བོད་མི་ཞིག་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཀྱི་འགན་འཛིན་དུ་བསྐོས།

ཨ་རིའི་ཧྥུལ་ལར་ཊོན་གཙུག་ལག་སློབ་ཆེན་གྱི་བོད་རིགས་སློབ་དཔོན་འབུམ་རམས་པ་བསྟན་འཛིན་རྡོ་རྗེ་ལགས་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་དུ་བསྐོ་བཞག་གནང་འདུག

ཟླ་འདིའི་ཕྱི་ཚེས་ ༨ ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་དང་དམངས་གཙོ་ཚོགས་པའི་ཚོགས་གཙོ་ལྕམ་ནན་སི་ཕི་ལོ་སི་ (Nancy Pelosi )མཆོག་ནས་མཚན་འདོན་གནང་བ་ལྟར། རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཀྱི་འགན་འཛིན་ལྷན་ཚོགས་ཐོག ཨ་རིའི་ཁེ་ལི་ཧྥོར་ནི་ཡ་མངའ་སྡེའི་ཧྥུལ་ལར་ཊོན་གཙུག་ལག་སློབ་ཆེན་(California State University, Fullerton) གྱི་བོད་རིགས་སློབ་དཔོན་འབུམ་རམས་པ་བསྟན་འཛིན་རྡོ་རྗེ་ལགས། ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་ (U.S. Commission on International Religious Freedom )འགན་འཛིན་དུ་བསྐོ་གཞག་གནང་ཡོད་པ་དང་། ཟླ་འདིའི་ཕྱི་ཚེས་ ༡༢ ཉིན་ནས་བཟུང་ཕྱག་ལས་དབུ་འཛུགས་གནང་སྟེ་ཨ་རིའི་རྒྱལ་ས་ཝ་ཤིན་ཊོན་གྱི་ཆོས་དད་རང་དབང་གི་ཚོགས་འདུའི་ཐོག་ཁ་པར་བརྒྱུད་མཉམ་ཞུགས་གནང་རྒྱུ་དང་། དེ་བཞིན་འཆར་ལོའི་ཕྱི་ཟླ་ ༡ པོའི་ནང་ཝ་ཤིན་ཊོན་ཌི་སི་ནང་འཚོགས་འཆར་ཡོད་པའི་ཚོགས་ཆེན་ཐོག་ཁོང་དངོས་སུ་ཞུགས་ཏེ་གནད་ཡོད་མི་སྣ་ཁག་ལ་མཇལ་འཕྲད་གནང་རྒྱུ་ཡིན་འདུག

འདི་གའི་གསར་འགོད་པས་དྲ་ལམ་བརྒྱུད་འབུམ་རམས་པ་བསྟན་འཛིན་རྡོ་རྗེ་ལགས་སུ། ཨ་རིའི་གཞུང་ནས་ཁོང་ལ་ཆེ་མཐོང་དང་ཐུགས་འགན་ཆེན་པོ་དེ་འདྲ་ཞིག་གནང་བར་དགོངས་ཚོར་ཅི་བྱུང་དང་། མ་འོངས་པར་རྒྱལ་སྤྱིའི་ཆོས་དད་རང་དབང་དང་། ལྷག་པར་དུ་བོད་ནང་གི་ཆོས་དད་རང་དབང་ཐད་ཕྱག་ལས་ག་འདྲ་གནང་འཆར་ཡོད་བཀའ་འདྲི་ཞུས་པར་ཁོང་གིས། ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་ཏུ་བསྐོ་བཞག་གཏན་འབེབས་གནང་བ་དེ་ང་རང་སྒེར་ལ་ཆེ་མཐོང་ཞིག་དང་། ལྷག་པར་དུ་ང་རང་བོད་པ་ཞིག་ཡིན་པའི་ཆ་ནས་སྤྱི་ཡོངས་ནས་བོད་ནང་གི་གནས་སྟངས་ཞེ་དྲགས་དཀའ་ངལ་ཆེན་པོ་དང་ཛ་དྲག་པོ་ཞིག་ཆགས་ཡོད་པ་མ་ཟད། བོད་ནང་ཆོས་དད་རང་དབང་མེད་པ་དཔེར་ན་ད་ལྟའི་ཆར་གསེར་རྟ་བླ་རུང་སྒར་བཙན་དབང་གིས་གཏོར་བཤིག་དང་། གྲྭ་བཙུན་སྟོང་ཕྲག་མང་པོ་གནས་དབྱུང་བཏང་དང་གཏོང་བཞིན་པའི་ཛ་དྲག་གནས་སྟངས་ཆགས་བསྡད་ཡོད་སྟབས། གནད་དོན་འདི་དང་འབྲེལ་ནས་མ་འོངས་པར་བོད་ནང་གི་ཆོས་དད་རང་དབང་ཐད་ལྟ་ཞིབ་སྲུང་སྐྱོབ་དང་། དེ་བཞིན་ང་འགན་འཛིན་ཡིན་པའི་ཆ་ནས་འཛམ་བུ་གླིང་གི་རྒྱལ་ཁབ་ཚང་མའི་ནང་གི་ཆོས་དད་རང་དབང་ཐོག་ལྟ་ཞིབ་སྲུང་སྐྱོབ་བྱེད་པའི་འགན་འཁྲི་ཡོད་པ་རེད།

བོད་ཀྱི་སྣོད་བཅུད་སྐོར་བཤད་སའི་སྡིངས་ཆ་ཆེན་པོ་ཞིག་རག་ཡོད་དུས་འདི་གནད་འགག་ཆེན་པོ་རེད་དྲན་གྱི་འདུག ངས་དྭང་བླངས་ཀྱིས་ལས་ཀ་བྱེད་དགོས་དུས་ང་རང་ལ་ལས་ཀ་མང་བའི་སྒང་ལ་སྣོན་པ་འདྲ་པོ་རེད་དེ། བོད་མི་ཞིག་འདི་འདྲའི་གནས་བབ་མཐོ་བོ་ཞིག་ལ་བསླེབས་པ་དེ་རྒྱལ་རབས་ལོ་རྒྱུས་ལྟ་བུར་སོང་ཡོད་སྟབས། ང་ཚོ་བོད་པ་ཚང་མ་དགའ་བོ་ཡོང་གི་རེད་དྲན་གྱི་འདུག་ལ། ངོ་དེབ་ཐོག་ཏུ་བོད་པ་མང་པོས་འཚམས་འདྲི་དང་དགའ་བོ་བྱུང་བའི་ཚོར་སྣང་མང་པོ་གསུང་གི་འདུག་པས་ཚང་མར་བཀའ་དྲིན་ཆེ་ཞུ་བ་ཡིན། ཅེས་བརྗོད་བྱུང་།

བོད་མི་རིགས་ལ་མཚོན་ནས་བཤད་ན། ཆོས་ལུགས་དད་མོས་རང་དབང་དེ་ག་ཚོད་ཀྱིས་གལ་ཆེན་པོ་ཆགས་ཡོད་པ་དང་། དེང་སང་རྒྱ་གཞུང་གིས་ཆོས་ལུགས་གཙང་སེལ་ལ་ཁ་གཡར་ཏེ་དོ་དམ་སྟངས་འཛིན་རིགས་མང་པོ་བྱེད་ཀྱི་ཡོད་པ་དེས། བོད་ཀྱི་ཆོས་ལུགས་དང་དད་ལྡན་དོན་གཉེར་བ་རྣམས་ལ་གནོད་སྐྱོན་ག་འདྲ་བཟོ་ཡི་ཡོད་མེད་སྐོར་ལ་ཁོང་གིས། བོད་ཆོས་ལྡན་རྒྱལ་ཁབ་ལ་ཆ་བཞག་པ་ཡིན་ན། ང་རང་ཚོའི་ངོམས་སུ་ཆོག་པའི་དཔལ་ནལེནྜ་ནས་བརྒྱུད་པའི་ནང་པའི་བསྟན་པ་ཆ་ལག་ཡོངས་སུ་རྫོགས་པ་འདི་ང་རང་ཚོ་བོད་མིའི་ངོ་བོ་འཛིན་ཕྱོགས་དང་། བོད་ཀྱི་བདེན་དོན་འཐབ་རྩོད་ལ་མེད་དུ་མི་རུང་བའི་ནུས་ཤུགས་ཤིག་ཆགས་ཡོད་དུས། ཆོས་དད་རང་དབང་འདི་བོད་མི་རིགས་ལ་གནད་འགག་ཞེ་དྲགས་རེད། དེང་སང་རྒྱ་ནག་གཞུང་གིས་སྲིད་དོན་དགོས་མཁོ་ཞིག་ལ་དམིགས་ཏེ་བོད་ཀྱི་ཆོས་ལུགས་དག་སེལ་བྱེད་ཀྱི་ཡོད་ཟེར་ན་རེད། གང་ལྟར་བོད་ནང་གི་ཆོས་དད་རང་དབང་ལ་དོ་ཕོག་དང་བཀག་འགོག་ཞེ་དྲགས་བྱེད་ཀྱིན་ཡོད་པ་རེད། དེ་བཞིན་༧གོང་ས་སྐྱབས་མགོན་ཆེན་པོ་མཆོག་གི་སྐུའི་ཡང་སྲིད་ཕེབས་ཕྱོགས་སྐོར་ལ་ཐེ་གཏོགས་དང་། ༧པཎ་ཆེན་རིན་པོ་ཆེའི་ཡང་སྲིད་བཙན་དབང་གིས་བཞག་པ་དེ་ཚོ་ཆོས་ལ་དགའ་དྲག་སྟེ་བྱེད་ཀྱི་ཡོད་པ་མ་རེད། བོད་ཀྱི་གནས་ཚུལ་ཡོངས་རྫོགས་ལ་བདག་དབང་འཛིན་པའི་ཆེད་དུ་ཆོས་ལུགས་ཆབ་སྲིད་ཀྱི་ལག་ཆར་བེད་སྤྱོད་བྱས་ཏེ། ཆོས་ལུགས་ལ་སྲུང་སྐྱོབ་བྱེད་ཀྱི་ཡོད་པའི་རྣམ་པ་སྟོན་བཞིན་ཡོད་པ་དེ་ཕྱི་གསལ་ནང་གསལ་ཆགས་བསྡད་ཡོད་པ་རེད་དྲན་གྱི་འདུག ཅེས་བརྗོད་བྱུང་།

འདས་ལོར་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ནན་སི་ཕི་ལོ་སི་(Nancy Pelosi )མཆོག་གིས་དབུ་འཁྲིད་པའི་ཨ་རིའི་སྐུ་ཚབ་ཚོགས་ཆུང་ཞིག་གིས་བོད་ནང་དམིགས་ཆེད་གཟིགས་སྐོར་གནང་སྐབས། བོད་རང་སྐྱོང་ལྗོངས་དམར་ཤོག་ཚོགས་པའི་མགོ་འཁྲིད་དག་ལ་མཇལ་འཕྲད་གནང་སྟེ། བོད་ནང་གི་བོད་མི་ཚོའི་ཆོས་དད་རང་དབང་དང་སྨྲ་བརྗོད་རང་དབང་ལ་བརྩི་བཀུར་ཞུ་དགོས་པའི་འབོད་སྐུལ་གནང་ཡོད་པ་མ་ཟད། བོད་ཀྱི་ཆོས་དང་རིག་གཞུང། སྐད་ཡིག་བཅས་སྲུང་སྐྱོབ་ཐད་ཨ་རིའི་གཞུང་ནས་སེམས་འཚབ་དང་བཅས་གལ་གནད་ཆེན་པོར་ངོས་འཛིན་ཞུ་ཡི་ཡོད་སྐོར་གསུངས་ཡོད་པ་དང་། དེ་བཞིན། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཚོགས་སྡེ་ཁག་དང་བོད་ནང་ཆེད་དམིགས་རྟོག་ཞིབ་ཏུ་ཕེབས་པའི་གསར་འགོད་པ་སོགས་ཀྱིས་ཀྱང་བོད་ནང་ཆོས་དད་རང་དབང་མེད་སྐོར་གསལ་འདོན་གནང་ཡོད་པ་རེད།

འདི་ལོའི་ཕྱི་ཟླ་ ༢ པའི་ནང་འདོན་སྤེལ་གནང་བའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཕྱི་ལོ་ ༢༠༡༥ ལོའི་ལོ་འཁོར་སྙན་ཐོའི་ནང་དུ། བོད་ནང་གི་ཆོས་དད་རང་དབང་དམིགས་བསལ་འབུར་དུ་བཏོན་ནས་བཀོད་ཡོད་པ་དང་། སྐབས་དེར་ལྟེ་གནས་ཁང་གི་ཉམས་ཞིབ་པ་ཚེ་རིང་རྒྱལ་ལགས་ཀྱིས་དམིགས་བསལ་འབུར་དུ་བཏོན་དགོས་པའི་རྒྱུ་མཚན་གཙོ་བོ་ནི། རྒྱ་གཞུང་གིས་ད་ལོར་དམིགས་བསལ་ཁྲིམས་གཞིའི་ངོས་ནས་བཀག་སྡོམ་བྱེད་ཀྱི་ཡོད་པ་དང་། བཀག་སྡོམ་བྱེད་ཡུལ་གཙོ་བོ་དེ་ཡང་དགོན་པ་བྱེ་བྲག་དང་མི་སྒེར་བྱེ་བྲག་ཙམ་མ་ཟད། དེའི་གནད་དོན་རེ་རེ་བཞིན་བཀག་སྡོམ་བྱེད་ཀྱི་ཡོད་པ་དང་། དགོན་པ་ནས་ཕྱིར་འཕུད་བཏང་བའི་གྲྭ་བཙུན་ཞིག་ལ་ཆ་བཞག་ན། ཕྱིར་འཕུད་བཏང་རྗེས་ད་དུང་ཁ་ལ་མ་ཉན་པ་ཡིན་ན། ཁོའི་དགོན་པ་དང་བླ་མ། ཕ་མ་དང་སྡེ་དཔོན། དེ་བཞིན། ས་གནས་ལས་བྱེད་སོགས་ཚང་མར་ཆད་པ་གཅོད་ཀྱི་ཡོད་པ་ལྟར། ཁྲིམས་ཀྱི་ངོ་བོའི་ཐོག་ནས་བཀག་སྡོམ་བྱེད་ཀྱི་ཡོད་པའི་ཛ་དྲག་གི་གནས་སྟངས་ཆགས་ཡོད་སྐོར་བརྗོད་ཡོད་པ་རེད།

གསར་འགོད་པ། པདྨ་མཚོ།