རྔ་བ་ཁུལ་གྱི་རྫོང་ཁག་མང་པོའི་ནང་དྲག་ཆར་བསྟུད་མར་བབ་ཀྱི་ཡོད་པས་ཆུ་ལོག་དང་རི་ཉིལ་སོགས་ཀྱི་རང་བྱུང་དཀའ་ངལ་མང་པོ་ཡོང་བཞིན་འདུག
རྔ་བ་ཁུལ་བརྙན་འཕྲིན་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པ་བོད་ནང་གི་ཆུ་ཚོད་ ༧།༥༠ ཙམ་གྱི་ཐོག རྔ་བ་ཁུལ་ཁྱུང་མཆུ་རྫོང་ལྷ་རྒྱལ་གླིང་གྲོང་བརྡལ་གྱི་རི་ཉིལ་བྱུང་སྟེ་གཞུང་ལམ་རྦད་དེ་བཀག་ཡོད་པ་དང་། ས་གནས་སྲིད་གཞུང་གིས་གཞུང་ལམ་དེའི་བརྒྱུད་དུ་རི་ཉིལ་བའི་གནས་ཚུལ་མུ་མཐུད་བྱུང་གི་ཡོད་པས་གནས་སྐབས་རིང་འགྲུལ་བའི་འགྲོ་འོང་བཀག་ཡོད་སྐོར་བསྒྲགས་འདུག
དྲག་ཆར་མུ་མཐུད་བབ་ཀྱི་ཡོད་པས་རྐ་ཆུ་དང་རྨེ་ཆུ་ཆེན་པོ་རྒྱས་ནས་ཆུ་ལོག་བྱུང་དང་འབྱུང་བཞིན་ཡོད་སྟབས། ཉེ་འགྲམ་གྱི་གྲོང་ཚོ་དང་འབྲོག་སྡེ་རྣམས་ལ་སེམས་འཚབ་ཆེན་པོ་ཡོང་བཞིན་འདུག ཁྱུང་མཆུའི་འབྲོག་པ་གསང་བདག་གིས་རྐ་ཆུའི་ཉེ་འགྲམ་དུ་སྦྲ་གུར་ཕུབ་སྟེ་ཚོང་ཁང་ཞིག་སྒོ་ཕྱེས་ཡོད་པ་དང་། མདང་དགོང་མཚན་གུང་ཞིག་ལ་སྦྲ་གུར་ནང་ཆུ་ལོག་བྱུང་སྟེ་གློ་བུར་དུ་གཉིད་སད་པ་དང་། དེ་མ་ཐག་རྨོ་ལགས་འཁྲིད་ནས་ཕར་ཕྱོགས་ཀྱི་རི་ངོས་སུ་བྲོས་ཕྱིན་སྐོར་དང་། ཞོགས་པ་ནམ་ལངས་དུས་སྦྲ་གུར་ཆུས་ནུབ་ནས་ཚོང་རྫས་མང་ཆེ་བ་འཕྲོ་བརླག་ཏུ་ཕྱིན་ཡོད་པ་དང་། ཉེ་འགྲམ་གྱི་འབྲོག་ཁྱིམ་འགའ་ཤས་ལ་ཅ་དངོས་རྩ་ཆེན་མང་པོ་ཆུས་འཁུར་བ་དང་འཕྲོ་བརླག་ཏུ་ཕྱིན་ཡོད་སྟབས། ཁོའི་ཚོང་རྫས་ཙག་ཙིག་འཕྲོ་བརླག་ཏུ་ཕྱིན་པ་དེ་གྱོང་གུད་ཆུང་ཆུང་ཡིན་ལུགས་བརྗོད་བྱུང་།
བོད་ནང་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཉིན་གྲངས་མང་པོར་སི་ཁྲོན་རྔ་བ་ཁུལ་གྱི་རྫོང་ཁག་མང་པོའི་ནང་དྲག་ཆར་བསྟུད་མར་བབ་ཀྱི་ཡོད་པར་བརྟེན། རྔ་བ་རྫོང་དང་ཁྱུང་མཆུ་རྫོང་། མཛོད་དགེ་རྫོང་། ཟུང་ཆུ་རྫོང་། ཁྲོ་ཆུ་རྫོང་། ཝུན་ཁྲོན་རྫོང་བཅས་ཀྱི་ཡུལ་ཚོ་མང་པོའི་ནང་ཆུ་ལོག་བྱུང་སྟེ་ཁྱིམ་ཚང་གི་ཁང་པ་རྡིབ་པ་དང་། ཟམ་པ་ཆུས་འཁུར་བ། ཞིང་ས་ཆུས་ནུབ་པ་དང་། དེ་བཞིན་རི་ཉིལ་ཏེ་གཞུང་ལམ་བཅད་པ་སོགས་ཀྱི་དཀའ་ངལ་ཆེན་པོ་འཕྲད་བཞིན་ཡོད་འདུག
འབྱུང་བའི་གནོད་འཚེ་ཕོག་སའི་ས་ཁུལ་ཚང་མར་གདུང་སེམས་མཉམ་སྐྱེད་ཡོད་།