ཁ་སང་ཕྱི་ཚེས་ ༢༦ ཉིན་ཨ་རིའི་སྲིད་འཛིན་ཊོམ་ཕུ་མཆོག་ནས་ཐའེ་ཝན་གྱི་མནའ་འབྲེལ་སྲུང་སྐྱོབ་དང་ཕྱི་འབྲེལ་གོང་སྤེལ་གཏོང་ཐབས་ཀྱི་ཁྲིམས་འཆར་ལ་མཚན་རྟགས་བསྐྱོན་ཡོད་པར་བརྟེན་ཐའེ་ཝན་གཞུང་ནས་རང་དབང་དམངས་གཙོ་དར་སྤེལ་གཏོང་བར་མུ་མཐུད་མཉམ་འབྲེལ་བྱ་རྒྱུ་ཡིན་སྐོར་བརྗོད་འདུག
ཁྲིམས་འཆར་དེར་སྲིད་འཛིན་ཊོམ་ཕུ་མཆོག་ནས་མཚན་རྟགས་བསྐྱོན་རྗེས། ཨ་རིའི་གྲོས་ཚོགས་གོང་མའི་ནང་ཐའེ་ཝན་དང་འབྲེལ་བའི་ཁྲིམས་འཆར་དེ་ངོ་སྤྲོད་གནང་མཁན་གྲོས་ཚོགས་འཐུས་མི་ཁོ་རི་གྷར་ཌི་ནར་ (Cory Gardner) ལགས་ཀྱིས། རྒྱལ་སྤྱིའི་སྡིངས་ཆའི་ཐོག་ཨ་རི་གཞུང་གིས་ཐའེ་ཝན་གྱི་ལངས་ཕྱོགས་ལ་ཕྱོགས་གང་ཐད་ནས་རྒྱབ་སྐྱོར་བྱེད་དགོས་པ་དང་། ཨ་རིའི་ཁྲིམས་ཀྱི་དགོངས་དོན་འོག་ཐའེ་ཝན་དང་ཐའེ་ཝན་མི་མང་གི་ཚབ་ཞུས་ཏེ་མུ་མཐུད་ཞུ་རྩོད་བྱེད་ཀྱི་ཡིན་སྐོར། དེ་བཞིན་རྒྱལ་སྤྱིའི་སྡིངས་ཆའི་ཐོག་ཐའེ་ཝན་གྱིས་ཞབས་འདེགས་སྔར་ལྷག་བསྒྲུབ་ཆེད་ཐབས་ཤེས་གཞན་འཚོལ་ཐབས་བྱེད་ཀྱི་ཡིན་སྐོར་སོགས་བརྗོད་ཡོད་འདུག
དེ་བཞིན་གྲོས་འོག་མའི་ནང་ངོ་སྤྲོད་གནང་མཁན་གྲོས་ཚོགས་འཐུས་མི་ཇོན་ཁར་ཊའི་སི་ (John Curtis) ལགས་ཀྱིས། གྲོས་འཆར་ནང་རྒྱལ་ཁབ་གང་ཞིག་གིས་ཐའེ་ཝན་ལ་སྣང་ཆུང་བྱས་ཏེ་ཚབས་ཆེན་གྱི་བྱ་འགུལ་བརྩམས་ཚེ་ཨ་རིའི་ངོས་ནས་རྒྱལ་ཁབ་དེའི་དཔལ་འབྱོར་དང་བདེ་སྲུང་། ཕྱི་སྲིད་བཅས་ཀྱི་ཐོག་ནས་བརྡ་ལན་སྤྲོད་དགོས་པ་འཁོད་ཡོད་པ་རེད། དེ་ནི་ང་ཚོས་བཅར་འདྲི་ཞིག་གི་སྐབས་བཤད་པ་ཁོ་ན་མིན་པར་དངོས་སུ་ཨ་རིའི་ཁྲིམས་ལ་གཏན་འབེབ་བྱས་ཡོད་པས་ཨ་རིའི་ངོས་ནས་བརྡ་ལན་ཤུགས་ཆེན་ཞིག་གཏོང་གི་ཡོད་པ་རེད། ཅེས་ཁྲིམས་འཆར་དེ་ནི་ཨ་རིའི་ཐའེ་ཝན་ལ་རྒྱབ་སྐྱོར་མཚོན་བྱེད་ཆེན་པོ་ཞིག་ཡིན་པ་བརྗོད་འདུག
དེ་རིང་ཕྱི་ཚེས་ ༢༧ ཉིན་ཐའེ་ཝན་ཕྱི་སྲིད་ལྷན་ཁང་གིས་ཨ་རིའི་སྲིད་འཛིན་མཆོག་ནས་ཐའེ་ཝན་དང་འབྲེལ་བའི་རྒྱབ་སྐྱོར་ཁྲིམས་འཆར་ལ་མཚན་རྟགས་བསྐྱོན་གནང་བར་ཐུགས་རྗེ་ཆེ་ཞུས་འདུག་ལ། ཐའེ་ཝན་ཕྱོགས་ནས་ཨ་རི་དང་མཉམ་དུ་དམངས་གཙོ་དང་རང་དབང་དར་སྤེལ་ཐད་མུ་མཐུད་མཉམ་འབྲེལ་བྱ་རྒྱུ་ཡིན་སྐོར་བརྗོད་འདུག
འདས་པའི་ལོ་ཤས་རིང་རྒྱ་ནག་གཞུང་གིས་རྒྱལ་སྤྱིའི་ཐོག་ཐའེ་ཝན་གྱི་མནའ་འབྲེལ་རྒྱལ་ཁབ་ཁག་ལ་གནོན་ཤུགས་སྤྲོད་ཀྱི་ཡོད་པར་བརྟེན། ཨ་རི་གཞུང་གིས་དེར་གདོང་ལེན་དང་ཐའེ་ཝན་ལ་རྒྱབ་སྐྱོར་བྱ་ཆེད་གྲོས་གཞི་བཏོན་པ་ཞིག་ཡིན་པ་དང་། གྲོས་ཆོད་ནང་ཨ་རིའི་གཞུང་གིས་རྒྱ་གར་ཞི་བདེ་རྒྱ་མཚོ་ཁུལ་གྱི་རྒྱལ་ཁབ་ཁག་དང་འཛམ་གླིང་ཁྱོན་ཡོངས་ཀྱི་རྒྱལ་ཁབ་ཁག་ལ་ཐའེ་ཝན་གཞུང་གིས་ཕྱི་སྲིད་འབྲེལ་བ་འཛུགས་པར་རྒྱབ་སྐྱོར་བྱེད་པ་དང་། ཐའེ་ཝན་གྱི་བདེ་སྲུང་དང་འཕེལ་རྒྱས་ལ་སྣང་ཆུང་བྱས་ཏེ་ཚབས་ཆེན་གྱི་བྱ་འགུལ་བརྩམ་ཚེ་ཨ་རིའི་ངོས་ནས་རྒྱལ་ཁབ་དེའི་དཔལ་འབྱོར་དང་བདེ་སྲུང་། ཕྱི་སྲིད་བཅས་ཀྱི་ཐོག་ནས་བརྡ་ལན་སྤྲོད་པ། དེ་བཞིན་གྲོས་གཞི་དེ་གཏན་ལ་ཕབ་ཉིན་ནས་ལོ་ལྔའི་རིང་། ཨ་རིའི་ཕྱི་སྲིད་དྲུང་ཆེ་ལགས་ནས་ལོ་རེར་ཐའེ་ཝན་གྱི་ཕྱི་འབྲེལ་གྱི་གནད་དོན་ཐོག་ཨ་རིའི་གྲོས་ཚོགས་ནང་སྙན་ཐོ་འབུལ་དགོས་པ་སོགས་བཀོད་ཡོད་པ་རེད།
ཕྱི་ལོ་ ༢༠༡༦ ལོར་ཐའེ་ཝན་ནང་ལྕམ་ཚའེ་ཡེན་ཝིན་མཆོག་གིས་སྲིད་འཛིན་གྱི་ལས་ཁུར་ཞུས་པ་ནས་བཟུང་། པ་ན་མ་ (Panama) དང་ཨེལ་སལ་ཝོ་ཌོར་ (El Salvador) ། སོ་ལོ་མོན་ (Solomon Islands) སོགས་གླིང་ཕྲན་རྒྱལ་ཁབ་ ༧ གྱིས་རིམ་པ་བཞིན་ཕྱི་འབྲེལ་སྲིད་བྱུས་རྒྱ་ནག་ལ་ཁ་ཕྱོགས་བསྒྱུར་ཡོད་སྟབས། ཐའེ་ཝན་གྱིས་ཡུན་རིང་ཕྱི་འབྲེལ་སྲིད་བྱུས་དམ་པོ་ཡོད་པའི་རྒྱལ་ཁབ་ཁག་ཅིག་རྒྱ་ནག་ཕྱོགས་སུ་ཤོར་ཡོད་ལ། ད་ལྟ་ཐའེ་ཝན་གླིང་ཕྲན་དང་ཕྱི་འབྲེལ་ཡོད་མཁན་རྒྱལ་ཁབ་ ༡༥ ལས་ལྷག་མེད་པ་རེད།
གསར་འགོད་པ། ཀླུ་མགོན་ཐར།
