ཚེ་རིང་བསམ་འགྲུབ་ཀྱིས་རྒྱ་ཡིག་ལས་བསྒྱུར།
【ནང་དོན་གནད་བསྡུས།】ཊི་རུམ་ཕི་ཡི་འོས་འགྲན་གྱི་བརྒྱུད་རིམ་ལ་ཕྱིར་བལྟས་བྱས་ན། ལས་སླ་པོས་ཤེས་ཐུབ་པ་ནི། ཁོས་ཐོག་མཐའ་བར་གསུམ་དུ་དམངས་གཙོ་ཚོགས་པ་གནད་འགག་ཆེ་ཤོས་ལ་བཟུང་ཡོད། དེ་ནི་སྤྱི་ཚོགས་ཁྲོད་དུ་དམངས་གཙོ་ཚོགས་པའི་དབང་ཤུགས་རིམ་པར་ཨ་རིའི་དམའ་རིམ་མང་ཚོགས་དང་ཁ་ཐག་རིང་དུ་གྱུར་ཡོད་པས་ཡིན།
ཊི་རུམ་ཕི་འོས་འགྲན་སྐབས་འདུ་འཛོམས་ཐོག་གཏམ་བཤད་བྱེད་བཞིན་པ།
ཊི་རུམ་ཕི་ལ་བསམ་ཡུལ་ལས་འདས་པའི་རྒྱལ་ཁ་ཐོབ་སྟེ། ཨ་རིའི་སྲིད་འཛིན་ ༤༥ པར་གྱུར་ཡོད་ཅིང་། ཁོས་ལོ་རྗེས་མའི་ཟླ་བ་དང་པོའི་ནང་དངོས་སུ་འགན་བཞེས་རྒྱུ་རེད།
ཊི་རུམ་ཕི་སུ་རེད། བརྒྱུད་ལམ་ཞིག་ཏུ་འདི་ལྟར་འཁོད་དོན། “ལོ་གཅིག་གི་སྔོན་ལ། ཁོ་ལ་རྒྱལ་ཁ་འཐོབ་པར་སུས་ཀྱང་ཡིད་ཆེས་བྱས་མེད། ལོ་གཉིས་ཀྱི་སྔོན་ལ། འཛམ་གླིང་གི་མི་མང་ཆེ་བས་ཁོའི་མིང་ཡང་གོ་མྱོང་མེད། དེ་ལས་ལྡོག་སྟེ་ཁོའི་འགྲན་ཟླ་ཧེ་ལ་རེ་ནི། མི་མང་གི་ཚོད་ལྟའི་འོས་བསྡུ་དག་གི་ཁྲོད་དུ་ཧ་ལམ་ལོ་ཧྲིལ་བོར་རྒྱལ་ཁ་ཐོབ་ཡོད་ཅིང་། ཁོང་མོར་སྐད་གྲགས་ཆགས་ཏེ་ལོ་སུམ་ཅུ་ལྷག་ཕྱིན་ཡོད།”
“ས་ཁང་ཚོང་གཉེར་བ་ཊི་རུམ་ཕི་ཡི་སྔོན་དུ། ཨ་རིར་ཐོད་བརྒལ་རང་བཞིན་ཅན་གྱི་སྲིད་འཛིན་གསུམ་བྱུང་ཡོད། དེ་དག་ནི་ཨ་སེན་ཧོ་ཝེར་(David Dwight Eisenhower) དང་། གྷི་རན་ཊི།(Ulysses S. Grant) ཧོའོ་ཝར།(John Edgar Hoover)བཅས་རེད། ཡིན་ཡང་མི་འདི་གསུམ་སྲིད་འཛིན་དུ་མ་བསྡད་སྔོན་ལ་གལ་ཆེའི་གོ་གནས་བཟུང་མྱོང་། སྤྱི་ཁྱབ་དམག་སྤྱི་བྱས་མྱོང་མེད་ཀྱང་ནང་སྲིད་ལྷན་ཁང་གི་བློན་ཆེན་གནང་མྱོང་ཡོད། ཊི་རུམ་ཕི་ལྟར་ཐ་ན་སྡེ་དཔོན་ཙམ་ཡང་བྱས་མྱོང་མེད་པར་ཐད་ཀར་ཨ་རིའི་སྲིད་འཛིན་ཆགས་པ་འདི་ཏན་ཏན་ཨ་རིའི་ལོ་རྒྱུས་ཐོག་བྱུང་མྱོང་མེད།”
སྲིད་དོན་ཉམས་མྱོང་རྩ་བ་ནས་མེད་པའི་ས་ཁང་ཚོང་བདག་ཊི་རུམ་ཕི་ཡིས། བློ་ཡུལ་ལས་འདས་པར་སྲིད་དོན་ལ་བྱང་ཆུབ་པའི་ཧེ་ལ་རེ་ཇི་ལྟར་ཕམ་པར་བརྒྱབ་པ་ཡིན་ནམ།
དང་པོ། ཊི་རུམ་ཕི་ཡིས་མདུན་སྐྱོད་དང་གསར་བརྗེའི་ལངས་ཕྱོགས་ཀྱིས་ཨ་རི་བ་ཧ་ཅང་མང་པོ་ཞིག་གི་སེམས་ནང་གི་སྡུག་ཡུས་ཆུང་ཙག་རིགས་ངོམས་པར་བྱས་པ།
ཊི་རུམ་ཕི་ཡི་ལམ་ལྷོང་ནི། གཅིག་ནས་འོས་འགྲན་འཐབ་རྩོད་ཀྱི་ལམ་ལྷོང་རེད།
ཉམས་ཞིབ་གྲུབ་འབྲས་ལྟར་ན། འོས་འཕེན་མཁན་ཚོས་རང་ཉིད་རྒྱུ་མཚན་གྱི་རྗེས་སུ་འབྲང་པར་སྙམ་ཡང་། གནས་ཚུལ་ཁ་ཤས་འོག་གདམ་ག་གཞན་ཡང་བཟོ་སྲིད་པ་ཡིན།
དཔེར་ན། ཊོ་རོན་ཊོ་སློབ་ཆེན་(Toronto university)གྱི་སེམས་ཁམས་རིག་པའི་དགེ་རྒན་ཆེན་མོ་ཇོལ་ཨིན་བྷ་(Joel Inba)ཡིས་དེ་སྔོན་ཞིབ་འཇུག་ཅིག་གནང་ཡོད། དེས་ང་ཚོའི་སེམས་སུ་སུན་སྣང་སློང་བའི་འབྱུང་ཁུངས་དག་འཚོལ་ཐུབ། ཁོས་དེ་སྔོན་ཉམས་ཞིབ་ཚོགས་པ་ཞིག་ལ་མིའི་སུན་སྣང་གི་ཤུགས་ཚད་ལ་ཚོད་ལྟ་ཞིག་བྱས་ཡོད་པ་དང་། ཁོ་ཚོར་རང་གིས་བྱ་དངོས་ལ་འཛིན་པའི་སུན་སྣང་གི་ཤུགས་ཚད་མཐོ་དམན་བཞིན་སྐར་གྲངས་རིམ་པར་བསྒྲིག་དགོས་པའི་ལམ་སྟོན་བྱས་ཡོད་པ་དང་། དེ་དག་གི་དོན་ཚན་དུ་འཁོད་པ་ནི། “ཕོ་བའི་རེངས་ཁུམ་གྱི་ན་ཚ།” “ཁྱོད་ཀྱིས་རང་གི་གྲོགས་པོ་ཞིག་གིས་གཟའ་འཁོར་རེར་གཞི་ནས་གསང་དོར་ཐེངས་རེར་བརྗེ་བོ་རྒྱག་གི་ཡོད་པ་ཤེས་རྟོགས་བྱུང་སྐབས།” སོགས་ཡིན་པ་མ་ཟད། ཉམས་ཞིབ་ཚོགས་པ་དེར་རྗེས་སུའང་ཁོ་ཚོའི་ཆབ་སྲིད་བསམ་བློ་ལ་དྲི་བ་བཀོད་ཡོད།
ཉམས་ཞིབ་འབྲས་བུར་གསལ་བ་ནི། མི་ཚོས་སོ་སོར་ན་ཚ་ཕོག་ཡོད་པར་སྙམ་དུས། ཁོ་ཚོས་རིགས་རྒྱུད་མི་གཅིག་པར་དམིགས་བསལ་གྱིས་སེམས་འཛིན་བྱེད་ཀྱིན་ཡོད། ཁོ་ཚོའི་གོམས་གཤིས་སུ་འདི་འདྲ་དང་མདོག་དབྱིབས་མི་གཅིག་པའི་མི་ཚོགས་ལ་དགའ་པོ་མེད། དེ་བཞིན། ཉིས་སྟོང་བཅུ་བཞི་ལོར་ཨ་རིའི་ཉམས་ཞིབ་ཅིག་གིས་ཤེས་རྟོགས་བྱུང་བར། རང་ཉིད་ཀྱི་ལུས་ཁམས་མི་བདེ་བར་ཚོར་བའི་འོས་འཕེན་མཁན་པ་དེ་ཚོས། དེ་བས་ཀྱང་ཕྱི་ཚུལ་ལ་འགུག་ཤུགས་ཆེ་བའི་འོས་མིར་འདེམས་ཤོག་སྤྲོད་སྲིད་ཅིང་། གཟུགས་གཞི་སྐྱོ་བའི་འོས་མིར་སུན་སྣང་སྐྱེ་བ་ཡིན།
ཊི་རུམ་ཕི་ཡི་རྒྱབ་སྐྱོར་བ།
དེར་བརྟེན། ལམ་ལྷོང་ཅན་གྱི་འོས་འགྲན་པ་ཁ་ཤས་ཀྱིས། རྟག་པར་འདི་འདྲའི་སེམས་ཁམས་ཅན་ལ་བློ་འགུག་དང་ནུས་པ་གང་ཐུབ་འདོན་ཞིང་། འོས་འཕེན་མཁན་མང་པོའི་ནང་སེམས་ཀྱི་སྡུག་ཡུས་ཆུང་ཙག་རྣམས་ཚིམ་པར་བྱས་ཏེ། དེ་འཕྲོར་འོས་ཤོག་དེ་ལས་མང་བ་ཐོབ་ཀྱི་ཡོད། ལྷག་པར་དུ་ཌོ་ནལ་ཊི་རུམ་ཕི་ནི་འདི་ཉིད་བཀོལ་སྤྱོད་བྱེད་པར་བྱང་ཆུབ་ཡོད།
དཔེ་མཚོན་ཞིག་བགྲང་ན། ཨ་རིའི་རྒྱལ་དམངས་མི་ཉུང་བ་ཞིག་ཨ་རིའི་ཁྱིམ་མཚེས་རྒྱལ་ཁབ་མེ་སི་ཁོ་(Mexico)ཡི་མི་མང་པོ་ཨ་རིར་གནས་སྤོ་བྱེད་བཞིན་པའི་ཁྲིམས་འགལ་དེ་དག་ལ་མི་དགའ་ཞིང་། འོས་འགྲན་གཏམ་བཤད་ཁྲོད་དུ་ཊི་རུམ་ཕི་ཡིས་ཀྱང་མེ་སི་ཁོ་ཡིས་ཨ་རིར་ “ཕྱི་གཏོང་ནག་ཉེས།” དང་། མེ་སི་ཁོ་ནས་ཡོང་བའི་གནས་སྤོ་བ་ཡིན་ཟེར་མཁན་“མང་ཆེ་བ་སྨྱོས་རྫས་དང་བཙན་གཡེམ་གྱི་ནག་ཉེས་བཟོ་མཁན་”རེད། ད་དུང་མེ་སི་ཁོ་ལ་འགྲོ་སོང་གཏོང་བཅུག་སྟེ། རྒྱལ་ཁབ་གཉིས་ཀྱི་ས་མཚམས་སུ་བར་གྱང་བརྩིག་ཏུ་འཇུག་དགོས་པ་དང་། ཁྲིམས་འགལ་གནས་སྤོ་བ་དང་འཇིགས་སྐུལ་པ་ཨ་རིར་སིམ་འཛུལ་བྱེད་པར་བཀག་འགོག་བྱེད་དགོས་སྐོར་སོགས་བཤད་ཡོད། འདི་འདྲའི་གཏམ་སྤྱོད་དག་ནི། ཨ་རིའི་མ་ལུས་ཀུན་འདུས་ཀྱི་རིག་གནས་དང་རྩ་བ་ནས་འཚམས་པོ་མེད་ནའང་ཁྲིམས་འགལ་ཐོག་ནས་གནས་སྤོ་བྱེད་བཞིན་པར་འདོད་པ་མེད་པའི་རྣམ་འགྱུར་འཛིན་མཁན་ཨ་རིའི་མི་མང་འབོར་ཆེན་ཞིག་གི་ཡིད་ཚིམ་ཡོད།
དཔེ་མཚོན་གཞན་ཞིག་ནི། ཊི་རུམ་ཕི་ཡིས་རྒྱབ་སྐྱོར་བ་ཚོར་སྤེལ་བའི་གསལ་བསྒྲགས་ཤིག་ཏུ། “ཁ་ཆེ་བ་ཧ་ཅང་མང་པོ་ཞིག་གིས་ཨ་རིར་འཁོན་སེམས་འཆང་ཡོད་སྟབས། ང་ཚོའི་འཐུས་མིས་གནས་ཚུལ་གསལ་པོ་བཟོ་མ་ཐུབ་བར་དུ། ངེས་པར་དུ་ཕྱོགས་ཡོངས་ནས་ཁ་ཆེ་བ་ཨ་རིར་འཛུལ་བ་རྩ་འགོག་བྱེད་དགོས།” གཞན་ཡང་། ཊི་རུམ་ཕི་འོས་བསྡུ་ཚོགས་པའི་འགན་འཛིན་ཁེ་ལིས་ཡཱེལ་གྱིས་ཀྱང་སིས་ཨན་ཨན་གསར་ཁང་(CNN)ལ། “ཁ་ཆེ་བ་ཨ་རིར་འཛུལ་བར་མཐའ་གཅིག་ཏུ་བཀག་སྡོམ་བྱེད་དགོས་པ་མ་ཟད། དེ་ནི་གནས་སྤོ་ཁ་ཆེ་བ་ཙམ་མིན་པར་ཨ་རིར་ཡུལ་སྐོར་སྤྲོ་འཆམ་དུ་ཡོང་མཁན་ཁ་ཆེ་རྣམས་ཀྱང་ཚུད་ཡོད། ཨ་རིའི་མི་མང་པོ་ཞིག་གིས་འཇིགས་སྐུལ་བ་སོ་སོའི་ཉེ་འཁྲིས་སུ་ཡོད་པར་སེམས་ཁྲལ་བྱེད་བཞིན་ཡོད་པ་མ་ཟད། འོན་ཀྱང་ཁ་ཆེའི་ལྟ་ཚུལ་ལ་ངོ་རྒོལ་བྱེད་པར་སྟབས་བདེ་པོ་མེད། ཊི་རུམ་ཕི་ཡིས་ཨ་རི་བའི་སེམས་ནང་གི་སྐད་ཆ་བཤད་རོགས་བྱས་ཡོད་སྟབས། རང་བཞིན་གྱིས་རྒྱབ་སྐྱོར་ཀྱང་ཐོབ་ཀྱི་ཡོད་པ་རེད།”
སྤྱིར་བཏང་གཏམ་བཤད་འདི་དག་ལ་སྙིང་པོ་དེ་ཙམ་མེད་པ་དང་། ཁ་ཤས་ནི་གཞི་རྩའི་རྒྱུན་ཤེས་དང་སྤྱིར་བཏང་གི་ལྟ་ཚུལ་ཙམ་རེད། དེ་ལ་བརྟེན་ནས་རྩོད་གཞི་ཡང་སྣ་ཚོགས་བྱུང་བ་རེད། ཡིན་ཡང་ཊི་རུམ་ཕི་ཡིས་ “མདུན་སྐྱོད་” དང་ “གསར་བརྗེ་” ཡི་རྣམ་འགྱུར་གྱི་བར་ནས། ཏན་ཏན་གྲུབ་འབྲས་ལྡན་པ་ཞིག་བྱུང་བ་ནི། ཨ་རིའི་མང་ཚོགས་ཀྱི་སེམས་ནང་གི་དཀའ་ངལ་མང་པོར་སྣེ་ཁྲིད་དེ། ཁོ་རང་ཚོའི་ཕྱིའི་ལུས་ངག་ཏུ་འཐོན་མི་རུང་བའི་ནང་སེམས་ཀྱི་སྡུག་ཡུས་མང་དག་ཅིག་ཡིད་ཚིམ་པར་བྱས་ཡོད་ཅིང་། ཨ་རིའི་མི་མང་ལ་སྔར་གྱི་སྲིད་འཛིན་འོས་མི་དག་དང་རྩ་བ་ནས་མི་འདྲ་བའི་སྣང་བརྙན་ཞིག་བསྐྲུན་ཡོད། དེར་བརྟེན། རྩོད་གླེང་ཡོད་བཞིན་དུ་ཊི་རུམ་ཕི་ཨ་རིའི་སྲིད་འཛིན་འོས་མིར་ཞུགས་པ་ནས་ཁ་ལས་རླུང་རྟ་དགུང་དུ་དར་ཡོད།
གཉིས་པ། “ཐོད་རྒལ་གྱི་སྲིད་འཛིན་འོས་མི་” ཡི་ཐོབ་ཐང་གིས་ཁྱིམ་རྒྱུད་ཆབ་སྲིད་བཅིང་གྲོལ་བཏང་ཞིང་ཕྱོགས་གཅིག་ནས་གཉིད་དུ་ཡུར་བའི་ཨ་རིའི་རྒྱལ་ཁབ་སད་དུ་བཅུག་ཡོད།
རྒྱུན་ཤེས་སྟེང་ནས་བཤད་ནའང་ཧེ་ལ་རེ་དང་བསྡུར་ན། ཊི་རུམ་ཕི་ནི་གཏན་ནས་ཚད་ལོན་མེད་པའི་སྲིད་འཛིན་འོས་མི་ཞིག་རེད། སྲིད་དོན་བསྒྲུབས་པའི་ལོ་རྒྱུས་མེད་པ་དང་། སྤྱི་ཚོགས་ནང་ཁོ་ལ་ལབ་གླེང་དང་མི་ཁས་སྦགས་ཤིང་། མ་གཞི་ནས་ཁོ་རང་ཁ་འབེལ་པོ་ཅན་ཞིག་རེད། ཁོས་བརྙན་འཕྲིན་ལས་རིམ་ཞིག་བསྒྲུབས་པའི་རྩོད་གླེང་ཁྲོད། ཨ་རིའི་སྲིད་དོན་པར་ངན་སྨྲས་སྐྱོན་བརྗོད་དང་། སྤྱི་མཐུན་ཚོགས་པའི་སྲིད་འཛིན་འོས་མི་སྔ་མ་ཇཱོན་མེ་ཁེན་(John McCain) ཝེ་ཐི་ནམ་གྱི་དོན་རྐྱེན་སྐབས་ཀྱི་འཇུ་བཟུང་ལ་ཟུར་ཟ། འཛེམ་བག་མེད་པར་འགྲན་རྩོད་ཁ་གཏད་བ་ཞིག་ག་སྒེར་གྱི་ལག་འཕྲིན་ཨང་གྲངས་སྤྱི་བསྒྲགས་སོགས་བྱས་ཡོད། ཐ་ན་ཨ་རིའི་སྲིད་འཛིན་ལས་ཐོག་པ་ཨོ་བྷ་མས་ཀྱང་ཊི་རུམ་ཕི་རྩ་བ་ནས་ཨ་རིའི་སྲིད་འཛིན་གསར་པ་དེར་མི་འགྱུར་ཅེས་བཤད་ཡོད།
དེར་མ་ཟད། གསར་འགྱུར་བརྒྱུད་ལམ་ཁག་ཚང་མས། ལོ་ངོ་བརྒྱད་སྔ་རོལ་གྱི་འོས་འགྲན་ཕམ་ཉེས་དང་བསྡུར་ན། དེ་རིང་གི་ཧེ་ལ་རེ་ལ་ཆ་རྐྱེན་ཆེན་པ་བཞི་ཚང་ཡོད་པར་ངོས་འཛིན་བྱེད་ཀྱིན་ཡོད། དཔེར་ན། སྲིད་གཞུང་ནང་ཁུལ་དུ་རྒྱབ་སྐྱོར་ཚད་མཐོ་ཞིང་ཨོ་བྷ་མས་ཀྱང་ཁོང་ནི་རང་གི་རྒྱུད་འཛིན་པ་ཞིག་ཡིན་པར་མཐའ་གཅིག་ཏུ་ངོས་འཛིན་བྱས་ཡོད། འོས་འགྲན་མ་དངུལ་འཐུས་ཚང་གྲ་སྒྲིག་བྱས་ཏེ་སྔ་ཕྱིར་བསྡོམས་པའི་ཨ་སྒོར་དུང་ཕྱུར་ ༢༥ ཙམ་ཡིན་པ་དང་། འོས་བསྡུའི་ཁྱབ་བསྒྲགས་ལས་རིམ་ཚོགས་ཆུང་སྟོབས་ཆེ་བ། གཞུང་འབྲེལ་གསར་འགྱུར་བརྒྱུད་ལམ་ཆེད་མཁས་པའི་འབྲེལ་ལམ་ཟབ་པ། དཔེ་མཚོན་གཞན་ཞིག་ནི། འོས་འཕེན་མཁན་གྱི་ནུས་པ་བཟང་བ་དང་ན་གཞོན་དང་བུད་མེད་འགུག་ཤུགས་ཆེ་བ་བཅས་ཀྱི་ཆ་རྐྱེན་ཚང་ཡོད་སྟབས། ཊི་རུམ་ཕི་དང་བསྡུར་ན་ཧེ་ལ་རེ་ནི་སྔོན་ཚུད་ནས་རྒྱལ་ཁ་ཐོབ་པར་གདེང་ཚོད་དང་རེ་བས་ཁེངས་ཡོད།
ཊི་རུམ་ཕི་ཡི་འོས་འགྲན་འདུ་ཚོགས་ལ་བལྟས་པ་ཙམ་གྱིས་མི་དཀར་ཀྱི་རྣམ་པས་ཁེངས་ཡོད།
ཡིན་ཡང་། བརྟག་དཔྱད་པས་སྣང་མེད་དུ་འཇོག་པ་ནི། ཊི་རུམ་ཕི་དང་ཧེ་ལ་རེ་སུ་ཡིན་རུང་། ཁོ་ཚོས་ཁ་གཏད་ཡུལ་ཐམས་ཅད་ད་ལྟ་ལོ་ངོ་བརྒྱད་ཀྱི་སྔ་རོལ་དང་རྩ་བ་ནས་མི་འདྲ་བའི་ཨ་རིའི་རྒྱལ་ཁབ་ཅིག་ཆགས་ཡོད།
ཨ་རིའི་དུས་དེབ་<<Forbes>> ༢༠༡༥ ལོའི་ལོ་མཇུག་ཏུ་འགྲེམ་སྤེལ་བྱས་པའི་ཞིབ་འཇུག་གྲུབ་དོན་ཞིག་གཞིར་བཟུང་བྱས་ན། ༢༠༡༥ ལོའི་ Forbes ཨ་རིའི་ཕྱུག་བདག་རེའུ་མིག་སྟེང་གི་མདུན་གྲལ་གྱི་མིང་ཐོའི་ནང་གི་མི་སྣ་བཞི་བརྒྱ་ཡོད་པ་དེ་དག་གི་རྒྱུ་ནོར་དེ། ཨ་རིའི་རིམ་པ་དམའ་བ་དང་འབྲིང་བའི་མི་མང་ཡོངས་ཀྱི་རྒྱུ་ནོར་ཡོད་ཚད་ལས་ཀྱང་མང་བ་མ་ཟད། རིགས་རྒྱུད་མི་འདྲ་བའི་ཨ་རི་བ་རྣམས་ཀྱི་བར་དུ་དཔལ་འབྱོར་ཡོང་འབབ་ཁ་འཐོར་དུ་འགྲོ་བཞིན་ཡོད། ན་ནིང་ཨ་རིའི་མི་རིགས་དཀར་པོའི་རྒྱུ་ནོར་ནི་ཕལ་ཆེར་ཨ་ཧྥི་རི་ཁའི་མི་རྒྱུད་ཀྱི་རྒྱུ་ནོར་ལས་ལྡབ་ ༢༢ ཡིན་པ་དང་། ཧེ་སི་ཕི་ནི་(Hispanic)ཡི་རྒྱུ་ནོར་གྱི་ལྡབ་ ༡༥ ཆགས་ཡོད།
ཨ་རིའི་དཔལ་འབྱོར་གྱི་འགལ་ཟླའི་ཉམ་ཉེས་དང་རྒྱལ་ནང་གི་དབུལ་ཕྱུག་བར་ཁྱད་སོགས་ལ་གཡོལ་ཐབས་མེད་པར་གྱུར་བའི་ཆབ་སྲིད་ནང་འགལ་ཛ་དྲག་དང་། དེ་མིན་སྤྱི་ཚོགས་རིག་གནས་ཀྱི་གས་ཆག་བཅས་ཀྱིས་ད་ལྟའི་བར་གྱི་ཨ་རིའི་ཁྱིམ་རྒྱུད་ཆབ་སྲིད་འཛིན་སྐྱོང་ལ་ཨ་རིའི་མི་མང་ཉིན་རེ་བཞིན་མི་དགའ་བར་འགྱུར་བཞིན་ཡོད། ཁོ་ཚོའི་མིག་མདུན་དུ། ཁྱིམ་རྒྱུད་ཆབ་སྲིད་དེས་སྒེར་སྡོམ་དབང་ཤུགས་ཀྱི་ཛ་དྲག་སློང་རྐྱེན་ཙམ་ལས། ཁོ་ཚོ་བསྐྱར་དུ་ཨ་རིའི་རྨི་ལམ་མངོན་འགྱུར་བྱེད་པར་ཁྲིད་མི་སྲིད། དེར་བརྟེན། སྔ་མའི་སྲིད་འཛིན་ཁི་ལིན་ཏོན་(Clinton)གྱི་ལྕམ་ཧེ་ལ་རེར་ཆ་བཞག་ན། ཕམ་ཉེས་བྱུང་བ་ནི་རང་བྱུང་གི་གནས་བབ་ལེགས་པོ་ཞིག་ཡིན།
ཊི་རུམ་ཕི་ཡི་མངོན་སྟངས་མི་འདྲ་བ་གཞན་ཞིག་ནི། ཏན་ཏན་ཁ་སྦུག་དོག་པོ་ཡིན་པའི་ཨ་རའི་རྒྱལ་དམངས་མང་ཆེ་བ་གཉིད་ལས་དཀྲོག་ཏེ། རྣམ་པ་མི་འདྲ་བ་འབྱུང་སྲིད་པའི་གནས་ཚུལ་རྣམས་ཁོ་ཚོར་གསལ་སྟོན་བྱས་ཡོད། ཊི་རུམ་ཕི་ཡི་འོས་འགྲན་གཏམ་བཤད་ནི་ “ཆབ་སྲིད་ཡང་དག་” ཅིག་མིན་ནའང་། མཐའ་གཅིག་ཏུ་ཨ་རིའི་མི་མང་ངར་ཤུགས་སློང་ཞིང་། སྐད་ཅོར་རྒྱག་པར་དམིགས་ཏེ་ཨ་རིའི་རྒྱལ་དམངས་དཀྱུས་མའི་ཁེ་ཕན་ལ་སེམས་འཁུར་བྱས་ཡོད། ཕོན་ཆེ་བའི་ཨ་རི་བར་ཆ་བཞག་ན། ཁོ་ཚོའི་ཡིད་ཆེས་ནི། ཧེ་ལ་རེ་དང་བསྡུར་ན། སྲིད་དོན་གྱི་ཉམས་མྱོང་རྩ་བ་ནས་མེད་པའི་ཊི་རུམ་ཕི་ཡིས་སྒེར་གྱི་ཁེ་ཕན་དེ་ལས་ལྷག་པར་འདོན་ཐུབ་ཅིང་། གྲངས་མང་བའི་ཨ་རི་བའི་ཁེ་ཕན་རྒྱལ་ཁབ་ཀྱི་ཐབས་ཇུས་དང་མཐུན་པར་བཟོ་ཐུབ་པ། ཁོ་ཚོས་གནད་འགག་འདི་དག་ཡང་དག་པ་ཞིག་ལ་ངོས་འཛིན་བྱེད་ཀྱིན་ཡོད་སྟབས། ཊི་རུམ་ཕི་ལུས་སྟེང་དུ་ཡོད་པའི་བློ་ཡུལ་ལས་འདས་པའི་སྐྱོན་ཆ་ “སྣ་ཚོགས་” ཀྱང་དེ་ཙམ་གལ་ཆེན་མིན།
སྒྲིག་སྲོལ་ཕྱི་རོལ་གྱི་ཊི་རུམ་ཕི་ཡིས། ལམ་ལྷོང་ལྡན་པའི་ཐོག་ནས་ཨ་རིའི་མང་ཚོགས་ཀྱི་སྒྲིག་སྲོལ་ལ་མི་རངས་བའི་རྣམ་འགྱུར་དག་སད་དུ་བཅུག་པ་དང་། རང་ཉིད་ལ་དེ་ལས་མང་བའི་བསྒྲུབ་ཐུབ་ཚོད་ཅིག་སྤྲད་དེ། རང་བཞིན་གྱིས་ཁོ་རང་འོས་འགྲན་ལམ་ལྷོང་དང་བར་ཐག་ཇེ་ཉེར་བཏང་ཡོད།
གསུམ། ཨ་རིའི་རྨི་ལམ་ཡོད་པའི་རིམ་པ་དམའ་འབྲིང་གི་རྒྱལ་དམངས་མང་ཆེ་བར་བསྟུན་ཐབས་བྱས་ཡོད། འདི་ནི་མི་སེར་གྱི་རྒྱལ་ཁ་ཐེངས་གཅིག་ཡིན།
དོ་སི་པ་(白屌丝)ཐོབ་པ་ནི་གནམ་འོག་ཐོབ་པ་ཡིན་ཞིང་། ཁྱད་པར་དུ་སྲིད་འཛིན་འདེམ་བསྐོའི་ཁྲོད་དུ་གལ་ཆེ་ཤོས་མང་ཚོགས་རིམ་པ་དམའ་བ་དང་འབྲིང་བའི་རྒྱབ་སྐྱོར་འཐོབ་དགོས་པ་མ་ཟད། ཊི་རུམ་ཕི་ཆེས་མཐའ་མའི་རྒྱལ་ཁ་ཐོབ་པའི་རྐྱེན་རྩ་གཅིག་ཀྱང་འདི་རེད།
ད་ལྟ་ཊི་རུམ་ཕི་ཡི་འོས་འགྲན་བརྒྱུད་རིམ་ལ་ཕྱིར་མིག་ཅིག་བལྟས་ན། ལས་སླ་པོས་རྟོགས་ཐུབ་པ་ནི་ཁོས་ཐོག་མཐའ་བར་གསུམ་དུ་དམངས་གཙོ་ཚོགས་པའི་འགག་རྩ་ཆེ་ཤོས་དེ་བཟུང་ཡོད། དེ་ནི་སྤྱི་ཚོགས་ཁྲོད་དུ་དམངས་གཙོ་ཚོགས་པའི་དབང་ཤུགས་རིམ་པ་ཨ་རིའི་དམའ་རིམ་མང་ཚོགས་དང་བར་ཐག་རིང་དུ་ཕྱིན་ཡོད། སྣང་ཚུལ་ཙམ་ལ་ཊི་རུམ་ཕི་ཡིས་བརྙན་འཕྲིན་དུ་རྩོད་གླེང་ངམ་འོས་འགྲན་གཏམ་བཤད་ཀྱི་འབྲེལ་ཡོད་ནང་དོན་ལ་དོགས་འདྲི་དང་འབྲེལ་ཡོད་ཀྱི་རྩོད་གླེང་བྱུང་ནའང་། དེ་ཚོ་ཚང་མ་ནི་ཨ་རིའི་རིམ་པ་དམའ་བ་དང་འབྲིང་བའི་ཡོངས་ཁྱབ་སེམས་ཁུར་གྱི་བརྗོད་གཞི་ཡིན་པ་མ་ཟད། ཊི་རུམ་ཕི་ཡིས་འགྲོས་དོན་རྐྱང་པས་ཐག་ཆོད་བྱེད་ཐབས་དེ་ཚོ་བཏོན་པའམ་ཐབས་ལམ་མཐོང་ཐུབ་པ་ཡིན། རིམ་པ་དམའ་འབྲིང་གི་ཉིན་རྒྱུན་འཚོ་བའི་སྐོར་ལ་སེམས་ཁུར་བྱས་སྟབས། ཨ་རིའི་རྨི་ལམ་ནང་དུ་ཡོད་བཞིན་པའི་དངོས་ཡོད་ཀྱི་རེ་བ་དང་བར་སྟོང་བཅས་བྱིན་ཡོད། ཊི་རུམ་ཕིས་གནད་འདིས་ཨ་རི་བ་དཀྱུས་མར་འགུག་ཤུགས་སྤྲད་དེ། ཧེ་ལ་རེ་ཡི་ཆབ་སྲིད་བཞེད་དགོངས་ཀྱི་ཉིང་བཅུད་རིང་དུ་དབྱུང་ཡོད།
ཊི་རུམ་ཕི་ཡི་བུད་མེད་ལབ་གླེང་སྐོར་ལ་རྩོད་གླེང་མང་པོ་རྒྱག་དགོས་བྱུང་ཡོད་ཀྱང་། སྔར་བཞིན་བུད་མེད་མི་ཉུང་བའི་རྒྱབ་སྐྱོར་ཀྱང་ཐོབ་ཡོད།
མ་ཟད་ཊི་རུམ་ཕི་མ་གཞི་ནས་ལེགས་གྲུབ་ཅན་གྱི་ཚོང་པ་སྟེ། སྒོར་མོ་དུང་ཕྱུར་མང་པོའི་ཕྱུག་བདག་རེད། གཞན་ཡང་སྟོབས་ཤུགས་ཆེ་བའི་ཚོང་ལས་དེ་དག་རྒྱལ་ཁབ་བདག་གཉེར་ཐོག་ནུས་པ་ཡོད་པ་ཞིག་རེད། ཨ་རིའི་རིམ་པ་དམའ་བ་དང་འབྲིང་བའི་རྒྱལ་དམངས་ཚོས་རང་བཞིན་གྱིས་འདི་ལྟར་སྙམ་སྟེ། མི་སྒེར་ལ་དཔལ་འབྱོར་བརྩོན་ལེན་གྱི་གནད་དོན་མེད་པའི་རྐྱེན་གྱིས་ཊི་རུམ་ཕི་ཡིས་ལུས་སྟོབས་དང་། སེམས་ཤུགས་ཡོད་ཚད་རྒྱལ་ཁབ་དང་སྤྱི་ཚོགས་ཀྱི་དོ་དམ་སྟེང་བཀོལ་ངེས་ཡིན་པ་མ་ཟད། ཁོ་རང་ཚོང་ལས་སྟེང་ནས་ལམ་ལྷོང་ཆེན་པོ་བྱུང་བ་དེས་ཊི་རུམ་ཕི་ལ་འདི་ལྟ་བུའི་འཛིན་སྐྱོང་ལས་བརྒལ་བའི་ནུས་ཤུགས་འཛོམས་ཡོད་པ་བདེན་དཔང་བྱས་ཡོད།
དེ་བཞིན། དབྱེ་ཞིབ་མི་སྣས་བསྟན་དོན་ཐམས་ཅད། འོས་འགྲན་བརྒྱུད་རིམ་ཁྲོད་དུ་ཊི་རུམ་ཕི་ཡི་ཁྱིམ་ཚང་གིས་ཀྱང་སྐར་གྲངས་མི་ཉུང་བ་ཞིག་བསྣན་ཡོད་པ་དང་། ལྷག་པར་དུ་བུ་མོ་ཨ་ཝན་ཁ་(Ivanka)ཡི་ཉམས་འགྱུར་གྱིས་སྤྱི་ཚོགས་འབྲེལ་ལམ་སྟེགས་བུར་ཡོངས་ཁྱབ་ཀྱི་ལྟ་རུབ་རྒྱག་པ་དང་བསྟོད་བསྔགས་བྱས་ཡོད། ཕོན་ཆེ་བའི་ཨ་རིའི་རིམ་པ་དམའ་འབྲིང་གི་རྒྱལ་དམངས་ངོས་ནས་བཤད་ན། ཁྱིམ་ཚང་གི་སྤྲོ་སྣང་དང་ལམ་ལྷོང་ཡང་སྲིད་འཛིན་འོས་མིར་ཚང་དགོས་པའི་ཆ་རྐྱེན་གལ་ཆེན་ཞིག་ཡིན་ཞིང་། ཊི་རུམ་ཕི་ཡི་ཁྱིམ་ཚང་ཁྱེར་ནས་ཧེ་ལ་རེ་ཡི་ཁྱིམ་ཚང་དང་བསྡུར་ན། ཧེ་ལ་རེའི་སྐུ་ཟླ་ཁི་ལིན་ཏོན་གྱི་དེ་སྔའི་ཁྱིམ་ཚང་གསར་འགྱུར་མི་ལེགས་པ་དེ་དག་དང་། གཞན་ཡང་འོས་འགྲན་རྒྱུད་རིམ་ཁྲོད་དུ་ཁྱིམ་ཚང་དང་འོས་འཕེན་མཁན་བར་ལྟོས་ས་ལྟོས་འཇོག་གིས་མི་འདང་པ། གཡོལ་ཐབས་མེད་པར་ཁྱིམ་ཚང་གི་གནས་ཚུལ་ཆེ་མ་ཆུང་གསུམ་མང་པོ་ཞིག་གི་ཐད་དུ་ཧེ་ལ་རེ་སྒེར་གྱི་སྣང་བརྙན་སྐར་གྲངས་མར་བཅག་ཡོད།
ངོས་མི་འདྲ་བ་ནས་ཊི་རུམ་ཕི་ཡིས་ཀྱང་གཟུགས་ལྡན་ནམ་གཟུགས་མེད་ཀྱིས་ཨ་རིའི་རྨི་ལམ་ཡོད་པའི་རིམ་པ་དམའ་བ་དང་འབྲིང་བའི་རྒྱལ་དམངས་མང་ཆེ་བར་བསྟུན་མཁས་བྱས་ཡོད། འདིས་ཁོ་རང་ཆེས་མཐའ་མཇུག་ཏུ་བསམ་ཡུལ་ལས་འདས་པའི་རྒྱལ་ཁ་ཐོབ་བཅུག་ཡོད། རྩ་བའི་ཆ་ནས་འདི་ནི་མི་སེར་གྱི་རྒྱལ་ཁ་ཐེངས་གཅིག་རེད།
མཇུག་བྱང་།
ཊི་རུམ་ཕི་ཡི་ཆེས་མཐའ་མའི་འགག་རྩ་ “ལྡོག་འཐབ་” ཀྱི་མཇུག་འབྲས་ནི། བརྒྱུད་ལམ་ཁག་ཧ་སང་དུ་བཅུག་པ་མ་ཟད། ཐ་ན་ཊི་རུམ་ཕི་རང་ཉིད་ཀྱང་གང་འཚམ་ཧ་སང་ཡོད་ངེས། གལ་སྲིད་འོས་འཕེན་པའི་བསམ་ཚུལ་ངོས་གནས་དེར་དབྱེ་ཞིབ་བྱས་ན། ཡོད་ཚད་རྩ་བ་ནས་བསམ་ཡུལ་ལས་འདས་པ་ཞིག་ཆགས་མེད། རྒྱུ་མཚན་ནི། འོས་འགྲན་བརྒྱུད་རིམ་ཁྲོད་དེ་ལྟར་རྩོད་གླེང་མང་པོ་བྱུང་ཡོད་ཀྱང་། ཨ་རི་བ་ཚོས་ཀྱང་ཕར་བལྟས་ན་ཨ་རིའི་རྨི་ལམ་མངོན་འགྱུར་བྱེད་པར་སྣེ་ཁྲིད་ཐུབ་པའི་འོས་མི་དེ་དག་འདེམས་འདོད་ཡོད། ཡམ་ཡོམ་ཅན་གྱི་ཨ་རིར་དགོས་པ་ནི་བྱང་ཆུབ་པའི་སྲིད་དོན་པ་ཞིག་མ་རེད། དེ་ལས་ལྡོག་སྟེ་ཕྱི་ཚུལ་ལ་ “རེ་བ་” དང་ “ནུས་པ་” ཡོད་པའི་མགོ་ཁྲིད་ཅིག་རེད། འདི་ནི་དོན་ངོ་མའི་ཨ་རིའི་རྒྱལ་ཁབ་ཡིན་པ་མ་ཟད། འདི་ནི་དོན་ངོ་མའི་ཨ་རིའི་འདེམས་བསྐོའི་རིག་གནས་ཀྱང་ཡིན་ནོ།།
མ་རྩོམ་འབྲེལ་ཐག https://view.inews.qq.com/a/CUL2016111102621308?from=singlemessage
