྱོབ་ལ་རང་དབང་མི་འདུག་ཟེར་ནས་ཡོད་ཚད་རྒྱ་དམར་ཚང་ལ་ཁག་དཀྲིས་དང་ཞྭ་ནག་གཡོགས་ཞོར་ཕྱི་གླིང་མགོ་སེར་ཚོའི་མདུན་དུ་སྡིགས་སྐད་རེ་བཏོན་ནས་ཉི་མ་བསྐྱལ་ཐབས་ཀྱི་སྦྱོར་བ་འདི་ལ་དངོས་གནས་ངོ་གནོང་དགོས་པའི་ཚོད་དུ་གདའ་མོད། འུ་ཚོའི་ཚོགས་སྤྱི་འདིས་ད་དུང་ཡང་སྐད་ཆ་སྐམ་པོ་རེ་དང་ལོ་རྒྱུས་རྙིང་པ་རེ་ལ་ཤི་འཐམ་རོ་འཐམ་གྱི་ངང་ནས་ཚེ་སྲོག་ཕྲ་མོ་འདའ་བར་བྱེད་པ་མ་གཏོགས་བོད་ཀྱི་སྐད་དང་རིག་གཞུང་སྲུང་སྐྱོབ་ཀྱི་རང་དབང་གང་ནས་བརླགས་འདུག ཚུལ་ཇི་ལྟར་བརླགས་འདུག་ཟེར་སྐད་ཀྱི་འཚོལ་རྟོག་གི་སེམས་གཤིས་མེད་པའི་ན། ནོར་འཁྲུལ་ཡོད་ཚད་གཞན་མགོར་གཡོགས་རྐྱང་གི་འདུ་ཤེས་འདི་དོར་བར་འཕྱི་དྲགས་མེད་ན་སྔ་དྲགས་མི་འདུག་ཟེར་བ་དེ་ཡིན་ནོ།

རྒྱུ་མཚན་ནི། རྒྱ་ནག་དམར་བོའི་དབང་ཤུགས་ཀྱི་ཁྲིམས་ཤིང་དེ་འུ་ཚོ་བཙན་བྱོལ་ཚོགས་སྤྱིའི་གཉའ་སྐེ་རུ་བསླེབས་ནས་སློབ་གྲྭ་ཁག་ནས་བོད་ཡིག་ལས་གཞན་ཕྱི་སྐད་དང་ཕྱི་ཡིག་ཐོག་ནས་སློབ་ཁྲིད་གནང་དགོས་ཟེར་པའི་བཀའ་རྒྱའི་ཁྲིམས་ཤིང་མེད་པ་དང་གཅིག གཞུང་ཞབས་ལས་བྱེད་འདེམས་མིར་ཕྱི་ཡིག་ཤེས་མིན་དང་ཕྱི་ཐོན་ལག་འཁྱེར་ཡོད་མིན་ལ་རྒྱ་ཡི་བཀའ་རྒྱ་མེད་པ་དང་གཉིས། ཕྱི་སྐད་དང་བོད་སྐད་མཉམ་བསྲེས་ཀྱིས་གླེང་མོལ་མེད་ཚེ་སྤྱི་ཚོགས་ཀྱིས་བརྩི་མཐོང་མེད་པའི་རྒྱའི་བཀའ་ཡིག་གི་ལུགས་སྲོལ་མེད་པ་དང་གསུམ། སྐྱབས་བཅོལ་ནས་ཡང་བཅོལ་དུ་འགྲོ་དགོས་པའི་རྒྱའི་ཁྲིམས་ལུགས་གྱི་གཉའ་གནོན་མེད་པ་དང་བཞི་སྟེ། རྒྱུ་རྐྱེན་འདི་དག་གིས་སྔུན་ནས་འཐེན་པས་རྒྱའི་ལྕགས་ཁྲིམས་ཀྱི་སྐེ་ཐག་བསྐོན་མེད་ལ། རྗེས་ནས་འདེད་མཁན་གྱི་རྒྱའི་མེ་མདའ་ཡིས་གཉའ་གནོན་གྱི་གནོན་ཤུགས་མེད་བཞིན་དུ་བཙན་བྱོལ་ཚོགས་སྤྱི་འདིས་དྭངས་བླངས་དྭངས་གཙང་དང་། སེམས་པ་རྣམ་དག་གིས་གནམ་སྡེ་སྒོ་མོ་ཆེ་ཡི་གཞུང་ལམ་དུ་ཤར་བསྐྱོད་ཐུབ་པའི་བསམ་བློ་འདིས། བོད་ཀྱི་སྐད་ཡིག་དང་བོད་ཀྱི་རིག་གཞུང་སྲུང་སྐྱོབ་ཀྱི་རང་དབང་མེད་པ་བཟོ་མཁན་དེ་གཞན་མ་ཡིན་པར་འུ་ཚོ་བོད་མི་རང་གིས་མེད་པ་བཟོ་ཡི་ཡོད་པའི་སེམས་ཚོར་ཞིག་གིས་གཅུན་ནས་ཡོང་གི་འདུག

ཡང་ཁག་ཅིག་གིས་འུ་ཚོ་བཙན་བྱོལ་བ་ཡིན་སྟབས་ཕྱི་མིར་རེ་ལྟོས་དང་སྐྱབས་རྟེན་ཞུ་དགོས་པས། དེ་འདྲ་མ་བྱེད་རང་བྱེད་རེད་ཟེར་བའི་སྐད་ཆ་ཡོང་སྲིད་མོད། འོན་ཀྱང་བཙན་བྱོལ་བོད་མིའི་སྒྲིག་འཛུགས་ལ་དཔོག་པའི་ལས་ཁུངས་འདྲ་མིན་ཞིག་ཡོད་པ་དེ་བཞིན་དུ་ལས་ཁུངས་རེ་ལ་ལས་འགན་མི་འདྲ་བ་ཡོད་པ་ཇི་བཞིན་ལས་སྟངས་ཀྱང་མ་འདྲ་བ་དགོས་པ་ལས། ལས་ཁུངས་ཚང་མ་ཕྱི་སྲིད་ལས་ཁུངས་(外交部)ཀྱི་ལས་ཚུལ་ལྟར་ཕྱི་མིར་འབྲེལ་བ་བྱས་དགོས་ན། འུ་ཚོ་ལ་རྣམ་གྲངས་མང་བའི་ལས་ཁུངས་དེ་དག་ཉར་ནས་ཅི་བྱེད། ཚང་མ་ཕྱིའི་རྒྱབ་ཁབ་ལ་འབྲེལ་བ་བྱེད་མཁན་གྱི་ཕྱི་སྲིད་ལས་ཁུངས་གཅིག་ཏུ་ཟླ་སྒྲིལ་དུ་བཏང་ཚེ་གཞུང་གི་འགྲོ་གྲོན་ཡང་ཉུང་དུ་འགྲོ་ལ་དཀའ་ཚེགས་ཀྱང་ཉུང་དུ་འགྲོ་ཟེར་བའི་ལན་དུ་སྨྲའོ།

དོན་དམ་དུ་བཤད་ན། འུ་ཚོ་མགོ་མ་འཚོས་(སྨིན)པའི་སློབ་གསོ་ཞིག་དང་ཧམ་སེམས་ཀྱི་མདུན་བསྐྱོད་ཅིག་གི་ལམ་མདོ་ན་འགག་འདུག་པར་སེམས་ཏེ། དང་པོ་ནི་འུ་ཚོས་ནམ་རྒྱུན་འཚོགས་རྭ་ཞིག་དང་འདུ་འཛོམས་ཤིག་ཏུ་མཉམ་འདུས་རེ་བྱས་ཚེ་བོད་ཀྱི་སྐད་དང་རིག་གཞུང་གི་ཆེད་དུ་བོད་སློབ་ཟུར་འཛུགས་བྱ་དགོས་བའི་རྒྱུ་རྐྱེན་དང་བརྒྱུད་རིམ་མ་ཎི་བཞིན་བགྲངས་ནས་༸གོང་ས་མཆོག་གི་བཀའ་སློབ་ལས་ལྷག་ཅིག་བཤད་རྒྱུ་ནི་འུ་ཚོའི་སྐུ་ངོ་ཚོའི་འཇོན་ཐང་ངོམས་བྱེད་ཀྱི་སྐད་ཆ་ཞིག་ཡིན་མོད། དོན་དངོས་སུ་སྐུ་ངོ་སུ་གཅིག་གིས་ཀྱང་༸ཡིད་བཞིན་ནོར་བུའི་བཀའ་སློབ་དེ་ཡི་གོ་དོན་རྟོགས་མེད་ལ། གོ་དོན་རྟོགས་ཐུབ་པའི་སྟ་གོན་ཡང་བྱེད་མེད་ཚོད་རེད།

གལ་ཏེ་ཡོད་ན། མི་ལོ་ལྔ་བཅུ་ལྷག་འགོར་ནའང་འདབ་གཤོག་གཉིས་ལྡན་གྱི་བོད་མི་གཙང་མ་ཇི་ཙམ་ཞིག་འུ་ཚོའི་ཁོ་ར་འདི་ནས་བྱུང་ཡོད་དམ། གཅིག་ཤེས་ན་གཅིག་མ་ཤེས་པའི་མི་ལྷག་སྐོར་གཅིག་གིས་ཁེངས་ནས་བསྡད་ཡོད་པ་འདི་རེད། འདི་ཚོ་ལ་བལྟས་ནས་ཡོང་དུས་འུ་ཚོས་འཕྲལ་ཕུགས་གང་ལ་ཡང་མི་ཕན་པའི་སློབ་གསོ་ཕུང་གསུམ་པ་ཞིག་ལ་མགོ་འཐོམ་ནས་བསྡད་ཡོད་སྟབས། འུ་ཚོའི་སློབ་གསོ་ནི་མགོ་མ་འཚོས་པའི་སློབ་གསོ་རེད་ཟེར་དོན་ཡང་དེ་ཡིན་ནོ།།

སྐད་ཆ་གཉིས་པའང་འདི་ལས་མ་འདས་ཏེ། ཕྱི་གླིང་བའི་ཆབ་དཔལ་རིག་གསུམ་ལ་ཧམ་སེམས་སྐྱེས་ནས་བོད་པའི་སློབ་ཕྲུག་ཚང་མ་ཕྱི་གླིང་གི་སློབ་ཕྲུག་ལྟར་བཟོ་རྒྱུ་ཡིན་ཟེར་ན་གླེན་རྟགས་ཚ་བོ་སྟོན་པ་མ་ཡིན་ནམ། མི་རེ་རེ་ལ་བསམ་བློ་རེ་དང་སྤྱི་ཚོགས་རེ་ལ་གོམ་གཤིས་རེ་དང་ལུགས་སྲོལ་རེ་ཡོད་པའི་རྒྱུ་མཚན་གྱིས། ཕྱི་གླིང་ཚོས་མགོ་སྐྲ་འཇོག་སྟངས་དང་གོན་པ་གྱོན་སྟངས་སོགས་ཀྱི་སློབ་གསོ་ཡན་ནས་སངས་རྒྱས་གསུང་རབ་ཏུ་རྩིས་ནས་འུ་ཚོའི་ཚོགས་སྤྱི་རུའི་ནང་འཁྱེར་ཡོང་ཚེ་བོད་ཕྲུག་གཙང་མ་ཞིག་ལ་རེ་ལྟོས་བྱ་བའི་སློབ་གསོ་མ་གནང་རོགས་གནང་ཟེར་བ་དེ་ཡིན་ནོ།།

མདོར་ན། འུ་ཚོས་བྱ་གཞག་ཅི་ཞིག་བརྩམས་རུང་ལས་ཀ་ཅི་ཞིག་བྱེད་ཀྱང་ཐམས་ཅད་རྒྱ་ནག་གི་འདོད་ཕྱོགས་མ་གཏོགས་ལྡོག་ཕྱོགས་སུ་ལངས་ཐུབ་ཀྱི་མི་འདུག་པའི་སེམས་ཚོར་ཞིག་ཤུགས་ཀྱིས་སྐྱེས་སུ་འཇུག་གོ།