བླ་རུང་སྒར་གྱི་ཀུན་སྤྱོད་ཀྱི་རྫོགས་ལྡན།

རྫ་ཚེ་རིང་བཀྲ་ཤིས།

གཅིག ༽  མ་གཞི་རང་གི་རྡོ་རྗེ་སློབ་དཔོན་ལ་གུས་ཞབས་བྱེད་པ་ནི་ཆ་རྐྱེན་གང་ཡང་མེད་པའི་ཡོང་དགོས། འདུལ་བའི་བསླབ་ཁྲིམས་ཀྱི་གོ་རིམ་དང་སྦྱར་ནས་གོང་འོག་ལ་ཐེག་ཆེན་དང་གསང་སྔགས་ཀྱི་བླ་མ་བསྟེན་ཚུལ་གཏན་ནས་མ་ཤེས་པ་རེད།

གཉིས། ༽
  ༢༠༡༦ལའི་སྤྱི་ཟླ་༡༡་པའི་ཚེས་༣སྟེ་ཁར་རྩང་། དཔལ་བླ་རུང་གི་རྒྱུན་ལས་དབུ་འཛིན་ཁག་ཅིག་ཁྲིན་ཏུར་ཕེབས་ནས་གླིང་གཙོ་རྫེ་བཙུན་མ་མུ་མཚོར་ཆེད་མཇལ་གྱིས་ཉེ་ཆར་བླ་རུང་སྒར་གྱི་མདུན་དུ་ལྷག་པའི་དཀའ་ངལ་ལ་གདོང་ལེན་བྱེད་སྟངས་སྐོར་གྱི་སྙན་གསེང་དང་། མ་འོངས་གནང་ཕྱོགས་ཀྱི་ཐད་ལ་བཀའ་སློབ་ལམ་སྟོན་ཞུས་འདུག་ལ་ད་ལྟ་དྲ་ཐོག་ཏུ་འགྲོ་བཞིན་པའི་འདྲ་པར་དག་ཀྱང་དེ་དུས་སྒྲོན་པ་རེད་འདུག

གཉིས༽  
རྗེ་བཙུན་མ་མུ་མཚོ་ནི་ཆོས་རྗེ་མཁན་ཆེན་འཇིགས་མེད་ཕུན་ཚོགས་ཀྱི་སྐུའི་ཚ་མོ་དང་ཐུགས་སྲས་རེད། བླ་རུང་སྒར་གྱིས་ཀྱང་ཆོས་རྗེ་མཆོག་གི་ཚ་བོ་ཚ་མོ་ཡིན་པ་ཚང་མ་གོང་བཀུར་དེ་འདྲ་བྱེད་ཀྱི་ཡོད་མ་རེད། སའི་སྟེང་འདི་ན་མཁན་ཆེན་འཇིགས་མེད་ཕུན་ཚོགས་ཀྱི་དབང་ལུང་མན་ངག་གི་བརྒྱུད་པ་ཡོངས་སུ་རྫོགས་པའི་གང་ཟག་ནི་ཁོང་ལས་མེད་པར་བཤད།

གསུམ༽  
ཚུལ་མཐོང་གི་དབང་དུ་བྱས་ན་ཡང་ཁོང་མོ་ད་བར་མི་ལོ་བཅུ་ཕྲག་མང་པོའི་རིང་ཆོས་རྗེ་མཆོག་གིས་དབང་ལུང་མན་ངག་སློབ་ཁྲིད་བཅས་ཀྱིས་གསོ་སྐྱོང་ཚད་ལྡན་གནང་བ་དང་། རྟེན་ཤིན་ཏུ་བཙུན་པོར་བཞུགས་པ། ཚུགས་ཐུབ་པ། ཆོས་ཀྱི་མཁྱེན་རྒྱ་ཡོད་པ། དགེ་འདུན་པ་ཁྲི་ཕྲག་ལ་མདོ་སྔགས་ཀྱི་འཆད་ཁྲིད་གནང་ཐུབ་མཁན་ཞིག་ཡིན་འདུག

གསུམ།༽  
ཆོས་རྗེ་མཆོག་འདས་རྗེས་ཁོང་མོ་ནི་བུ་སློབ་རྣམས་ཀྱི་ཆགས་ས་རྟེན་ས་གཙོ་བོ་ཆགས་ཡོད། བླ་རུང་འདི་རྨང་གཞིའི་ཆ་ནས་དགོན་པ་མ་རེད་སྒར་རེད། སྒར་ཟེར་ན་ཕྱོགས་མེད་ཀྱི་ཆོས་པ་མཉམ་འདུས་བྱས་ནས་མཉམ་བསྡོད་བྱེད་པ་ཞིག་རེད། དེ་ནས་ཁོང་ཚོ་ནང་མི་ནང་བཞིན་ཆགས་པ་རེད། དེ་འདྲའི་དམིགས་བསལ་གྱི་གནས་བབས་འོག་ནས་ཆོས་རྗེ་ཡིད་བཞིན་ནོར་བུ་མིང་སྲིང་གཉིས་གཤེགས་རྗེས་སྒར་གྱི་སེམས་འཁྲི་ས་གཙོ་བོའི་ནང་གི་གཙོ་བོ་གཅིག་དེ་ཁོང་རེད།

བཞི།༽  
རྗེ་བཙུན་མ་མུ་མཚོ་ནི་བླ་རུང་སྒར་གྱི་གླིང་གཙོ་རེད། ཚང་མས་བླ་མ་བཞུགས་པའི་སྐབས་ནས་དབང་དང་ཁྲིད་ཞུ་གིན་ཡོད་པ་རེད། ཚང་མའི་རྩ་བའི་བླ་མར་གྱུར་ཡོད། བླ་མ་བསྟེན་ཚུལ་གྱི་དབང་དུ་བྱས་ན་ཚུལ་ཁྲིམས་བློ་གྲོས་དང་བསོད་དར་རྒྱས་སོགས་ཡོན་ཏན་ཆེ་བ་དང་གྲགས་པ་ཆེ་བར་དམིགས་བསལ་གང་ཡང་མེད་པ་རེད། བླ་མར་གྱུར་ཕན་ཆད་ཟོལ་ཟོག་སྤངས་པའི་གུས་ཞབས་ཞུ་བ་ནི་ཆ་རྐྱེན་གང་ཡང་མེད་པའི་ཐོག་ནས་དང་ལེན་བྱ་དགོས་པ་ཞིག་རེད།

ལྔ། ༽  
མ་གཞི་དེང་སང་དཔེ་ཆ་བ་ཡིན་ཟེར་མཁན། གསང་སྔགས་ཉམས་ལེན་པ་ཡིན་ཟེར་མཁན་མང་པོ་ཞིག་གིས་གསང་སྔགས་དང་ཐེག་ཆེན་གྱི་ཉམས་ལེན་གྱི་དྲི་ཡང་མི་བྲོ་བའི་སྐད་ཆ་ཞེ་སུན་པ་དེ་འདྲ་བཤད་ཀྱི་འདུག གསང་སྔགས་དང་ཐེག་ཆེན་གྱི་བཏུལ་ཞུགས་དང་དམ་ཚིག་ཆུང་ཆུང་དེ་འདྲའང་བློ་ལ་མ་ཤོངས་པའི་འཕྱ་དམོད་བྱེད་ཀྱི་འདུག ཆེ་ས་ནས་༧གོང་ས་སྐྱབས་མགོན་ཆེན་པོས་དིལ་མགོ་མཁྱེན་བརྩེ་བླ་མར་བསྟེན་པ་རེད། ཁ་སྐད་བྱས་ན་དགེ་སློང་ཉེ་བ་འཁོར་ལྟ་བུ་ཁོང་གིས་རྙིང་མའི་རྒད་པོ་ཞིག་ལ་ཕྱག་འཚལ་བ་རེད། ད་དུང་སེ་འབྲས་དགེ་གསུམ་གྱི་དགེ་བཤེས་བཟང་ལ་མང་པ་ཚང་མ་༧ས་སྐྱ་གོང་མའི་མདུན་དུ་ཆེད་དུ་བཏང་ནས་རིན་འབྱུང་རྒྱ་རྩ་སོགས་ཞུ་བཅུག་པ་རེད། ར་སྟོད་ཀྱི་མཁན་པོ་ཕྱི་རྒྱལ་བ་དེས་ཀྱང་གཅོང་བླ་རིན་པོ་ཆེ་ཁྱིམ་པའི་རྟེན་ཅན་དེའི་ཞབས་ཞུ་བྱས་ནས་རྒྱལ་ཕྱི་ནང་གང་སར་འགྲོ་གི་འདུག ད་དུང་ཁ་སྐད་བྱས་ན་ས་སྐྱ་གོང་མ་ཚང་དགའ་ལྡན་ཁྲི་བའི་གོང་བཞུགས་པ་ནི་བོད་ལ་མཚོན་ན་ཡོངས་གྲགས་ཀྱི་གནས་ལུགས་ཤིག་རེད། ངས་ནི་འདི་ཚང་མ་སྤྱིར་བཏང་ཙམ་དུ་མཐོང་གི་ཡོད། གང་ཡིན་ཟེར་ན་ང་ལ་དད་པ་ཟེར་བ་ཧ་ལས་པ་ཞིག་མེད་ཀྱང་། ཐེག་ཆེན་དང་གསང་སྔགས་ཀྱི་རྒྱུན་ཤེས་ཡོད་པ་རེད།

དྲུག ༽  
འདུལ་བའི་ལས་བྱེད་པའི་སྐབས་སུ་དགེ་ཚུལ་སློང་དང་བསླབ་པ་རྒན་གཞོན་འདུལ་བ་བཞིན་དགོས་པ་རྩོད་མེད་རེད། ཐེག་ཆེན་དང་བསྔགས་ཀྱི་དམ་ཚིག་དང་གོང་འོག་དེ་རྟེན་དགེ་ཚུལ་སློང་གང་ཡིན་སོགས་ཀྱི་ཐོག་ནས་འགྲོ་བ་ཞིག་མ་རེད། སྨྲ་བ་ལ་དགའ་མཁན་དེ་ཚོས་ཐ་ན་ཁ་ལ་འཁྱེར་བཞིན་པའི་འདུལ་བའང་མ་ཤེས་པའི་རྟགས་རེད། མཐར་གཏུགས་ན་དེ་ནི་ཆོས་ཀྱི་འགྲོ་སྟངས་མ་ཤེས་པའི་རྟགས་རེད།

བདུན།༽  
རྗེ་མཙུན་མ་མུ་མཚོ་ལ་བླ་རུང་སྒར་གྱིས་ལྷ་དང་བླ་མ་རུ་བཀུར་གྱི་ཡོད། ཟོལ་མེད་ཀྱི་དད་ཞེན་ཞུ་གིན་འདུག འོན་ཀྱང་། ཁོང་རང་ངོས་ནས་ཁུ་སིམ་དང་ཧ་ཅང་ཁེངས་བསྐྱུངས་ཀྱིས་ཆོས་རང་ཉམས་ལེན་གནང་གི་ཡོད། བླ་རུང་གི་ལས་རིགས་ཡོངས་རྫོགས་དགེ་འདུན་པའི་མང་གཙོའི་ལམ་ནས་ཐག་བཅོད་བྱེད་པ་ལ་ཁོང་གི་གོ་བབས་དང་མཚན་གནས་རྗེས་འབྲེལ་གྱི་དབང་ཐང་གིས་འགོག་རྐྱེན་རྩ་བ་ནས་མེད།

བརྒྱད།༽  
ཚུལ་ཁྲིམས་བློ་གྲོས་དང་བསོད་དར་རྒྱས་ལྟ་བུ་མཚན་སྙན་དང་གྲགས་པ་ཡོད་པ་དེ་ཚོས་ཀྱང་ནང་ལ་བསླེབས་ན་ཁོང་ནི་ནང་གི་ཨ་མ་ནང་ལྟར་དང་། སོ་སོ་དེའི་མཐའ་ན་བུ་ཕྲུག་བཞིན་བཞུགས་ཀྱི་ཡོད། ཁོང་ཚོས་བླ་མ་མི་བཞུགས་པའི་སྐབས་སུའང་རང་གི་དབང་ཐང་གིས་བུད་མེད་དང་དགེ་ཚུལ་གྱི་རྟེན་ཅན་ཡིན་པའི་ཇོ་མོ་འདི་མིག་ལམ་ནས་འབོར་གྱི་མེད།

དགུ།༽ 
 བླ་རུང་སྒར་ལ་གནད་འགག་གི་དཀའ་ངལ་ཕྲད་པའི་སྐབས་སུ་དང་། དེ་ལ་གདོང་ལེན་བྱེད་པའི་སྐབས་སུ་ལས་འཛིན་ཚོས་ཇོ་མོ་འདི་ཁ་གཡོར་ས་དང་ཁག་འགེལ་ས་བྱས་ནས་དོན་ཆེན་དང་། ཡང་ན་འགན་འཁྲི་ལས་གཡོལ་ཐབས་བྱེད་ཀྱི་མེད། མོའི་སྐད་ཆ་ཁུར་ནས་ལག་པ་འཕྱི་ས་ཡང་བྱེད་ཀྱི་མེད། ཁོང་ཚོས་ཁོང་ཚོ་དང་རྗེ་བཙུན་མ་མུ་མཚོའི་བར་གྱི་འབྲེལ་བ་དེ་ལས་ཁུངས་དང་མགོ་དཔོན་གྱི་འབྲེལ་བ་ཙམ་དུ་མི་བསྒྱུར་བར་བླ་སློབ་ཀྱི་དམ་ཚིག་དང་བརྩེ་དུང་གི་གཉུག་གཤིས་དག་མ་ཞིག་ཉར་གྱིན་ཡོད། ཁོང་ཚོའི་འབྲེལ་བ་དེ་དགོན་དཔོན་དང་སྒྲིག་འཛུགས་ཀྱི་འབྲེལ་བ་སྤྱིར་བཏང་བ་དང་མ་འདྲ་བའི་འབྲེལ་བ་ཞིག་རེད།

བཅུ།༽ 
 ཁོང་ཚོའི་ཐོག་ན་ཆོས་ཀྱི་དད་གུས་དང་དམ་ཚིག་གི་ཞག་རྩི་ཡོད། ཁོང་ཚོར་འཇིག་རྟེན་ཡ་རབས་ཀྱི་ཕྱི་ཐག་དང་བརྩེ་དུང་གི་འོད་མདངས་ཡོད། ཁོང་ཚོས་སོ་སོས་ཆོས་ཕྱོགས་ཀྱི་གནས་བབ། བླ་སློབ་ཀྱི་གནས་བབ། འཇིག་རྟེན་གྱི་གནས་བབ། འགན་འཁྲིའི་གནས་བབ་ཚང་མ་ངོས་ཟིན་ཡོད། 
ཚུལ་ཁྲིམས་བློ་གྲོས་དང་བསོད་དར་རྒྱས་ལྟ་བུ་སའི་གོ་ལའི་ཐོག་ཏུ་གྲགས་པ་རྒྱས་ཀྱང་། མུ་མཚོའི་མདུན་དུ་གཅར་སྐབས་ལོ་ངོ་སུམ་ཅུའི་ཡར་སྔོན་གྱི་དུས་ཚོད་ཅིག་ལ། རུམ་བྲོ་མེད། འོག་རྟ་མེད་ཀྱིས་ཆོས་རྣལ་མ་ཞིག་ཞེ་ལ་བཅངས་ནས་བླ་རུང་སྒར་དུ་ཆོས་རྗེ་ཡིད་བཞིན་ནོར་བུ་ཞང་དབོན་གསུམ་མཇལ་དུ་ཡོང་དུས་ཀྱི་སོ་སོའི་གྲྭ་རྐྱང་གི་ཀུན་སྤྱོད་དང་གནས་བབ་དེ་རང་འཇགས་ཉར་ཡོད། འདི་ལ་རླབས་ཆེན་ཟེར། བླ་རུང་སྒར་དང་ཁོང་རྣམ་པའི་མཛད་སྤྱོད་ལ་ཆ་རྒྱུས་ཏོག་ཙམ་མེད་ན་ངའི་སྐད་ཆ་འདི་མི་ཐུབ་པ་ཡོང་སྲིད། འདི་ནི་ང་ཡིན་ཁོ་ཡིན་ཟེར་མཁན་མང་པོ་ཞིག་གིས་གནང་མི་ཐུབ་པ་ཞིག་རེད། འདི་ཙམ་དུ་ཕྱོགས་སུ་མ་ལྷུང་བ་དང་། ཆ་སྙོམས་པའི་མཛད་པ་ནི་ཤིན་ཏུ་དཔོག་པར་དཀའ་བ་ཞིག་རེད། འདི་ལ་ཀུན་སྤྱོད་ཀྱི་རྫོགས་ལྡན་ཟེར། གུས་པ་དུས་ཀྱི་མཐའ་འདི་ཙམ་དུ་སྐྱེས་ཀྱང་ཁོང་རྣམ་པའི་མཛད་དང་འཕྲིན་ལས་མིག་གིས་མཇལ་ཐུབ་པ་ནི་ཧ་ཅང་བསྐལ་བ་བཟང་པོར་སྙམ།

བཅུ་གཅིག༽  གཅིག་བྱས་ན། ང་ལ་བླ་རུང་སྒར་གྱི་མཁན་ཆེན་དེ་ཚོའི་དུག་ཕོག་པ་འདྲ། ག་དུས་ཡིན་ན་ཁོང་ཚོའི་མཛད་པ་མཐོང་དུས་མིག་ཆུ་ཤོར་ལ་ཁད་ཀྱི་སེམས་འགུལ་དང་ཡ་མཚན་གྱི་ཚོར་བ་སྐྱེ་གིན་འདུག འདི་ལ་བཅོས་མ་དང་ཕྱོགས་ལྷུང་གཏན་ནས་མེད།

འོན་ཀྱང་། ང་བླ་རུང་སྒར་གྱི་མི་ཞིག་མིན་སྟབས་ངའི་སྐད་ཆའི་ནང་དུ་མངོན་པའི་ང་རྒྱལ་དང་ཧམ་བཤད་ཀྱི་ཆའང་ཡོད་སྲིད།