དུས་དབང་ཐེངས་ ༣༤ པའི་བྱུང་ཧིན་སྒོར་ས་ཡ་སུམ་བརྒྱ་ལྷག་ནས་ས་ཡ་ ༢༧༢ ལྷག་བཏང་རྗེས་ལྷག་མ་ཚང་མ་སྤྱི་ཚོཊ་བདེ་རྩར་གཏོང་རྒྱུ་རེད།

དུས་དབང་ཐེངས་ ༣༤ པའི་ཁྱོན་བསྡོམས་འགྲོ་སོང་གི་བརྒྱ་ཆ་ ༢༩ ལྷག་ཙམ་ཡོན་བདག་ཁག་གི་བསྡུ་འབབ་ཁོངས་ནས་བྱུང་བ་དང་། དེ་འཕྲོས་བརྒྱ་ཆ་ ༧༠ ལྷག་ཙམ་དད་ལྡན་ཆོས་ཞུ་བ་རྣམ་པའི་ཞལ་འདེབས་ལས་བྱུང་ཡོད་འདུག

དེ་རིང་སྔ་དྲོའི་ཆུ་ཚོད་ ༡༡ ཐོག་གངས་སྐྱིད་ལྷག་པ་ཚེ་རིང་ཚོགས་ཁང་དུ། དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་གོ་སྒྲིག་ཚོགས་ཆུང་ནས་དུས་དབང་གི་བྱུང་སོང་ལྷག་གསུམ་གྱི་མཐའ་བསྡོམས་རྩིས་ཁྲ་གསལ་བསྒྲགས་གནང་བ་ལྟར་ན། ཐེངས་འདིའི་དུས་དབང་སྐབས་ཁྱོན་ཧིན་སྒོར་༣༠༣,༦༤༡,༠༣༤(ས་ཡ་སུམ་བརྒྱ་གསུམ་དང་དྲུག་འབུམ་བཞི་ཁྲི་ཆིག་སྟོང་བརྒྱ་མེད་སུམ་ཅུ་སོ་བཞི)བྱུང་ཡོད་པ་དང་། འགྲོ་སོང་ཧིན་སྒོར་༢༧༢,༦༩༢,༥༩༩ (ས་ཡ་ཉིས་བརྒྱ་དོན་གཉིས་དང་དྲུག་འབུམ་དགུ་ཁྲི་ཉིས་སྟོང་ལྔ་བརྒྱ་དགུ་བཅུ་གོ་དགུ)བཏང་རྗེས། ཧིན་སྒོར་ ༣༠,༩༤༨,༤༣༥ (ས་ཡ་སུམ་ཅུ་དང་དགུ་འབུམ་བཞི་ཁྲི་བརྒྱད་སྟོང་བཞི་བརྒྱ་སུམ་ཅུ་སོ་ལྔ)་ལྷག་ཡོད་པ་རྣམས་དགའ་ལྡན་ཕོ་བྲང་ཡིག་ཚང་ནས་སྔོན་བསྩལ་རྩ་འཛིན་ལམ་སྟོན་ཇི་བཞིན་བཙན་བྱོལ་བོད་མིའི་སྤྱི་ཚོགས་ཀྱི་བདེ་རྩར་གཏང་སྟེ། ལྷག་བསྡད་ཀྱི་དངུལ་འབོར་ཀླད་ཀོར་བཟོས་གནང་ཡོད་འདུག དུས་དབང་ཐེངས་ ༣༤ པ་གཞུང་འབྲེལ་ཐོག་གོ་སྒྲིག་གནང་བ་ལྟར་བོད་མིའི་སྒྲིག་འཛུགས་ནས་འགྲོ་གྲོན་འཆར་རྩིས་འདང་ངེས་གནང་ཡོད་ཀྱང་། དུས་དབང་གི་ཁྱོན་བསྡོམས་ཀྱི་འགྲོ་སོང་གི་བརྒྱ་ཆ་ ༢༩ ལྷག་ཙམ་ཡོན་བདག་ཁག་གི་བསྡུ་འབབ་ཁོངས་ནས་བྱུང་བ་དང་། དེ་འཕྲོས་བརྒྱ་ཆ་ ༧༠ ལྷག་ཙམ་དད་ལྡན་ཆོས་ཞུ་བ་རྣམ་པའི་ཞལ་འདེབས་ལས་བྱུང་ཡོད་པར་བརྟེན། བོད་མིའི་སྒྲིག་འཛུགས་ནས་དུས་དབང་གོ་སྒྲིག་ཆེད་ས་གནས་གནད་ཡོད་མི་སྣར་ཆེད་བཅར་དང་།  ལས་བྱེད་ ༡༣༠ ལྷག་གིས་ཉིན་གྲངས་ ༢༠ ནས་ ༩༠ བར་གྲ་སྒྲིག་གནང་བར་འགྲོ་སོང་བཏང་བ་སོགས་མ་གཏོགས་དུས་དབང་གི་མཛད་རིམ་་ལ་འགྲོ་སོང་གཏོང་དགོས་ཁེལ་མི་འདུག

གསར་འགོད་ལྷན་ཚོགས་ཐོག་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ནས་དུས་དབང་གི་མཐའ་བསྡོམས་སྔོན་རྩིས་དང་འབྲེལ་བའི་གསལ་བཤད་ཁག་ཅིག་གནང་སྐབས། མཐའ་བསྡོམས་རྩིས་ཁྲ་གསལ་བསྒྲགས་ད་བར་འགོར་བའི་རྒྱུ་རྐྱེན་ནི། དངུལ་ཁང་བརྒྱུད་ཞལ་འདེབས་བྱུང་ཁག་ཅིག་གི་ཞིབ་གནས་རྩད་གཅོད་བྱ་རྒྱུ་དང་། ད་སྔོན་སོང་འཆར་གྱི་ངོ་བོར་ཡོད་པའི་འགྲོ་གྲོན་ཁག་ཅིག་གི་སོང་ཁྲ་ངོ་མ་རྒྱ་བལ་འབྲུག་གསུམ་གྱི་ས་གནས་སོ་སོ་ནས་འབྲེལ་ཡོད་ལས་ཁུངས་བརྒྱུད་འབུལ་འབྱོར་དགོས་པ་དངོས་འབྲེལ་རྒྱུ་མཚན་ཅི་རིགས་ལ་བརྟེན་ནས་ཕྲན་བུ་འབུལ་འགྱངས་བྱུང་བ། བྱུང་སོང་ཁ་འཐབ་ཀྱི་དངུལ་ལྷག་ཇི་ཐོན་ངེས་མཚམས་དགའ་ལྡན་ཕོ་བྲང་ཡིག་ཚང་ནས་སྔོན་བསྩལ་རྩ་འཛིན་ལམ་སྟོན་གྱི་འབྲུ་དོན་ལྟར་བཙན་བྱོལ་བོད་མིའི་སྤྱི་ཚོགས་བདེ་རྩ་ཁོ་ནར་སྨིན་གཏོང་གནང་ཕྱོགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸སྙན་གསེང་དང་འབྲེལ་ཐག་གཅོད་གཏན་འབེབས་གནང་དགོས་པའི་བརྒྱུད་རིམ་བཅས་ལ་བརྟེན་ནས་བྱུང་བ་དང་། དེ་བཞིན། གོང་གསལ་མཐའ་བསྡོམས་བྱུང་སོང་དངུལ་འབོར་དང་གསལ་བསྒྲགས་སྔ་མའི་ཚོད་རྩིས་བྱུང་སོང་དངུལ་འབོར་དབར་བར་ཁྱད་ཕྲན་བུ་ཕྱིན་ཡོད་པ་ནི། གསལ་བསྒྲགས་སྔ་མའི་ནང་གསེས་དངུལ་འབོར་ཁག་ཅིག་ཡོང་བསྡད་དང་སོང་འཆར་གྱི་ངོ་བོར་ཡོད་པ་དང་། ཕྱི་དངུལ་གྱི་ཛ་ཐང་ཐོག་མའི་ཚོད་རྩིས་ལྟར་མ་གནས་པ་བཅས་ཀྱི་དབང་གིས་བྱུང་ཡོད་སྐོར་སོགས་གསུངས་སོང་།

དགའ་ལྡན་ཕོ་བྲང་ཡིག་ཚང་ནས་སྔོན་བསྩལ་རྩ་འཛིན་ལམ་སྟོན་ཇི་བཞིན་དངུལ་དངུལ་ལྷག་ས་ཡ་ ༣༠ བརྒལ་བ་དེ་བཙན་བྱོལ་བོད་མིའི་སྤྱི་ཚོགས་ཀྱི་བདེ་རྩར་སྨིན་གཏོང་བགོ་འགྲེམས་གནང་གཏན་འཁེལ་བ།

བོད་བརྒྱུད་ནང་བསྟན་གྱི་རྟེན་གཞི་བྱེས་ཁྲོད་རིས་མེད་དགོན་སྡེ་ཁག་གི་དཔེ་འཁྲིད་དགེ་རྒན་དང་སློབ་གཉེར་བ་མང་པོ་མཆིན་པའི་གཉན་ཚད་ལ་བརྟེན་ནས་དུས་མིན་རྐྱེན་འདས་ཤོར་བའི་གནས་ཚུལ་ཐོན་དང་འཐོན་བཞིན་པ་སོགས་བཙན་བྱོལ་བོད་མིའི་སྤྱི་ཚོགས་ནང་མཆིན་པའི་གཉན་ཚད་སྔོན་འགོག་དང་སྨན་བཅོས་ཚད་ལྡན་ཐུབ་སླད་འཕྲོད་བསྟེན་ལས་ཁུངས་ནས་ཛ་དྲག་ལས་གཞི་སྤེལ་རྒྱུའི་མ་དངུལ་ཆེད་ཧིན་སྒོར་ ༡༠,༠༠༠,༠༠༠ (ས་ཡ་བཅུ་ཐམ་པ་) གནང་རྒྱུ།

ནང་སྲིད་ལས་ཁུངས་ཀྱི་གཟིགས་སྐྱོང་འོག་ཡོད་པའི་རྒས་གསོ་ཁང་རྣམས་ཀྱི་ནང་ཆས་གསར་བཟོའི་འགྲོ་སོང་ཆེད་འཆར་རྩིས་ཟུར་འབྱོར་ལྟར། ཧིན་སྒོར་ ༤,༩༨༠,༡༥༠ (ས་ཡ་བཞི་དང་དགུ་འབུམ་བརྒྱད་ཁྲི་སྟོང་མེད་བརྒྱ་དང་ལྔ་བཅུ་ཐམ་པ) གནང་རྒྱུ།

མ་སུ་རི་བོད་ཁྱིམ་སློབ་གྲྭའི་རོགས་ཚོགས་གཙོ་བོ་ sos ནས་གློ་བུར་སློབ་ཡོན་རོགས་དངུལ་གནང་མཚམས་བཞག་པ་ལ་བརྟེན་ནས་གཞི་རིམ་སློབ་ཐོན་པ་མང་པོར་མཐོ་རིམ་སློབ་ཡོན་སྤྲོད་དམིགས་མེད་པའི་ཛ་དྲག་དཀའ་ངལ་སེལ་སླད། ཧིན་སྒོར་ ༤,༠༠༠,༠༠༠ (ས་ཡ་བཞི་) གནང་རྒྱུ།

བཞུགས་སྒར་དུ་ལོ་ལྟར་ས་གནས་ཧིན་བོད་མཛའ་ཚོགས་སོགས་ས་གནས་ཡུལ་མིའི་ཚོགས་སྡེ་ཁག་ཅིག་ནས་ཧི་མཱ་ལ་ཡའི་དུས་སྟོན་ (Himalayan Festival) ཞེས་པ་གོ་སྒྲིག་གནང་བཞིན་ཡོད་པ་དེར་བོད་མིའི་སྒྲིག་འཛུགས་ནས་ཡུལ་མིར་མཐུན་འབྲེལ་དང་རིག་གཞུང་མཉམ་འབྲེལ་ལ་དམིགས་ཏེ་དུས་སྟོན་དེའི་འགྲོ་གྲོན་ཐོག་རོགས་སྐྱོར་གང་འཚམས་རེ་ནང་སྲིད་ལས་ཁུངས་བརྒྱུད་གནང་མུས་ཡིན་པ་དེའི་མ་དངུལ་ཆེད།    ཧིན་སྒོར་ ༢,༠༠༠,༠༠༠ (ས་ཡ་གཉིས་) ནང་སྲིད་ལས་ཁུངས་ལ་གནང་རྒྱུ།

ལྡེ་ར་ལྡུན་ཁྱབ་ཁོངས་རཱཇ་པུར་ལ་རྟེན་གཞི་བྱེད་པའི་མྱོས་རྫས་ངན་གོམས་བཅོས་ཐབས་ཁང་ཞི་བདེ་ཁང་གསར་ཞེས་པ་དེར་བོད་རིགས་ན་གཞོན་ཁག་ཅིག་ཡོད་པ་ཁོང་ཚོའི་འཚོ་གོས་གནས་སྟངས་ཧ་ཅང་ཞན་པོ་ཡོད་གནས་དངོས་སུ་ར་འཕྲོད་བྱུང་འདུག་པས། ཁོང་ཚོར་གྱོན་ཆས་གསར་ཉོ་སོགས་གཟིགས་རྟོག་ཇི་དགོས་ཆེད་འཕྲོད་བསྟེན་ལས་ཁུངས་བརྒྱུད་རོགས་སྐྱོར་ཧིན་སྒོར་ ༣༥༠,༠༠༠ (སུམ་འབུམ་ལྔ་ཁྲི་ཐམ་པ་) ཞི་བདེ་ཁང་གསར་ལ་གནང་རྒྱུ།

རྒྱ་གར་བྱང་རྒྱུད་གཞིས་ཆགས་ཆུང་ཁག་ཅིག་ཏུ་མང་ཚོགས་ནས་བསྟན་སྲིད་སྤྱི་རིམ་ཆེད་ལོ་ལྟར་ཆག་མེད་ མ་ཎི་དུང་སྒྲུབ་གསོག་སྒྲུབ་ཞུ་བཞིན་ཡོད་རུང་། དེ་ལྟར་བྱ་རྒྱུར་མཐུན་རྐྱེན་དང་འགྲོ་གྲོན་གྱི་དཀའ་ངལ་ཅི་ཆེ་ཡོད་གནས་དངོས་སུ་ར་འཕྲོད་བྱུང་འདུག་པས། མང་ཚོགས་ཁྲོད་ནས་གལ་ཆེའི་སྤྱི་རིམ་དེ་དག་མུ་མཐུད་རྒྱུན་སྐྱོང་ཐུབ་སླད། ཆོས་རིག་ལས་ཁུངས་བརྒྱུད་ཚོགས་སྡེ་དེ་དག་ལ་རོགས་དངུལ་ཧིན་སྒོར་ ༥༩༣,༨༤༠    (ལྔ་འབུམ་དགུ་ཁྲི་སུམ་སྟོང་བརྒྱད་བརྒྱ་བཞི་བཅུ་ཐམ་པ་) བགོ་འགྲེམས་གནང་རྒྱུ་ཡིན་འདུག

མཇུག་ཏུ་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་མཆོག་ནས་ཐེངས་   ༣༤ པའི་དུས་འཁོར་དབང་ཆེན་གྱི་སྦྱིན་བདག་གཙོ་བོ་དང་གོ་སྒྲིག་འགན་འཁུར་ཡོངས་རྫོགས་བོད་མིའི་སྒྲིག་འཛུགས་ནས་འཁུར་གནང་རྒྱུ་བྱས་པ་ལྟར། གོ་སྒྲིག་འགན་དབང་ཆ་ཚང་བོད་མིའི་སྒྲིག་འཛུགས་ཀྱི་འགན་འཛིན་བཀའ་ཤག་ཐོག་བབས་པ་ལྟར། དུས་དབང་གི་ལས་དོན་ཞུ་སྒོ་མཐའ་དག་ཁྲིམས་སྒྲིག་འགྲོ་ལུགས་དང་ཡོངས་སུ་མཐུན་ཞིང་། བྱ་སྤུ་གནོན་གྱི་གོ་རིམ་དང་ལྡན་པ། མང་ཚོགས་ཞབས་ཞུའི་ལས་དོན་རྣམས་ཀྱང་གནད་དུ་སྨིན་པ་བྱུང་ཡོད་ཅེས་དགའ་སྤྲོ་དང་སྤོབས་པ་ཆེན་པོས་ཞུ་བ་དང་ཆབས་གཅིག ཐེངས་ ༣༤ པའི་དུས་འཁོར་དབང་ཆེན་གྱི་གྲ་སྒྲིག་འགན་འཁུར་གནང་མཁན་དབུ་ལས་ཡོངས་དང་། ལྷག་པར་དངོས་སུ་ལས་དོན་འགན་འཁུར་གནང་མཁན་ཚོགས་ཆུང་ཁག་གི་འགན་འཛིན་དང་ལས་བྱེད་རྣམ་པ།  དང་བླངས་ཚོགས་སྡེ་ཁག་གི་འགོ་ལས་རྣམ་པ་བཅས་ཚང་མར་ལེགས་སོའི་བསྔགས་བརྗོད་དང་འབྲེལ་སྙིང་ཐག་པ་ནས་ཐུགས་རྗེ་ཆེ་ཞུ་ཡི་ཡོད་ཅེས་གསུངས་སོང་།

གསར་འགོད་པ། པདྨ་མཚོ།