༧གོང་ས་རྒྱལ་བ་རིན་པོ་ཆེ་མཆོག་ནས། སྔོན་མ་བོད་གངས་ཅན་པའི་ལྗོངས་སུ་སངས་རྒྱས་པའི་བསྟན་པ་ཧ་ཅང་དར་ཡོད་ནའང་མང་ཚོགས་ཀྱིས་ཆོས་ཀྱི་འགྲོ་སྟངས་མ་ཤེས་པ་དང་། རྒྱུ་མཚན་ལ་དོ་སྣང་དང་སློབ་སྦྱོང་མ་བྱས་པར་དད་པ་རང་བྱས་ནས་འགྲོ་བཞིན་ཡོད་སྟབས། དེ་སངས་རྒྱས་པའི་ཆོས་ངོ་མའི་སྒང་ལ་སླེབ་ཐུབ་ཀྱི་མེད་སྐོར་གསུངས་སོང་།
དེ་རིང་སྔོ་དྲོའི་ཆུ་ཚོད་ ༧།༣༠ ནས་ ༡༡།༣༠ བར། ༧གོང་ས་རྒྱལ་བ་རིན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་བཀའ་དབང་གསུངས་སོང་ཡོད་པ་དང་། གསུང་ཆོས་སྟེང་བོད་པ་གཙོས་པའི་འཛམ་གླིང་རྒྱལ་ཁབ་མང་པོའི་ཆོས་ཞུ་བ་ ༣༠༠༠ ཙམ་འཛོམས་འདུག
གསུང་ཆོས་ཀྱི་སྔོན་དུ་༧གོང་ས་རྒྱལ་བ་རིན་པོ་ཆེ་མཆོག་གིས་གསུངས་དོན། དེ་རིང་གི་བཀའ་དབང་དེ་སྤྱི་རིམ་ཡིན། བོད་ཀྱི་བསྟན་སྲིད་སྤྱིའི་དོན་དག་དང་། དེ་ནས་སེམས་ཅན་ཐམས་ཅད། ཡང་སྒོས་འཛམ་བུ་གླིང་འདིའི་སྒང་ལ་མི་དུང་ཕྱུར་བདུན་བཅུ་ཙམ་ཡོད་པ་རེད། བསམ་བློ་རྒྱ་ཆེན་པོ་དང་གཏིང་རིང་པོ་གཏོང་ཐུབ་མཁན་དེ་མི་གཅིག་པུ་རེད་ལ་ཉོག་དྲ་བཟོ་མཁན་དེའང་མི་རེད། ང་རང་ཚོས་སེམས་ཅན་ཐམས་ཅད་ཅེས་སྨོན་ལམ་རྒྱག་གི་ཡོད་པ་རེད། འཇིག་རྟེན་ཁམས་ལ་མཐའ་དང་མུ་མེད་སྟབས། ང་ཚོས་སྨོན་ལམ་རྒྱག་རྒྱུ་མ་གཏོགས་གང་ཡང་བྱེད་ཐབས་ཡོད་པ་མ་རེད། འཛམ་བུ་གླིང་འདིའི་སྒང་ལ་ཉ་དང་བྱ་རི་དྭགས། འབུ་སྲིན་བགྲང་ལས་འདས་པ་ཞིག་ཡོད་པ་རེད། སྨོན་ལམ་འདེབས་རྒྱུ་ཙམ་ལས་གང་ཡང་བྱེད་ཐུབ་པ་མི་འདུག ང་ཚོས་བྱེད་ཐུབ་པ་ནི་སེམས་ཅན་ཐམས་ཅད་ཅེས་ཁ་ཞེ་གཉིས་མེད་ཀྱིས་སྨོན་ལམ་འདེབས་རྒྱུ་དེ་རེད། འཛམ་བུ་གླིང་འདིའི་སྒང་མི་དུང་ཕྱུར་བདུན་བཅུ་ཙམ་ཡོད་པ་རེད། གང་ལྟར་མི་ལ་ཀླད་པ་དང་། སྐད་ཡིག་ཡོད་པ་རེད། དེ་འདྲའི་ཐོག་ནས་ཕན་ཐོགས་བྱེད་ཐུབ་ཀྱི་ཡོད། ངོས་རང་གིས་ནམ་རྒྱུན་སངས་རྒྱས་པའི་ཆོས་བྱེད་སྐབས་སེམས་ཅན་ཐམས་ཅད་ལ་སེམས་སྐྱེད་ཀྱི་ཡོད། སེམས་སྐྱེད་པ་དེ་ཁ་ཞེ་གཉིས་མིན་ན་ནི་སྨོན་ལམ་བརྒྱབ་ནས་བཞག་ན་འགྲིག་གི་རེད། སེམས་སྐྱེད་པ་དེ་ཁ་ཞེ་གཉིས་མེད་ཡིན་ན་ཁ་ཡོད་ལག་ཡོད་ཀྱིས་ཕན་ཐོགས་བྱེད་ས་ཞིག་ཡོད་ན་ཕན་ཐོགས་བྱེད་དགོས་པ་དེ་གལ་ཆེན་པོ་རེད།
དེ་རིང་ང་ཚོས་འདིར་མ་ཎི་རིལ་སྒྲུབ་བྱེད་པ་དང་། མ་ཎི་གསོག་པ་དེ་གང་ལྟར་སེམས་ཅན་ཐམས་ཅད་སྤྱི་དང་། ཡང་སྒོས་འཛམ་བུ་གླིང་འདིའི་སྒང་སེམས་ཅན་དང་། དེའི་ནང་ནས་འགྲོ་བ་མིའི་རིགས། དེ་དག་ལ་ང་ཚོས་ཕན་ཐོགས་བྱེད་སྡོད་པ་ཞིག་དང་། མ་ཎི་རིལ་བུ་དེ་ཏན་ཏན་འགྲོ་བ་མང་པོར་ཁྱབ་ཀྱི་ཡོད་སྟབས། དེ་ཚང་མ་ལ་ཐད་ཀར་སེམས་པ་བཟང་པོ་ཞིག་ཡོང་བ་དང་། དཔེར་ན། ཞེ་སྡང་དང་སེམས་རྩུབ་པོ་དེ་འདྲ་མི་ཡོང་བ། སེམས་ཞི་བདེ་ཡོད་པའི་ཐོག་ནས། སོ་སོའི་ཡུལ་ལུང་དེ་བདེ་བ་ཡོང་བ་ཞིག་དང་། མི་རིགས་དེ་སྐྱིད་པོ་ཡོང་བ་ཞིག རང་སྐྱིད་པའི་ཞོར་ལ་རོགས་པའང་སྐྱིད་པོ་ཡོང་གི་ཡོད་པ་ཞིག་ཡིན་སྟབས། ཚང་མས་སེམས་ཡག་པོ་ཞིག་སྐྱེད། སྨོན་ལམ་ཡག་པོ་ཞིག་བརྒྱབ་ནས་མ་ཎི་རིལ་སྒྲུབ་གནད་སྨིན་ཞིག་གནང་ཤོག་ཨཱ། ཁ་སང་ནས་ང་རང་ལ་བསམ་བློ་ཞིག་འཁོར་སོང་། ད་རེས་ཀྱི་མ་ཎི་རིལ་སྒྲུབ་ཀྱི་མགོ་དེར་ཐུགས་རྗེ་ཆེན་པོའི་བཀའ་དབང་ཞིག་བྱས་ན་ཡག་པོ་མེད་འགྲོ་དྲན་སོང་། མི་གཞན་དག་གིས་དབང་དེ་བྱེད་རོགས་ཞེས་གང་ཡང་ལབ་མ་སོང་། སྦྱིན་བདག་ཀྱང་གང་ཡང་མེད། དེར་བརྟེན། ཐུགས་རྗེ་ཆེན་པོའི་དབང་དེ་ངེད་རང་གིས་བསྐུར། སྦྱིན་བདག་ཀྱང་ངེད་རང་ཡིན། ཞེས་སོགས་གསུངས་སོང་།
མ་ཎི་གསོག་སྒྲུབ་གནང་རྗེས་༧གོང་ས་མཆོག་གིས་སླར་ཡང་གསུངས་དོན། དེ་རིང་སྤྱིར་སེམས་ཅན་ཐམས་ཅད། ཡང་སྒོས་འཛམ་གླིང་འདིའི་སྒང་གི་སྨྲ་ཤེས་དོན་གོ་བའི་མི་རིགས་ཆགས་སྡང་གི་དབང་དུ་སོང་བསྡད་ཡོད་སྟབས། ང་ཚོ་རང་གཞན་ཚང་མས་བདེ་བ་འདོད་པ་རེད་དེ། བློ་ཆགས་སྡང་གི་དབང་དུ་སོང་བསྡད་ཡོད་སྟབས། སྡུག་བསྔལ་མི་འདོད་བཞིན་དུ་སྡུག་བསྔལ་གྱི་རྒྱུ་ལ་དང་དོད་སླེབས་ཀྱི་ཡོད། སྡུག་བསྔལ་གྱི་རྒྱུ་ཕྱི་ལོགས་ལ་ཡོད་པ་མ་རེད། སྡུག་བསྔལ་གྱི་རྒྱུ་གཙོ་བོ་དེ་སོ་སོའི་ནང་ལ་ཡོད་རེད། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་བྱ། ཞེས་གསུངས་པ་ལྟར། དགེ་བ་དང་སྡིག་པ་ཞེས་པ་དེ་གཙོ་བོ་རང་དང་གཞན་ལ་འབྲས་བུ་ཕན་ཐོགས་ཡོད་བསྡད་པ་ཞིག་འདུག་ན་དེ་དགེ་བ་རེད། རང་དང་གཞན་ལ་སྡུག་བསྔལ་ཡོང་གི་འདུག་ན་དེ་སྡིག་པ་རེད། དགེ་བ་དང་སྡིག་པ་ཞེས་པ་དེ་འབྲས་བུ་བཟང་ངན་ཞིག་ལ་ལྟོས་ནས་འཇོག་དགོས་པ་མ་གཏོགས་དགེ་སྡིག་རང་ཚན་པ་ཞིག་ཡོད་པ་མ་རེད།
ང་ཚོ་ཚང་མར་རང་བཞིན་ལྷན་སྐྱེས་ཀྱི་ཤེས་པ་ཞིག་ཡོད་པ་དང་། ཤེས་པ་དེ་དང་འབྲེལ་ནས་ཚོར་བ་ཞིག་ཡོད་པ། ཚོར་བ་དེ་ལ་བརྟེན་ནས་ཚོར་བ་བདེ་བ་ཞིག་དང་ཚོར་བ་སྡུག་བསྔལ་ཞིག་རང་བཞིན་གྱིས་ཡོང་གི་ཡོད། སྡུག་བསྔལ་གྱི་རྒྱུ་མཐར་ཐུག་ནི་ཆགས་སྡང་གཉིས་རེད། ཆགས་སྡང་གཉིས་དང་དུ་བླངས་ཏེ་འཛམ་གླིང་འདིའི་སྒང་ལ་འགྲོ་སྡོད་ཀྱི་ཡོད། ཆོས་ཁས་ལེན་ནའང་རེད་ལ། ཆོས་ཁས་མ་ལེན་ནའང་རེད། གང་ལྟར་སེམས་གདུལ་བ་ཞིག་བྱུང་ན་བདེ་སྐྱིད་ཡོང་གི་རེད། སེམས་མ་གདུལ་བ་ཞིག་བྱུང་ན་སྡུག་བསྔལ་ཡོང་གི་རེད། དེ་རིང་ཐུགས་རྗེ་ཆེན་པོའི་དབང་གི་དམིགས་ཡུལ་གཙོ་བ་དེ་རེད། ཅེས་གསུངས་སོང་།
གཏམ་བཟང་ཞིག་ཡོད་པ་ནི། བར་སྐབས་ངེད་ཚོ་ཚན་རིག་པ་ཚོའི་མཉམ་དུ་ཚོགས་འདུ་དང་བགྲོ་གླེང་ཚོགས་པའི་སྐབས་འགྲེལ་བཤད་གང་བརྒྱབ་སོང་ཟེར་ན། ཉམས་ཞིབ་རིམ་པས་བྱེད་ཡོང་སྐབས་མིའི་རང་བཞིན་ལྷན་སྐྱེས་ནི་སྙིང་རྗེའི་རང་བཞིན་ཅན་ཞིག་རེད་ཟེར་གྱི་འདུག དེ་གོ་ནས་ངེད་རང་ལ་སེམས་ཤུགས་ཧ་ཅང་སྐྱེས་སོང་། དངོས་གནས་མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེའི་རང་བཞིན་ཅན་ཞིག་ཡིན་ན། མིའི་བསམ་བློ་དེར་ཡག་པོ་བྱས་ནས་ལམ་སྟོན་བྱེད་ཐུབ་པ་ཡིན་ན། འཛམ་གླིང་འདི་བྱམས་བརྩེ་ཅན་གྱི་འཛམ་གླིང་ཞིག་བཟོ་ཐུབ་ཤག་རེད། མིའི་ལྷན་སྐྱེས་དེ་ཁོང་ཁྲོའི་རང་བཞིན་ཞིག་ཡིན་ན། བྱེད་ཐབས་གང་ཡང་ཡོད་པ་མ་རེད། དཔེར་ན། མེ་ཚ་བའི་རང་བཞིན་ཡིན་སྟབས་ག་དུས་ཡིན་ཡང་ཚ་བོར་སྡོད་རྒྱུ་ལས་བཟོ་བཅོས་བྱ་ཐབས་མེད། ཆུ་ཡི་རང་བཞིན་རླན་ཞིང་གཤེར་བ་ཞིག་ཡིན་སྟབས། དེའི་རང་བཞིན་འགྱུར་བ་འགྲོ་རྒྱུ་མེད། དེར་བརྟེན། མིའི་རང་བཞིན་དེ་ཁོང་ཁྲོའི་རང་བཞིན་ཞིག་ཡིན་ན་བྱེད་ཐབས་གང་ཡང་མེད། མིའི་རང་བཞིན་དེ་བྱམས་བརྩེ་རེད་ཅེས་པ་དེ་ཆོས་ཀྱི་ཐོག་ནས་བཤད་ཀྱི་ཡོད་པ་མ་རེད། དངོས་གནས་མཐོང་བ་མངོན་འགྱུར་གྱི་ཆོས་ལ་བརྟག་དཔྱད་བྱས་ཏེ། དེ་འདྲ་རྙེད་སོང་ཞེས་བཤད་ཀྱི་འདུག ཅེས་གསུངས་སོང་།
ཁོང་གིས། སྔོན་མ་བོད་གངས་ཅན་པའི་ལྗོངས་སུ་སངས་རྒྱས་པའི་བསྟན་པ་ཧ་ཅང་དར་ཡོད་པ་རེད་དེ། ཡིན་ནའང་མང་ཚོགས་ཀྱིས་ཆོས་ཀྱི་འགྲོ་སྟངས་ཤེས་ཀྱི་ཡོད་པ་མ་རེད་ལ། རྒྱུ་མཚན་ལའང་དོ་སྣང་དང་སློབ་སྦྱོང་བྱེད་ཀྱི་མེད་པར། དད་པ་རང་བྱས་ནས་འགྲོ་བསྡད་ཡོད་པ་རེད། དེ་སངས་རྒྱས་པའི་ཆོས་ངོ་མའི་སྒང་ལ་ཕལ་ཆེར་སླེབ་ཐུབ་ཀྱི་ཡོད་པ་མ་རེད་བསམ་གྱི་འདུག ཅེས་སོགས་གསུངས་སོང་།
གསར་འགོད་པ། ཉི་མ་ཚེ་རིང་དང་པདྨ་རྒྱལ།
འགྲོ་བ་མིའི་གཟུགས་པོའི་ལྷན་སྐྱེས་ཀྱི་གནས་སྟངས་དེ་ཨ་མའི་བརྩེ་བ་ལ་ལྟོས་ཚབས་ཤིན་ཏུ་ཆེན་པོ་ཡོད་པ་ཞིག་ཡིན། ཨ་མ་མེད་ན་རང་མགོ་མི་ཐོན་ཞིང་། ཨ་མའི་ངོས་ནས་བུ་ལ་བརྩེ་བ་མེད་ན་འོ་མ་མི་སྤྲོད་ལ། བུ་ཡི་ངོས་ནས་ཨ་མར་བརྩེ་བ་མེད་ན་འོ་མ་འཐུང་དུ་མི་འགྲོ་བས་འཆི་བ་ལས་འོས་མེད། དེས་ན་བརྩེ་བ་ནི་ཆོས་ཀྱི་བསླབ་བྱ་གཅིག་པུ་ཙམ་མིན་པ་ཞེས་སོགས་ཡང་ཡང་༧མགོན་པོ་གང་གིས་གསུངས།
ཕྱག་འཚལ་བ་དང་མཆོད་ཅིང་བཤགས་པ་དང་། རྗེས་སུ་ཡི་རངས་བསྐུལ་ཞིང་གསོལ་བ་ཡི། དགེ་བ་འདི་ཡིས་ངན་སོང་སྟོངས་གྱུར་ནས། ཐམས་ཅད་རྫོགས་པའི་བྱང་ཆུབ་ཕྱིར་བསྔོ་འོ། རང་རེ་ཚང་མས་རྒྱལ་བ་དགྱེས་པའི་ལས་ལ་བརྩོན་དགོས།