ཨ་རིའི་སྲིད་འཛིན་ཨོ་བྷ་མས་གཞུང་འབྲེལ་གསལ་བསྒྲགས་ཤིག་སྤེལ་ཏེ། ཆུ་ཚོད་ ༧༢ ནང་ཚུན་ལ་ཨ་རིའི་ནང་ཡོད་པའི་ཨུ་རུ་སུའི་ཕྱི་འབྲེལ་མི་སྣ་ ༣༥ དང་ཁོ་ཚོའི་ནང་མི་དང་བཅས་ཨ་རི་ནས་ཁ་འབྲལ་དགོས་སྐོར་བརྗོད་འདུག
དེ་རིང་སེ་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་སྲིད་འཛིན་ཨོ་བྷ་མས་གཞུང་འབྲེལ་གསལ་བསྒྲགས་ཤིག་སྤེལ་ཏེ། ཨ་རིའི་ནང་ཡོད་པའི་གསང་མྱུལ་བར་དོགས་གཞི་ཡོད་པའི་ཨུ་རུ་སུའི་ཕྱི་འབྲེལ་མི་སྣ་ ༣༥ ཙམ་ཨ་རི་ནས་ཕྱིར་འཕུད་གཏོང་རྒྱུ་དང་། ཨུ་རུ་སུའི་གསང་བའི་མི་སྣ་གཉིས་ཀྱི་ལས་དོན་ཐོག་དམ་དྲགས་བྱ་རྒྱུ་ཡིན་པ། ཕྱིར་འཕུད་གཏོང་འཆར་ཡོད་པའི་ཨུ་རུ་སུའི་མི་སྣ་དེ་དག་ཆུ་ཚོད་ ༧༢ ནང་། སོ་སོའི་ནང་མི་དང་བཅས་ཨ་རི་ནས་འཐོན་དགོས་སྐོར་སོགས་བརྗོད་འདུག
ཨུ་རུ་སུའི་མི་སྣ་དེ་དག་གི་གྲས་སུ་ཨུ་རུ་སུའི་ཕྱི་འབྲེལ་ལས་ཁུངས་ (GRU) ཀྱི་དཔོན་རིགས་ཀོ་རོ་བྷོ་ཝ་ (Korobov) དང་། ཨུ་རུ་སུའི་དམག་དོན་གསང་བའི་ལས་ཁུངས་ཀྱི་གཙོ་འཛིན་གཞོན་པ་གྷེ་ཙུ་ནོ་ཝ་ (Gizunov)། དམག་དོན་གསང་བའི་ལས་ཁུངས་ཀྱི་གཙོ་འཛིན་གཞོན་པ་ཟུར་བ་ཀོ་སི་ཊ་ཡུ་ཀོ་ཝ་ (Kostyukov) དང་ཨ་ལེ་ཀ་སི་ཡུ་ཝ་ (Alekseyev) སོགས་ཚུད་ཡོད་པ་མ་ཟད། ད་དུང་ཨ་རིའི་ནང་གི་ཨུ་རུ་སུའི་རྫོར་བདེ་འཇགས་ལས་ཁུངས་ (Zor Security) དང་། དམིགས་བསལ་འཕྲུལ་ལས་རིག་རྩལ་ལྟེ་གནས་ཁང་ (STC)། དེ་བཞིན། གཞུང་འབྲེལ་ཁེ་ལས་མ་ཡིན་པའི་དེང་རབས་འཕྲུལ་ཆས་གསར་སྐྲུན་གྱི་ཆེད་ལས་ལྷན་ཚོགས་ (NOPADDPS) སོགས་ཀྱི་ཐོག་ལའང་དམ་དྲགས་བྱ་རྒྱུ་ཡིན་འདུག
གསལ་བསྒྲགས་དེའི་ནང་ཨོ་བྷ་མས། ཨུ་རུ་སུ་དྲ་ཐོག་གསང་ཉུལ་བ་ཚོས་ཨ་རིའི་སྲིད་འཛིན་འོས་བསྡུའི་ལས་རིམ་ནང་ཐེ་གཏོགས་བྱས་ཏེ་འོས་བསྡུར་ཤན་ཤུགས་ཚབས་ཆེན་བཟོས་ཡོད་པ་མ་ཟད། ཨ་རིའི་ནང་སྲིད་ཀྱི་སྡེ་ཚན་མང་པོ་ཞིག་ལ་སྣང་ཆུང་དང་ལས་དོན་ལ་གཏོར་བརླག་བྱས་ཡོད་སྟབས། ཨ་རིའི་གཞུང་གིས་གནད་དོན་འདི་དང་ལེན་དང་བཟོད་བསྲན་བྱེད་ཐབས་མེད། འདི་ནི་ཨུ་རུ་སུའི་གཞུང་གིས་རྒྱལ་སྤྱིའི་ཁྲིམས་དང་འགལ་བའི་བྱ་སྤྱོད་སྤེལ་ཏེ། ཨ་རིའི་ཁེ་ཕན་ལ་གཏོར་བརླག་བྱས་པའི་གནད་དོན་ལ་བརྡ་ལན་གསལ་བོ་སྤྲད་པ་ཡིན། ཨུ་རུ་སུའི་གསང་བའི་མི་སྣ་ཚོས་ཨ་རིའི་ཁེ་ཕན་ལ་ཁྲིམས་འགལ་བཙན་ཤེད་ཀྱི་བྱ་སྤྱོད་མང་པོ་སྤེལ་ཡོད། ཨ་རིའི་གཞུང་གིས་ཡུལ་དུས་དང་བསྟུན་ནས་མུ་མཐུད་དུ་ཨུ་རུ་སུའི་ཁྲིམས་འགལ་གྱི་བྱ་སྤྱོད་དེ་དག་ཐོག་དམ་དྲགས་ལས་འགུལ་སྣ་ཚོགས་སྤེལ་ངེས་ཡིན། ཞེས་བརྗོད་ཡོད་འདུག
ཨུ་རུ་སུའི་གཞུང་ཚབ་ཁང་གིས། ཨོ་བྷ་མའི་གཞུང་ནས་ཨུ་རུ་སུའི་གཞུང་གིས་ཨ་རིའི་འོས་བསྡུ་ལ་ཐེ་གཏོགས་བྱས་སོང་ཟེར་བ་དེར་ངོས་ལེན་བྱེད་ཐབས་མེད་ལ། ཨུ་རུ་སུའི་གཞུང་གིས་ཨ་རི་ལ་དྲ་ཐོག་གསང་ཉུལ་གྱི་གནད་དོན་ཡང་བཟོས་མྱོང་མེད། ཅེས་བརྗོད་འདུག
རྩོད་རྙོག་དེའི་ཐད་ཨ་རིའི་སྲིད་འཛིན་འོས་ཐོབ་པ་སྐུ་ཞབས་ཊི་རུམ་ཕི་ཡིས། ཨུ་རུ་སུས་ཨ་རིའི་འོས་བསྡུ་ལ་ཐེ་གཏོགས་བྱས་པར་དོགས་གཞི་ཡོད། ཨ་རིའི་ཕྱོགས་ནས་གནད་དོན་དེའི་ཐོག་རྟོགས་ཞིབ་བྱེད་པའི་དུས་ལ་བབ་ཡོད། ཨ་རིའི་རྒྱལ་ཁབ་དང་ཨ་རིའི་མི་མང་གི་ཁེ་ཕན་ཆེད་དུ། གཟའ་འཁོར་རྗེས་མར་ང་ཨུ་རུ་སུའི་གསང་བའི་དཔོན་རིགས་ཚོར་ཐུག་འཕྲད་བྱས་ཏེ། རྩོད་རྙོག་འདིའི་དངོས་ཡོད་གནས་ཚུལ་ལ་རྒྱུས་ལོན་བྱ་རྒྱུ་ཡིན། ཞེས་བརྗོད་འདུག
གནས་ཚུལ་འདིའི་ནང་ད་དུང་། སྲིད་འཛིན་ཨོ་བྷ་མའི་གཞུང་གིས། མི་འགྱངས་པར་ཨུ་རུ་སུའི་གསང་བའི་མི་སྣ་ཚོས་དྲ་ཐོག་ནས་ཨ་རིའི་འོས་བསྡུ་ལ་ཐེ་གཏོགས་བྱས་པའི་བདེན་དཔང་ཕྱིར་བསྒྲགས་བྱ་རྒྱུ་ཡིན་སྐོར་བརྗོད་ཡོད་པ་དང་། དེ་བཞིན། ཨུ་རུ་སུའི་ཕྱོགས་ནས་ཀྱང་། མི་འགྱངས་པར་ཨ་རིའི་གྲོང་ཁྱེར་མ་རེ་ལན་ཊི་དང་ནེའུ་ཡོག་གྲོང་ཁྱེར་གཉིས་ནང་ཡོད་པའི་ཨུ་རུ་སུའི་གཞུང་འབྲེལ་ལས་ཁུངས་གཉིས་སྒོ་རྒྱག་རྒྱུ་ཡིན་སྐོར་བརྗོད་ཡོད་ཚུལ་སོགས་བཀོད་འདུག
གཞན། ཆབ་སྲིད་དབྱེ་ཞིབ་པ་ཚོས། ཐེངས་འདིའི་དམ་དྲགས་ཀྱི་ལས་འགུལ་དེ་ནི་ཨ་རིས་དྲ་ཐོག་གསང་ཉུལ་གྱི་གནད་དོན་ཐོག་སྤེལ་བའི་ལས་འགུལ་ཤུགས་ཆེ་ཤོས་དེ་ཆགས་ཀྱི་ཡོད་ནའང་། འཆར་ལོའི་ཕྱི་ཟླ་ ༡ ནང་སྐུ་ཞབས་ཊི་རུམ་ཕི་ཡི་སྲིད་དབང་འོག ཨུ་རུ་སུ་དང་ཨ་རི་གཉིས་བར་གྱི་འབྲེལ་ལམ་ཅུང་གུ་ཡངས་ཆགས་སྲིད་པར་ཚོད་དཔག་བྱེད་ཀྱིན་འདུག
གསར་འགོད་པ། པདྨ་རྒྱལ།
