དེ་རིང་ཡང་བསྐྱར་ཁྱེད་རང་ཚོར་ཆོས་འབྲེལ་གྱི་གོ་སྐབས་བྱུང་བ་ཞེ་དྲགས་དགའ་བོ་བྱུང་།

དེ་རིང་ནས་བཟུང་མ་འོངས་པའི་ཉིན་བཞིའི་རིང་༧གོང་ས་མཆོག་གིས་དྷ་རམ་ས་ལར་དབུ་མ་བཞི་བརྒྱ་བའི་གསུང་ཆོས་དབུ་འཛུགས་གནང་ཡོད་པའི་ཐོག་ཁོང་གིས་རྒྱ་གར་བ་མང་པོ་ཞིག་ཆོས་ཞུ་བར་བཅར་ཡོད་པ་དེ་ཡག་པོ་ཡིན་པ་དང་། རང་གི་ཕ་མེས་ཀྱི་རིག་གཞུང་གཅེས་ནོར་ལ་བདག་པོ་བསྐྱོན་གྱི་ཡོད་པ་རེད་ཅེས་གསུངས་འདུག

དེ་རིང་སྔ་དྲོའི་ཆུ་ཚོད་ ༩ སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། དེ་སྔོན་ཐའེ་ཝན་གྱི་དད་ལྡན་ཆོས་ཞུ་བ་ཁག་གཅིག་གིས་གསོལ་འདེབས་ཞུས་དོན་ལྟར། ༧གོང་ས་མཆོག་གིས་ཉིན་བཞི་རིང་གི་དབུ་མ་བཞི་བརྒྱ་བའི་གསུང་ཆོས་དབུ་འཛུགས་གནང་སོང་། དེར་ཐའེ་ཝན་དང་རྒྱ་ནག་སྐམ་ས་ཆེན་མོའི་ཆོས་ཞུ་བ་གཙོ་བྱས་ཏེ། ལྷོ་ཕྱོགས་གདན་ས་ཁག་དང་། བོད་ནས་ཕེབས་མཁན། དེ་བཞིན། འཛམ་གླིང་ཤར་ནུབ་ཡུལ་གྲུ་གཞན་བཅས་ནས་ཆོས་ཆུ་བ་ ༣༠༠ ལྷག་འཛོམས་འདུག

གསུང་ཆོས་དབུ་འཛུགས་སྟེང་༧གོང་ས་མཆོག་གིས་བཀའ་སློབ་ཕེབས་དོན། དེ་རིང་གི་ཆོས་དང་འབྲེལ་བའི་དུས་བཅད་གཙོ་བོ་དེ་ཁྱེད་རང་ཚོ་ཐའེ་ཝན་ནས་ཡོང་བའི་བསྟན་འཛིན་བྱམས་ཆེན་ཆོས་ཚོགས་ཀྱི་རབ་བྱུང་ཕོ་མོ་དང་ཉེ་ཆར་གསར་དུ་བསྒྲུབས་པའི་རབ་བྱུང་ཕོ་མོ་རྣམ་པ་ཚོ་རེད། དེ་བཞིན་འབྲེལ་ཡོད་ཆོས་ཞུ་བ་ཚོ་དང་། བསྟན་འཛིན་བྱམས་ཆེན་ཆོས་ཚོགས་ཁོངས་ཀྱི་ཆོས་གྲོགས་ཚོ། ཐའེ་ཝན་ནང་ཡོད་པའི་ས་སྐྱ་བཀའ་བརྒྱུད་རིས་མེད་ཀྱི་ཆོས་ཚོགས་ཁག་ནས་ཕེབས་མཁན་རྣམ་པ་ཚོ། རྒྱ་ནག་སྐམ་ས་ཆེན་མོ་ནས་ཕེབས་མཁན་ཡོད་པ་རེད།

སྤྱི་ཡོངས་ཀྱི་ཐོག་ནས་རྒྱ་མི་རིགས་སངས་རྒྱས་བཅོམ་ལྡན་འདས་ཀྱི་ཆོས་མཉམ་ལེན་བྱེད་མཁན་དང་སངས་རྒྱས་པའི་རྗེས་འབྲང་བ་ཆགས་བསྡད་ཡོད། འཛམ་བུ་གླིང་འདིའི་སྒང་རྒྱ་རིགས་ཡོད་ས་ཨ་རིའི་ལུང་པའི་ནང་ལ་ལོ་སིན་རྗལ་དང་ནེའུ་ཡོག་སོགས་སུ་ནང་པའི་ལྷ་ཁང་མང་པོ་ཡོད་པ་རེད། ཨོ་སི་ཊོར་ལེ་ཡའི་ནང་དུའང་ཝེ་ཋི་ནམ་གྱི་ནང་པའི་ལྷ་ཁང་ཆེ་ཐག་ཆོད་ཅིག་ཡོད་པ་རེད། མ་ལེ་ཤེ་ཡར་རྒྱ་རིགས་མང་པོ་ཡོད་པའི་ཁྲོད་དུ་ནང་པ་མང་པོ་རེད། ཨིན་དྷི་ནེ་ཤེ་ཡ་ཡིན་ནའང་དེ་བཞིན་རེད། ལོ་རྒྱུས་ཀྱི་ཐོག་ནས་དེ་ཚོ་ཚང་མ་ཕ་མེས་རིང་ནས་སངས་རྒྱས་པའི་ཆོས་ཀྱི་རྗེས་འབྲང་པ་ཆགས་ཡོད། ངོས་ཀྱིས་ནམ་རྒྱུན་ལོ་རྒྱུས་ཐོག་ནས་རྒྱ་རིགས་ཚོ་བཅོམ་ལྡན་འདས་ཀྱི་དགེ་ཕྲུག་རྒན་པ་རེད་ཟེར་གྱིན་ཡོད། འབར་མ་དང་ཐེ་ལན། སེང་གྷ་ལ། ཁེམ་བྷོ་ཌེ་ཡ། ལའོ་སི་སོགས་པཱ་ལེ་ཆོས་བརྒྱུད་ཐོག་མ་འཛིན་མཁན་ཡིན་སྟབས། དེ་ཚོ་བཅོམ་ལྡན་འདས་ཀྱི་དགེ་ཕྲུག་རྒན་ཤོས་ཆགས་ཡོད་པ་རེད།

ཕྲན་བུ་རེ་མ་གཏོགས་ང་ཚོ་ཚང་མ་གཅིག་པ་རེད། པཱ་ལེ་ཆོས་བརྒྱུད་དང་ལེགས་སྦྱར་གྱི་ཆོས་བརྒྱུད་གཉིས་ཆ་གཅིག་པ་རེད། ལེགས་སྦྱར་གྱི་ཆོས་བརྒྱུད་འཛིན་མཁན་སྔ་ཤོས་དེ་ཕལ་ཆེར་རྒྱ་ནག་ཡིན་ས་རེད། དེ་ཡང་ཀླུ་སྒྲུབ་ཀྱི་རྗེས་འབྲང་བ་ཆགས་ནས་རྒྱ་གར་ནས་ཕར་རྒྱ་ནག་ལ་དར་བ་དེ་འདྲ་རེད། རྒྱ་ནག་ལ་དུས་རབས་བདུན་པའི་གོང་ནས་ནང་ཆོས་དར་བ་དང་བོད་ལ་དུས་རབས་བདུན་པ་ཙམ་ནས་མགོ་ཚུགས་པ་རེད། ང་ཚོ་བོད་དང་སོག་པོ་དགེ་ཕྲུག་གཞོན་པའི་བཟོ་འདྲ་བོ་ཞིག་རེད། ཡིན་ནའང་ང་ཚོའི་ཤེས་ཚད་བསྡུར་དགོས་བྱུང་ན། དགེ་ཕྲུག་གཞོན་པ་ཚོ་སྐྱོ་བོ་རང་ཡོད་པ་མ་རེད། གང་ཡིན་ཟེར་ན། བོད་ལ་མཁན་ཆེན་ཞི་བ་མཚོའི་ཐུགས་རྗེ་བཀའ་དྲིན་ལ་བརྟེན་ཏེ། ཁོང་གིས་ན་ལཱེན་ཊའི་ཆོས་བརྒྱུད་ངོ་སྤྲོད་གནང་བ་དང་། ཁོང་རང་ཉིད་ལྟ་གྲུབ་སྨྲ་བ་དང་མཚན་མ་ལ་ཞེ་དྲགས་མཁས་པ་ཡིན་སྟབས། ཁོང་གི་དགེ་ཕྲུག་ཚོས་ཀྱང་དེ་བཞིན་དུ་ལྟ་གྲུབ་གཏན་ལ་ཕབ་སྐབས་མཚན་མའི་ལམ་དང་རིག་པའི་ལམ་ནས་གཏན་ལ་ཕབ་རྒྱུ་དེ་གཙོ་བོ་བྱས་ཡོད་པ་རེད། དེར་བརྟེན། བོད་གངས་ཅན་ལྗོངས་རང་ནས་མཚན་མའི་གཞུང་མཛད་མཁན། དཔེར་ན། ས་པཎ་ཀུན་དགའ་རྒྱལ་མཚན་རང་གིས་རིགས་གཏེར་མཛད་ཡོད་པ་རེད། དེ་ལ་སོགས་པའི་མཚན་མའི་གཞུང་མཛད་མཁན་བོད་རང་ལ་འགའ་རབ་ཅིག་བྱུང་འདུག ཉེ་ཆར་ང་ཚོས་ཞིབ་འཇུག་སྡོམ་རྩིས་བྱས་པ་ཡིན་ན། རྒྱ་གར་ནས་ཚུར་བསྒྱུར་བའི་བཀའ་འགྱུར་བསྟན་འགྱུར་པོད་སུམ་ ༣༠༠ དང་། བོད་གངས་ཅན་ལྗོངས་ནས་བོད་ཀྱི་མཁས་པ་ཚོས་བཀའ་འགྱུར་བསྟན་འགྱུར་པོད་སུམ་བརྒྱ་དེའི་དགོངས་འགྲེལ་བརྩམས་པ་ཕལ་ཆེར་པོད་ཁྲི་ ༢ ལྷག་ཡོད་འདྲ་བོ་འདུག ལྟ་གྲུབ་ཀྱི་སྐོར་དང་མཚན་མའི་སྐོར་བཤད་ཡོང་དུས། བོད་ཡིག་བོད་སྐད་དེ་སྔ་མོའི་ལེགས་སྦྱར་གྱི་གཞུང་བོད་ཡིག་ནང་སྒྱུར་བཞིན་སྒྱུར་བཞིན་བོད་སྐད་ཡར་རྒྱས་ཕྱིན་པ་རེད། དེར་བརྟེན། ལེགས་སྦྱར་གྱི་ཚིག་དང་བོད་སྐད་ཀྱི་ཚིག་གཉིས་པོ་དེ་ཏག་ཏག་འགྲོ་སྡོད་པ་ཞིག་འདུག

དེ་རིང་འདིར་ལོ་རྒྱུས་ཀྱི་ཐོག་ནས་བཅོམ་ལྡན་འདས་ཀྱི་རྗེས་འབྲང་བ་དང་དེའི་ནང་ཚན་ནས་དཔལ་ན་ལཱེན་ཎ་ཊའི་ཆོས་བརྒྱུད་འཛིན་མཁན་གཅིག་གྱུར་བྱུང་ཡོད་པའི་ཆ་ནས། འདས་པའི་ལོ་མང་རིང་འདི་ལྟར་ཁྱེད་རང་ཚོར་ཆོས་འབྲེལ་བྱེད་པའི་གོ་སྐབས་བྱུང་བ་རེད་ལ། དེ་རིང་ཡང་བསྐྱར་ཁྱེད་རང་ཚོར་ཆོས་འབྲེལ་གྱི་གོ་སྐབས་བྱུང་བ་དེར་ངོས་རང་ཞེ་དྲགས་དགའ་བོ་བྱུང་། ཁྱེད་རང་ཚོ་གོ་སྒྲིག་ཞུ་མཁན་དང་། ཁྱེད་རང་ཚོ་སྒེར་སོ་སོའི་འགྲོ་སོང་དང་དཀའ་ངལ་ཁྱད་དུ་བསད་པའི་ཐོག་ནས་འདིར་ཡོང་བ་རེད། ཐུགས་རྗེ་ཆེ་ཞུ་རྒྱུ་ཡིན། དེ་དང་ཆབས་ཅིག དེ་སྔ་སངས་རྒྱས་པའི་ཆོས་མ་དར་སའི་ཡུལ་གྲུ་གཞན་ནུབ་ཕྱོགས་རྒྱལ་ཁབ་དེ་འདྲ་ནས་ནམ་རྒྱུན་ཡོང་སྡོད་ཀྱི་ཡོད་པ་དང་། དེ་རིང་ཡང་འདིར་འགའ་རབ་ཅིག་ཡོད་སྡོད་པའི་བཟོ་འདྲ་བོ་འདུག རྩ་བའི་ལོ་རྒྱུས་ཀྱི་ཐོག་ནས་བལྟས་པ་ཡིན་ན། ནང་པའི་ཆོས་ཟེར་ན་ཕལ་ཆེར་ཨེ་ཤ་ཡའི་ཆོས་ཀྱི་བཟོ་འདྲ་བོ་ཞིག་ཆགས་བསྡད་ཡོད་པ་རེད། ཡིན་ནའང་དཀྱིལ་ཤར་ཡུལ་གྲུ་ནས་བྱུང་བའི་ཡེ་ཤུ་ཆོས་ལ་ཆ་བཞག་ན། ཨེ་ཤ་ཡའི་ལུང་པའི་ནང་མང་པོ་ཡོད་པ་རེད། དེར་བརྟེན། ཧ་ལམ་རྒྱལ་སྤྱིའི་ཆོས་འདྲ་བོ་ཞིག་ཆགས་ཡོད་པ་རེད། ནང་པའི་ཆོས་དེ་སྔ་ཤར་ཕྱོགས་ནས་ཡོང་བ་རེད། དེང་སྐབས་འཛམ་བུ་གླིང་འདིའི་སྒང་ལ་ཕན་ཚུན་བར་ཐུག་འཕྲད་དང་འབྲེལ་བ་ཞེ་དྲགས་ཟབ་པོ་ཡོད་པ་དང་། ཕན་ཚུན་ནང་འགྲོ་འདུག་བདེ་པོ་དང་གནས་ཚུལ་མང་པོ་གོ་ཐུབ་ཀྱི་ཡོད་སྟབས། སངས་རྒྱས་པའི་ཆོས་ལ་དོ་སྣང་བྱེད་མཁན་མང་པོ་ཡོང་གི་འདུག

ཕལ་ཆེར་རྒྱ་གར་རང་ནས་འགའ་རབ་ཡོད་ས་རེད། ཁྱེད་རང་ཚོ་ཡིན་ན། བཅོམ་ལྡན་འདས་རང་གི་འཁྲུངས་ཡུལ་དང་དཔལ་ན་ལཱེན་ཊའི་པཎ་གྲུབ་བཅུ་བདུན་དེ་ཚོ་ཚང་མ་རྒྱ་གར་རང་རེད། དེར་བརྟེན། རྒྱ་གར་ལ་ཆ་བཞག་ན། ན་ལཱེན་ཊའི་མཁས་པའི་དབང་པོ་ཚོའི་མཛད་པའི་རྣམ་དཔྱོད་ཀྱི་ལེགས་བཤད་དེ་རྒྱ་གར་རང་གི་རིག་གཞུང་ཞིག་ཆགས་ཡོད། རྒྱ་གར་ཁྱེད་རང་ཚོས་སོ་སོའི་ཕ་མེས་ཀྱི་རིག་གནས་གཏིང་ཟབ་ཡོད་པ་དེར་བདག་པོ་རྒྱག་གི་ཡོད་པ་རེད། དེ་ལ་དོ་སྣང་བྱུང་བ་ཞེ་དྲགས་ཡག་པོ་འདུག དེ་སོ་སོའི་ཕ་མེས་ཀྱི་གཅེས་ནོར་རེད། དེང་སྐབས་རྒྱ་གར་ནང་སངས་རྒྱས་པའི་ཆོས་ཡིན་ན་འདྲ། སངས་རྒྱས་པའི་ལྟ་གྲུབ་ཡིན་ན་འདྲ། དེ་བཞིན། སངས་རྒྱས་པའི་མཚན་མ་རིག་པའི་སྐོར་དེ་འདྲའི་རིགས་ལ་དོ་སྣང་བྱེད་མཁན་མང་དུ་འགྲོ་ཡི་འདུག དེ་ཞེ་དྲགས་ཡག་པོ་རེད། རང་གི་ཕ་མེས་ཀྱི་གཅེས་ནོར་ལ་དོ་སྣང་བྱས་ནས་བདག་པོ་རྒྱག་གི་ཡོད་པ་རེད། དཔེ་ཡག་པོ་རེད། ཅེས་སོགས་གསུངས་སོང་།

གསར་འགོད་པ། པདྨ་རྒྱལ།