བཀྲ་ཤིས་དབང་ཕྱུགས་ལགས་ཀྱི་ཁྲིམས་བཤེར་དུས་ཡུན་ཕྱིར་འགྱངས་གནང་རོགས།

རྒྱ་རིགས་ཁྲིམས་གཏུགས་བྱེད་མཁན་ཁ་ཅིག་གིས་ཡུལ་ཤུལ་ཁུལ་འབྲིང་རིམ་མི་དམངས་ཁྲིམས་ལ་བཀྲ་ཤིས་དབང་ཕྱུགས་ཀྱི་ཁྲིམས་བཤེར་དུས་ཡུན་ཇེ་རིང་ལ་བཏང་ནས་ཁོའི་ཉེས་དོན་ཐོག་མུ་མཐུད་ཞིབ་འཇུག་བྱེད་དགོས་ཟེར།

ཁ་སང་ནེའུ་ཡོག་དུས་བབ་ཀྱིས་གནས་ཚུལ་སྤེལ་བ་ལྟར་ན། བོད་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་ཕྱུགས་ལགས་ཀྱི་གནད་དོན་ལ་བསྐྱར་དུ་ཁྲིམས་གཏུགས་བྱེད་མཁན་རྒྱ་རིགས་ཁྲིམས་རྩོད་པ་ཚོས་ཡུལ་ཤུལ་འབྲིང་རིམ་མི་དམངས་ཁྲིམས་ཁང་གི་ཁྲིམས་དཔོན་ཚོར་ཉེས་གྱོད་དོན་དེར་ཞིབ་དཔྱོད་བྱ་བའི་དུས་ཡུན་ཇེ་རིང་དུ་གཏང་དགོས་ལུགས་བཤད་ཡོད་འདུག

གནས་ཚུལ་ནང་། ལིན་ཆི་ལི་ (Lin Qilei) ཟེར་བའི་ཁྲིམས་རྩོད་པ་ཞིག་གིས་གསར་འགོད་པའི་དྲི་བར། ཁྲིམས་གཏུགས་བྱེད་མཁན་ཚོས་བཀྲ་ཤིས་དབང་ཕྱུགས་ཀྱི་ཉེས་དོན་ཐད་ཞིབ་འཇུག་བྱ་བའི་དུས་ཡུན་ཇེ་རིང་དུ་གཏོང་དགོས་པའི་རེ་འདུན་བཏོན་ཡོད་པ་དང་། སྤྱིར་བཀྲ་ཤིས་དབང་ཕྱུགས་ཀྱི་ཉེས་དོན་ཐད་སྤྱི་བདེ་ཉེན་རྟོག་པས་ཞིབ་བཤེར་བྱས་པ་བརྒྱུད་འཆར་ལོའི་ཕྱི་ཟླ་ ༡ ཚེས་ ༤ ཉིན་ཉེས་དོན་ཐག་གཅོད་བྱ་འཆར་ཡོད་པ་རེད། ཅེས་བཤད་འདུག

ཡུལ་ཤུལ་ཁུལ་འབྲིང་རིམ་མི་དམངས་ཁྲིམས་ཁང་གི་ཁྲིམས་དཔོན་ཚུའུ་ (Cui) ཟེར་བ་ཞིག་གིས། ཁྲིམས་གཏུགས་བྱེད་མཁན་ཚོས་ཟླ་འདིའི་ནང་ཡུལ་ཤུལ་ཁུལ་འབྲིང་རིམ་མི་དམངས་ཁྲིམས་ཁང་ནས་བཀྲ་ཤིས་དབང་ཕྱུགས་ཀྱི་ཉེས་དོན་དེ་ཕྱིར་ཁོང་ཚོར་སྤྲད་ནས། ཉེས་དོན་དེའི་ཐོག་མུ་མཐུད་ཞིབ་འཇུགས་བྱེད་དུ་འཇུག་དགོས་པའི་རེ་བ་བཏོན་ཡོད། ཅེས་བཤད་འདུག

བཀྲ་ཤིས་དབང་ཕྱུགས་ལགས་ཀྱི་ཁྲིམས་རྩོད་པ་ལིང་ཞོ་ཅིན་ (Liang Xiaojun) ཟེར་བ་ཞིག་གིས། འདི་ལོའི་ཕྱི་ཟླ་དགུ་བའི་ནང་། ནེའུ་ཡོག་དུས་བབ་གསར་ཁང་གིས་བཀྲ་ཤིས་དབང་ཕྱུགས་ལ་བཅར་འདྲི་ཞུས་པར་བརྟེན་ཏེ། ཁུལ་ཉེན་རྟོག་པས་བཀྲ་ཤིས་དབང་ཕྱུགས་ལ་ཞིབ་བཤེར་བྱས་ཡོད་པ་མ་ཟད། ཉེན་རྟོག་པས་ད་དུང་ནེའུ་ཡོག་དུས་བབ་གསར་ཁང་གིས་བཏོན་པའི་བཀྲ་ཤིས་དབང་ཕྱུགས་སྐོར་གྱི་བརྙན་ཐུང་དེ་དམིགས་འབེན་གཙོ་བོར་བཟུང་འདུག ཅེས་བརྗོད་ཡོད་འདུག

ཕྱི་ལོ་ ༢༠༡༥ ལོའི་ནེའུ་ཡོག་དུས་བབ་གསར་ཁང་གི་བཅར་འདྲིའི་སྐབས་སུ། བོད་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུགས་ལགས་ཀྱིས། ངས་བོད་རང་བཙན་ལ་རྒྱབ་སྐྱོར་བྱེད་ཀྱིན་མེད། རྒྱ་ནག་དབུས་གཞུང་གིས་གཏན་འབེབས་བྱས་པའི་གྲངས་ཉུང་མི་རིགས་རང་སྐྱོང་ས་ཁུལ་གྱི་བཅའ་ཁྲིམས་གཞིར་བཟུང་གིས། ངས་ནི་བོད་སྐད་ཡིག་སློབ་གསོའི་གནས་བབ་ཡར་རྒྱས་གཏོང་དགོས་པ་དང་། བོད་ཁུལ་དུ་བོད་ཡིག་བཀོལ་སྤྱོད་བྱེད་དགོས་པའི་རེ་འདུན་ཞུ་ཡི་ཡོད། ཅེས་བརྗོད་ཡོད་འདུག

འདི་ལོའི་ཕྱི་ཟླ་ ༡༢ ཚེས་ ༡༠ ཉིན་ཏེ་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ཉིན་མོར། རྒྱ་ནག་ནང་གི་ཨ་རིའི་གཞུང་ཚབ་པ་སྐུ་ཞབས་མ་ཁི་སི་བྷུ་ཁུ་སི་ (Max Baucus) ལགས་ཀྱིས་གཞུང་འབྲེལ་གསལ་བསྒྲགས་ཤིག་སྤེལ་ཏེ། རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་རང་དབང་དམངས་གཙོ་དོན་གཉེར་བ་མང་པོ་འཛིན་བཟུང་བྱས་ཡོད་པའི་གྲས་སུ། ད་དུང་བཀྲ་ཤིས་དབང་ཕྱུགས་ལགས་ཀྱང་ཡོད་པ་དང་། བཀྲ་ཤིས་དབང་ཕྱུགས་ལགས་ཀྱིས། བོད་སྐད་ཡིག་སློབ་གསོའི་གནས་བབ་ཡར་རྒྱས་གཏོང་དགོས་པའི་ཞི་འབོད་བྱས་པར་བརྟེན་ནས། རྒྱ་ནག་གཞུང་གིས་ཁོང་འཛིན་བཟུང་བཀག་བསྐྱིལ་བྱས་ཡོད་པ་རེད། ཅེས་བརྗོད་ཡོད་འདུག

གནས་ཚུལ་ལྟར་ན། ནེའུ་ཡོག་དུས་བབ་གསར་ཁང་གིས་བཀྲ་ཤིས་དབང་ཕྱུགས་ལགས་ལ་བོད་སྐད་ཡིག་སློབ་གསོའི་གནས་སྟངས་སྐོར་ལ་བཅར་འདྲི་ཞུས་པ་དང་། ཕྱིས་སུ་བཅར་འདྲི་དེ་བརྙན་ཐུང་བཟོས་ནས་ཟླ་བ་གཉིས་ཙམ་འགོར་བའི་རྗེས་ཏེ། ཕྱི་ཟླ་ ༡ དང་པོའི་ནང་ཡུལ་ཤུལ་ཁུལ་ཉེན་རྟོག་པས་བཀྲ་ཤིས་དབང་ཕྱུགས་ལགས་རང་ཡུལ་ནས་འཛིན་བཟུང་བཀག་བསྐྱིལ་བྱས་ཡོད་འདུག ཁོང་འཛིན་བཟུང་བཀག་བསྐྱིལ་བྱས་ཏེ་བདུན་ཕྲག་ཁ་ཤས་རིང་གསང་རྒྱ་བྱས་ཡོད་སྟབས། ཁོང་གི་ནང་མི་ཚོས་ཕྱི་ཟླ་ ༣ ཚེས་ ༢༤ བར་ཡུལ་ཤུལ་ཁུལ་ཉེན་རྟོག་པས་ཁོང་འཛིན་བཟུང་བཀག་བསྐྱིལ་བྱས་ཡོད་པའི་གནས་ཚུལ་ཤེས་རྟོགས་བྱུང་ཐུབ་མེད་པ་རེད། ཡུལ་ཤུལ་ཁུལ་ཉེན་རྟོག་པས་ཁོང་གི་ནང་མི་ཚོར། བཀྲ་ཤིས་དབང་ཕྱུགས་ལགས་ཀྱིས་རྒྱལ་ཁབ་ཀྱི་རྩ་ཁྲིམས་རྡོག་རོལ་བཏང་བ་མ་ཟད། བཀྲ་ཤིས་དབང་ཕྱུགས་ཀྱིས་ཁ་བྲལ་རིང་ལུགས་པར་ངན་སྐུལ་བྱས་ཡོད་སྟབས། ཁོང་ལ་མི་ལོ་ ༡༥ ཁྲིམས་ཐག་གཅོད་རྒྱུ་ཡིན་ལུགས་སོགས་བཤད་ཡོད་འདུག

གཞན། ན་ནིང་ལོ་མགོར་བཀྲ་ཤིས་དབང་ཕྱུགས་ལགས་རྒྱ་ནག་གི་རྒྱལ་ས་པེ་ཅིན་དུ་བསྐྱོད་ནས། རྒྱ་ནག་གཞུང་འབྲེལ་བརྒྱུད་ལམ་སྒྲིག་འཛུགས་ཁག་ (Chinese state news organizations)ལ། ཡུལ་ཤུལ་ཁུལ་རིམ་པའི་དཔོན་རིགས་ཚོས་བོད་སྐད་ཡིག་སློབ་གསོའི་ཐོག་དམ་དྲག་བྱེད་ཀྱིན་པའི་དངོས་ཡོད་གནས་ཚུལ་རྒྱང་བསྒྲགས་བྱེད་དགོས་པའི་ཞུ་གཏུགས་ཀྱང་བྱས་ཡོད་འདུག

གསར་འགོད་པ། པདྨ་རྒྱལ།