ཕྱི་ལོ་ ༢༠༢༠ ལོའི་སེམས་གུ་ཡངས་ཀྱི་གཟེངས་རྟཊ་ལྕམ་ནན་སི་པོ་ལོ་སི་མཆོག་ལ་ཕུལ་འདུག

འདི་ལོའི་སེམས་གུ་ཡངས་ཀྱི་གཟེངས་རྟཊ་འོས་གཞིའི་ཁོངས་ཨ་རིའི་གྲོས་ཚོགས་འོག་མའི་ཚོཊ་གཙོ་ལྕམ་ནན་སི་པོ་ལོ་སི་མཆོག་གི་དབུས་པའི་གྲོས་ཚོགས་འཐུས་མི་ཇིམ་མེག་གྷ་ཝན་མཆོག་དང་ཁོར་ཡུག་ལས་འགུལ་བ་བུ་མོ་གྷེ་རེ་ཊ་ཐན་བྷག་ལགས་བཅས་འདུགདེ་རིང་ཕྱི་ཚེས་ ༢༥ ཉིན་གྱི་སྔ་དྲོའི་ཆུ་ཚོད་ ༡༡ སྟེང་བཞུགས་སྒར་དྷ་སའི་ནོར་བུ་གསོལ་མགྲོན་ཁང་དུ། བོད་ཀྱི་མཛངས་མའི་འགྲན་བསྡུར་གྱི་གཙོ་གཉེར་བ་བློ་བཟང་དབང་རྒྱལ་ལགས་ཀྱིས་གསར་འགོད་ལྷན་ཚོགས་ཤིག་བསྐོངས་ཏེ། ཕྱི་ལོ་ ༢༠༢༠ ལོའི་སེམས་གུ་ཡངས་ཀྱི་གཟེངས་རྟགས་ (Free Spirit Award) དེ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་པི་ལོ་སི་ (Nancy Pelosi) མཆོག་ལ་ཕུལ་བ་གསལ་བསྒྲགས་གནང་སོང་།

དེ་ཡང་ཐོག་མར་གཟེངས་རྟགས་དེ་ལྕམ་སྐུ་ནན་སི་པི་ལོ་སི་ (Nancy Pelosi) མཆོག་ལ་འབུལ་དགོས་པའི་རྒྱུ་མཚན་སྐོར་ལ་བློ་བཟང་དབང་རྒྱལ་ལགས་ཀྱིས། ལྕམ་ནན་སི་པོལ་སི་མཆོག་ནི་འཛམ་གླིང་གི་ས་གནས་གང་སར་འགྲོ་བ་མིའི་ཐོབ་ཐང་རྡོག་རོལ་གཏོང་བ་དང་ཁོར་ཡུག་ཉམས་རྒུད་དུ་འགྲོ་བཞིན་པ། དེ་བཞིན་སྤྱི་ཚོགས་བདེ་འཇགས་སོགས་ཀྱི་གནད་དོན་ཐད་བཀའ་མོལ་ཤུགས་ཆེན་གསུང་མཁན་ཞིག་ཡིན་སྐོར་དང་། བོད་དོན་ཐོག་དམིགས་བསལ་གྱིས་ཐུགས་འགན་བཞེས་ཏེ་ལོ་ངོ་མང་པོའི་རིང་རྒྱབ་སྐྱོར་ཤུགས་ཆེན་གནང་ཡོད་པ་དང་། ཨ་རིའི་ཆབ་སྲིད་པ་དྷ་སར་ཕེབས་ཏེ་བོད་དོན་ཐོག་རྒྱབ་སྐྱོར་གྱི་རྣམ་པ་སྟོན་མཁན་ཤུགས་ཆེ་ཤོས་དེ་ཁོང་ཆགས་ཡོད་པ་མ་ཟད། ཕྱི་ལོ་ ༢༠༠༨ ལོར་བོད་ནང་ཛ་དྲག་གི་གནས་སྟངས་ཆགས་སྐབས་དང་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་ཤུགས་ཆེན་གཏོང་བཞིན་པར་ངོ་རྒོལ་གྱི་རྣམ་པ་སྟོན་ཆེད་དང་། ཕྱི་ལོ་ ༢༠༡༧ ལོར་བསྐྱར་དུ་བོད་དོན་ལ་རྒྱབ་སྐྱོར་གྱི་རྣམ་པ་སྟོན་ཆེད་ཁོང་མོ་དྷ་སར་ཐེངས་གཉིས་རིང་ཕེབས་ཡོད་སྐོར། དེ་བཞིན་ཡུ་གུར་དང་ཧོང་ཀོང་གི་གནས་སྟངས་ཐད་གླེང་སློང་བྱེད་ཀྱི་ཡོད་པ་སོགས་ལ་བརྟེན་ནས། ཐེངས་འདིའི་སེམས་གུ་ཡངས་ཀྱི་གཟེངས་རྟགས་དེ་བཞིན་ལྕམ་སྐུ་ནན་སི་པི་ལི་སི་མཆོག་ལ་ཕུལ་གྱི་ཡོད་སྐོར་བརྗོད་སོང་།

ཡང་གཟེངས་རྟགས་ཕུལ་སྟངས་དང་གཟེངས་རྟགས་ཀྱི་འོས་གཞིའི་ཁོངས་འོས་མི་ག་ཚོད་ཅིག་ཡོད་མེད་སྐོར་ལ་ཁོས། སེམས་གུ་ཡངས་ཀྱི་གཟེངས་རྟགས་སུ་ངོས་འཛིན་ཕྱག་ཁྱེར་ཞིག་དང་ཁ་བཏགས་ཤིག་ཡོད་པ་ལས་ཕྱག་ཁྱེར་དེ་ (PDF) ལ་བསྒྱུར་ཏེ་དྲ་ལམ་བརྒྱུད་ལྕམ་སྐུ་མཆོག་ལ་གཏོང་རྒྱུ་ཡིན་པ་དང་། ཁ་བཏགས་དྲ་ལམ་ནས་གཏོང་ཐབས་མེད་སྟབས་སྤྱན་འབུལ་ཞུས་ཏེ་སེམས་གཏིང་ནས་ཁོང་མོར་ནད་མེད་ཚེ་རིང་དང་། ཕྱག་ལས་ཐ་དག་ལམ་ལྷོང་ཡོང་བའི་སྨོན་འདུན་ཞུ་ཡི་ཡོད་སྐོར་དང་། ཐེངས་འདིའི་གཟེངས་རྟགས་ཀྱི་འོས་གཞིའི་ཁོངས་སུ་ཨ་རིའི་གྲོས་ཚོགས་ནང་བོད་དོན་གྲོས་འཆར་གལ་ཆེན་ཁག་ཅིག་འདོན་གནང་མཁན་གྲོས་ཚོགས་འཐུས་མི་སྐུ་ཞབས་ཇིམ་མེག་གྷ་ཝན་ (Jim McGovern) ལགས་དང་། རང་ལོ་ ༡༧ ཡིན་པའི་སི་ཝེ་ཌན་ (Sweden) རྒྱལ་ཁབ་ཀྱི་ཁོར་ཡུག་ལས་འགུལ་བ་བུ་མོ་གྷེ་རེ་ཊ་ཐན་བྷག་ (Greta Thunberg) ལགས་བཅས་ཡོད་སྐོར་སོགས་འགྲེལ་བརྗོད་གནང་སོང་།བློ་བཟང་དབང་རྒྱལ་ལགས་ཀྱིས་ཕྱི་ལོ་ ༢༠༠༣ ནས་བཟུང་ལོ་ལྟར་སྤྱི་ཚོགས་ནང་གཟེངས་སུ་ཐོན་ཏེ་ཕྱག་ལས་སྣ་ཚོགས་གནང་མཁན་རྣམས་ལ་སེམས་གུ་ཡངས་ཀྱི་གཟེངས་རྟགས་ཞེས་པ་ཞིག་ཆེ་བསྟོད་དང་ངོས་འཛིན་བྱ་ཆེད་འབུལ་གྱི་ཡོད་པ་དང་། ཕྱི་ལོ་ ༢༠༡༩ ལོའི་སེམས་གུ་ཡངས་ཀྱི་གཟེངས་རྟགས་ (Free Spirit Award) དེ་འཛམ་གླིང་ཡུ་གུར་མི་རིགས་མཐུན་ཚོགས་ཀྱི་ཚོགས་གཙོ་ཟུར་པ་ལྕམ་རཱ་བྷི་ཡ་ཁ་ཏིར་ (Rabiya Kadeer) ལགས་ལ་ཕུལ་ཡོད་པ་རེད།

དེ་བཞིན་བློ་བཟང་དབང་རྒྱལ་ལགས་ཀྱིས་སེམས་གུ་ཡངས་ཀྱི་གློག་བརྙན་གཟེངས་རྟགས་དང་། བོད་ཀྱི་རོལ་དབྱངས་གཟེངས་རྟགས། ཧི་མ་ལ་ཡའི་མཛངས་མའི་གཟེངས་རྟགས་སོགས་གོ་སྒྲིག་ཞུ་བཞིན་ཡོད་པའི་ཁྲོད། ཕྱི་ལོ་ ༢༠༠༢ ལོར་མགོ་འཛུགས་བྱས་པའི་བོད་ཀྱི་མཛངས་མའི་འགྲན་བསྡུར་ནི་གྲགས་ཆེ་ཤོས་གྲས་ཤིག་ཡིན་པ་རེད་ལ། བོད་ཀྱི་མཛངས་མའི་སྡིངས་ཆབརྒྱུད་ད་བར་ཁྱོན་བོད་ཀྱི་མཛངས་མ་ ༡༦ བདམས་ཐོན་བྱུང་ཡོད་པ་དང་། དེའི་ནང་ནས་བུད་མེད་ཁག་ཅིག་རྒྱལ་སྤྱིའི་སྡིངས་ཆ་གང་འཚམ་ཞིག་གི་ནང་མཉམ་ཞུགས་བྱེད་པའི་གོ་སྐབས་རག་ཡོད་པ་མ་ཟད། བོད་ཀྱི་མཛངས་མའི་མིང་ཐོག་ནས་བོད་དོན་དྲིལ་བསྒྲགས་སོགས་ཀྱང་བྱས་ཡོད་པར་བརྟེན། རྒྱ་ནག་གཞུང་གིས་བོད་ཀྱི་མཛངས་མ་དང་རྒྱལ་སྤྱིའི་མཛངས་མའི་འགྲན་བསྡུར་གོ་སྒྲིག་པ་སོགས་ལ་གནོན་ཤུགས་སྤྲད་པའི་གནས་ཚུལ་ཡང་བྱུང་ཡོད་པ་རེད།

འོན་ཀྱང་། ཕྱི་ལོ་ ༢༠༡༩ ལོའི་བོད་ཀྱི་མཛངས་མའི་འགྲན་བསྡུར་ནང་བུད་མེད་གཅིག་གིས་ཀྱང་མཉམ་ཞུགས་བྱས་མེད་སྟབས་འགྲན་བསྡུར་ཕྱིར་འཐེན་བྱས་ཡོད་པ་དང་། འདི་ལོའི་ལོ་མགོ་ནས་བཟུང་རྒྱ་ནག་མཆེད་པའི་ཏོག་དབྱིབས་གཉན་རིམས་འཛམ་གླིང་གང་སར་ཁྱབ་པར་བརྟེན། ཕྱི་ལོ་ ༢༠༢༠ ལོའི་བོད་ཀྱི་མཛངས་མའི་འགྲན་བསྡུར་དེ་བཞིན་འཚོགས་ཐུབ་མེད་པ་རེད།

གསར་འགོད་པ། ཀླུ་མགོན་ཐར།