ས་གནས་མགོ་འཛིན་རྣམ་པར་རྩོད་རྙོག་འདུམ་འགྲིག་གི་ཟབ་སྦྱོང་འཚོཊ།

བོད་ཀྱི་རྩོད་རྙོག་འདུམ་འགྲིག་ལྟེ་གནས་ཁང་གིས་རྒྱ་བལ་འབྲུག་གསུམ་ནས་ཡོང་བའི་ས་གནས་མགོ་འཛིན་རྣམ་པར་ཉིན་གྲངས་གཉིས་རིང་རྩོད་རྙོག་འདུམ་འགྲིག་ཇི་ལྟར་གནང་དགོས་པའི་སྐོར་ནས་ཟབ་སྦྱོང་ཞིག་སྤྲོད་བཞིན་འདུག
ཉིན་གྲངས་ ༤ རིང་གི་བོད་མིའི་ས་གནས་མགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་གཅིག་པ་མཇུག་སྒྲིལ་བ་དང་བསྟུན། དེ་རིང་སྔ་དྲོའི་ཆུ་ཚོད་ ༩ པ་ཐོག་གངས་སྐྱིད་གཉའ་ཁྲི་ཚོགས་ཁང་དུ། བོད་ཀྱི་རྩོད་རྙོག་འདུམ་འགྲིག་ལྟེ་གནས་ཁང་གི་གོ་སྒྲིག་འོག རྒྱ་བལ་འབྲུག་གསུམ་ནས་ཕེབས་པའི་ས་གནས་མགོ་འཛིན་རྣམ་པར། རྩོད་རྙོག་རིགས་བར་འདུམ་མ་བྱས་སྔོན་དུ་ཆ་རྐྱེན་ག་རེ་ཚང་དགོས་ཀྱི་ཡོད་པ་དང་། དེ་ནས་བར་འདུམ་ཇི་ལྟར་གནང་དགོས་པའི་སྐོར་ནས་ཉིན་གཉིས་རིང་ཟབ་སྦྱོང་ཞིག་དབུ་འཛུགས་གནང་ཡོད་པ་དང་། ཟབ་སྦྱོང་དབུ་འཛུགས་ཀྱི་སྐུ་མགྲོན་གཙོ་བོ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས། ལྟེ་གནས་ཁང་གི་ཐོག་མའི་དམིགས་ཡུལ་གཞིར་བཟུང་བཙན་བྱོལ་བོད་མིའི་སྤྱི་ཚོགས་གཅིག་པུ་ཙམ་མིན་པར། རྒྱ་གར་གྱི་མཐོ་སློབ་སོགས་ཀྱི་ནང་རྩོད་རྙོག་འདུམ་འགྲིག་དང་འབྲེལ་བའི་ཟབ་སྦྱོང་གང་མང་གོ་སྒྲིག་གནང་ཐུབ་ཡོད་པ་དེ་ཧ་ཅང་གཟི་བརྗིད་ཆེན་པོ་ཞིག་ཏུ་ངོས་འཛིན་གནང་བཞིན་ཡོད་ལ། མ་འོངས་པར་ཕྱག་ལས་མུ་མཐུད་རྒྱུན་སྐྱོང་ཡར་རྒྱས་གཏོང་དགོས་པ་ལས་མི་རེ་ཟུང་ཞིག་གི་ཁེ་ཕན་དང་ཆབ་སྲིད་ཀྱི་ངོ་བོར་མ་འགྲོ་བ་ཞིག་གནང་དགོས་སྐོར་གསུངས་སོང་།

ཟབ་སྦྱོང་དབུ་འཛུགས་ཐོག བོད་ཀྱི་རྩོད་རྙོག་འདུམ་འགྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ལགས་ཀྱིས་ལྟེ་གནས་ཁང་གི་ངོས་ནས་ཕྱི་ལོ་ ༢༠༠༡ ནས་བཟུང་ད་ལྟའི་བར་དུ་ལས་འགུལ་རྣམ་གྲངས་མི་འདྲ་བ་ ༥༠༠ ལྷག་གོ་སྒྲིག་གནང་ཡོད་པ་དང་། ལས་འགུལ་ཁག་གི་ནང་བཙན་བྱོལ་བོད་མི་དང་རྒྱ་གར་བ། ཕྱི་རྒྱལ་བ་བཅས་མི་གྲངས་ཁྲི་ཚོ་བརྒལ་བ་མཉམ་ཞུགས་བྱས་ཡོད་སྐོར་ངོ་སྤྲོད་གནང་བ་དང་འབྲེལ། ད་ལན་གྱི་ཟབ་སྦྱོང་གི་དམིགས་ཡུལ་གཙོ་བོ་ནི་ས་གནས་མགོ་འཛིན་རྣམ་པས་ས་གནས་ས་ཐོག་ཏུ་སྐུ་ལས་མང་པོ་བསྐྱོན་ཏེ་ཉམས་མྱོང་ལྡན་པ་དང་། དོགས་གནད་མང་པོ་ཞེ་དྲགས་བསྣམས་ནས་ཕེབས་ཡོད་པ་དང་། རྩོད་རྙོག་ནི་མིའི་མི་ཚེ་ཡི་ཆ་ཤས་ཤིག་ཡིན་པས་ག་དུས་ཡིན་ནའང་ཡོང་གི་ཡོད་པའི་གནས་སྟངས་ཤིག་ཆགས་བསྡད་ཡོད་སྟབས། ས་གནས་མགོ་འཛིན་རྣམ་པའི་ཉམས་མྱོང་དང་གུ་ཡངས་ཀྱི་ཐོག་ནས་ད་ལྟའི་བར་དུ་ཕྱག་ལས་གནང་བསྡད་པ་དང་། དེང་སང་དམངས་གཙོའི་རྒྱལ་ཁབ་དང་ལྷག་པར་དུ་ནུབ་ཕྱོགས་ཀྱི་རྒྱལ་ཁབ་མང་པོའི་ནང་གལ་ཆེ་ཤོས་གཅིག་དེ་རྩོད་རྙོག་རྣམས་འཚེ་མེད་ཞི་བའི་ཐོག་ནས་གདོང་ལེན་བྱེད་དགོས་ཀྱི་ཡོད་སྟབས། རྩོད་རྙོག་ག་འདྲ་ཞིག་ཡིན་ནའང་བར་འདུམ་བྱེད་དགོས་པ་དང་། བར་འདུམ་བྱེད་སྟངས་ལལའང་དེང་དུས་དང་མཐུན་པའི་ཐབས་ལམ་མང་པོ་ཞིག་ཡོད་པ་ས་གནས་མགོ་འཛིན་རྣམ་པས་མཁྱེན་གྱི་ཡོད་ཀྱང་། ལྟེ་གནས་ཁང་གི་ངོས་ནས་ཤེས་རྟོགས་ཡོད་པ་རྣམས་སྤྱན་འབུལ་ཞུ་རྒྱུ་དང་། ས་གནས་མགོ་འཛིན་རྣམ་པའི་ཉམས་མྱོང་དང་གུ་ཡངས་ཀྱི་གནང་ཕྱོགས་ཐོག་ནས་ལྟེ་གནས་ཁང་གི་ངོས་ནས་མ་འོངས་པར་ཡར་རྒྱས་གཏོང་རྒྱུ་དང་། བོད་པ་ཙམ་མིན་པར་རྒྱ་གར་དང་ཕྱི་རྒྱལ་གྱི་མི་རིགས་གཞན་ལའང་ཞབས་ཞུ་ཞུ་བར་ཏན་ཏན་ཐུགས་ཕན་གསོ་ཐུབ་པ་མང་པོ་ཞིག་ཤེས་རྟོགས་བྱུང་རྒྱུ་དང་། དེ་བཞིན་ས་གནས་མགོ་འཛིན་རྣམ་པས་མ་འོངས་པར་ས་གནས་ཁག་གི་ནང་ལས་དོན་སྔར་ལས་ཚགས་ཚུད་དང་ནུས་པ་ཆེ་རུ་འཐོན་པར་ཐུགས་ཕན་གསོ་ཐུབ་པའི་རེ་བ་དང་དམིགས་བསལ་ཡོད་སྐོར་བརྗོད་སོང་།

འཁོར་ལྷ་ཚང་བསོད་ནམས་སྟོབས་རྒྱལ་མཆོག་ནས་ལྟེ་གནས་ཁང་གི་ངོས་ནས་ཐོག་མའི་དམིགས་ཡུལ་ལྟར་སྤྱི་ཚོགས་ནང་ཐུགས་ཕན་གསོ་ཐུབ་ཀྱི་ཡོད་པ་དེ་མ་འོངས་པར་ཡར་རྒྱས་རྒྱུན་སྐྱོང་དགོས་སྐོར་གསུངས་དོན། ལྟེ་གནས་ཁང་གི་ངོས་ནས་བོད་པ་ཙམ་མིན་པར་རྒྱ་གར་གྱི་མཐོ་སློབ་སོགས་ཀྱི་ནང་ཕེབས་ཏེ་ཟབ་སྦྱོང་སྤྲད་པའི་གནས་ཚུལ་བརྒྱུད་ལམ་ཁག་ཏུ་མང་པོ་ཐོན་ཡོད་སྟབས། ཐོག་མའི་དམིགས་ཡུལ་གཞིར་བཟུང་གིས་དཔེར་ན་མདའ་དེ་འབེན་རང་གི་ཐོག་གཏད་ནས་ཏག་ཏག་གཏོར་ཐུབ་པའི་དམིགས་ཡུལ་འཛིན་ཐུབ་པ་དེ་ཧ་ལས་པའི་གཟི་བརྗིད་ཆེན་པོ་ཡིན་པ་ཞིག་ལ་ངོས་འཛིན་བྱེད་བཞིན་ཡོད་ཀྱང་། མ་འོངས་པར་གཟི་བརྗིད་དེ་མི་རེ་གཉིས་ཤིག་གི་ཁེ་ཕན་དང་ཆབ་སྲིད་ཀྱི་ངོ་བོ་ཞིག་ཏུ་བསྒྱུར་ཏེ་ཕྱིན་པ་ཡིན་ན་ཞེ་དྲགས་ཕངས་པོ་ཡིན་སྟབས། དེ་འདྲ་ཞིག་གི་སྒང་ལ་འགྲོ་ཡི་རེད་བསམ་པ་མེད་ཀྱང་དེ་འདྲར་མི་འགྲོ་བར་ཏན་ཏན་དགོངས་པ་བཞེས་དགོས་སྐོར་དང་། ཐེངས་འདིའི་ཉིན་གཉིས་ཀྱི་ཟབ་སྦྱོང་ཁྲོད་ཚོགས་ཞུགས་པ་རྣམ་ནས་ལྟེ་གནས་ཁང་གི་ཕྱག་ལས་སྔར་ལས་ཚགས་ཚུད་དང་སྤུས་དག་ཏུ་ཡོང་བར་དགོངས་འཆར་གནང་ཐུབ་ན། མ་འོངས་པར་ཚོགས་ཆེན་གཉིས་པ་ཞིག་ཚོགས་ཡོང་སྐབས་ལྟེ་གནས་ཁང་གི་ལས་བསྡོམས་ནང་ད་ལྟའི་གནས་སྟངས་ལས་ལྷག་ཅིག་སྙན་གསེང་ཞུ་རྒྱུ་ཡོང་བར་དགོངས་བཞེས་འབད་བརྩོན་གནང་དགོས་སྐོར་གསུངས་སོང་།

གསར་འགོད་པ། པདྨ་མཚོ།