བོད་རིགས་ཚོང་པ་བློ་བཟང་དར་རྒྱས་ཀྱིས་ས་ཁང་འཛུགས་སྐྲུན་ལས་གཞིའི་ཁྲོད་དངུལ་འབོར་ཆེན་གཡོ་ལེན་བྱས་པ་དང་ཁྲིམས་འགལ་གྱི་དངུལ་ཉར་བ་སོགས་ཀྱི་ནག་ཉེས་འོག་ལོ་ ༡༠ ཡི་བཙོན་འཇུག་ཁྲིམས་ཐག་བཅད་ཡོད་འདུག
གཟའ་པ་སངས་ཉིན་ཨ་རིའི་སེ་ཊལ་དུས་བབ་གསར་ཁང་ (seattletimes) གིས་གནས་ཚུལ་སྤེལ་བ་ལྟར་ན། བོད་རིགས་ཚོང་པ་བློ་བཟང་དར་རྒྱས་(མིང་གཞན་ལ་བསྟན་པ་དར་རྒྱས་ཀྱང་ཟེར་གྱི་ཡོད་འདུག)ཀྱིས་ས་ཁང་ཉོ་འཚོང་གི་ཁེ་ལས་གཉེར་ཏེ། གཞན་གྱི་ལག་ནས་མ་དངུལ་འབོར་ཆེན་གཡོ་ལེན་བྱས་པ་དང་། ཁོ་རང་གི་དངུལ་ཡོངས་རྫོགས་ཨ་རིའི་དངུལ་ཁང་སོགས་སུ་མ་བཅུག་པར། རྒྱན་འཛུགས་ཁང་གི་དངུལ་བྱང་བརྒྱུད་ནས་ཁྲལ་མ་འཇལ་བར་ཉར་ཐབས་བྱས་པ་སོགས་ཀྱི་ཉེས་དོན་འོག ཟླ་འདིའི་ཕྱི་ཚེས་ ༥ ཉིན་ཨ་རིའི་སེ་ཊལ་ཁྲིམས་ཁང་གིས། ཉུང་མཐར་ལོ་ ༡༠ ཡི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། སྒོར་ས་ཡ་ ༢༤ ཉེས་ཆད་དང་ཁོ་རང་གི་ལས་གཞི་ཡོངས་རྫོགས་བཀག་སྡོམ་བྱས་པ་བསྒྲགས་ཡོད་པ་དང་། ད་ལོའི་ཕྱི་ཟླ་ ༤ ཚེས་ ༦ ཉིན་དངོས་སུ་བཙོན་འཇུག་བྱ་འཆར་ཡོད་འདུག
ཁྲིམས་ཁང་གི་གསལ་བསྒྲགས་ལྟར་ན། བོད་རིགས་ཚོང་པ་བློ་བཟང་དར་རྒྱས་ཀྱིས། རྒྱ་རིགས་མ་དངུལ་འཛུགས་མཁན་ ༢༨༠ ཚོང་འབྲེལ་བྱས་ཏེ། ཨ་རིའི་གནས་སྤོ་མ་དངུལ་འཛུགས་སྐྲུན་ལས་རིམ་ (EB-5 Immigrant Investor Pilot Program) བརྒྱུད་ཁོར་ཚོར་ཨ་རིའི་ལག་དེབ་ལྗིང་ཁུ་ (green card) མཁོ་སྤྲོད་བྱེད་ཐུབ་ཚུལ་བཤད་པ་དང་། ཁོ་རང་གི་ས་ཁང་འཛུགས་སྐྲུན་ལས་གཞིའི་ནང་མ་དངུལ་ཨ་སྒོར་ས་ཡ་ ༡༥༠ ཙམ་འཇོག་ཏུ་བཅུག་ཡོད་འདུག
ཨ་རིའི་མ་དངུལ་འཛུགས་སྐྲུན་འགན་སྲུང་ཚོགས་ཆུང་ (SEC) གིས། བློ་བཟང་དར་རྒྱས་ཀྱིས་ཁྲིམས་འགལ་ཐོག་སེ་ཊལ་ (Seattle) གྲོང་ཁྱེར་ནང་པོ་ཏ་ལ་ཞེས་པའི་ས་ཁང་མང་པོ་འཛུགས་སྐྲུན་དང་། ཨེ་ཝི་རི་ཌ་སྤྱི་མང་ཁྲོམ་རྭ་ (Everett Public Market) ཉོ་འཚོང་སོགས་ཀྱི་ལས་གཞིའི་ཐད་མ་དངུལ་ཨ་སྒོར་ས་ཡ་ ༡༢༥ བཏང་ཡོད་པ་མ་ཟད། ཁོས་ད་དུང་མ་རྐང་འཛུགས་མཁན་ཚོའི་ལག་ནས་ཨ་སྒོར་ས་ཡ་ ༡༤ གཡོ་ལེན་བྱས་ཡོད་པ་དང་། བྷི་ལི་ཝུ (Bellevue) གྲོང་ཁྱེར་དུ་ཨ་སྒོར་ས་ཡ་ ༢.༥ སྤྲད་ནས་ཁོའི་བཟའ་ཟླ་ཊ་མེ་ཨ་གྷ་སེ་ (Tami Agassi) དང་བུ་མོ་གཉིས་ལ་སྡོད་ཁང་ཞིག་ཀྱང་ཉོས་ཡོད་སྐོར་སོགས་བརྗོད་འདུག
གནས་ཚུལ་ལྟར་ན། བོད་རིགས་ཚོང་པ་བློ་བཟང་དར་རྒྱས་ཀྱིས། ཨ་རིའི་སེ་ཊལ་ (Seattle) གྲོང་ཁྱེར་དང་ཨེ་ཝི་རི་ཊ་ (Everett) གྲོང་ཁྱེར། ཀེར་ཀ་ལན་ཌི་ (Kirkland) དང་ཤཱོ་རི་ལེན་ (Shoreline) གྲོང་ཁྱེར་བཅས་ཀྱི་ནང་ས་ཁང་འཛུགས་སྐྲུན་གྱི་ལས་འཆར་བཟོས་ཡོད་པ་མ་ཟད། ལས་གཞི་དེ་དག་ཨ་རིའི་མངའ་སྡེ་ཨོ་རི་གྷོན་ (Oregon) དང་ཁ་ལེ་ཧྥོར་ནེ་ཡ་ (California) བཅས་ཀྱི་ནང་རྒྱ་བསྐྱེད་རྒྱུའི་འཆར་གཞི་ཡང་ཡོད་འདུག
ཕྱི་ལོ་ ༢༠༠༦ ལོ་ནས་བློ་བཟང་དར་རྒྱས་ཀྱིས་ཨ་རིའི་ནང་ས་ཁང་འཛུགས་སྐྲུན་གྱི་ཁེ་ལས་གཉེར་མགོ་བཙུགས་ཏེ། ཐོག་མར་ཨེ་ཝི་རི་ཊ་གྲོང་ཁྱེར་ནང་ཡོད་པའི་ཨེ་ཝི་རི་ཌ་སྤྱི་མང་ཁྲོམ་རྭ་ (Everett Public Market) ཉོ་འཚོང་བྱས་ཡོད་པ་དང་། ཕྱིས་སུ་གྲོང་ཁྱེར་དེའི་ནང“པོ་ཏ་ལ”ཞེས་པའི་སྡོད་ཁང་མང་པོ་འཛུགས་སྐྲུན་བྱས་ཡོད་པ་དང་། ཕྱི་ལོ་ ༢༠༡༠ ལོ་ནས་ཁོས་ཕྱོགས་གཅིག་ནས་ས་ཁང་ཉོ་འཚོང་དང་འཛུགས་སྐྲུན་གྱི་ཁེ་ལས་གཉེར་བ་དང་། ཕྱོགས་གཞན་ཞིག་ནས་ཨ་རིའི་གནས་སྤོ་མ་དངུལ་འཛུགས་སྐྲུན་ལས་རིམ་ (EB-5 Immigrant Investor Pilot Program) བརྒྱུད་དེ་ཚོང་པ་གཞན་གྱི་ལག་ནས་མ་རྐང་བསྡུ་ལེན་བྱས་ཡོད་འདུག
ཕྱི་ལོ་ ༢༠༡༢ ནས་ ༢༠༡༥ ལོའི་བར་ཁོས་ཡིག་ཆ་རྫུན་མ་བཟོས་ཏེ། རྒྱ་རིགས་ཚོང་པ་མ་དངུལ་འཇོག་མཁན་ ༢༨༢ ཡི་ལག་ནས་མ་དངུལ་ཨ་སྒོར་ས་ཡ་ ༡༥༣ བླངས་ཡོད་པ་དང་། རྒྱ་རིགས་དེ་ཚོའི་གྲས་ཀྱི་མ་དངུལ་འཇོག་མཁན་ ༢༠༢ ཡིས་པོ་ཏ་ལ་ཞེས་པའི་ས་ཁང་འཛུགས་སྐྲུན་ལས་གཞིའི་ནང་མ་དངུལ་ཨ་སྒོར་ས་ཡ་ ༤༣.༦ བཞག་ཡོད་པ་དང་། རྒྱ་རིགས་ ༢༠༢ ཡིས་པོ་ཏ་ལ་ལྕོགས་མཁར་ཞེས་པའི་ས་ཁང་འཛུགས་སྐྲུན་ལས་གཞིའི་ནང་མ་དངུལ་ཨ་སྒོར་ཁྱོན་ས་ཡ་ ༡༡༠ བཞག་ཡོད་འདུག
བློ་བཟང་དར་རྒྱས་ཀྱིས་ཨེ་ཝི་རི་ཊ་ས་ཁང་འཛུགས་སྐྲུན་ལས་གཞིའི་ཐད་ (Voya Insurance and Annuity Co) ཚོང་གཉེར་ཁང་ནས་ཨ་སྒོར་ས་ཡ་ ༢༥ ཡི་བུ་ལོན་བླངས་ཡོད་པ་དང་། པོ་ཏ་ལ་ལྕོགས་མཁར་འཛུགས་སྐྲུན་ལས་གཞིའི་ཐད་ (Shanghai Binshun Investment Management Co) ཚོང་གཉེར་ཁང་ནས་ཨ་སྒོར་ས་ཡ་ ༣༠ དང་། འཛུགས་སྐྲུན་ལས་གཞི་གཞན་གྱི་ཐད་ཨ་སྒོར་ས་ཡ་ ༣༠ བུན་དངུལ་བླངས་ཡོད་སྐོར་སོགས་གསར་ལམ་ཐོག་བཀོད་འདུག
བོད་རིགས་བློ་བཟང་དར་རྒྱས་ཀྱི་ཕ་ཡུལ་རྒྱལ་རོང་ཡིན་པ་དང་ད་ལྟ་རང་ལོ་ ༤༣ ཡིན་འདུག ཁོ་བོད་ནས་ག་དུས་ཡོང་མིན་གསལ་ཁ་མེད་ཀྱང་། སྔར་གྲྭ་བ་ཡིན་པ་དང་། རྒྱ་གར་དུ་ཡོང་སྟེ་དྷ་རམ་ས་ལ་སོགས་སུ་ལོང་མང་བསྡད་མྱོང་ཡོད་འདུག ༡༩༩༧ ལོར་གཞན་ལ་བུ་ལོན་གཡར་ཏེ་ཨ་རིར་ཕྱིན་ཡོད་ཅིང་། ༢༠༠༤ ཁོ་ཨ་རིའི་ཊི་ནེ་སི་རྩེད་མཁན་གྲགས་ཅན་ཨན་ཌ་རི་ཨ་གྷ་སེ་ (Andre Agassi) ཡི་སྲིང་མོ་ཊ་མེ་ཨ་གྷ་སེ་ (Tami Agassi)དང་གཉེན་སྒྲིག་བྱས་ཏེ་ད་ལྟ་བུ་མོ་གཅིག་ཡོད་འདུག ཕྱི་ལོ་ ༢༠༡༥ ལོའི་ཕྱི་ཟླ་ ༨ པའི་ནང་ལ་ཆེས་ཐོག་མར་ཁོ་རང་གི་ནག་ཉེས་ཕྱི་ལོགས་སུ་ཐོན་ཡོད་པ་དང་། འདས་པའི་ལོ་གཅིག་ལྷག་རིང་ཁྲིམས་བཤེར་ཞིབ་འཇུག་བྱས་པ་བརྒྱུད་དེ་ཟླ་འདིའི་ཚེས་ ༥ ཉིན་ཁྲིམས་ཐག་གཅོད་བྱས་ཡོད་འདུག
གསར་འགོད་པ། པདྨ་རྒྱལ།
ངས་ཁྱེད་ངོ་མི་ཤེས་ཀྱང་། ཕོ་ཁྱོ་ག་ཟེར་ན་འདི་འདྲ་དགོས། འདི་འདྲའི་བོད་རིགས་ཤིག་ཐོན་ཐུབ་པར་འགྲིག་བཞག སྤོབས་པ་སྐྱེད་ཡག་རེད ། དེང་སྐབས་འཛམ་གླིང་འདིར་ཕྱུག་བདག་ཡིན་ན་རྐུན་མ་མིན་པའི་ཁྱབ་ཟེར་ཆོག ཁྱེད་རྐུན་མ་མ་རེད། ངོ་མ་མ་རེད། ལྷག་པར་དུ་ང་ཚོ་བོད་པའི་སྤྱི་ཚོགས་ནང་རྐུན་མ་ཡིན་ན་ཉམ་ཆུང་རྒྱབ་རྟགས་མེད་མཁན། སྤྱི་རྒྱུ་ཆང་ངེ་ཆུང་ངེ་དང་ཙག་ཙིག་རང་དོན་དུ་སྤྱོད་མི་ཤེས་མཁན་ཞིག་ཡིན་དགོས། ངོ་མ་ཡིན་ད། ཁྱེད་ཏོག་ཙམ་མགོ་བདེ་སོང་བ་རེད། རྒྱར་རྒན་ཁ་ཤས་ཀྱིས་མགོ་བསྐོར་བཏང་འདུག ཕྱིན་ཆད་ནས་གཟོན་གྱིས། ཁོང་ཚོས་བོད་བཟས་པ་དེ་ལ་རྐུན་མ་རེད་ཟེར་ནས་ངོས་ལེན་བྱེད་མཁན་མི་འདུག གས་གནང་གི་མ་རེད། བཙོན་ནས་མགྱོགས་པོ་ཐོན་ཤོག ༧རྒྱལ་བ་རིན་པོ་ཆེ་གཅིག་མཇལ། བཟོད་སྲོལ་ཅིག་ཞུས། དེ་ནས་ནེའུ་ཡོག་བོད་མིའི་སྤྱི་ཁང་དེ་ལེགས་སྒྲུབ་ཡོང་སླད་རོགས་རམ་ཏོག་ཙམ་ཅིག་བྱོས་དང། བོད་མིར་འཕྲལ་ཕུགས་གཉིས་ཀར་ཞབས་འདེགས་བླ་མེད་ཡིན་པར་རིམ་པས་ར་འཕྲོད་ཡོང་གི་རེད། དེ་ནས་བོད་ཕྱི་ནང་གི་་མི་ཆེ་ཆུང་ཚང་མས་ཁྱེད་རང་ལ་ལྷ་གསོལ་ཀླུ་གསོལ་གྱིས་བཀུར་རྒྱུ་ཡིན་ཡིན་པ་རེད། བློ་བཟང་དར་རྒྱས་དར་ཤོག བློ་བཟང་དར་རྒྱས་རྒྱས་ཤོག །
ཞབས་འདྲེན་པ་།
མྱི་ངར་བ་རེད། ཨ་སྒོར་ས་ཡ་མང་པོ་ཡར་སྐོར་མར་སྐོར་བྱེད་ཐུབ་པ་གཅིག་པུའང་རིག་སྟོབས་ཧ་ཅང་ཆེ་བའི་རྟགས་རེད།
རྐུན་མ་ལ་མྱི་ངར་མ་ཟེར་ན། ང་ཚོ་བོད་མིའི་བཟང་སྤྱོད་ཟེར་བ་དེ་ག་པར་ཕྱིན་སོང་། ཐུགས་རྗེ་གཟིགས་འགན་འཁྱེར་རོགས་གནང་།
རང་ཅག་བོད་ལ་དེང་གི་དུས་སུ་ཨ་རིར་ན་ཨ་སྒོན་ཕོན་ཆེར་འདི་འདྲ་ཞིག་གི་ཉོ་ཚོང་བྱས་ཐུབ་པའི་མི་སྣ་ཞིག་བྱུང་ཡོད་པ་ནི་ཆེས་སྤོབས་པ་སྐྱེས་འོང་པའི་གནས་ཞིག་རེད།
མ་ཟད་ཁོང་གིས་རྒྱ་མི་མང་དག་ལ་དངུལ་ཕོན་ཆེར་མགོ་སྐོར་བྱས་ཐུབ་པ་ནི་ལས་སླ་མོ་ཞིག་མ་རེད།