ཧ་ཝིར་ཌི་གཙུག་ལག་སློབ་ཆེན་ཆབ་སྲིད་ཚན་པའི་ཚོད་ལྟའི་འོས་གྲངས་ཁྲོད་ཨ་རིའི་གཞོན་སྐྱེས་ཁྲོད་ཊི་རུམ་ཕི་ལ་རྒྱབ་སྐྱོར་བྱེད་མཁན་བརྒྱ་ཆ་ ༢༡ དང་ལྕམ་ཧེ་ལ་རེ་ལ་རྒྱབ་སྐྱོར་བྱེད་མཁན་བརྒྱ་ཆ་ ༤༩ ཟིན་འདུག་ཟེར།
དེ་རིང་རྒྱ་ནག་ལྷོ་རྒྱུད་ཞོགས་པའི་ཚགས་པར་གྱིས་གནས་ཚུལ་སྤེལ་བ་ལྟར། ཁ་སང་ཨ་རིའི་ཧ་ཝིར་ཌི་གཙུག་ལག་སློབ་ཆེན་གྱི་ཆབ་སྲིད་ཚན་པས་ཨ་རིའི་སྲིད་འཛིན་འོས་བསྡུ་དང་འབྲེལ་བའི་ཚོད་ལྟའི་འོས་ཤོག་ཞིབ་བཤེར་གྲངས་ཐོ་ཞིག་ཕྱི་བསྒྲགས་བྱས་པའི་ནང་། ཨ་རིའི་ནང་གི་རང་ལོ་ ༡༨ ནས་ ༢༩ བར་གྱི་གཞོན་སྐྱེས་ཚོའི་ཁྲོད་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ལ་འོས་གྲངས་བརྒྱ་ཆ་ ༤༩ དང་། སྤྱི་མཐུན་ཚོགས་པའི་འོས་མི་སྐུ་ཞབས་ཊི་རུམ་ཕི་ལ་འོས་གྲངས་བརྒྱ་ཆ་ ༢༡། དེ་བཞིན། ངལ་རྩོལ་ཚོགས་པའི་སྲིད་འཛིན་འོས་མི་སྐུ་ཞབས་གྷ་རེ་རྗོན་སན་ལ་འོས་གྲངས་བརྒྱ་ཆ་ ༡༤ ། གྷི་རན་ཚོགས་པའི་སྲིད་འཛིན་འོས་མི་ལྕམ་རྗེལ་སི་ཊེན་ལ་འོས་གྲངས་བརྒྱ་ཆ་ ༥ བཅས་ཐོབ་ཡོད་འདུག
ཧ་ཝིར་ཌི་གཙུག་ལག་སློབ་ཆེན་གྱི་འོས་གྲངས་ཞིབ་བཤེར་འགན་འཛིན་སྐུ་ཞབས་རྗོན་ཌི་ལ་ཝོལ་ཕི་ (John Della Volpe) ལགས་ཀྱིས། ཐེངས་འདིའི་འོས་གྲངས་ཞིབ་བཤེར་གྱི་གྲུབ་འབྲས་དེ་གཞོན་སྐྱེས་ཚོར་ཨ་རིའི་མ་འོངས་སྲིད་དོན་ཁ་ཕྱོགས་ལ་སེམས་འཚུབ་ལང་གི་ཡོད་པའི་རྣམ་པ་ཞིག་མཚོན་གྱི་ཡོད་སྟབས། ཨ་རིའི་གྲོས་ཚོགས་ནས་ཨ་རིའི་རྒྱལ་ཁབ་མདུན་ཕྱོགས་སུ་སྣེ་ཁྲིད་དེ་ཨ་རིའི་གཞོན་སྐྱོས་ཚོའི་མ་འོངས་ལས་གནས་དང་ནུས་སྟོབས་མཐོར་འདེགས་གཏོང་བར་རེ་བ་ཡོད་སྐོར་བརྗོད་འདུག
སེ་ཨན་ཨན་གསར་ཁང་གིས་སྤེལ་བའི་གནས་ཚུལ་ཞིག་གི་ནང་། ཨ་རིའི་རྒྱལ་དོན་དྲུང་ཆེ་ཟུར་བ་སྐུ་ཞབས་ཕོ་ཝིལ་ (Powel) ལགས་ཀྱིས། སྤྱིར་ཁོང་ནི་ཨ་རིའི་སྤྱི་མཐུན་ཚོགས་པའི་དཔོན་རིགས་ཤིག་ཡིན་ནའང་། ཁོང་གིས་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ཡི་ཨ་རིའི་སྲིད་དོན་ཐད་ཀྱི་ཉམས་མྱོང་དང་ཤེས་འཇོན་ལ་གཞིགས་ཏེ་ཁོང་མོར་འོས་ལྡུག་རྒྱུ་ཡིན་སྐོར་དང་། སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་ཡིས་རྒྱུན་པར་ཨ་རིའི་གཞུང་མང་གཉིས་ལ་དམའ་འབེབས་བྱེད་པ་དང་། ལྷག་པར་དུ་བུད་མེད་ལ་མཐོང་ཆུང་བྱེད་པ། ཁོ་རང་གི་སྤྱི་མཐུན་ཚོགས་པར་མཚང་འབྱིན་བྱེད་པ། དེ་བཞིན། ཨ་རིའི་མཐུན་ཕྱོགས་རྒྱལ་ཁབ་ཁག་ལ་སྐྱོན་འཛུགས་བྱེད་ཀྱིན་ཡོད་པ་དང་། དེ་ནི་སྐུ་ཞབས་ཊི་རུམ་ཕི་ལ་ཨ་རིའི་སྲིད་དོན་ཐད་ཉམས་མྱོང་མེད་པའི་སྐད་ཆ་ཡིན་སྐོར་སོགས་བརྗོད་འདུག
ཧ་ཝིར་ཌི་གཙུག་ལག་སློབ་ཆེན་གྱི་ཆབ་སྲིད་ཚན་པའི་ཞིབ་འཇུག་གྲུབ་འབྲས་ལྟར་ན། ཨ་རིའི་གཞོན་སྐྱེས་བརྒྱ་ཆ་ ༢༠ ཨ་རིའི་མ་འོངས་སྲིད་དོན་ཁ་ཕྱོགས་ལ་རེ་བས་ཁེངས་ཡོད་པ་དང་། གཞོན་སྐྱེས་བརྒྱ་ཆ་ ༥༡ སེམས་འཚུབ་ལང་གི་ཡོད་པ། དེའི་གྲས་ཀྱི་བརྒྱ་ཆ་ ༦༠ བུད་མེད་ཡིན་འདུག
གཞན། དེ་རིང་ནེའུ་ཡོག་དུས་བབ་གསར་ཁང་གིས་འོས་གྲངས་ཞིབ་བཤེར་རུས་མིག་ཅིག་སྤེལ་བའི་སྟེང་། དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ལ་སྲིད་འཛིན་རྒྱལ་ཁ་འཐོབ་པའི་གོ་སྐབས་བརྒྱ་ཆ་ ༩༢ ཟིན་གྱི་ཡོད་སྐོར་བཀོད་འདུག་ལ། རུས་མིག་དེ་ནི་རྒྱལ་སྤྱིའི་གཞུང་མང་གཉིས་ནས་ལྕམ་ཧེ་ལ་རེ་ལ་རྒྱབ་སྐྱོར་གྱི་རྣམ་པ་གཞིར་བཟུང་བ་ཞིག་ཡིན་འདུག
གསར་འགོད་པ། པདྨ་རྒྱལ།
