ཏོག་དབྱིབས་ནད་ཡམས་ཀྱིས་དམར་ཤོག་ཚོགས་པར་ནང་འཁྲུག་བསླངས་བ།

 རྒྱ་ནག་ནང་ཏོག་དབྱིབས་ནད་ཡམས་སྟངས་འཛིན་དང་འབྲེལ་ནས་རྒྱ་ནག་དམར་ཤོག་ཚོགས་པའི་མགོ་ཁྲིད་ཚོའི་བར་དབང་ཆ་འཐབ་རྩོད་ཤུགས་ཆེ་རུ་འགྲོ་བཞིན་ཡོད་པའི་ཚོད་དཔག་བྱེད་ཀྱི་ཡོད་འདུག

ཟླ་འདིའི་ཕྱི་ཚེས་ ༨ ཉིན་པེ་ཅིན་གྱི་ས་ཁང་ཚོང་བསྒྱུར་བ་རིན་ཀྲི་ཆིང་ (Ren Zhiqiang)གིས་སྒེར་གྱི་སྤྱི་ཚོགས་དྲ་ལམ་པོད་འཕྲིན་སྟེང་། ཞི་ཅིན་ཕིན་ནི་དབང་ཆ་ལ་རྔམ་མཁན་ཞིག་ཡིན་པ་དང་། རྒྱ་ནག་ནང་ཏོག་དབྱིབས་ནད་ཡམས་བྱུང་སྐབས་དམར་ཤོག་ཚོགས་པས་སྨྲ་བརྗོད་རང་དབང་ཚོད་འཛིན་བྱས་པ་ལ་བརྟེན་ཁྱབ་བརྡལ་ཤུགས་ཆེ་རུ་ཕྱིན་ཏེ། ད་ལྟ་འཛམ་གླིང་ཡོངས་ཛ་དྲག་ཅན་ཏུ་བསྒྱུར་པ་སོགས་ཞི་ཅིན་ཕིན་དང་དམར་ཤོག་ཚོགས་པར་སྐྱོན་བརྗོད་བྱས་པའི་རྩོམ་ཡིག་ཅིག་བྲིས་པར་བརྟེན། ཟླ་འདིའི་ཕྱི་ཚེས་ ༡༢ ཉིན་ཁོང་གར་སོང་ཆ་མེད་དུ་གྱུར་ཡོད་པ་རེད་ལ། རྒྱ་ནག་གཞུང་གིས་རྩོམ་ཡིག་དེ་དྲ་ཐོག་ནས་ནག་བསུབ་བཏང་ཡོད་པ་རེད།

ཁོང་གི་གྲོགས་པོ་ཚོས་བརྗོད་པ་ལྟར་ན། རྒྱ་ནག་གཞུང་གིས་ཁོང་འཛིན་བཟུང་བྱས་ཡོད་པ་དང་། རྒྱ་ནག་ཕྱི་ནང་གཉིས་ཀྱི་དམངས་གཙོ་དོན་གཉེར་བ་དང་རང་དབང་འཐབ་རྩོད་པ། ལས་འགུལ་བ་སོགས་ཀྱིས་རྒྱ་ནག་གཞུང་གི་བྱེད་སྟངས་དེ་ལ་སྐྱོན་བརྗོད་ཤུགས་ཆེན་བྱས་དང་བྱེད་བཞིན་ཡོད་པ་དང་། དེར་མཐུད་ཞི་ཅིན་ཕིན་གྱིས་རྒྱ་ནག་གཞུང་འཛིན་ནང་བཅོས་བསྒྱུར་བྱེད་དགོས་པའི་ཞུ་ཡིག་ཅིག་ལ་རྒྱ་ནག་གི་ཚོང་གཉེར་བ་དང་རྒས་ཡོལ་ཞུས་པའི་མཐོ་རིམ་དཔོན་རིགས་ཁག་ཅིག་གིས་མིང་རྟགས་བཀོད་དེ་རྒྱབ་སྐྱོར་བྱས་ཡོད་པ་དང་། ཡི་གེ་དེ་ཕྱི་སྡོད་རྒྱ་རིགས་དམངས་གཙོ་དོན་གཉེར་བ་ཚོས་དྲ་ཐོག་ཏུ་བརྒྱུད་བསྐུར་ཤུགས་ཆེན་བྱུང་ཡོད་པ་རེད།

ཟླ་འདིའི་ཕྱི་ཚེས་ ༢༡ ཉིན་རྒྱ་རིགས་ཕྱུག་བདག་ཁྲིན་ཕིན (Chen Ping) གྱིས་སྒེར་གྱི་སྐད་འཕྲིན་ནང་མིང་བཀོད་མེད་པའི་རྩོམ་ཡིག་ཅིག་སྤེལ་བའི་ནང་། རྒྱ་ནག་གཞུང་ནི་ཁྲིམས་མེད་ལུགས་མེད་ཡིན་པ་དང་། སྨྲ་བརྗོད་རང་དབང་དང་གསར་འགོད་རང་དབང་མེད་པ། ཐའེ་ཝན་དང་ཧོང་ཀོང་ནང་གཉའ་གནོན་གྱི་སྲིད་བྱུས་འཛིན་པ་ལ་བརྟེན། མི་མང་རྣམས་ད་ལྟའི་དམར་ཤོག་ཚོགས་པར་འདོད་བློ་ཁེངས་ཀྱི་མེད་སྐོར་དང་། ཆེས་མཐོའི་དཔོན་རིིགས་ཀྱི་ཚོགས་འདུ་ཞིག་བསྡུས་ཏེ་ཞི་ཅིན་ཕིན་གྱིས་མུ་མཐུད་རྒྱ་ནག་གི་སྲིད་འཛིན་བྱས་ཚེ་འོས་མིན་ཐད་གྲོས་མོལ་བྱེད་དགོས་སྐོར་སོགས་བྲིས་ཡོད་འདུག

དེ་བཞིན་ཟླ་འདིའི་ཕྱི་ཚེས་ ༢༦ ཉིན་རྒྱ་ནག་གི་ལས་འགུལ་བ་ཡས་ཅན་ཕེའོ་ཁྲིན་(Yijian Piaochen) གྱིས་ཊུ་ཝེ་ཊར་སྤྱི་ཚོགས་དྲ་ལམ་ཐོག་དགོས་འདུན་དོན་ཚན་  ༩ ཅན་གྱི་ཞུ་ཡིག་ཞིག་སྤེལ་ཡོད་པའི་ནང་། རྒྱ་ནག་གཞུང་ལ་བཅོས་བསྒྱུར་གཏོང་དགོས་པ་དང་། འོས་བསྡུའི་ལམ་ལུགས་དགོས་པ་དང་། སྒེར་གཉེར་ཚོང་ལས་ལ་གཞུང་གཉེར་ཚོང་ལས་ལྟར་གཅིག་མཚུངས་ཀྱི་ཁེ་དབང་དགོས་པ་དང་། ཚོང་གཉེར་བའི་རྒྱུ་དངོས་ལ་སྲུང་སྐྱོབ་དགོས་པ་དང་། ཏོག་དབྱིབས་ནད་ཡམས་ཀྱི་གནོད་སྐྱོན་ཐེབས་པ་ལ་རོགས་དངུལ་དགོས་པ་དང་། ཝུ་ཧན་དང་རྒྱལ་ཡོངས་འཕྲོད་བསྟེན་ཚན་པའི་ལས་བྱེད་ལ་རིམས་ནད་སྐབས་ལས་འགན་སྒྲུབ་རྒྱུར་བསྐུལ་བ་དང་། ཝུ་ཧན་ནང་རིམས་ནད་ཁྲོད་རྐྱེན་འདས་སུ་ཕྱིན་པའི་སྨན་པ་ལི་ཝིན་ཉིང་(Li Wenliang) གི་གནད་དོན་ལ་བསྐྱར་ཞིབ་བྱེད་པ་སོགས་བཀོད་ཡོད་འདུག་ལ། ཞུ་ཡིག་དེར་རྒྱ་རིགས་ཚོང་གཉེར་བ་ ༥༠ ཙམ་གྱིས་རྒྱབ་སྐྱོར་མིང་རྟགས་བཀོད་ཡོད་ནའང་ཁོང་ཚོའི་བདེ་འཇགས་ཆེད་མིང་རྟགས་ཕྱིར་བསྒྲགས་བྱས་མེད་སྐོར་བརྗོད་འདུག

ཡང་ཕྱི་ཚེས་ ༢༦ ཉིན་རྒྱ་རིགས་ལས་འགུལ་བ་ལེའུ་ཏིན་ (Laodeng) གྱིས་ཊུའུ་ཝེ་ཊར་སྤྱི་ཚོགས་དྲ་ལམ་དུ་ཞི་ཅིན་ཕིན་གྱི་མིང་ཐོག་ཏུ་བྲིས་པའི་རྒྱ་ནག་གཞུང་འཛིན་ལ་བཅོས་བསྒྱུར་དགོས་པའི་ཞུ་ཡིག་ཞིག་བཀོད་ཡོད་པ་དང་། དེ་དག་ནི་རྒྱ་ནག་གི་ཆབ་སྲིད་ལམ་སྟོན་ཚན་པའི་ཚོགས་གཙོ་ཟུར་བ་ལི་རེ་ཧན་ (Li Ruihuan) དང་། སྲིད་བློན་ཟུར་པ་ཝིན་ཅཱ་པའོ་ (Wen Jiabao)། སྲིད་བློན་གཞོན་པ་ཟུར་པ་ལི་ལན་ཆིན་ (Li Lanqing)། རྒྱ་ནག་དམར་ཤོག་ཚོགས་པའི་དྲུང་ལས་ཁང་གི་དྲུང་ཡིག་ཟུར་པ་ཧུ་ཆི་ལི་ (Hu Qili)། སྲིད་བློན་གཞོན་པ་ཟུར་པ་ཐེན་ཇི་ཡན་ (Tian Jiyun) བཅས་རྒྱ་ནག་གི་ཆེས་མཐོའི་དཔོན་རིགས་ཟུར་པ་ལྔ་ཡིས་མིང་རྟགས་བཀོད་ཡོད་པ་བརྗོད་ཡོད་པ་རེད།

སྤྱི་ཚོགས་དྲ་ལམ་གྱི་ཁ་གསལ་མེད་པའི་ཞུ་ཡིག་དེ་དག་རྒྱ་ནག་གི་སྲིད་འཛིན་ཞི་ཅིན་ཕིན་གྱི་ལག་ཏུ་འབྱོར་ཡོད་མེད་ཤེས་ཀྱི་མེད་ནའང་། ཨ་རིར་གནས་སྡོད་བྱེད་པའི་རྒྱ་རིགས་གནད་དོན་དབྱེ་ཞིབ་པ་ཐང་ཇིན་ཡན (Tang Jinyuan) གྱིས། རྒྱ་ནག་གི་དཔོན་རིགས་ཚོའི་ཁྲོད་ཞི་ཅིན་ཕིན་གྱི་མགོ་ཁྲིད་ལ་འདོད་བློ་ཁེངས་ཀྱི་མེད་པའི་སྐད་ཆ་ཞིག་ཡོང་གི་ཡོིད་པ་དེ་ཡིས་ད་ལྟའི་ནད་ཡམས་འདི་ལ་བརྟེན། རྒྱ་ནག་གི་དམར་ཤོག་དཔོན་རིགས་ཚོའི་ཁྲོད་དུ་དབང་ཆ་འཐབ་རྩོད་ཞིག་འགྲོ་བཞིན་ཡོད་པ་མཚོན་གྱི་ཡོད་སྐོར་དང་། དཔོན་རིགས་ཁག་ཅིག་གིས་ནད་ཡམས་འདི་ལ་བརྟེན་ནས་རྒྱ་ནག་གི་སྤྱི་ཚོགས་ནང་རྙོག་འཛིང་འབྱུང་སྲིད་པའི་ཚོད་དཔག་བྱེད་ཀྱི་ཡོད་པ་དང་། དེའི་ནག་ཉེས་དཔོན་རིགས་གཞན་ལ་གཡོགས་འདོད་བྱེད་ཀྱི་ཡོད་པ་མཚོན་གྱི་ཡོད་སྐོར་བརྗོད་འདུག

གནས་ཚུལ་བསྡུ་སྒྲིག་པ། ཀླུ་མགོན་ཐར།