རྩོམ་པ་བོ། ཨ་ཚོགས་མཁས་བཙུན།
གནམ་ནས་འབབ་ཕྱོགས་འཆད་པ་ལ། དང་པོ་གནམ་ལ་སོང་ཚུལ་འཆད་དགོས་ལ། གནམ་ལ་འགྲོ་ཚུལ་དེ་གནམ་གྲུ་ནས་འགྲོ་བ་དང་། གཤོག་པ་ཐོགས་ཏེ་འགྲོ་བ་དང་། དབུགས་སྒང་ནས་འགྲོ་བ་བཅས་ཕྱོགས་གསུམ་ལས་མ་འདས་མོད། རང་རེས་གནམ་གྲུ་བཟོ་མྱོང་མེད་པས་རང་སྟོབས་ཀྱིས་འགྲོ་ཐབས་མ་བྱུང་ཞིང་། གཤོག་པ་ཐོགས་ནས་འགྲོ་བ་བྱ་བྱེའུ་ཁོ་ནའི་རང་རྩལ་ཡིན་པས། དབུགས་སྒང་ནས་སོང་བའང་བོད་དུ་རྩོད་མེད་ཡོངས་གྲགས་ལ་རྗེ་བཙུན་མི་ལ་གཅིག་ཉིད་ལས་མ་བྱུང་བས། རང་རེ་གནམ་ལ་སོང་ཚུལ་ཅི་འདྲ་ཡིན་ཕལ་ཆེར་ཚང་མས་ཚོད་དཔག་ཐུབ་རྒྱུ་རེད་བསམས།
དེ་ལ་གནམ་ནས་འབབ་ཚུལ་དངོས་འཆད་པ་ལ། འཇིག་རྟེན་རྒད་པོའི་གཏམ་ལ་ཡང་། རྒོད་པོ་གྱེན་བརྒྱུག་སླ་ཡང་། གཡུང་མོ་ཐུར་འབབ་དཀའ། ཟེར་བ་ལྟར་དགུང་གནམ་འཕང་བསྟད་དྲག་ན་གཞི་ས་ལ་འབབ་རྒྱུ་དེ་ལས་སླ་བོ་ཡོད་ས་མ་རེད། ཡིན་ནའང་། འཇིན་རྟེན་མཁས་པའི་གསུང་ལ། ཐ་སྙད་ལ་ནི་མ་བརྟེན་པར།། དམ་པའི་དོན་ནི་རྟོགས་མི་འགྱུར།། ཅེས་གསུངས་པ་མི་འགྲོ། ཐེག་པ་མས་རིམ་དང་ཐེམ་པ་འོག་རིམ་གྱི་དཔེ་བཞིན་རྩིག་གྱང་གི་རྨང་མི་གཏོང་བ་དེ་གལ་བོ་ཆེ་ལ་ནན་ཏན་གྱི་ཚུལ་ཏུ་གསུང་འདུག་པས། དམ་པ་ལྷ་ཆོས་རྐྱང་གཙོར་འདོན་ནས་འཇིག་རྟེན་མི་ཆོས་ལ་མར་འབབ་པ་དང་། དེ་ནས་ཀྱང་བྱེ་བྲག་ཏུ་ཤེས་འཇོན་གཉིས་དང་། ཁྱད་པར་ཏུ་ཀུན་སྤྱོད་ཡར་རྒྱས་ལ་དམིགས་ཕུགས་ཀིས་རྨང་རྐང་མི་འདོར་བ་ནི་ཆེས་སྤྱིར་བཏང་གི་བསླབ་བྱ་ཡིན་པ་གོ་དགོས།
དེ་ཡང་མིའི་གཤིས་སྤུས་ཀ་དང་འཇོན་ཐང་བྱང་ཚད་མཐོར་འདེགས་གཏོང་བ་གཉིས་ལས་མ་འདུས་པ་མེད། འདི་ལ་བོད་ཕྱི་ལོགས་སུ་ལེགས་བྱང་ཟེར་བའང་ཡོད་ཅིང་། བོད་ནང་དུ་རྒྱ་ནག་གི་ཐ་སྙད་ཐད་བསྒྱུར་གྱིས་སློབ་གསོ་ཟེར་བཞིན་ཡོད། ལེགས་བྱང་ཟེར་ཞིང་སློབ་གསོ་ཟེར་ན་གང་ལྟར་གནད་བསྡུས་ན་ལུས་ངག་ཡིད་གསུམ་གྱི་འདུལ་སྦྱོང་ཞིག་ལ་ལེགས་བྱང་ངམ་སློབ་གསོ་ཟེར། འདི་གཉིས་ལས་མ་འདས་པ་དང་མ་འདའ་བ་ཡིན། དེ་ཡང་འདུལ་སྦྱོང་ཞེས་ཟོར་ཡངས་པའི་སྒོ་ནས་འཆད་ན། འདུལ་ཅེས་པ་སྒོ་གསུམ་གྱི་ཞན་ཆ་ངན་གཤིས་འདུལ་བའམ་ལོག་ལམ་ལ་མ་སོང་བ་གཙོར་འདོན་དང་། སྦྱོང་ཞེས་པ་སྒོ་གསུམ་གྱི་རྩལ་དང་ནུས་པ་འདོན་སྤེལ་བྱ་རྒྱུ་དེ་ཡིན་པས། མདོར་བསྡུས་ན། སློབ་གསོ་ནི་མིའི་ལུས་ངག་ཡིད་གསུམ་འདུལ་སྦྱོང་གི་རིག་ལམ་དང་རིག་ཚན་ཞིག་ཡིན་ཞེས་ཟེར་ཆོག་གི་ཡོད་ཅེས་པ་ནི་མདོར་བསྡུས་སྤྱི་དོན་དུ་བསྟན་པ་ཡིན།
དེ་ལྟ་བུའི་ལེགས་བྱང་ངམ་སློབ་གསོ་དེ་ལ་མིའི་གཤིས་ཡ་རབས་ཀུན་སྤྱོད་སློབ་གསོ་དང་། འཇོན་ནུས་སློབ་གསོ་གཉིས་ཡོད་པའི་དང་པོ། མི་ཡི་གཤིས་སྤྱོད་སློབ་གསོ་དེ་ཉིད་རགས་ཙམ་གླེང་ན། སློབ་གསོ་དེ་ཡོང་ཐབས་ལ་གསུམ་ཡོད་པ་ལས་ (གཅིག) བཙན་དབང་གི་ཁྲིམས་སྲོལ་གཞན་དབང་ཅན་དང་། (གཉིས་པ) ལུགས་མཐུན་གྱི་ཁྲིམས་སྲོལ་རང་དབང་ཅན། (གསུམ་པ) ཆོས་ལུགས་ཀྱི་ལམ་ཀ་སྣེ་མང་ཅན་བཅས་གསུམ་ཡོད། དེ་ཡང་སྲིད་དབང་སྒེར་གཅོད་ཀྱི་ཡུལ་ལུང་རྒྱལ་ཁབ་གྱི་སློབ་གསོ་དེ་ཁྲིམས་ལུགས་དབང་བཙན་གཞན་དབང་ཅན་ཞིག་དང་། དམངས་གཙོ་སྲིད་དབང་ལྡན་པའི་ཡུལ་ལུང་རྒྱལ་ཁབ་གྱི་སློབ་གསོ་དེ་གོ་སྐོན་ལེགས་བརྡ་སྤྲོད་པ་གཙོར་འདོན་གྱི་སློབ་གསོ་རང་དབང་ཅན་དང་། ཆོས་ལྡན་རྒྱལ་ཁབ་ཁག་གི་གཤིས་སྤྱོད་སློབ་གསོ་དེ་ཆོས་ཀྱི་བསླབ་བྱ་འཇམ་རྩུབ་གཉིས་ལྡན་ཞིག་གཙོར་འདོན་བྱེད་བཞིན་ཡོད་ཅིང་། དེ་ལའང་ <༡> འཇིགས་སྣང་སློང་བ་ལྟ་བུའི་གཞན་དབང་ཅན་དང་། <༢> གོ་བརྡ་སྤྲོད་པ་གཙོར་འདོན་གྱི་རང་དབང་ཅན་དང་གཉིས་ཡོད། དང་པོའི་དཔེ་མཚོན་ནི་ཡེ་ཤུ་ཆོས་ལུགས་དང་། གཉིས་པའི་དཔེ་ནི་རང་རེ་སངས་རྒྱས་ཆོས་ལུགས་ཡིན།
སྲིད་དབང་སྒེར་གཅོད་ཀྱི་ཡུལ་ལུང་རྒྱལ་ཁབ་རྣམས་ཀྱིས་དུས་རྟག་པར་ཁྲིམས་ཀྱིས་བཅུན་པ་སླར་ལེན་ཞིང་། བཙན་དང་དབང་གི་ཟིལ་ཤུགས་དང་ལྡན་པར་འབངས་མིའི་ཕྱིའི་ཀུན་སྤྱོད་དང་ནང་བསམ་ཕྱོགས་ཀྱི་ཁ་ལོ་བསྒྱུར་ཐབས་དང་། ཚོད་འཛིན་ཐེབས་ཅི་ཐུབ་བྱེད། མང་གཙོའི་རྒྱལ་ཁབ་ཁག་གིས་འགྲོ་པ་མིའི་ཐོབ་ཐང་དང་། སྨྲ་བརྗོད་རང་དབང་རྩ་འཛིན་དང་། དམངས་ཀྱི་ཁེ་ཕན་ཆེད་དམིགས་ཀྱིས་གོ་བརྡ་སྤྲོད་པའི་སློབ་གསོ་རྐང་དུ་བཟུང་བའི་རང་དབང་དང་། སྒམ་བཀྱེད་བློ་ཁོག་ཆེན་པོའི་ལམ་ནས་མི་དམངས་ཀྱི་གཤིས་སྤྱོད་བཟང་ཕྱོགས་ཡར་ལམ་ལ་འཇུག་གི་ཡོད། འཛམ་གླིང་གི་ཆོས་ལུགས་མང་ཤས་ཤིག་གི་སློབ་གསོ་རྒྱག་སྟངས་ནི་རྒྱལ་བོ་ཉེན་ཁ་ཅན་ཞིག་གི་བཀའ། བློན་པོ་ཉེན་ཁ་ཅན་དག་གིས་བཀའ་བརྩི་དང་ལེན་བྱེད་པ་དང་འདྲ་བར་འཇིགས་ཞུམ་དང་དངངས་འཚབ་གྱིས་རང་གི་སྒོ་གསུམ་གྱི་བྱ་སྤྱོད་ལ་བདག་པོ་རྒྱག་ཅི་ཐུབ་བྱེད་པ་དེ་ཡིན།
རང་རེ་བོད་ནི་གནའ་ནས་ད་ལ་ཐུག་པའི་བར་ཆོས་ཀྱི་བསླབ་བྱས་མི་གཤིས་ཀུན་སྤྱོད་མཐོར་འདེགས་ལ་ནུས་པ་ཆེན་པོ་ཐོན་ཡོད་པ་དང་། ད་དུང་མི་རིགས་གཅིག་གྱུར་དང་། སྐད་ཡིག་འཛིན་སྐྱོང་། ཤེས་རིག་དར་སྤེལ་བཅས་ལ་ནུས་པ་ཆེན་པོ་ཐོན་ཡོད་ཅིང་། དབང་རྣོན་ཆོས་ཀྱི་རྗེས་འབྲང་དེ་སློབ་གསོའི་རྐང་དུ་བཟུང་བ་ཡིན། ཡིན་ན་ཡང་། རང་རེའི་སྲོལ་རྒྱུན་གྱི་ཆོས་ཀྱི་བསླབ་བྱ་གཞི་དམངས་ཚོགས་ལ་གོ་བརྡ་སྤྲོད་ཕྱོགས་འདི་ཁོ་ནས་དུས་རབས་ཉེར་གཅིག་པར་ཁོངས་དེ་ཙམ་ཆོད་ཀྱི་མེད་པ་༧སྐྱབས་མགོན་རིན་པོ་ཆེས་ཡང་ཡང་གསུངས་བ་དེ་ག་རང་རེད། སྲོལ་རྒྱུན་གྱི་འགྲོ་ལུགས་དེ་ཆོས་ཀྱི་དགོངས་པ་ཡིན་ནའང་། གཡས་གཡོན་གྱི་མཐའ་གཅིག་ལ་ལྷུང་འདུག མཐའ་དེ་ནི་འདི་ཕྱི་གཉིས་ལས་ཕྱི་མ་གཙོར་འདོན་གྱི་མཐའ་རེད། སྡིག་སྤོང་དགེ་སྒྲུབ་གྱི་མཐའ་འབྲས་ལེགས་ཉེས་ཐམས་ཅད་ཕྱི་མ་དབང་བཙན་དུ་བགྱིས་པ་དང་། ངན་སོང་ངན་འགྲོའི་མྱོང་བས་འཇིགས་སྐུལ་ལྟ་བུ་དང་། བདེ་འགྲོ་མཐོ་རིས་ཀྱི་ཕུན་ཚོགས་ཀྱིས་བློ་བྲིད་མགོ་སྐོར་ལྟ་བུས་མུ་མཐུད་ཁོངས་ཆོད་ཀྱི་མེད།
དེས་ན་རང་རེ་ད་ནས་བཟུང་ཆོས་ཀྱི་ར་བ་ལས་བརྒལ་བའི་ཆོས་ཀྱི་བསླབ་བྱ་རྒྱག་སྟངས་ཀྱི་ཤིང་རྟའི་སྲོལ་ལྟ་བུའི་ལམ་ཁ་དེར་ཤར་བསྐྱོད་བྱ་རྒྱུ་དེ་ཤིན་ཏུ་གལ་ཆེན་པོ་ཡིན། དཔེར་ན། དལ་འབྱོར་རྙེད་དཀའ་བའི་བསླབ་བྱ་ལ་ནུབ་ཕྱོགས་མཚན་ཉིད་རིག་པའི་བརྡ་ཆད་ཚེ་སྲོག་གི་རིན་ཐང་ཞེས་པ་དང་། དེ་ལུགས་ཀྱི་གོ་དོན་གཞི་ལ་བབས་ནས་འཆད་ཐུབ་པ་དང་སྦྱོར་ཤེས་པ་ཤིན་ཏུ་གལ་ཆེ་བ་དང་། དེ་བཞིན། འཆི་བ་མི་རྟག་པ་ལ་དུས་ཚོད་ཀྱི་རིན་ཐང་། ལས་དབང་རྒྱུ་འབྲས་འཁྱོལ་མེད་ལ་བདེན་དོན་དྲང་སྙོམས་ཀྱི་རིན་ཐང་། འདོད་ཆུང་ཆོག་ཤེས་ལ་ཐལ་ཆ་སྙོམས་སྒྲིག་གི་བསམ་བློའི་རིན་ཐང་དང་། དགེ་མཚན་ནུས་བ་དང་ལྡན་པ་བཅས། དེ་བས་ཀྱང་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པ་ནི་ཤེས་འཇོན་གཉིས་ལྡན་གྱི་སློབ་གསོའི་སྡོམ་ཆེན་པོ་དེ་ཡིན་པ་ཤེས་པར་བྱ་ཞིང་བསླབ་པར་བྱའོ། མདོར་བསྡུས་ན་རང་རེས་ངེས་པར་ཏུ་ཆོས་ཀྱི་བསླབ་བྱ་དེ་དག་ལ་མི་སྐད་འཆད་དུ་འཇུག་དགོས་པ་དང་། བྱ་བྱེད་ཐམས་ཅད་ལ་ཤེས་རབ་གྱི་གྲོགས་དང་ལྡན་པར་བྱ་གལ་ཆེ་བ་ཆོས་ཀྱི་བསླབ་བྱའི་སྙིང་བོ་ཡིན་པ་ར་སྤྲོད་དགོས་པར་ཡོད།
མདོར་ན། ཚེ་སྟོད་ཀུན་སྤྱོད་བསམ་ཕྱོགས་བཟང་ཐག་ཆོད་ཅིག་བྱུང་བ་ཡིན་ན་ཚེ་སྨད་ངང་གིས་ཡོང་བ་དང་། ཚེ་འདི་བཟང་ཐག་ཆོད་ཅིག་ལ་ཕྱི་མ་རང་བཞིན་གྱིས་ཡོད་པའི་གོ་བརྡ་སྤྲོད་རྒྱུ་དང་། དེའི་བསམ་བློ་འཁོར་ཐུབ་པ་བྱ་དགོས། ཁྱད་པར་དུ་སྡུག་སྤོང་དགེ་སྒྲུབ་གོང་ནས་མར་འཆད་པ་ལ་ཞུགས་མཁན་ཡིན་ན་རེད། ཡང་ན། མར་ནས་ཡང་སེ་ཡང་སེ་ལག་ལེན་ལ་ཐེབས་མཁན་ཞིག་ཡིན་ན་རེད། ཐམས་ཅད་ཀྱིས་སྐབས་གང་ཡིན་ལ། དཔེར་ན། སྦྱིན་པའི་སྦྱིན་འབྲས་ལོངས་སྤྱོད་ཀྱིས་མི་འཕོངས་པ་དང་། སྲོག་བླུའི་བླུའི་འབྲས་ཚེ་རིང་བ་དང་། བཟོད་པའི་འབྲས་བུར་གཟུགས་བཟང་བ་ལ་སོགས་པའི་རེ་བ་མ་བརྒྱབ་པའི་ལན་ལ་མི་རེ་བའི་དགེ་རྩ་དངོས་དེ་འདོན་དགོས་ཀྱི་འདུག དེ་འདྲའི་ལན་ལ་མི་རེ་བ་འཚོ་བ་དངོས་ལ་བབས་པའི་དགེ་རྩ་དེ་དག་གིས་ཕ་རོལ་བོའི་འཕྲལ་གྱི་འཕོངས་པ་སེལ་ཞིང་། སྲོག་གི་འཇིགས་ལས་སྐྱོབ་པ་དང་། བཟོད་པས་དཀའ་གནད་ལ་གདོང་ལེན་དང་བསྲན་ཚུགས་པའི་འགྲེལ་བཤད་དང་བསམ་བློ་འཁོར་རྒྱུ་དང་། འཁོར་འཇུག་རྒྱུ་དེ་ཤིན་ཏུ་གལ་ཆེ་བ་ཡིན།
དེ་ནས་མིའི་འཇོན་ཐང་སློབ་གསོ་ནི་མིའི་གཤིས་སྤྱོད་དང་ཁ་འབྲལ་ཐབས་མེད་ཅིང་། འདི་གཉིས་ཕན་ཚུན་གཅིག་ལ་གཅིག་བརྟེན་ལྟོས་ཚབས་ཆེ་བ་དང་། མིའི་སྒོ་གསུམ་འདུལ་སྦྱོང་གི་གོ་རྟོགས་བྱང་ཚད་དང་ལྷག་བསམ་མེད་ན། ལུས་ངག་ཁོ་ནའི་ས་མཆོང་གནམ་མཆོང་ཙམ་ནི་སྣུམ་ཟད་ཀྱི་མར་མེ་ནང་བཞིན་འོད་སྣང་འབྱིན་ཞིང་མུན་པ་སེལ་བའི་སྐབས་དང་སྟོབས་མེད་པ་དང་འདྲའོ། རྣམ་དཔྱོད་དང་ལྷག་བསམ་གཉིས་ནི་ཚེ་འདིའི་སོ་ཚིས་འཚོ་རྟེན་ཙམ་དུ་མ་ཟད། དེ་ལས་ལྷག་པར་མི་རིགས་དང་རྒྱལ་ཁབ་ལ་གསར་གཏོད་དང་རྒྱུན་གནས་རང་བཞིན་གྱི་ལས་ཀ་གང་ཞིག་བྱ་དགོས་བྱེད་སྐབས་བྱུང་ན། དེས་གོ་སྐབས་དང་ནུས་པ་འདང་ངེས་ཆོད་པ་ཞིག་སྟེར་བ་དང་། དེར་མ་ཟད་ཆོས་ཕྱོགས་ནས་ཀྱང་ས་ལམ་གྱི་རྟོགས་པ་ཆེ་ཆུང་དང་། ལམ་གྱི་བགྲོད་པ་མྱུར་བུལ། ཕྱི་མའི་བདེ་སྡུག་གི་འདེམ་གསེས་འདེམ་ག་ཐམས་ཅད་རྣམ་དཔྱོད་དང་ལྷག་བསམ་གཉིས་ལ་ལྟོས་ཚབས་ཤིན་ཏུ་ཆེ་བས། སློབ་གསོ་ནི་སྒོ་གསུམ་གྱི་འདུལ་སྦྱོང་ཡིན་པ་དང་། དེ་བས་ཀྱང་སེམས་ཀྱི་འདུལ་སྦྱོང་ནི་སློབ་གསོ་སྤྱི་ཡི་ཨ་མ་ལྟ་བུ་ཡིན་ནོ།།
ཆུང་ཆུང་མེ་ཏོག་འཛུམ་རིས་འཇའ་ལ་ཐིམ།།
དར་བབ་འོ་མའི་འཇམ་ཤ་ཟླ་བས་འཐུང་།།
རྒས་འཁོགས་གྲུང་ཤ་དོད་པོ་ལྕགས་ཀྱིས་བརྡུངས།།
མ་ཤི་གསོན་གྱི་དོན་སྒོ་གང་ལ་འཐེན།།
